Dahil Ginagabi Ako ng Uwi

Pagpasok sa tarangkahan, dinig ko ang boses mula sa ikalawang palapag, Kumain ka na? Mababaw ang tulog ng aking ina. Umakyat ako sa kanyang kuwarto at inilapag sa mesita ang paborito niyang bola-bola. Kinabukasan, malamig na ang aking pasalubong ngunit kinain niya pa rin. Kumurot ako ng kaunti at saka nagpaalam. Hinalikan niya ako sa noo sabay sinabing hihintayin kita anak, at huwag ka sana magpapagabi