Vol.

XIV :

Issue No. 34

19th August 2012

Pathianni

Phek 1 - na

Lehkhathawn
Rawngbawlpui duhtak te, Cambodia atangin kan Lal Isua Krista hmingin chibai ka buk a che u. Kohhran hote hnena report pe theia a min siamtu Pathian leh Kohhran leh mimal min tawngtaisaktute hnenah lawmthu ka sawi hmasa a ni. May thla kan Kohhran atangin baptisma chang thar pahnih kan nei a, kan lawm hle. Kan Pastor te hi ordained an nih loh avangin Cambodia a Bible zirna pakhat dintu Korean Presbyterian Pastor, Rev. Ezra Kim-an baptisma hi a chantir a. Anni rual hian kan thenawm Kohhran atangin mi panga laiin an chang ve bawk. An zinga pakhat, Buddhist puithiamten thlarau sual laka venhimnana a kawnga hrui an hrensak pawk Rev. Kim hian Pathian hmingin a phelhsak nghal a ni. Mizoram Synod tirhin June 15 khan Rev. Sairengpuia a lo thleng chho va, kan phuisui phah hle. Kan Kohhranah pawh vawihnih lai thu a rawn sawi tawh a, Mizo awmhote pawh min ho khawm tha hle. A rawn thlen tirh khan visa thla khat daih chauh an pe a, business visa kum khat daih dilin Vietnam-ah a kal a, an lo pe duh lo va. Mahse, helaia a thian chhar thar hmangin Pathianin kar hmasa mai khan a pe a, kan lawm hle. July 21 Inrinni hmang khan kan Kohhran awmna khua Kdan Royah-ah Volleyball Tournament kan buatsaih a. Thalaite hnena Pathian thu sawina remchangah leh rawn inkhawm ve tura sawmna hun atan hman ni se, kan ti a. Kan beisei angin tel tam lo mahse Pathianin min remtihpui a ni ang, kan hlawhtling thawkhat hle. Ruah a sur loh reng avangin buh an phun thei lo va, tournament kan buatsaih hma ni hnihah ruah a sur ta hlauh a, buh phun a tul avangin team 5 chauh an rawn tel thei a ni. Pathian hnenah a senso tur te kan dil a, kan Kohhran Ramthar Committee, Pi Kawli, Bawngkawn Baptist Kohhran leh SEAMS ten sum min rawn thawn avangin lawmman tha tak leh chhun chaw kan pe thei a, kan lawm hle a ni. A tukah kan Biak inah lawmman kan sem a, Rev. Sairengpuian Pathian thuchah sawiin rawn inkhawm thin turin a sawm a, kan hlim tlang hle. Heng thalaite hi an rawn inkhawm ve zel a, Lal Isua an pawm theihnan min lo tawngtaipui zel ang che u. Kan Kohhran pawh kan pung ve hret a, ringlo mi rawn inkhawm thar an awm reng bawk a, Pathianin hna a thawk zel a, in tawngtaina rah a takin kan hmu a, a ropui hle. Naktuk (5th August) khian kan chhehvela factory hnathawkte tlawh chhuah kan tum a, kumin chhung hian ringthar pathum tal neih belh kan duh hle a, min lo tawngtaipui zel turin Kohhranhote ka sawm a che u. Kan Biak In ram leina tur thawhlawm- mimal leh pawl atanga kan dawn pawh cheng nuai chuang fe kan kawl tawh a. He ramah hian Buddhist sakhaw betuten an pathian biakna tur ram zau pui pui an nei a. An pathian aia thiltithei leh ropui zawk kan Pathian biakna hmun tur hi a ding ve ngei ang tih kan ring a, he ram tan hian min lo dilpui rawh u. EV-71 virus an tih mai avanga naupang tam tak an thih tawh avangin nu leh pate an ralkhel hle a. Hun engemawti chhung chu School pawh kan khar ren rawn a, tunah erawh chuan kan hawng leh ta e. Naupangte hi School an lo thlen veleh an hriselna lo endik vek an ni a, kut sil lova room luh kan phal lo va, heng hian hun a duh rei avangin School pawh zing dar 7 ah tanin tlai dar 5:30 ah kan bang a, taksa a chauh duh deuh. Mahse, Mizoram leh hmun hrang hrang atangin min tawngtaipuitu tam tak in awm tih kan hriat avangin harsa leh hreawm ti lovin kan kal ve thei zel a, Pathian awmpuina nasa tak kan dawn avangin kan lawm hle. In tawngtaina hi kan chakna a ni tih hriain bang lovin min lo tawngtaipui reng turin kan sawm a che u. Kohhranhote Lalpan malsawm che u rawh se. In rawngbawlpui, Zairemtluangi Khiangte, Cambodia

Kohhran Aw

Pathianni chhuak

19th August 2012

Phek -2- na

2012- KOHHRAN AW SEMTUTE: B-1: Lalengkima, Lalruatfeli, Lalkhawngaiha B-2: Vanlalnghaka, Zahmingliana B-3: Vanlalruata, Lalbiakthanga B-4: Zochhuanmawia, Lalrinawma B-5: Noel Lalremsiami, Lalnunpuia B-6: Lalawmpuia, Lalmuanawma, Zonunmawia B-7: Zohmingthanga Tlau, Zodinmawia B-8: F. Lalremruatpuia, Lalrindika, MS Dawngliana, Zohmingkima B-9: Lalramengmawii,Lalbiaksiami, Lalramtharzuala B-10: Lalramchhana, Roluahpuia B-11: Vanlalpeka, Remruatsanga B-12:Lalnunthara, Lalfelkima, New Saron : BL Thanzama, TBC VL Remruatsanga

Synod News
@ PCI Executive Committee, August 8 & 9-a Shillong-a thukhawm chuan Assam rama Bodo ho leh Muslim ho inkara buaina chhuaka mi tam takin nunna an chan bakah mi nuai 4 zette chuan in leh lo an chan te chungchang a ngaihtuah a. He thil thleng hi pawi a tiin lungchhiatthlak a ti takzet a, PCI hnuaia Unit tinte chu Assam rama chi leh chi inkara buaina chhuak hi a reh theihna tur leh a bik takin buaina chhuah hluarna leh a tuartu tamna hmun - Kokrajhar, Dhubri, Chirag leh a chhehvela chengte tana tawngtai turin ngenna a siam a. Mizoram Synod chuan Mizoram chhunga Presbyterian Kohhran tinte an remchan dan anga tawngtaina hun lo hmang turin a ngen. @ Aug 13 khan Synod Conference Centre-ah Mizoram Kohhran Hruaitute Committee (MKHC) chuan kum 30 hmel a hmuh denchhena a siam, MKHC Chanchin chu Chairman, Synod Moderator ni bawk Rev. Thangzauvan a tlangzarh. MKHC hi kum 1982-ah din tan a ni a. Kum 1966-a ram a lo buai khan Mizoram Kohhran ten remna palai hna thawkin mipui mangang thlabarte thlamuanna hna an thawk bawk thin a. MNF leh India sorkar inbiakna a lo tawp khan Kohhran hruaitute chuan India sorkar leh MNF te chu dawhkan pakhat kila inbiaktir leh a tha ber ang tih ngaihdan an nei a. Aug 13, 1982-ah Kohhran hrang hrang Mizoram Presbyterian Church, Baptist Church of Mizoram, United Pentecostal Church, Salvation Army, Catholic Church, Seventhday Adventist, Isua Krista Kohhran (Aizawl), Assemblies of God leh Pawiram Baptist Kohhran aiawhte chuan Zoram Kohhran Hruaitute Committee (ZKHC) an din ta a ni.

Kar hmasa khan Phillipines ramah a zawna ni 11 chhung ruah a sur avangin tulian nasa tak a thleng a, an ram zaa 60 chu tulian hian a tibuai a ni. Tuilian avang hian mi 66 aia tam mah an thi tawh a, mi maktaduai 1 chuang a tibuai bawk. Hei vang hian Kristian tanpuitu pawl World Vision pawhin heng harsatna tawkte hi a theih ang kawng kawngin tanpui hna a thawk mek bawk. Christian development agency pawhin chhungkaw 1000 tan eitur a pe a, a vaiin chhungkaw 50000 tan eitur pek phawt an tum thu an hotute chuan an sawi bawk. Tunlai thalaite buaipui tak Facebook-ah chuan thla thum kal ta atang khan infiamna (games) chikhat Journey of Jesus: The Calling chu khelh theih turatihchhuah a ni a. He game ah hian Isua damlaia a thiltihte leh Isua nukawng hrim hrim hmanga infiamna tur dah a ni a. Thla thum a ral tih chauhah a kheltu hi mi maktaduai 1 an tling nghal der a. He game hi tawng chi hrang hrang pakuaa siam a ni a, ram hrang hrang atangin kheltu an tam hle a, miten Lal Isua chanchin hriat chian an tum phah a, he game-a thleng sang tur hian Isua chanchin Thuthlung Thar ami hriat chian a ngai hle niin an sawi. Tunkar ningani khan Sri Lanka-a Kohhran hruaitute chu misual ten an bei a, tin Kohhrana hnathawk awmte pawh an beih avangin Kristiante zingah boruak a sang hman hle a. Hetiang deuh bawk hian August ni 1 khan Pastor pakhat chu a nupui leh a fate nen an mut laiin misual ten an darthlalang vaw kehin beih an tawk tawh bawk. Sri Lanka-ah hian za zela 8 hi Kristian an ni a, za zela 70 hi Buddhist an ni thung. August ni 12 khan Pakistan-a Pastor pakhat pastor Kelvin chu an ramin zalenna a lawmna tur urlawk nana a nupui fanaute nena an bazar lai chu misual ten an rubo. Pastor hi Punjab state-a Sahob District-a cheng a ni a, Kristiante leh Muslim zingah Pathian thu a hril thin avangin a hma lam pawhin Muslim te hian an lo vau fo tawh niin an sawi. Pastor hian nupui a nei tawh a, tunah hian fa panga a nei bawk. Kar hmasa khan China rama khaw pakhatah chuan Kristian ten khawlaia inkhawmna hun an hman mek laiin inkhawm chhimtu Kristian 26te chu thuneitu ten an man. An man hnu hian mi paruk te chu an chhuah leh nghal a, tlai lamah an zavaiin an chhuah leh niin an sawi. Heta tel ve pakhat chuan hetia an chhuak leh mai hi Pathian hnathawh mak tak niin a sawi a,sawrkar hotute pawhin Isua an lo hriat ve phah a duh hle thu a sawi. Iran rama Pastor an man tuna tanina tang mek Pastor Youcef Nadarkhani chu September ni 8 hian Iran court-ah a thubuai ngaihtuah leh tur a ni a, hemi hunah hian amah an puhna te sawifiah tura tih a ni. A thubuai hi an ziahluh belh leh tawh nge hriat a ni lova. A rinna avang hian hun ni 1060 chhung a tang tawh a ni. Tunkar nilaini khan Washington D.C- a Conservative Christian Headquarters office-ah silai keng mi pakhatin silai hmet puakin he office vengtu pakhat chu a kap hliam. Silai hmet puaktu hi Floyd Corkins niin police lam chuan an hria a, tunah hian an man tawh.

Christian News

Kohhran Aw

Pathianni chhuak

Dt. 19th August 2012

Phek -3-na

Synod News Chhunzawmna

@ August 17 - 28 chhung hian Jharkhand, Patna, Lucknow, Delhi Mission Field Committee meeting neih a ni dawn a, Field Committee neihpui tur hian Rev. Lalchhuanmawia, SMB Secretary; Rev. Rualkhuma leh Rev. R.S. Rokima (BEC Members) te an kal ang. August 20 (Thawhtanni) ah Jharkhand Field Committee an thu ang a, August 22 (Nilaini) ah Patna Field Committee an thu leh ang a, August 24 (Zirtawpni) ah Lucknow Field Committee an thu leh ang a, August 27 (Thawhtanni) ah Delhi Field Committee an thu leh ang. @ August 10 - 12 chhung khan Ramhlun Kohhran Biak Inah Home Mission North huam chhunga Missionary-te pualin Retreat neih a ni a, thupuiah Krista sipai rinawm (II Tim 2:3) tih an hmang a, speaker atan Upa R. Lalmalsawma, Synod Mission Board Coordinator an hmang. Retreat neih chhung hian Rev. Lalramliana Pachuau hovin Character Study : Paula, Missionary ropui tih zirho a ni bawk. Home Mission Field hi Mizoram Synod hnuaiah kum 1949 khan ramchhung a ringlote hnena rawngbawlna tura tan a ni a. Tun dinhmunah Home Mission North huam chhungah hian Dampa, Chhawrpial, Hmarthlang, Khawthlang,Tlawng leh Serlui Presbytery te an awm a ni. January - July 2012 chhung khan ringthar 162 an awm. Home Mission North huam chhunga rawngbawlna dinhmun tlangpui hetiang a ni : (1) Hnathawktu zat : 159 (2) Hnathawhna khaw zat : 36 (3) Full Time Evangelist : 48 (4) Pastor Bial huam zat : 15 (5)Evangelist Teacher : 95 (6) Presbytery huam zat :6 (7) Evangelist + Evan. Teacher : 143 Kohhran Dinhmun (1) Kohhran neih zat (Bru-ho zingah) : 45 (2) Kohhran neih zat (Chakma-ho zingah) : 12 (3) Kristian (Bru) : 13444 vel (4) Kristian (Chakma) : 1220 vel Home Mission North hnuaiah hian Elementary School 2, Primary School 6 leh High School 1 a awm mek a, Nurse 5 in Dispensary te neiin rawng an bawl mek bawk. @ Campus Ministry rawngbawlna hnuaiah August 16 & 17 hian Apollo School of Nursing-ah Crusade neih mek a ni a, crusade hi Dr. Robert S. Halliday, Social Front Coordinator; Pu Jacob Laldinsaka, Chaltlang S leh Tv. C. Lalremruata, Chaltlang S ten an neihpui a ni

Damlo Tawngtaipui Ngaite

Pu Lalzarmawia, Pi Sangkhawli, Pu Biakdawla, Upa Hrangvelthanga, Pu C. Vankhuma, Pi Bawitluangi leh Pu F. Lalkunga te i tawngtaipui zel ang u.

Pangpar Khawi Turte

Vawiina pangpar khawitute: 1)Pi Chhandamthangi 2) Pi JH Lalrinngheti

Pangpar Tui Petu Turte

Dt 20- 26 .08.2012 chhunga pang par tui petu tur te : - (1) Pi R. Laldinpuii (2) Pi Lalbiaknguri (3) Pi Zoramliani (4) Pi Lalengmawii

Vawiin NPSS Zirlai

Beginner Primary Junior Inter Phar tihdam Jerusalem tam tanpui thu Nula thianghlim sawm Kohhran awmzia leh nihna Sakramen Rinna leh thiltih inlaichin dan Senior Duhthlanna hman dik

HIV/AIDS Zirho
Dt 16.8.2012(Ningani) zan khan kan Kohhran Committee ten Committee Room-ah HIV/AIDS chungchang an zirho. Hei hi MSACS hmalakna niin MSACS consultant, Doctor te leh an thawhpuite bakah New Hope Dropin Centre lama thawkten he hun hi an rawn hmanpui a ni. HIV/AIDS nih phung, a darh theih dan, invenna lam leh Kohhran hmalakna turte pawh sawiho nghal a ni. Kan Kohhran hian a bikin thalai/naupangte zingah kumin chhungin HIV/AIDS inzirtirna neih a lo tum sa mek a. Tin, AIDS vei mi harsate tanpuina pawh fund dahin Social Front ten hma an la mek a ni.

Music leh zai zir duhte tana hriattirna

Synod School of Music-ah Indian Music leh Zai (Western Vocalisation) zir duhte tan seat a la awm a, dil duhte chuan August 24 (Zirtawpni) thleng dilna theh luh theih a ni.Synod Office Music Department-ah zawtfiahin Dilna Form pawh Office hun chhungin lak theih a ni. Sd/REV. LALZUITHANGA Executive Secretary i/c Music

Campaign Nei Mek

Nizan atang khan Kristian Chhungkaw Campaign neih a ni a. Hlawk taka kan hman theihnan Kohhran chhungtinten thahnemngai ila a tha hle mai.

Kohhran Aw

Pathianni chhuak

Dt. 19th August

2012

Phek -4-na

Darthlalang : Tumah Hmusit Lovin

1803 khan US President Thomas Jefferson chuan America khawtlang lam Pacific tuipui kam vela thil awmte chanchin zir turin tuipuia zin thin lawng hmingthang Lewis leh Clark te chu a tirchhuak a. He thilhmuhchhuah tuma zinchhuahna hi Corps of Discovery tiin a hming an phuah nghe nghe a. Heta zinchhuakte hian thil thar chi hrang hrang, Europe lama an la hriat ngai hauh loh 300 lai mai an chhinchhiah a. Chung zingah chuan Red Indian hnam hrang hrang 50 lai an tel bawk a. He lawnga zinchhuakte hi Sahmul hnmanga sumdawng thin French mi leh a nupui mi vakvai, Sacajawea , Red Indian hnam mawl tak mai chuan an zui ve bawk a. A tirah chuan chung sumdawng chu hnamdang an nih bakah an hmusit tak mai Red Indian nupui nei a lo ni vei bawk nen, lawnga chuang ve sawrkar mi pawimawh leh lehkha thiam tak takte chuan an ning ru hle mai a. Mahse, a beisei loh lam atang an hmusit em em French sumdawng nupui Sacajawea chu an hmang tangkai ta hle a. An kalna khaw pakhatah chuan Sacajawea leh a chhungte chu an intawng hlawl mai a. A unaupa phei chu an hnam lal a lo ni hial a. Tichuan American thil hrang hrang chanchin zirmite chuan Sacajawea chu tawnglet tu ah hmangin Sakawr leh kal kawng hriat theihna tur map lam chite chu a unaupa chuan a pe a. Sacajawea te chhungkaw zarah an zinchhuak chu khawvel chanchina hmun thar tlawhpawhna ropui bera an sawi thin zinga mi a nih theih phah a ni. Bible-ah pawh hetiang chanchin hi kan hre awm e. Israel faten Jeriko an lak dawn khan enthlatu te chu mi hmusitawm Nawhchizuar Rahabi puihnain an talchhuak leh thei hram a nih kha. Mizo upaten Lampui chang khatah mi an be chhe ngai lo an tih kha a dik hle mai a. Pathian hian kan chhiat kan thatna atan hian hmanrua atan eng pawh hi a hmang thiam vek a. Mi te ber leh mi lian ber thlengin Pathian thilsiam vek leh a hmangaih, a thisena a tlan te, chatuan roluah tura a duhte vek kan ni a. Mahni mihringpuite hmusit a, diriam ching chuan Pathian thilsiam a zah lova, chu chu Pathian pawisawina a ni.Tuna kan hmusit leh engamah kan ngaih lohte hi Pathian hnena kan chanchin hrfilhtu turte an ni a, he leia kan mizia thailang tute an ni bawk a ni. Chuvangin fimkhur ila, mi te ber kan tih te, mi lian kan tihte hi Pathian ta vek an ni tih hriain, Pathian hian kan tan remchang takin a hmang thei a ni. Chuvangin hleih nei miah lovin roreltute pawhin ro kan rel hi Pathian duhdan a ni a, kan Kohhran inkaihhruaina danah pawh a awm hial a nih kha.

August Chairman : Upa Dr Thangsailova

VAWIIN BIAK INPUI

Chawhma : Kristian Chhungkaw Campaign Tantu : Pi Thanzami Speaker : Rev Zosangliana Colney Chawhnu : Kristian Chhungkaw Campaign Tantu : Pi H. Lalchhungi Speaker : Rev Zosangliana Colney Zan : Kristian Chhungkaw Campaign Speaker : Rev Zosangliana Colney KTP TAWNGTAI INKHAWM Hruaitu : Pu David Laltlanmawia Tantu : Tv. Lalrammawia(Mk. Gr) Kumpuan Thupui zirho Hawngtu : Tv. K. Laltlanmawia Dt. 20. 08. 2012:THAWHTAN ZAN (KTP Inkhawm) Hruaitu : Pu Lalnunsanga Fanai Tantu : Tv. Lalhruaitluanga(Lk. Gr) Thuhriltu : Pu R. Laltanpuia Group zai : Group intihsiakna (Member 10 aia tlem lo) Dt. 20. 08. 2012 : THAWHTAN ZAN (Pavalai Inkhawm) Hruaitu : Pu F. Lalzehmanga Tantu : Pu Zoramlawma Thuhriltu : RC Lalzuithanga Dt. 21. 08. 2012 : THAWHLEH ZAN (Kohhran Hmeichhe Inkhawm) Hruaitu : Pi Roluti Tantu : Pi Vanlalhruaii Thuhriltu : Pi Zoramliani Thilpek : Pi H. Lalremruati(Sari Gr.) lakhawmtu : Pi Lalrikhumi (Sari Gr) Dt. 22. 08. 2012 : NILAI ZAN Tantu : Pi H. Lalnuntluangi Thupui : Fa neih malsawmna -II Hawngtu : Pu H. Malsawma Dt. 25. 08. 2012 : INRINNI ZAN Tantu : Pu F. Lalchaka Thuhriltu : Pu V. Rozama

TAWNGTAI INKHAWM HRUAITU

TAHRIK ZING :Dar 5:15 AM TLAI: Dar 4:00 PM 20.08.12(Thawhtanni) : Pi Laltharsari Pu Laltanpuia 21.08.12(Thawhlehni) : Pu HS Lalngaizuala Pu H. Neihkiamlova 22.08.12(Nilaini) : Pi Vanneihmawii Tv. Zosangliana 23.08.12(Ningani) : Pu C. Sualneka Pi Mahawihi 24.08.12(Zirtawpni) : Pu Laihuliana Pu T. Lalrizapa 25.08.12(Inrinni) : Pi Lalnunnemi Pi Lalrozami 26.08.12(Pathianni) : Pu R. Thatkhuma Pu J. Lalthianghlima

Editor : T/Upa Lalhuapzauva, Jt. Editor : C.Lalthanpuia, News Editor : Robert Lalmuanpuia Manager : JC.Laldinsanga Cir. Manager : K.Lalrinawma, Published by Vengthlang Kohhran & Printed at C.K.Offset, Vengthlang. Biak In Ph.: 235380