Kum 24 Issue No.28 Missionary Tlngau April 2012 Editor 2342250 (O) 9615344234(M) Asst. Editor : H.

Zadingliana 2342294 (R) 9436157190(M) Cir.Manager : K.Lalremsanga 9436370298(M) Member : Rev.Dr.K.Lalrinthanga 9436158852 (M) : L.H.Liandinga 2342667 (O) Email Address : angelzaiteibh@Gmail.Com Address Baptist Church of Mizoram Office Serkawn, P.O. Zotlang - 796691 Lunglei, Mizoram Ph.Off - 2342250 A man kum khatah - Rs 40 : HS.Lalhmingthanga

Thuchhuah rng rng hi a ziaktu mawhphurhna a ni a, Editor leh BCM ngaihdn a ni vek kher lo. A CHHUNGA THU AWM TE Sl.No 1. Editorial 2. Tokar Basar kha maw 3. Arunachal West Field-a fehchhuah Report 4. BCM Mission Partner-te nene inkawm hona .. 5. Kohhranho tawngtaina Lalpan mal a sawm zel 6. Birpara Work Camp Report tlangpui 7. Krista Pasaltha Upa S.Darkama kan then ta 8. Hari-ah kumthar 9. BCM Missionary te tana hriattur pawimawh Phk 1 2

Editorial Editorial THAWHHONA A tuhtu leh a attu an lawm dun theih nan, (Johana 4:36). Van Missionary ropui, boralte zawnga chhandam tura lo kal Lal Isua chuan a zirtirte nen Judai ram kalsan a, Galili rama kal a duh a. Tum nei takin Samari ram a kal tlang a ni. Judate leh Samari mite hi hetih hun lai hian an inhal hle a. A bik takin Juda Dan zirtirtu Rabhi te chuan Samari mite nena in hman tawn an duh lo va, an kut atanga ei leh in dawn phei chu an duh miah lo a ni. A chhan chu hemi hma kum 800 chuang lai kal taah Asuria-hovin Israel hmar .lam hi rawn hnehin, Israel-te chu rei tak awpbeh a, an rilru thlenga hmin tumin, an tlangvalte chu Israel nulate an neihtir a, chutiang inneih pawlhna atanga lo piang chhuak chu Samari mite an tih hi an lo ni ta a. Israel thisen hlang nei tawh lo, inthlah pawlh an nih tawh avangin, chhim lama cheng Juda te, an sakhaw hruaitute chuan Samari mite hi an hmusit a, an dah hnuai hle a ni. Chuvangin Samari hmeichhia hian Juda tlangval, Rabhi-in tui in tur a dil kha mak a ti a. Isua, thlarau bo hmangaihnaa khat thung chuan Samari hmeichhe mamawh tui chu hmanruaah hmangin, thlarau lam Tui nung pekna remchang a zawng a. An hnam pahnih indaidanna bang chu su tlangin, mi sualte zawk lama simtir turin hna a thawk ta zawk a ni. Thiam leh dawh thei taka kawmin, Samari hmeichhe nun tuihalna chu a chawk tho a, a mamawh tak Tui nung chu a pe ta a ni. Johana 4:36-38 ah hian Lal Isuan Mission rawngbawlna hnaa thawhhona pawimawhzia min hrilh a. Hemi tuma a zirtirte nena rawng an bawlna Sukar hi Baptistu Johanan mipui tam tak simna Baptisma a chantirna Ainon atang khan hla lo te a ni a. Bible zir mite chuan Johana zirtirte khan he khuaah hian simna thu an lo hril tawh a, mipuite rilru pawh Chanchin Tha dawngsawng turin lo 2

buatsaih lawk tawh anih an ring a. Kha vang khan Isua thu hriaa Samari hmeichhiain thu a va hril leh, amah Isua ngeiin an hnena Pathian ram thu a sawi kha, lawm takin an ring ta a ni an ti. Tichuan a tuhtu leh a attu te chu an lawm tlang ta a ni. Chuvangin Mission hnaah chuan midang lo thawh tawh chu chhunzawmin, kan thawhrim loh rah kan seng thin a ni. BCM Field Rabha-ah khuan Australia Missionary te hnathawh chhunzawmin hlawk takin kan seng a. Tripura Field-ah khuan New Zealand Missionary te thawh kan chhunzawm a, rah tam tak kan seng mek a. Assam phaiah te, Arunachal-ah te, Mire hnam zingah te, Thailand, China, Indonesia leh Africa ramah te pawh midangte thawhrim rah sengin, thlarau bo tam tak kan sengkhawm a. Delhi chheh vel Hindu hnam hnuaihnung zingah pawh midang hnathawh chhunzawmin 2011 chhung khan ringthar 1800 chuang zet Baptisma kan chantir a ni. Heng midangte hnathawh kan chhunzawm avanga kan hlawhtlinnaah hian lawmna chang i hria ang u. Hetiang hian midangten hma an lo lak tawh chu chhunzawmin, BCM hian Lalpa zemah thlarau bo kan seng khawm mek a ni. Tuna kan thawhna Field-a kan thawhpui kan Mission Partner te nen pawh kan thawkho mek a ni a. Kan Inremna Thuthlung (Memorandum of Understanding MOU) angin kohhran din tura tan lak kawngah te, Mission sikul siamah te, Music leh Skill Training hmanga rawngbawlnaah te hma kan laho a ni. BCM Missionary te kal leh awm chhan ber chu Lal Isua la ring lote hnena Chanchin Tha hril a, ringthar siam a, Baptisma chantir a, kohhran dina ringtu puitling buatsaih a ni a. He hna pawimawh tak hlawhtling taka thawk thei tur chuan midangte nena thawhho a, ruahmanna siamho a, hma lakho thiam a ngai a. Midang ngaichang thiam leh thawhpui nuam chuan an thawk hlawhtling thin a ni. Mahni thu duh nguk a, hnam dang ngai thei lova dah hniam tum tlat leh chhan tha tak awm si lova chapo taka mahni in dah sang chung chuan midangte a thawhpui hleih theih lo va, thlarau bo hruai 3

a har hle thin. He kan indah san bikna, hnam dang leh midang kan hmuhsit a, kan ngaih theih loh tlatna rilru hi Lal Isua Kraws thiltihtheihnain a tih hlum kan phal a tul a ni. Hei hi kan phal loh chhung chuan thawhhona leh rawngbawlna boruak tha a awm thei thin lo a ni. Inrem tlang a, inlungrual a, thawhhona boruak tha tak nei chunga rawngbawlhona hmunah chuan ringthar an pung tawk tawk a, kohhranho pawh thlarauvah an nungin an hlim a, hma an sawn chak thin a ni (Tirhkohte 2:42-47). Thawhhona boruak tha siamna kawng tha tak chu midangte fak leh chawimawi thiam a ni awm e. Isua hian a zirtirte hi midangte hlutna hre chunga lawm taka rawngbawlho thiam turin a zirtir a ni. Pathian rawngbawltu hlawhtling te chuan mahni indah sang ber chunga ka tih tawngkam aiin, in ngaitlawm tak leh midangte tangkaina hre chunga kan tih tawngkam an hmang uar zawk thin a ni. Midangte dah pawnlan aiin, midangte huikhawm a tha zawk a, chuvangin mahni tih that aia midangte chet thatna tarlan hlauh hi za vaia lawm tlanna, thawhhona boruak nuam siamna, phur tak leh tha tho taka hnathawh theihna a ni thin a ni. Hetiang rilru tha leh zau, Thlarau Thianghlim kaihhruai nei thei tur hian ni tin Pathian chu a thu takah tawngtaina nena pawl a, kawm a, a zirtirna dawn thin a tul a ni. Lal Isua Krawsah hian inrem lohna zawng zawng a tawp vek a; inremna leh thawhhona tha a intan a ni. Missionary hlawhtling nihna pawh he hmun atang hian a intan a ni. Hemi hmun tlawm tak, mahni inphatna, mihring hlui vui liamna, mihring thar lo thovin Krista chakna hmanga, tuarna kal tlanga Chanchin Tha a hril a, thlarau bote Isua hnena a hruai thinnaah hian kan Mission rawngbawlna hi kan tan thar theih nan, Thlarau Thianghlimin kan hma hruai sela, thuawih takin i zui theuh ang u.

*******************

TOKAR BASAR KHA MAW? David Lalrengpuia, Basar, Arunachal East Field TU NGE A NIH ? Ni leh Thla pathian (Donyi Polo) hian thlamuanna emaw taksa damna emaw, min pek theih loh avangin, a hnena ka inthawina zawng zawng ka bansan ang a, taksa, rilru leh thlarau damna min pe theitu Pathian ka zawng ang, tia sawitu Tokar Basar hi, amah hre miah lo va, van Pathian hnena ringthar i lo dil thinna rah chhuah ngei nia ka hriat avangin, a chanchin tlem ka han tarlang teh ang. Chhiartu zawng zawngten, ringthar kan dil thin te hi Lalpan min pe ngei tih kan hriat nan leh nasa zawka kan tawngtai theih nan. Tokar Basar hi Galo hnam, Basar khuaa Nyigam venga chhungkaw hung tak atangin Dt. 14/11/59-ah a piang a, mahni inring tawk leh dik nia a hriat chu nghet taka vuan tlat mi a ni. Zirtirtu senior tak a ni a, an vengah hian in leh lo, ram zau tak neiin a nupui fanaute nen an cheng. Nasa taka Kristiante dodal thintu leh hmusit thintu niin, Kristian chu miretheiho awmna tura ngai nghet tlattu a ni. Nyigam khawtlangah pawh pa rawn tling, mi rin kai a ni pha a ni. KAWMNA HUN REMCHANG A INHAWNG : Kum 15 dawn kal ta atang khan a nupui Gumpu Basar hi natna sawi ber tur nei em em si lo hian a dam hlei thei lo va, Doctor leh damdawi lam te rawnin nasa taka an inenkawl pawhin a dam thei lo va. A chang phei chuan hlauh neiin, eng nge a hlauh pawh hre si lo hian an buai chiam thin. Doctor rawn leh damdawia in enkawlin awmzia teh chiam a neih tak si lovah chuan, ramhuai hnena inthawi mai chu an hmabak leh tih tur ber niah ngaiin, inthawina, a te ber atanga a lian leh senso tam ber thlengin an hlan a, mahse an beisei an hmu si lo! Chutia beidawng leh tih leh chuan tur hre lo taka an awm lai chuan, a fanu upa ber, pasal nei tawh rilruah chuan, i tawngtaina chhangtu Pathian chuan hna a lo thawk tan ta a ni. Kan Biak inah tuma ngaihsak lem lohvin vawi eng emaw zat a rawn inkhawm ve a, a 5

rilru hahna leh a beisei, an chhungkaw tana Damna leh Thlamuanna kawng kawh hmuh theitu hmuh a in beisei tlat thin. Pathianni vawi khat chu hma deuh maiah hian a lo thleng a, biak in bul maia awm kan nih avangin, inkhawm tan hmain ti ti puina hun tawi ka nei hlauh mai a, an chhungkaw chanchin tlangpui min hrilh a, tin, an ina leng tur leh a nu leh pate kawm turin min sawm a, chu chu kan in hriat contact hmasak ber a ni. Zanah kan quarter-ah an nupain an lo kal leh a, tichuan an mahni kawm dan tur ka ruahmanpui ta a ni. Hun rei tak atang tawh khan Tokar Basar hian a mumangah Kraws hi a lo hmu tawh thin a, mahse a awmzia hre lo leh Kraws chu Kristian, miretheiho tan a lawm tiin a lo dah pawimawh ngai lo mai ni lovin, a hmuhsit em em Kristiante zawm ve tur chuan a rilru pawh a siam chhin ngai lo. Mahse chu a mumanga Kraws chu theihngilh mai chu harsa a ti hle ni tur a ni. An nu damna chauh ni lovin, an chhungkaw tan Ni leh Thla (Donyi Polo) pathian chuan lungawina leh an beisei a thlen theih si loh thu min hrilh a, tin, chu an rindan chu bansan a tum thu min hrilh bawk. An nu damlohnate, an chhungkaw mangann, an hlauhthawn thinzia te, an inthawi nasat tawhzia te, mahse an beisei an hmuh si loh dan te chu min hrilh mial mial a, a thinlung takin chung chu min hrilh niin ka hria. Chhandamtu tak hre lo va, Thlamuanna, damna, an lo zawn nasatzia han hriat meuh chuan, an va khawngaih thlak em!! Eng vang nge ? Hrilhtu, CHANCHIN THA HRILHTU an nei lo a ni. Chhiartu duh tak, kan va han vannei bik em! I LO TAWNGTAINA KHA A THLAWN LO : Dilsak bik pawh nei lem lo va, Lalpa, ringthar min pe rawh, i chhiahhlawhte seng khawmtir zel ang che, tia, i lo tawngtaina chuan an thinlunga Sual setana Tala chu a lo chhu hawng reng tawh asin. Chhandamna, Chatuan nunna, taksa, rilru leh thlarau damna famkim chu ISUA KRISTA kan aiawha mualpho taka thinglera an khai kan avang khan Pathianin, tupawh a ring apiangte tan, an chan turin a lo ruat 6

diam tawh thu te kan hrilh chu an va lawm em! Pathianin an sualna zawng zawng, ramhuai hnena an inthawina chenin a ngaidam thei chu mak an ti hle. Chatuan nunna pawh Amah ringtute chu a thlawnin min pe tih an han hriat chuan mak an va ti em! Lal Isua ringtute hi Kristian tih kan ni a, Kristiante chu rethei awm khawm ni lovin, Chatuan nunna, hlimna leh thlamuanna famkim neitute, Van ram khua leh tui nihna neitute kan nih zawk thu kan hrilh te chuan, a ngaihtuahna a fan thui hlein ka hria, Lal Isua chhandamna chang turin, senso engzatnge ngai, Kristian ni turin engzat nge senso tul ang tih te min han zawt chu, a lungchhiat thlak zawkin ka hria. A ngaihtuahna atang chuan zawhna pawimawh tak a ni tlat. Ramhuai hnena an inthawi hian Common/ Ordinary inthawi naah pawh Bawlpu (Dhondai) kha a tlem berah Rs 5,000/- an pek a ngai a, hei bakah hian Setana emaw thlarau sual tlawn lungawi nan Rs 4,000/- vel an ngiat leh thin. Bawlpu hmuh a har vak lo va, mahse amah puitu tur hmuh hi thil harsa tak a ni. Tokar Basar hian an inthawina Common aia sang chi ngawt pawh vawi 12 chuang a ti tawh a; mirethei tan chuan heti zozai hi thil tih theih chi a ni lo. Chuvang chuan mi rethei tam tak hian an sakhaw dana inthawi hi an tlin loh avangin Kristian hi an pan chawk a ni. Tokar Basar pawhin Kristian chu rethei awmkhawm tia a lo hmel hriat hi a awm viau reng a ni. Fakna hla siamtu chuan, A hmangaihna A THLAWN A NI, a ti. Kan insen emaw, tuar ve emaw lam a ni lo, RIN, PAWM, AMAHA INNGHAH hi a tawk a ni, tih kan hrilhfiah hnu chuan, Kristianna a lo hriat dan leh Lal Isua a lo rin hriat ve dan dik lohzia chu rang takin a in man chhuak nghal a, lawm em emin an chhungkaw tan a rang thei ang bera Baptisma programme buatsaih a duh ta a, thu kan ti tlu ta reng mai. Praise the Lord! Tichuan kum 2011 March 27 khan amah leh a nupui leh a fate 3 in Lal Isua an rinna Baptisma changin an puang chhuak ta a ni. Chhiartu, i tawngtaina kha a thlawn lo ve. HRUAITU NIH TLING A NI : Mi inngaitlawm, taima leh thil tha duh mi anih avangin a thiltih a duh tui a, a kova innghat chu tha taka puitlin duh mi a ni. Kum 2011 chhung hian theih ang angin ka 7

chher chho va, tawngtai dante leh thuchah tawi sawi dan, Bible leh Pathian thu hman dan te kan inzirtir thin. Nyigam Baptist Churchah pawh hian kohhran ban pawimawh tak a la ni thuai ang. Pathian thlamuanna leh tihdamna an chang chho zel a, an chhungkaw khawvel chu thlak thleng vekin a awm ta. Tokar Basar hian unau pianpui dang mipa panga lai a nei a, chungte chuan Kristiana awm lo tur hian nasa takin an bei tih ka hria a, mahse a nunah Lalpan hnehna a chang zel rih e. I tawngtaisak zel ang u. An Baptisma chan ni hian an inchhunga ramhuai hnena an inthawina thil zawng zawng hal ral vek a ni. Ka zawhna chhangin, Kristian an lo nih tak hnu a thil a lo danglam zia leh, an thlamuan zia hi engmah hian a teh khin zo lo! Engkim mai hi chhun leh zan in thlak ang mai niin a sawi (II Korinth 5:17). Amah pawh hian, Hetiang a ni tih hria ila hmanah khan Kristianah awmin Isua hi ka ring tawh ngei tur a ni, a ti. THAHNEM NGAI LEHZUALIN AW ? Sakhaw biak thlak hi thil na mai a ni lo va, sakhaw thlak chu sawi loh pawl thlak pawh hi a va harsa em. Ringlo te hian an sakhua leh pathian thlak vekin, an pathian biak / inthawina thil halral veka Isua lo ring ta te hi thil tenau a ni lo a sin. Aw le, i tawngtaina avang hian mi tam takin Lal Isua an nei tawh tih hi, nang Missionary Tlangau Chhiartu duh tak, i hriat loh hi ka duh lo ve. Amaherawhchu, nasa lehzuala tawngtai hi a tul a sin. Tokar Basar chuan amah leh a nupui fanaute nen Isua an nei tawh a, a u leh nau, chi leh kuang dang zawng zawngte chu setana thuhnuaiah an la awm vek. I tawngtaina an nghak mek a ni. Lo tawngtai zel teh u. In tawngtaina leh in thilpekte hi a thlawnin pakhat te mah hi a luang ral lo a sin. Eng chen nge hun tha kan neih dawn kan hre lo, hun tha kan neih lai hian hawh teh u, Lalpa buh thlarau bote hi i sengkhawm zung zung ang u. Kan Lalpa duh zawng a ni ngei e. (Basar-a kan Missionary Pu David Lalrengpuia rawn sawi Pu Tokar Basar hian, January 16, 2012 Thawhtan tuk dar 4:30 khan, kei leh BCM Upper Republic Bial Zaipawl member te, United Galo Baptist Church inkhawmpui Basar-a Nyigam Baptist Church-a zuk hmang te chu a inah Breakfast min lo buatsaihsak a. Zing khawvar hmaa meipui lo 8

chhep hluah a, hlim hmel leh phur taka ei leh in min lo siamsak kha an fakawm tak zet a ni. Nyigam venga Pathian ram zauna hmanraw pawimawh tak a nih theih nan a hming lamin thahnemngai takin i tawngtaisak zui ang u. Editor)

************************* ARUNACHAL WEST FIELD-A FEHCHHUAH REPORT - Upa K. Lalnuntluanga BCM Serkawn Kohhran hian kan phak tawk ang anga Mission Field-a work Camp/Field tlawh chungchang hi a rel thin a. Tualchhung Mission Committee kuta dahin kum tawp lamah Planning te siamin kum thar lo awm tur atan a buatsaih thin a. Chumi tihhlawhtling tur chuan kuminah Rs 150,000/- dahin Arunachal West Field tlawh a ni a. Kan kal hmain Field Director be rawnin Field lam mamawhte inzawtin an mamawhte tihsak tura inbuatsaih lawkna tha tak nen fehchhuah a ni a. Member 20 chuan November ni 9-a Serkawn chhuahsanin Ziro Valley chu ni 12 zanah dam takin kan thleng a. Town Baptist Church-ah BCM Missionaryte leh Apatani Baptist Association hotuten lawm takin min lo dawngsawng a. Hetiang hian rawngbawlna kan nei thei a ni : Dt. 11.11.2011 Naharlagun-ah zan kan riak a, Nyishi Baptist Church Council hmunpuia Rev. Laltanpuia Colney, Field Director, Arunachal West Field inah kan riak a, min thleng zo hle mai. Dt. 12.11.2011 Naharlagun Area-a Missionary awm zawng zawngte Tukthuan kan eipui a, hetah hian tawngtai hona te neiin Arunachal West Field tana Serkawn kohhranin Keyboard Rs 40,500/- man a leisak chu pek a ni. Chaw ei khamah Ziro panin kan chhuak a. Huto English School Pu F. Lalzidinga leh a hote awmna kan tlawh a, thingpui kan inho hnuin tawngtai hona hunte kan hmang a, kan kalsan leh ta a. Naupangte tana Medical Free Clinic 9

neihsak a chakawm hle a, kan hman ta si lo va, a pawi hle mai, rilruah erawh an cham reng a ni. Dt. 13,11,2011 Group hniha inthenin Apatani Valley-a Kohhran pahnih Immanuel Baptist Church leh Grace Baptist Church-ah kan inkhawm a. Thu sawina hun leh zaina hun te min siamsak a. BCM Missionary hmasaten thlan tui luang zawih zawiha khawhar taka an Biak In lo sak tuna a khat hmur maia an inkhawm han hmuh chuan thinlung a fan raih mai. Tlai lamah Ziro Valley-a BCM Missionary-te Zanriah kilpuiin Midland School-ah Pu J. Lalsawmliana, Headmaster hovin Fellowship kan nei nghal a. Thinlunga khat liamin Lalpa kan han fakho chu a va nuam em, bianga mittui luang zawih zawihte chuan thlarau nun a va tiharh em! Kha zan tak kha chu aw theihnghilh a har ngawt ang. Dt. 14.11.2011 Immanuel Baptist Church-ah Medical Free Clinic kan buatsaih a. Dr. HS Lalchungnungan damlo a en mawlh mawlh a, Dr. Zoramthangin Ha a lo phawi mawlh mawlh bawk a. Tin, hetih lai hian Ziro Valley huam chhunga kohhran tin atanga thalai thlan chhuahte chu kan Nula pahnih ten Worship Dance an lo zirtir mawlh mawlh bawk a. Tin, veng lehlam Midland School-ah then khatin an in sak thar rawng an lo hnawih mawlh mawlh bawk a. Kan tlangval pahnihin School Office hnuai Electrical Wiring an lo fit mawlh mawlh bawk a. Tlai lamah kan Doctor te pahnihin Midland School naupang pualin Medical Free Clinic an nei leh mawlh mawlh bawk a, buai tak si nuam ti tak siin kan va indaih lo tehlul em. Dt 15.11.2011 Grace Baptist Church lamah Medical Free Clinic kan nei leh a, kan hun neihin min phal tawk chin thlengin kan Doctor-te an bung leh mawlh mawlh mai. Hetih lai hian rawng hnawih zawh loh a thenin an hnawih chhunzawm a, Electrical Wiring tih zawh loh kan chhunzawm bawk a. Immanuel Baptist Church lamah kan tlangvalte pahnihin Ziro Valley-a kohhran hrang hrangte aiawh lo kal chu Biak In Sound Control dan an lo zirtir mawlh mawlh bawk 10

a. Kan nula pahnihten Midland School naupangte Worship dance an lo zirtir leh mawlh mawlh bawk a. Hmanhmawh takin kan Missionary Dampuii te nufa In luah bang awng lutuk chu silpoulin leiin chhung lamah a thenin kan thuah sak mawlh mawlh a, kan zo hman lo lehnghal. Nl. Malsawmliani, Evangelist, Bula, Old Ziro lo chhunzawm atan kan dah ta a ni. Tlai lam dar 4 ah Immanuel Baptist Church-ah Cultural Programme-a tel leh a ngaih bawk si avangin hmanhmawh takin kan inthlak a, min rawn phone chhen tawh bawk nenhun han nei tam thei deuh ila aw. Hemi zan hian darkar 2 chhung Cultural Programme kham lo takin kan hmang a. Kan Missionary tena nuho zaipawl an siam zai thiam zia te, an rawngbawlna rah chhuak leh Pu Thlanawman Mizo hla tha tak tak Apatani tawnga a lehlinsak an han sate chuan mittui a ko chhuak chiang khawp mai. Kan rilrua cham tlat te chu : Asia rama Thingtlang khaw lian ber dawttu Hong Village In 12001400 khua hi a ni. An khaw laiah ramhuai In a awm a, In tin deuh thaw kawtah Inthawina a awm chuk mai. Missionary Pu FP Lalthathanga (Thatea) te chhung an awm, a va la thim ve le! Hla siamtuin, I kiangah thimah mi an thi, thlanah thlamuanna nei lovin, tih hla kha helaiah hian a dik lehzual. He khuaa ramhuai In hi kohhran hoten tawngtainain i thiat ang u. Tlangkawmna : Helai Ziro Area Supervisor Pu J. Lalrinawma (Marina) leh kan Missionary-te inpekna zawng zawng kan hmuhin kan chhuang a, a lawmawm hle a ni. Apatani Baptist Association hruaituten kan awm chhungin min tawiawm a, ni 15 zanah phei chuan thilpek min hlan mai ni lovin Zanriah min buatsaihsak hial a, an Treasurer Inah meilum ai chungin tlai leh tui ti takin kan ei a ni. Ziro Valley-a kan Missionary-te inah kalin tawngtaina kan nei chhuak vek thei a, kan lawm hle a ni. Kan kal lam leh kan haw lamah Tv. Laldingngheta, Music Teacher, Yazali-a kan Missionary awmna kan tlawh a, haw lamah thingpui tui tak kan in a, khawhar thu sawipui tur nei lovin kan chhuahsan leh ta, a thian Isua hnenah 11

a khawharnate chu a thlen ngei ang. Kan tih theih chhun te ti a Lalpa tana kan hlan hian Ani chuan a let tam takin a tipung thin. Kan duhzawng leh rilrem zawng ni lovin, Lalpa duhzawng leh rilru mil zawng zawka rawngbawlna kalpui hi a va pawimawh em, tlemte pawh ni se Ani chuan a let tam takin a tipung thin si a. (He report ngaihnawm tak rawn ziaktu Upa K. Lalnuntluanga hi BCM Serkawn ami, BCM Printing & Literature Department Manager hna thawk lai a ni. An kohhran leh Aizawla BCM Shalom, Mission Veng te hi Mission Field-a Medical Free Clinic nena changtlung taka feh chhuak thin an ni a, a lawmawm tak zet a ni. Mission kan vei dan a ril telh telh a, chuvangin kan tlawhte tana malsawmna ni ngei tur zawnga tlawh dan ngaihtuah chungin, keimahni tan pawh thlarau lam malsawmna a ni tih hriain, i tlawh zel teh ang u. Pu Tluangtea chungah lawmthu kan sawi e. Editor) . ***************************

BCM MISSION PARTNER-TE NENA INKAWMHONA (CONSULTATION WITH BCM PARTNERS) A hmun: CBCNEI Mission Compound, Gwuahati A hun: 15 17, Februar, 2012 Resource Persons: Rev. Dr. K Thanzauva, Rev. C. Ngurhnema, Rev. Dr. V. Laldingliana, Rev. Dr. K. Lalrinthanga. BCM hian kan Mission Partner-te nen hian mumal taka inkoh khawma inkawmhona programme hi kan la buatsaih ngai lo va. Tun tumah hian hun bichilh tak karah BCM Mission Board-in a lo rel tawh angin kan han inko khawm chuk chuk a. Hmun hrang hranga kan Mission Partner 17 atangin member 34 an lo kal khawm thei a, kan Field Director ten an rawn tawiawm thei bawk a, Regional Office-a thawktute leh driver te nen kan vai chuan 50 vel kan ni. 12

Hlim tak leh awmze nei takin hun kan hmangho thei a, a lawmawm tak zet a ni. 1. Kan inhmuhkhawna chhan ber: Mizoram pawnah hian BCM hian Mission rawngbawl hna hi kum 43 lai a lo buaipui ve tawh a. Pathian malsawmna pawh kan dawng nasa em em a. Kristian la awm ngai lohna leh Kohhran pawh a la din ngai lohna hmun tam takah BCM Mission rawngbawlna atang hian ringtu tam tak neiin kohhran tam tak din a lo ni ta a. Heng hmun hrang hrang a, kan kohhran din leh thawhpui-te nen hian hun lo la kal zel turah inlungrual tak leh thahnemngaihna hmun khata rawng kan bawl tlan zel theih nan Mission leh Kohhran lam thu pawimawh tak tak zirho va sawiho turin he inkawmhona (Consultation) hi buatsaih a ni. 2. Kan Partner-te hnen atanga reports : Kan partner-te nena kan thawhhona hmun hrang hranga BCM kal tlanga Pathian hnathawh chanchin reports rawn ziak theuh tur kan tih chu an rawn ziak theuh va, a inchhawkin reports an pe theuh va. Thlarau lama kan Nu leh Pa ti-a BCM min han sawi thin te chu a ngaihthlak a nuam khawp mai. Pathian leh BCM chunga lawmthu sawina uar tak kan han ngaithla thin te chuan min ti lawmin min ti phur hle a ni. Tawngtaipui an ngaihna te, tun aia tha zawka kan thawh tlan theih dan tur te, thlah thlam hauh lo tura min ngenna te chuan chawp leh chilhin chakna thar min pe hial zu nia! BCM Mission hi kum 43 chauhva upa la ni mahse Pathianin a hnena thlarau bo tam tak hruaina hmanruaah a hmang nasa hle a, tunah hian kan partner te nen tang tlangin Mizoram leh India ram hmun hrang hrangah kohhran 1,000 leh Member 200,000 vel kan enkawl mek a ni. Khawvel pumpui hi kan Lalpa leh Isua Krista Lalna ram anih hma chuan chawl lovin kan bei zel ang. 3. Kan thil zirho: Rev. Dr. K. Lalrinthangan BCM leh Thupek Ropui tih min zirtir bakah Evangelism leh Church Growth kan ngaihpawimawh ber anih thu min zirtir bawk a, hlawk kan inti hle. Rev Dr. K. Thanzauvan Revival leh Worship mahni hnam 13

nunphung mila kalpui a pawimawhzia leh kohhran inrelbawlna atana Centralization System a thatzia te a sawi a, kan ngaihtuahna a ti harhin kan tuipui tlang hle. Rev. Dr. V. Laldinglianan kan partner te nena thawhhona boruak tha neih a pawimawhzia leh thawhhona boruak tha tak kan neih theih dan turte min zirtir-a, chawp leh chilhin hma kan sawnpui nghal a ni ber e. Rev. C. Ngurhneman Tualchhung Kohhran inrelbawl dan leh enkawl dan te min zirtir bawk a, mut chhuak leh ning hmelpu hmuh tur reng reng an awm lo. A kar lakah han zawh fiah zawk duh tan hun hawngin han sawiho lawk tur chi te min han chhawp chhuahsak zauh zauh bawk a, kham lo takin min tawppui thiam a, a fakawm hle. 4. Kan kham lo: Tun tuma kan inkawmhona programme hi nuam kan ti em, a zawng chhang thlak em, tih kan han inzawt nak nak a, kan vaiin kan kham lo a ni, tih chu kan chhanna a ni tlangpui a, a lawmawm tak zet a ni. 5. Engtikah nge kan tih leh ang? Kan zavaia inlungrual taka zawhna kan siam theuh chu Engtikah nge kan tih leh ang? tih hi a ni. He zawhna hi chawp lehchilha han inchhan mai theih a ni lova, Mission Board Meeting-in ngun takin a ngaihtuah ang a, remchang a la ruat leh beisei phawt mai ang u tiin kan in thlah a ni. 6. Kan hlawhtlinna thuruk: Hetitaka programme kan la neih ngai loh hlawhtling taka kan neih theihna chhan hrang hrang lo tarlang ila:6.1. Pathianin kan tawngtaina a chhang a ni. Hnawh sarum taka he programme hi buatsaih a ni a, information pawh duh angin kan inpe advance thei lo va. Pathian hnenah tawngtaiin kan thlen a, Lalpan kan ngaihtuah leh kan dil aia tha zawkin min tih hlawhtlinsak ta a ni. 6.2. Kan Field Director te an che tha em a ni. Phur takin kan partner an thawhpui te theuh an rawn kawikhawm thei a, 14

neitu chan chang takin an awm thiam a, an va patling em! An ni nge nge hi kan hlawhtlinna thurukte an ni. 6.3. Kan Regional Director Rev. F. Ramdinmawia leh office-a a thawh puite inpekna vang a ni. He consultation atana kan mamawh leh tul zawng zawng lo ngaihtuahtu an ni a, kan thlenna tur, kan ei leh in tur (mess) leh kan meeting hall-a thil mamawh chi hrang hrang kimchang takin min lo chhawpsak vek a, kan tul leh mamawh kan lam apiang min ngaihtuahsak zung zung bawk a, Lalpa malsawm duh zawng takin fel fai takin engkim an lo ruahman a, hei hi kan consultation hlawhtlinna chhan pawimawh tak chu a ni. 6.4. A tawp berah chuan kan resource person te an subject chan theuh vah chuan khawiah mah an ni bak an awm bik lovang tih tur theuhin an che tha a, anni hi kan hlawhtlinna thuruk te an ni. 7. Thu tlangkawmna: Hetiang programme hi kan han neih takah chuan kan Mission Partner te nena inkawmhona (consultation) neih hi kan lo thlahlel viau a ni tih kan hre chhuak a, kan hun hman dan pawh tha kan tiin a zawngchhang thlak kan ti tlang viau a. Overseas lama kan partner te nen pawh hian consultation hi la buatsaih tha dawn hlein kan hria. Field tinah hian la neihpui dan awm se, tih rawtna pawh a awm nghal nak nak mai. Kan hotuten hetiang thil pawimawh tak ngaihtuah chhuah nachang an hria hi kan lawm tak zet a ni. Lalpa chu fakin awm rawh se!

********************************

KOHHRANHO TAWNGTAINA LALPA'N MAL A SAWM ZEL (Hindu Puithiamin Lal Isua chibai buk turin mi a tir!), T.Nghaksanga, 15

Principal, Yakhili Academy. Mizorama Missionary Thlen Champha January ni 11 chu kumtinin Mizoram tan chuan theihngilh theih loh khawpa ni pawimawh, 'Missionary Day' tiin kan lawm thin a. Kei ka tan chuan, a hma ni chiah January ni 10 pawh hi ni pawimawh tak a nihna lai a awm tlat mai. Nikum 2011 January ni 10 tuk khan, Tripuraa Debbarma hnam zingah chuan a aia upa dam an awm tawh kher lovang, kum 109 a upa a ni e an ti a, Renglal Sipai hlui Bahadur Debbarma Baptisma ka chantir a. Kumin 2012 January ni 10 zingah thung chuan Nupa tuak khat Testimony ngaihnawm tak nei ka chantir thung a, vannei ka inti hle a ni. Tiken Debbarma leh a nupui chu Debbarmaho khawpui hlun 'Khuai' Tripura-a Tlangmi Chief Minister awm chhun Dasarat Debbarma khaw lam mi an ni a. An nupa hian Primary School Head Teacher ve ve an ni nghe nghe. Hindu sakhuaa rinna nghat thin an ni. Vanduaithlak takin kan ti dawn nge ni, an pa Tiken Debbarma hi a kawngruh nain a che tha thei ta lo va. Docto-te an rawna an in enkawl pawhin eng a ang thei si lo va, an rinpui ber, tidam thei tura an ngaih Hindu pathian, Mahadeb an tih chu panin, Hindu puithiam Mahadeb Bokto an tih chu an rawn ta a. Chu Hindu puithiam pawh chuan duhsak tak leh uluk takin an thinghnah damdawi hmangtein a zut vel thin a. A zut lai chuan a han ziaawm deuh thin na a, rei loteah che hlei tei lovin a awm leh thin a. Chu puithiam Mahadeb Bokto chuan ni bik ruat sak, chu a ni ruatah chuan zingah thovin a in bual ang a, tichuan an pathian Mahadeb chu chu puithiam chuan a rawn sak tur a ni a. Chu ni ruat chu a lo thlen chuan Tiken Debbarma chu zing takah thovin in bual tur chuan a theih ang angin chet a la ve. Taksa damna hlu tak chu chang turin tidam thei tura an beisei chu a nghak ta ran mai a. MAHSE, chu Hindu puithiam chu a lo kal a. Inbual lo tura hrilh chunginMahadeb pawh an rawn loh tur thu a rawn hrilh ta a. Tiken 16

Debbarma chuan beidawng takin, "Damna duhin hei chen hi hun kan sengin tih tur i tih apiang ti turin kan inpeihin i thu kan zawm a ni a, enga ti nge Mahadeb chu kan rawn tak loh vang?' tiin a zawt ta a. Hindu puitiam chuan, Kristian ni lo mahse Tikkena nupui chuan Kristian Biak inah kain a pasal tan Lal Isua hnena a dilsak thu, eng rau emawni hriattirnain a lo hre tlat mai a lo ni a. Chumi hmunah chuan in zawt chhuakin amah Tiken Debbarma pawhin a hriat loh hlana a nupuiin Biakina a lo tawngtaisak thu chu a han hre chiang a. Hindu puithiam chuan, "Pathian nung betu in ni a, in chungah hian eng pathian dang mahin tih theih an nei lo. Chuvangin Mahadeb pawhin engmah a tih sak thei lovang che u. Chuvang chuan haw ula chu Pathian nung hnenah chu eng (mombati) halin amah chu chibai buk rawh u," a ti ta a. Chu chu hriain Tiken Debbarma chu a mittui a tla ta zawih zawih mai a. Mahadeb Bokto chuan, "Enga ti nge i mittui a tlak? i lungngai em ni? tia a zawhna chu Tiken Debbarma chuan, "Lungngai lo ve, lungngaih vanga mittui tla ka ni lo. Chutianga Pathian nung Hmangaihtu awm reng si , Amah hre lo va heng thleng thlenga ka lo kal hi ka rilru a na a, ka mittui a tla a ni. Tunah chuan Ama hnenah chuan kalin Amah chu chibai ka buk tawh dawn a ni," tiin chu Hindu puithiam nen chuan an in then ta a ni. Chu puithiam chuan," Isua nen chuan a chang changin kan in hmu thin," tiin a sawi ve tlat bawk. Tichuan hepa leh a nupui, Geeta Debbarma, Kristian a nih hma pawha a pasal tana Pathian nung hnena tawngtaitu hi January ni 10, 2012 khan lawm em emin ka Baptist ta a. A hnu lawk, January ni 14 khan an fapa Matrict Exam tur pawh Hostel atanga lo chhuakin Thlasik khawvawt hnuai zing dar 6-ah Baptisma ka chantir leh ta a ni. Kohhranho tawngtaina avangin Lal Isuan, "In tuh loh rah seng turin ka tirh che u hi.." a tih chu a takin kan chang zel a ni. Lalpa chu fakin awm rawh se!

17

(Pu T. Nghaksanga hi BCM Missionary, Serh leh Sang khawih theihna nei tawh a ni a. Hriselna tha lo chung chungin sikul lian tak a enkawl a; hei bakah hian kohhran 30 chuang a vil bawk a, hah pawh sawi hlei thei lovin a tul thei hle a ni. A thawhrimna a thlawn lo ve. Pathian tihdamna leh tihchak tharna i dilsak ang u. Editor)

************************* BIRPARA WORK CAMP REPORT TLANGPUI Lalthianga Kawlni, BCM Venglai, Lunglei Work Camp kal kan rel : Tualchhung Mission Committee-in kumin (2011) tawp lama Birpara-a Work Camp neih a lo ruahman chu, Field lam mamawhna avangin a hmalama kal a lo ngai ta si a. Tualchhung kohhran in tinah Envelope te sema kalna tur senso tuak a lo ngaih phah ta a ni. Upa H. Lalthangmawia leh Rbt. Lalhmingliana Sailo leh Rbt. Rongura Sailo te kaihhruainain ni June 13, 2011 khan mi 17 leh Driver 1 kan vaiin mi 18 te chu Upa TL Hneman tawngtainaa min thlah liam hnuin, zing dar 6-ah Lunglei Police Thana kawm chhak atangin kan chhuak a, kan kohhran hruaitute leh member-te nen kan in bye bye liam ta a. Kal kawng hlim thlak : Tluang taka kalin Haulawngah zing thingpui kan in a, Thenzawlah Tukthuan kan ei phei a, kan kal leh ta nghal zel a. Sairangah thingpui kan in thla leh a, Sairanga thingpui kan in lai hian Khamrangah motor chesualin kawng a dang a, a tlang mai thei dawna a lan loh avangin Aizawlah kan let leh a, Durtlang lam kawngah kan tlan leh ta a. Vairengtea riah thlak tum kan ni a, tluang takin kan kal ta zel a Vairengteah chuan Thelma Hotel-ah Zanriah kan ei a. Hetih lai hian Upa R. Lalthanzauva nupui Pi Hrangthiangi a lo thleng a, khua a lum si a Kohhran Hall18

a riah ai chuan tiin, an in lamah min hruai chho ta a, an mi duhsakna avang hian an chungah kan lawm hle a ni. Pathian hnena kan tawngtaiho zawhah mut zai kan rel ta a. A tuk June 14, 2011 zing khua a lo var chuan Vairampur lam panin kan liam thla ta a, dar 4-ah Vairengte kan chhuahsan fel hman a,tluang taka kal zelin Silchar-ah zing thingpui kan in a, thingpui in no a te sawt hle mai! Sonapur-ah Tukthuan kan ei a. Tlai lam mi tam vang laiin Shillong khawpui kan lut thla a, kan zingah Aizawl bak la pel lo an awm nual avangin Shilong khawpui kan han tlan meuh chu an nghawng a fan sei thei hlawm khawp mai! Hawina lam apiangah hmuhnawm a tam si a! Tlai thim hlim bazar kal tam vang lai taka Guwahati khawpui kan han lut thla leh phei chu, an mitin hawina lam tur a hre tawh mang lo a ni deuh ber e! Mizoram House-ah Zanriah kan ei a, chaw ei khamah chuan Baptist House lamah pheiin Pathian hnenah kan tawngtaiho hnuin kan mu hahdam thei ta a ni. Zawh ngai loh lamtluang : Zawh ngai loh lamtluang zawhin June 15, 2011 zing dar 4-ah Guwahati chhuahsanin kan tlan leh ta vut vut a, he lam kawngah hian kan la kal ngai vak hlawm lo va, hmun pakhatah zing dar 8 bawr velah zing thingpui kan in a, hemi hnua kan han tlan leh chu, kan thian pakhat hi a chhungten an rawn phone a, In kal tluang em, khawi lai nge in thlen tawh? an rawn ti a.Ani chuan, Kal tluang e, kan thlen chin pawh ka hre tawh lo! saw tah a ni mai, a ti a, an in chhanna chu kan hlimpui dar dar hle. Tluang taka kal zelin tlai lam dar 4 bawr velah Birpara Mission Compound Gate bulah Nl. Lalthanzuali Hauhnar-in (kan kohhran atanga BCM Missionary ZBMS, Birpara Headmistress, Birpara Area Superviser ni bawk Zuali) min lo hmuak a, kan thla a muangin hah a dam sawng sawng mai. Birpara Mission Compound chhunga Zuali Quarter-ah hian kan innghat vek a. Inbual faia Zanriah te kan eikham hnuin in hmel hriattirna leh Pathian hnena lawmthu sawia tawngtaihona hun kan hmang a, chumi hnu chuan thlamuang takin kan mu ta a.

19

Bhaghat-para Biak In kan sa : June 16, 2011 zing khua a lo var chuan zing thingpui kan in zawh hnuah kan Biak In sakna tur hmun Baghat-para panin kan phei ta a. He khua hi kan awmna Birpara atanga km. 5 vela hla a ni a, Kohhran member chu chhungkaw pa 5 leh membes 21 an awm a, zingkarah hian Work Camp-a Biak In kan sakna tur hmun hma te chu kan teh fel a, Pathian hnena tawngtainaa kan hlan zawh hnuin Tukthuan ei turin kan haw leh rih a, chaw eikhamah chuan Biakin sak kan tan nghal a. Kan Biak In sak lenzawng hi a dung ft. 27 a vang ft. 15, a veranda ft. 9 a zau a ni a, a pumpuiin ft. 36 X ft. 15 a ni. Mizoram boruak dai nuam tak kalsan a, West Bengal-a hna zuk thawh zet chu Ni a sain khua a lum em em thin a. Kan cham chhunga sak zawh ngei kan tum avangin theih tawp chhuahin tan kan la a, zing dar 6ah a hmun kan thleng phei a, zan dar 7 velah in kan thleng leh thei hram a, khaw en chhung zawng kan thawk a ni deuh ber mai. Ni 3 chhung kan thawh hnu chuan kan chauvin kan hah ve tawh hle a. June 19, 2011 Pathianni tuk a lo thleng a, hmanhmawh tehchiam lovin zing kan tho va Tukthuan te kan ei kham hnuin inkhawm turin kan in buatsaih ta a, inkhawmnaah hian Birpara Mission Compound-a kohhran hoten thilpek min pe a, keini pawhin Pathian fakna hla te kan rem ve a ni. Bhutan lamah : Pathianni chawhnu lamah chuan Bhutan lamah kan leng phei ve leh thung a. Bhutan Gate bulah Bhutan-a kan Field Director Rev. Zirsanglianan min lo hmuak a. Bhutan ram chhunga hmun pawimawh chi hrang hrang te min fan kualpui thuak thuak a, vannei kan inti hle. Kan haw dawnah an chhungkaw chenna inah min hruai lut a, an rawngbawl dan reports tlangpui te min hrilh thuak thuak a, an rawngbawlna atan hian tawngtaipui an ngai hle. Kan tawngtaiho zawhin kan rawn hawsan leh ta a ni. Biak In sak kan zo ta : June 20, 2011 Thawhtanni tuk atang chuan kan hna thawh lai chu kan chhunzawm leh ta tlauh tlauh a. Nisa leh khaw lumin a ngai tein min lo la uap reng a; keini lah chuan zawh hman loh hlauvin theih tawp kan chhuah ve sauh 20

sauh zel bawk a. Kan Biak In sak hi a ban RCC, a bang Leirawhchan, a liang leh inchhun atan thir (steel) hman a ni a, a chung rangva a ni. Thing khawih hna hi a chak vak loh avangin kan zo hman dawn lo hial emaw kan ti a, amaherawhchu Pathianin a hun takah hna a thawk zel a, kar tluana rim taka kan thawh hnuin, a chung kan chih a, a bang kan ping zo va, kawngkhar kan vuah zo hman vek bawk a. June 25, 2011 Inrinni zing chaw ei hmain kan tih theih chin ang ang chu kan zo hman ta vek a ni. Hemi tuk hian Baghat-para kohhran hoten Tukthuan min buatsaihsak a, kan Biak In sak tharah ngei Pathian hnenah kan tawngtaiho a; chhun dar 12ah hlim takin chawhlui kan kilho ta a, tichuan Birpara lamah kan haw phei san ta a ni. Birpara Area kan hmu : Pathianni tuk hian Rev. F. Ramdinmawia nupui Pi Laldinpuii leh an fapa (RIP) thlan kan en a, rilru a khawih duh hle. Tukthuan ei khamah chuan Dobo-para lamah kan liam phei a, km. 10 vela hla a ni. Ringthar mi 9 laiin Baptisma an chang a, kan thil hmuh hian rilru a khawih duh hle. Chawhnu lamah Bhutan ramriah Pu C. Thangzela te thawhna hmun Tulsi-para-ah kan leng phei leh a. Tawngtaihovin zanah chuan kan inkhawmho a, inkhawm banah Missionary leh kohhranho te nen in pawlhona te kan nei a, an ni hian Zanriah min buatsaihsak nghe nghe a ni. Kan awm chhungin Missionary-ten theih tawpin min buaipui thin a, an chungah kan lawm hle a ni. Haw kawng : June 27, 2011 chuan Mizoram lam pana haw zai kan rel ta a, an Pastor-in tawngtaiin min thlah a, zing dar 4-ah kan chhuahsan ta a. Tluang taka kalin BCM Shillong Madanriting Biak In Hall-ah kan riak a, a tuk June 28, 2011 zing dar 4-ah Shillong khawpui chu chhuahsan lehin tlai lam dar 7 velah Aizawl kan lo thleng chho a, Bawngkawn Baptist House-ah kan riak a. A tuk June 29, 2011 zing dar 05:30-ah Aizawl chhuahsanin Pathian awmpuina leh kaihhruainain chhun dar 12:30-ah Lunglei Venglai chu kan rawn thleng leh ta a. Upa T. Lalchunga kan kohhran Chairman Pathian hnena lawmthu sawiin a tawngtai a, kan kohhran 21

member min lo hmuaktute nen hlim taka in chibai nak nakin, mahni in lam theuh kan pan ta sang sang a ni.

***********************

KRISTA PASALTHA Upa S. Darkama (1931 2011) (BCM Missionary Pension) kan then ta Upa A.Thannghina, Secretary, BCM Thingkah Upa S.Darkama hi Sathing hnam a ni a, Pu Hrenghaia leh Pi Hniarkaii te fa 5 zinga a tlum ber a ni a. Kum 1931 November thla khan Thingkah khuaah a lo piang a, a pa Hrenghaia hi Thingkah kohhran dintu a ni. Upa S.Darkama hi thiamna lamah chuan Pawl VI a ni a, Teacher Training a zo bawk. Pathian fakna hla za chuang lai a phuah bawk a ni. A hla phuah zinga mi, Kraws chu mi sual ber thihnaa thlan, tih phei chu hriat a hlawh hle. Upa S. Darkama hi a naupan tet lai atangin Nu leh Pa thuawih mi a ni a, mi nun ngil leh zaidam, thiante pawh hau ngai lo mi a ni. Kum 1951 October thla khan a piangthar a, kum 1952 April thlaah Pastor Thanzingan Baptistma a chantir a, 1953 ah rawngbawltua lak a ni. Hemi kum vek hian Zirtiri Bible School Serkawnah a zir bawk. January 25, 1960 ah Kohhran Upaa thlan tlin a ni a, Pastor Thanzingan a nemnghet a ni. Kum 1964 ah S. Lunghnemi nen Kohhran Dan Puitlingin an innei a, Pathian malsawmna changin Fapa 4 leh Fanu 4 an nei a, Tu 26 lai a nei bawk a ni. Pathian rawngbawl hi a hlimna leh a nuam tih ber a ni a. kum 1952 khan Tuikuk leh Takam zingah rawngbawlin a feh 22

chhuak a, Diltlang khuaah Voluntary-in zirtir hna a thawk bawk. Kum 1962 atangin BCM Home Mission hnuaiah thla khatah Rs. 5/(Cheng nga) chiah hlawhin heng hmunah te hian a thawk tawh a ni. 1. 2. 3. 4. 5. Udalthonasora Samang tlang Hmeithai tlang Varihawrawh kawn Hmunnuam 1962 - 1963 1964 1966 1967 1968 1969 1970

Kum 1971 ah rawngbawlna zau zawk nei turin Rampawn Mission Field Tripura, Udaipur District, Makhuchora hmunah ring lo mi te karah an chhungkuaa Pathian rawngbawlin hun an hmang a. Tripura Baptist Christian Union (TBCU) chuan kum 1987 1994 atanga a pension thlengin Serh leh Sang khawih theihna (License) a pe a, he rawngbawlna a chelh chhung hian Nupa tuak 66 a in vawntir a, mi 773 Baptistma a chantir bawk. Harsatna hrang hrang paltlangin 1st January, 1995 ah pension-in Mission Field a chhuahsan a ni. Pathian rawngbawl hna hi a thupui ber a nih avangin Missionary atanga a pension hnu, Thingkah khuaa a awm chinah pawh hian taksa chak lo tak chung pawhin, Pathian hnenah nun thapin chhim leh hmar, chhak leh thlangah Tisa, Rilru leh Thlarauva harsatna tawk te mi tam tak chawnghei leh tlaivarin Tawngtaina nen tanpui ngai te tanpui nan a hun tam zawk hi a hmang thin a ni. Amah hi mi inngaitlawm leh thuhnuairawlh tak mi a ni a, rawngbawlpuite tihnat leh hliam palh a hlau em em a, damlo leh khawhar chhungte ina len a, tawngtaisak pawh a taima hle a ni. Kohhran leh Pathian rawngbawlna ngai pawimawh mi anih angin kohhran hnena a thuchah, Lal Isuan, Keimahah awm reng rawh u, keipawh nangmahniah ka awm reng ang.., (Joh 15:4-8) a tih ang khan, kohhranhote hi Lal Isuaah leh Thutakah awm reng turin min chah ngawih ngawih a ni. He mi bakah hian Paulan, Kan rawngbawlna hi mi ten an dem lohna turin, eng kawngah mah mite 23

tluk phahna tur siam lovin, Pathian rawngbawltu kan nih hr rengin, engkimah mi mit tlungin i awm ang u, (II Kor 6:3-4) tiin kohhrante hnenah thu a chah bawk a ni. Kohhran khaipa ber niin, kohhranah Pathian rawngbawlna hetiangin a lo thawk tawh a ni. 1. 2. 3. 4. 5. 6. 1953 1961: KNP Treasurer leh TKP President, Secretary 1962 2002 : Inneihtirtu 1955 : Nu Pawl Secretary 1951 1993 : Sunday School Zitirtu 1954 1960 : Sunday Zing thawhlawm vawngtu 1965 1994, 2003 2004, 2008 2011 : Sunday School Superintendent 7. 1995 2003, 2009 2010 : BMP & BKHP 8. 2001 2002 : Kohhran Treasurer leh Bial Executive iMember

Hun engemaw chen atang khan taksa lamah harsatna a nei a, Khupna, Asthma leh Thisensang natnain a tlak buak a, Damdawiinah vawi tam tak a in enkawl hnu pawhin, ziaawm lam a pan thei tak tak lo va, tlem a a thawhkan peih hlek chuan Pathian biak inkhawm, zaikhawm, Sunday School Committee te chenin a thulh ngai lo a ni. Ni 26 December, 2011 zing Pathian biak inkhawmah pawh khan taksa chak lo tak chungin Krismas thuchah Kohhran hote hnenah a sawi a, hei hi Pathian biak ina hun a hman hnuhnung ber a lo ni ta reng mai. Kohhranhote nen hlim taka Kumthar hmang tura kan inbuatsaih, rin loh leh beisei loh takin Tahrik ni 30, December, 2011 tlai dar 5:25 khan hlim leh lawm taka a rawng a lo bawl thin, a Lalpa, Isua Krista hnenah kohhranhote leh a chhungte chu thlamuang takin min lo hawsan ta a ni.

24

Amah vuina hi In lamah leh Biakin lamah urhsun taka buatsaih a ni a, In lamah Lawngtlai North Bialtu Pastor Rev. Lalhmunsangan thuchah a sawi a, Rev. C. Ngurhnema, AGS, Service-in malsawmnain min tin a. Biak in lamah Rev. C. Lalbiaksanga, BCM Lawngtlai Area E.S-in thuchah a sawi hnuin Rev. Dr. K. Lalrinthanga, AGS, Mission-in malsawmnain hun a khar a, Thlanmual lam panpui niin, Rev. H. Lianngaia, General Secretary Pathian hnenah a tawngtai a, Upa S. Darkama lei taksa chu ui em emin kan thlah liam ta a ni.

************************

HARI-AH KUMTHAR Ngursailova Fanai Thuhma: Pathian khawngaihna avang liau liau a BD zir tura nupui fanaute leh Field ka chhuahsanna pawh kum hnih lai a lo ni ve ta der mai. Rilru erawh chuan Ziro a la ti thum tlut tlut reng a, nupui fanau te awmna anih vang ni mai lovin, a thlum a al ei za a, a thim a var pawh thlu lova Pu Hmingtea (Mission Promoter ni ta) te, Pu Faktea, Ziro (AICS, Aizawla M.Div. zir tum ) te, a ram mi te chawhmeh ei har tak tak ei min zirtir a, Apatani Pike-Pila, Mizo Saum rim nam hman mai, tui ti taka ei thei tura min lo kaihruaitute hnung zuia, khawi kip ka lo hrut ve thinna anih avangin, kan Apatani unaute hi rilruah an thi thei mawlh lo a ni. Tichuan kum bul intan atanga Tlumtea thlir taka kan lo thlir, Krismas chawlh pawh a lo thleng leh dawn ta reng mai. Nikhat chu AICS-a ka awm laiin phone a rawn ri a, Kumthar Speaker tura ruat ka nih thu Hari Baptist Kohhran Secretary Pu Gyati Napa chuan phur tak leh hlim takin min rawn hrilh a. Ka lawm hle rualin, a hmun nghak kan Missionary ten hmang zawk se a va tha em aw ka ti rilru a. Amaherawhchu, Senate of Serampore Curriculum thara Practical 25

Ministry Credit Subject kan hman tak avangin, kan Dean-in kan chawlh chhunga kan activities (Pathian rawng kan bawl dan) report form, dahkhah tur tam zet mai min hawn tir leh ngei dawn si a, hei hian Marks 100 lai a put ve si avangin, hemi form-a ka dah khah tur rawngbawlna kawng Pathianin min hawnsakah ka ngai a, lawm takin ka pawm ta a ni. Kumthar Programme: Krismas 2011 hun hlimawm tak Ziro-a kan kohhran te nen kan hman liam hnuin, Kumthar 2012 lo thleng tur chuan eng ang hun nge a lo herchhuahpui dawn tih kan hre hauh lo. Kumthar Programme-a thupui awmsa, In thiltih ang zelin Pathianin in chungah ro a rel dawn, tih ka sawi tur pawh Mizorama ka awm lai daih atangin ka inbuatsaih ve a. Mahse a mi siam hring faten a Thuthlung kan bawh chhiat avanga Pathian anchhia vaivuta siam i ni a, vaivutah vek i kir leh tur a ni, tih chu beisei loh tak maiin keini chhungkaw chungah pawh a lo thleng ve ta tlat mai. Dt. 30.12.2011 zing lam dar 9:45 ah phone call ngaihnawm lo fahran mai kan dawng a, kan unau zinga upaber, Aizawl a in leh lo neia awm chu Kal (Kidney) na avangin a boral tih thuin min deng ta. Tih tur leh tih loh tur, sawi tur leh sawi loh tur pawh hre lovin ka ham haih hle a. Nimahsela he kan chhungkaw chhiat tawh atang hian mite kal tlanga min hmangaihna hlu tak Pathianin min hmuhtir nasa hle. Kan thawhpui Mizo awm zawng zawngte kan inah lo kal khawmin, hunserh te kan hmang ve a, zan lam thlengin kan zaiho a, kan khawhar min hnem tak zet a ni. Tichuan, rilru pangkhing teh mahsela, Kumthar programme chu ka hmachhawn tho tho a ngai ta si. Mizoram ang lo takin Ziro kohhran te hian Krismas leh Kumthar programme hi a NI (day) tak ai hian, a dawn ni (eve) hi an hmang ropuiin an la urhsun zawk a. Hari Kohhran pawhin ni Dt. 31.1.2011 tlai dar 04:00 atangin programme an hmang tan a. Keini chhungkua bakah Senyi-Apu-a Tailoring Instructress Nl. J. Lalrempuii leh Mission ruhkawl, Missionary te thian kan tih mai, Tv. Dennis Khiangte, Mission Vengthlang, BCM Shalom member-ten min tawiawm a, kan phu loh thilpek te kan dawng a, kan thiam ang tawkin Mizo hla te kan sa ve a, programme hlimawm tak zan dar 07:00 thleng kan hmangho a. Dt. 01.01.2012 Kumthar Ni chu kan 26

thleng ve leh ta reng mai. Engtizia emaw ni teh reng ni, zing ka thawh atangin mihring tawnga sawifiah thiam rual lohin ka lung a leng em em mai a, ka insum thei lo anga ka chhungte ka ti hrilhhai ang tih hlauin, ka inthup nasa khawp mai. Zing dar 10:00-ah programme tan tur anih avangin kan chhungin Biak In lam panin ke-in muangchangin kan kal a. Biak In kan thleng a, sualin min bei nasa tulh tulh a, ka mittui chu dan rual a ni ta hauh lo mai! Thu ka sawi a ngai si, midang kuta han hlan chi a ni tawh si lo. Ka thusawi pawh ka tlingtla ve hram a ni ber mai e. Mahni insit hle mah ila, a thu hmanga thil ropui tak ti thin Lalpa chuan hna a thawh zui erawhchu ka beisei. Inkhawm banah Kumthar ruai Biak In kawtah kan theh a, Vawksa hrang kuttum tia leng lawng, khawvawtin a hmeh khal vek tawh ( a vawt hle a, Celsius degree 0 a ni) chu kut khur ngat ngat khawpin kan petfan a, Apatani Pike-Pila nen puar el euhin kan ei a, inkhawm ban zaikhawm te awm ve hek lo, Kumthar programme chu kan hmang zo (tiak) a ni ta der mai. Hari Khua chu: Hari khua hi Ziro phaizawla thingtlang khua pasarih zinga a lian pawl tak a ni a. In 300 400 vel a ni a. He khua ah hian Kristian chhungkua hi in 60 zen zawn an awm a, chung zinga chhungkaw 35 vel chu Baptist Kohhran an ni. Tunhma chuan Kristian pawh an tam thinin zaipawl tha tak an nei thin a, enkawltu an awm mumal loh vang nge (?) an tia-vai ta vek mai a, heti zat lek hi an lo awm ta niin an sawi. A rilru nat thlak hle. Hari Baptist Church: Ziro a kan awm ve tirh atanga kan kohhran kan tih ve thin chu Hari Baptist Kohhran hi a ni a. Kan in luah atangin Biak In hi km. 1 vel a ni a, ke pawhin rei lote kal a ni. Kan thlen tirh phat atanga min ta neih ve tlattute, keini pawhin taa kan neih, fa duat taka min duattute an ni. He Kohhran hi kawngpui atanga leilet thui lo te kal tlang ngaia awm a ni a. Kum 1995-ah Hari Christian Fellowship ten pawisa thawhkhawmin a hmun an lei a, dodalna nasa tak avangin Biak In sak theih a ni lo va, a hmun lei anih atanga kum sawm (10) dawnah March ni 4, 2004 ah Rev. B. Lalrinawma, chutih laia Arunachal West Field Director-in a hawng ta a ni. Kohhran te tak te a ni a, tunah hian member hming ziak hi puitling 50 vel leh naupang leh thalai 20 30 vel, an vaiin 70 27

atanga 80 vel an ni. A din tirh atang hian he kohhran hian thutchilha enkawltu mumal a la nei lo niin a lang a, kan awm ve lai hian Apatani nula Mudang Oje, Kolkata Mizo Chriatian Fellowship-ten an chawm chu a enkawltu Evangelist a ni a. A hriselna a tha lo hle chungin thahnemngai takin a thawk ve thin. Kum 2009 khan Pu. Rubu Takha chu Apatani Baptist Association (ABA) in Evangelist atan a lak belh a, a phak tawkah thahnem a ngai ve viau. Tunah hian a ram mi tho Nl. Koj Yabo chu Sunday School enkawltua dah leh a ni. Kum 2008 atang khan Biak In an sa tan ve a, an kohhran tet leh tlem ngaihtuahin an Biak In sak tur ruahman lah chu a puitham viau mai a, huphurhpui rilru tak, an rilru kan tihnual ang tih hlau takin, theihtawp kan chhuahpui ve a. BCM Headquarters in a phalsak angin tanpuitu zawnsak an ni a, BCM kohhrante leh mimal atangin tanpuina thahnem tham tak an dawng a. Tichuan kum 2010 kum tawp lamah Biak in chu luah theiha peih a ni a, 2011-ah ABA President Pu Habung Youngbo-an Pathian hnena hlanin a hawng ta a ni. Ka duhaisam chu hei hi: Kan sawi tak ang khan Hari Kohhran hian thutchilha enkawltu hi a la nei mumal lo niin a lang a, a ram mi (native worker) kan chhawr hian ralkhat atangin a vil a, kan Missionary sikula thawk ten an hman hun apiangin an va tlawh thin bawk. Kum khat hnua ka tlawh leh a ka rilrua lo lang han sawi ka duh a, chu chu he thu ka ziak chhan ber pawh a ni. Biak In lian tak, mawi tak mai an sa uaih a, a lawmawm hle mai. A langsarin Kristian dodalna hmuna hetiang Biak In tha leh mawi kan nei thei hi a ropui hle. Chutih rual chuan he Kohhran hi member pun lamah an thang mawh hle a, an thutthleng a la ruak teuh mai. An kohhran hruaitu tur patling an indaih loh avangin an khaw chhuak, Hapoli lama kohhran danga lawi te pawh kohhran (general) OB atan an thlan a ngai an ni hian hman leh hman lovin ral khat atangin kohhran enkawl hna an rawn thawk hram hram thin. He an than mawh bawk hi eng nge ni ang aw? tiin ka ngaihtuah ve nasa mai a, ka rilrua thu mu hnu rawn tho leh awm chu hei hi a ni. Kum hnih kal ta vel khan an kohhran Secretary hian an kohhrana Mizo Missionary, Hari-a awm chilh tur Field Director hnena dilsak a, 28

hma lakpui turin min sawm tawh a, amaherawhchu a ram mi thawktu an awm tho avang leh BCM Missionary te pawhin a khat tawka an tlawh reng tho avangin, hma ka lakpui duh ta lem lo va. Mahse kum a lo vei a, hun a lo liam zel hnu pawha hmasawn lam an pan mawh viau tak atang hian khatih hun laia an Secretary-in min ngenna kha ka rilruah a rawn ri nawn leh a. Chuvangin Kumthar 2012 programme report khar nan ti hian duhthu ka han sam teh ang Hari khuaah hian BCM hian Mizo thawktu dah ila, anin chhun zan zawma thutchilin a vil ang a, kohhran enkawl mai bakah Home Visit leh House Fellowship- ah pawh hma a hruai zel ang a. Tichuan reiloteah tuna Hari Biak ina thutthleng ruak awm teuh te khu a lo khat ang a, kohhran hruaitu rin tlak leh fel tak tak kan chher chhuak ang a, Ziro Valley-a ABA hnuaia kohhran te zinga te ber leh thangmawh ber ni bawk si khu, a lo thang lianin hma a lo sawn chho ve dawn a ni. ******************************* BCM MISSIONARY-TE TANA HRIAT TUR PAWIMAWH - Mission Promoter BCM Missionary-te hriat tur thu pawimawh tlem lo tarlang ila a tha awm e. Missionary hna hi hna zahawm leh pawimawh tak anih avangin, BCM Mission Handbook bung 4-na Field chhung fel taka inenkawlna atana siam Thawhhona Boruak sawi angin, a huhova rawngbawl kan nih avangin midangte nena thawhhona boruak tha kan neih theih nan hengte hi i ngai pawimawh tlang ang u : a) Mahni nun, tawngkam chhuak, taksa leh incheina vawn thianghlim leh fimkhur a tha.

29

b) Rawngbawlpui dangte thik thama inkawm fal bik leh intih unau zual bik lutuk loh a, a tul anga inkawm leh thiltihho dial dial thiam zawk tum tur a ni. c) Thawhpuite leh midangte tana thawhpui nuam ni thei turin an tana phurrit ni lo va, malsawmna nih tum zawk ila, hemi kawngah hian entawn tlak nih theuh i tum ang u. d) Thawhpuite ngaihsak a, a phu te chu lawmpui leh chawimawi thiam a tha. A eng zawnga thil thlir a, dawhthei leh chhel taka awm a, vui leh phunchiar lutuk loh a tha. e) Mahni thawhna hotute laka intukluh leh zahna lantir hi a mawi a, zir theuh a tha hle. Mahni theih ang tawka hawihhawm leh mawia nun theuh i tum ang u. f) Midangte rilru tihel zawng leh hotute ep zawnga titi leh midangte fuihpawrh hi chin miah loh tur a ni. Thawhhona siam that nana tul tak chu tha taka sawi mai tur a ni a. Lam tang siam tum ang maia thu te tak te khel zui chiam chiam lo tura insum theih theuh a tha a ni. g) Nitin a thu leh tawngtainain Lalpa hi pawl tum tlat ila. Mahni chan tawkah lungawi leh lawmna chang hriat theuh i tum ang u. h) BCM Service Rules sawi angin, mahni thawhna Field Director kal tlang lova Headquarters emaw, hotu lian zawkte emaw dawr tur a ni lo. i) Headquarters hotute emaw, Field Director / kan thawhna hotute emaw rawn hmasa lova mimal, pawlho leh kohhran dawr a, tanpuina ang chi pawisa, volunteer worker leh thildang dil/ zawn loh tur a ni. Hetiang hi a tul anih chuan Field committee-a thlen emaw, hotute be rawn hmasa chunga, an remtihnaa tih tur a ni. Field Director leh hotu dangte pawhin, thawhpuite khap zawng vek 30

ni lo va, Field-a kohhran leh Mission sikul te mamawh chi hrang hrang hriatpui a, a tul dan azira puitu zawn nachang hriat a tha hle. j) Station khata rawngbawlho te chu thlarau lam inpum khatna leh thawhhona boruak tha a awm theih nan, a zing thei ang bera Pathian hnena tawngtai leh inpawlhona neih thin a tha a, chawlhkar khatah vawi khat tal chu tawngtaiho ngei tur a ni. ******************

HRIATTIRNA PAWIMAWH 1. Missionary Tlangau Man : BCM Mission rawngbawlna chanchin hre chaka Missionary Tlangau la (subscribe) tu zawng zawng te hnenah lawmthu kan sawi e. Kan Chanchinbu hi man chawia chhut a ngaih avangin a lakna man (subscribtion fees) kan pek theuh a ngai a. Pe tha te hnenah lawmthu kan sawi a, pe mumal lote pawhin kohhran Agent kal tlanga rawn pe turin kan in ngen a. Mahnia la te pawhin lak man pek hi i ngai pawimawh ang u. 2. Reports Pek a pawimawh : i) Mimal, pawlho leh kohhran anga Field tlawh leh rawngbawl ten kan Field tlawh reports taima takin i pe ang u. ii) Mahni tualchhung kohhran emaw, Bial emawa Mission convention leh Mission lama kan in tihchak tawnna atana programme kan neih kan hman dan Hqrs.-ah reports pek i taima ang u. A chipchiara pek tul kan tih kher loh pawhin tawi fel deuh pawhin a pek theih tho a nia. iii) Kan chhungkua/ kohhran atanga Missionary te pui tura kal chhuakte Hqrs.-ah i report thin ang u. BCM Assembly rel tawh angin hetiang mahni inpea kal tur te hi Hqrs. Office-ah emaw, an awmna Area Executive Secretary te hnenah emaw, Mizoram pawn atanga kal tur an nih chuan Guwahati-a Regional Director hnenah emaw tal in report a, Field-a awm dan leh hnathawh dan phung hotuten an lo hrilh hnu chauha kal tur a ni. Hei hi inkhap tumna vang a ni lo va. Kan zavaia 31

rawngbawlhona, a bikin Field-a kan rawngbawlna atana tul a nih vang a ni. Hemi thuah hian Missionary Sikul Head te, Evangelist leh Director te pawhin, min pui tura hetiang mite hi kan koh dawnin, hotute hnena kal hmasa phawt tura kan hriattir ngei ngei a ngai tih i hria ang u. 3. Rawngbawl Dan reports : Missionary ten kan rawngbawl dan, inkhawmpui leh programme dang kan hman dan, kan lawmna te, kan lungngaihna te, tawngtaipui kan ngaihna te, puih kan ngaihna te Hqrs.-a hotute hnenah i sawi zel ang u. Thlen duh kan neih te chu Hqrs. leh Field-a hotute kal tlang ngeia thlen hi kan tih tur- Service Rules sawi dan pawh a ni.Hotute hnenah chauh pawh ni lovin min tir chhuaktu kan kohhran leh min lo tawngtaisak thintute hnena reports pek i ngai pawimawh ang u. 4. Pawisa Thawn chungchang : Mission rawngbawlna atana Field/ Missionary te hnena pawisa thawn chungchangah mimal, pawlho leh kohhran ten, Hqrs. leh Field-a hotute kal tlang chauhva thawn thin tur a ni e. Entir nan, kan Evangelist chawm te hlawh, Biak in sakna, etc. chu Hqrs. Office-a Mission worker hnenah thehlut ila, anin Receipt lo siamin, a dawng tur te hnenah a lo thawn ve mai dawn a ni. Hetianga pawisa thawn hi a him bakah, Missionary te leh Field-a an hotute inkar boruak a siam tha a, an thawhhona a ti tha a. Chu bakah Hqrs. kal tlang, Internal Audit pawhin kum tin an endik vek thin a ni. 5. Missionary Tlangauva thu chhuah : Missionary te leh a tirtu kohhran te kan in hriat pawhna ber Missionary Tlangauvah hian Missionary ten taima takin thu chhuah i tum ang u. Kan rawng bawl dan chanchin, kan sikul naupang/ kohhrana ringthar te, etc. chanchin te pawh, kohhran min tirtuten lawmthu an sawi a, an lo tawngtaisak theih nan, i ziak thin ang u. Sei leh tlawr taka ziak kher a ngai lo va, kan theih ang tawk theuh hi zahpui lovin, Editor hnenah i thawn ang u. Anin a tul angin a lo chhuah mai dawn a ni. A ti theite chuan Missionary Tlangau kawm chhung lama e-mail 32

address-ah hian thawn ila a lawmawm em em ang. Tun thleng hian thla tina chhuah tham thuziak/ reports a la awm meuh lo fo a ni. I han tang thar leh teh ang u. Mission Promoter, BCM.

33