Estd.

2007

ROHLU
JUNE 2009

THE WESLEYAN METHODIST CHURCH OF EAST INDIA MIZORAM

ROHLU
( Thla tin chhuak )
A man : Thla khat Rs.10 /Kum 3-na June 2009

FEditorial : E khai, kum chanve kan thleng leh ta. Hun hi a va kal chak ve le! Hun a kal chak kan tih chuan Pathian malsawmna kan dawng tihna a ni. Pathian venna leh enkawlna avangin kan taksa a hrisel a, kan rilru kan thlarau pawh min venhimsak bawk a; Pathian leh kohhran tan te, mahni leh chhungkaw tan te, buai takin hna kan thawk thei a, chuvangin kan rin aia chakin hun a kal a ni. January thla leh June thla inkar chhung hian kan kohhranah te harsatna leh buaina a thleng tam lo va, Pathian venna kan chang zel niin a lang a, a lawmawm hle mai. Kan rawngbawlna theuhah, local lian leh local te-ah pawh kan lawm tlang zel niin kan hria a. Kohhran member pawh tlem tlem chuan belhchhahin kan la awm zel a, Pathian hnenah lawmthu i sawi zel ang u. Aizawl Local Board rorelna chuan June ni 29 leh 30 khian nilengin Local Hruaitute tan Seminar ( Training ) neih an rel a. Hetah hian kohhrana chanvo nei zawng zawng chu tel vek tur a ni ang. Ni hnih teh meuh uluk takin intuaitharna an nei dawn a. Pathian thu leh Inkaihhruaina leh Rawngbawlna kawnga kan mamawhte Rawngbawltute leh Upa senior ten an zawi ang a. Sawihona duhawm tak neih a ni bawk ang. Zanriah tuihnai tak kilho thin a ni bawk ang. Champhai circuit leh Kolasib circuit pawhin programme siamin Pastor-te pawh chah theih an ni ang. Hun tha

Editorial Board Editor Joint Editor : Rev. Dr. Chalhnuna. : Rev. C. Zalianthanga. Rev. Lallawmthanga. Lalringliana. Rochharliana. : Lalthangzauva. : Lalromawia.

News Editor Cir. Manager

Office Address : Wesleyan Methodist Church, Sub post office : Chanmari. Aizawl. Pin code : 796007 Telephone No. 2305845 / 9436351889 / 9862316121. Rohlu-a thu chhuah tur nei chuan engtik lai pawhin

editor hnenah pek theih reng a ni. Rohlu-a thu chhuah te hi editorial Board ngaihdan a ni vek lo. Regd. No. J. 22020 / 1/2006-DC(A) 93: Dated Aizawl, the 27th March 2007.

Tun lai huna thil hmuhchhuah ropui ber chu, Mihring hian a ngaihtuah dan thlakin a nun dan a tidanglam thei a ni tih hi a ni. - William James

Local News : Kolasib Circuit - Ni 26/4/09 Pathianniah District hmeichhe hmingin Kolasib ww-ten Bawktlang leh Gosen bial an fanga an hlimtlang hle. Ni 1/5/09 leh 8/5/09 khan Bawktlang Biak In hmun laiin Circuit huapa hnatlang neih a ni. Kolasib local-ah hian ni 25/ 5 /09 atang khan chawlkar hnih chung Crusade neih a ni a, Speaker Evan Runthanga a ni a, kohhran mipuiinhlawk thlak an ti hlea chhunzawm zel pawh an beisei a ni. Kolasib Circuit Hian Local thum (3) ah Biak In an mamawh a, circuit thuchhuah chuan local tinah tawngtai beihpui thlak a, tan la turin kohhran mipuite an ngen a ni. Aizawl Circuit : Aizawl local te hi pathian kaihhruaina changin an hlim tlang hle a, kohhran chhunga evangilist-ten hmun hrang hrang ah rawngbawlna neiin an tul tlang hle hlawm a ni. Upa bial then indawtin kohhran in remchangah crusade chawl lova neih chhun zawm zel a ni bawk. Edenthar Biak in pawh chawl loa sak chhunzawm zel a ni bawk. June ni 29-30 hian Aizawl local chhunga kohhrana chanvo nei ( Hruaitu) zawng zawngte tan Seminar cum Retreat buatsaih tum a ni. He Seminar hi kohhran in hma a sawn zel theihna tura Aizawl Admin Board-in a rel a ni a, deptt hrang hranga hruaitute kim taka kal theuh turin a sawmin a ngen nghal bawk a ni. Awy te pawhin Pathian kaihhruaina changin tunah hian MMEM leh rawngbawlna zau zawka an neih theih nan zaipawl tha tak neithei turin hma an la tan mek a, Half yearly meet ropui taka hman an tum niin thu kan dawng bawk. An ruahman dan chuan June ni 27 hian Outdoor game neih an tuma, ni 28 sunday chawhnu hian fellowship hun hlimawm tak hman an tum bawk a ni. Lawngtlai local te pawhin Biakin thatak nei tumin hma an la mek a, kohhran mipuiten thilpek leh tawngtaiin Lawngtlai local te hi i hre reng thin ang u

Champhai Circuit : Pathian kaihhruaina changin Champhai local te hi an hlim tlang hlea, May ni 25th - June 6th inkar khan camping chhawng 2 Evan. Office Kailiana hovin an nei a, kohhranho an hlim tlang hle nia thu dawn a ni. Champhai Circuit te hian Fanau malsawmna an dawng nasa a, bialtu Pastor Rev. Lallawmthangan champhai circuit chhungah hian tunhnai mai khan naupang thahnem tak Baptisma a chantir a ni. Champhai kohhran zaipawl Pathianin mal a sawm a, zaipawl nungtak neiin Champhai North Branch Bible Society Campaing-ah te zaiin, rawngbawlna zau zawk nei zel turin tunah hian anin puahchah mek a ni. Sazep local te Biak in thatak pathianin a pek hnuah Thlarau Thianghlim kaihhruaina changin kohhranhote an hlim tlang hle a, biak in an hawn atanga vawin ni thleng hian Chawl lovin inkhawm hun bik kan neih thin nilo ah pawh Inkhawm hun hlimawm tak an hmang ziah thin niin thu kan dawng. Champhai Circuit hi Rev. C. Zalianthanga D/S te nupain bail fangin an tlawh a, hun hlimawm tak an hman kan Bialfan Report : Dt 15-17. 5. 2009 khan Rev. C. Zalianthanga D/S leh Rev. S. Neihkhuaia te chuan lawngtlai ah bailfang leh Plan hmangin tluangtakin an kal a, Lawngtlai ah hian ni thum chhung an chama, an cham chhung hian Kohhrante kanna lehBiakin hmun turte an en nghal a ni. Tun hmaa biak in hmun a tana an lo hual deuhte a rem chan leh tak lohah chuan, hmun danga mi an lungdum takmai an huala, Lalpa min pek ngei theih nan kohhran mipuiten Pathian hnenah i dil ang u. Tin an rawn haw hnu Dt 32.5.09 sunday khan member thar in sarih (7), mi 29-an lawm lut a, mi dang pawh Pathianin rawngbawlpui tur min la pe zel dawn niin a lang a, Pathian hnenah lawmthu sawiin i tawngtai zel ang u.

THLARAU THIANGHLIM : Lalpa leh Nunna petu Rev. Dr. Chalhnuna Chang thlan: Thlarau Thianghlim nei rawh u ( Joh. 20: 22) Thuhmahruai : Pentikos Pathianniah te khan in Biak Inah Thlarau Thianghlim thu in ngaithla em? Kohhran pawl hrang hrang Biak Inah chuan Thlarau Thianghlim leh a hnathawh chanchin ngaihthlak a ni thin a. Pentikos ni-ah pawh ngaithla lo leh sawi lo ni ta ila kan local ( Kohhran) chu Thlarau lamah eng ang nge ni ang le? 1. Thlarau Thianghlim nei rawh u titu hi Lal Isua a ni a. Isua chu Lalpa a ni a. Tisaa a awm zel dawn loh avang leh mihringten kan mamawh em avangin Thlarau Thianghlim nei rawh u, min ti a ni. Chu Thlarau Thianghlim tel lo chuan Mihringin engmah a ti thei lo. Mihring tan Thlarau Thianghlim chu engkima engkim a ni. Heti hian lo sawi zel ila: Thlarau Thianghlim chu NUNNA PETU LEH LALPA A NI. Tinungtu chu Thlarau a ni.Chuvangin, Lal Isua ngeiin Thlarau Thianghlim nei rawh u min ti a. Min sawm a. Paula phei chuan tumah dim lovin Krista Thlarau nei lo chu amaha mi a ni lo a ti hmiah mai a. ( Rom 8:9) 2. Lal Isuan, Thlarau Thianghlim nei rawh u min tih chhan chu tihnun kan ngaih vang a ni. Thlarau Thianghlim chauh hi nunna petu a ni. Adama, hluma siam tinungtu pawh Nunna Thaw a nih kha. Hebrai tawngah Nunna te, thaw te leh thli te, thlarau sawina te hi thu pakhat ( Ruach) a ni. Kan Thlarau pianthar tirtu pawh Thlarau Thianghlim a ni a, tithang lian tur leh tichak tur pawhin Thlarau Thianghlim bawk kan mamawh. Chuvangin, Thlarau Thianghlim nei rawh u Lal Isuan min ti. 3. Lal Isuan, Thlarau Thianghlim nei rawh u min tihna chhan dang leh chu kan bawlhlawh em vang a ni. Mihring chu sual leh fellohnaa khat kan ni a. Mihringte sual hi tui leh petrol hmanga silfai chi a ni lo va, krista thisen leh Thlarau Thianghlim te chauhvin an tifai thei a. Thlarau Thianghlim chu Tithianghlimtu ( Sanctifier) a ni. Ringtute rilru, thinlung, ngaihtuahna leh mizia, lang thei leh lang thei lote tithianghlim theitu chu Thlarau Thianghlim a ni. Thlarau Thianghlim chu Awmdan danglamtirtu a ni. Ka thinlung sual bawlhhlawh hnu kha, I temple-ah chantir la tih hla hi kan vaiin kan mamawh a.

Sermon :

Lal Isua chenna tlaka siam thei chu Thlarau Thianghlim chauh a ni. Heng te pawh hi Thlarau Thianghlim hnathawh avang chauhvin kan nei thei a. Chungte chu : Hlimna te, thlamuanna te, dawhtheihna te, thuhnuairawlhna te, rinawmna te, remna te, hmangaihna te hi. Thlarau rah atang chauh lo chuan mihringah thil tha a chhuak thei lo. Chuvangin Thlarau Thianghlim nei tura Lal Isuan min sawm ang ngei hian: Thlarau Thianghlim i nei theuh ang u. Thlarauva khatin i awm theuh ang u. Thlarau hruaia awm apiangte chu pathian fate an ni si a. Amen. KHAWIAH NGE LAL ISUA A AWM Chang thlan : Tin, chung thu chu a sawi zawhin an hmuh reng chungin, vana hruai chhohvin a awm ta a. (Tirh. 1 : 9) Kan Thupui khawiah nge Lal Isua a awm tih chu kan Bible chang thlan hian kawng khat chuan a chhang dik nghal a. Lal Isua chu Vana hruai chhohvin a awm tih min hrilh a. Fiah lehzuala kansawi zel chuan Pathian kut ding lamah chawimawiin, Thuttirin a awm tih kan hmu bawk, (Tirh.2:30,33). Amah, Isua Krista kaltlanga Pa Pathian hnena kal zawng zawngte chu a tawpkhawk thlenga chhandam kan nih vek theih nan keimahni min tawngtaisak turin chatuanin a nung reng a ni, ( Heb. 7: 25). Chutichuan, Lal Isua chu vanah Pathian dinglamah a thu a, puithiam Lal ber a nih ang ngeiin min tawngtaisak reng a. Nakinah, khawvel tawp hunah Amah ngei hi lei leh vana thuneihna zawng zawng neiin, chum te nen ropui takin, minung leh mithi rorelsak turin ropui takin a lo kal leh dawn a. Leia a awm laia a thusawi Ka lo kir leh anga ka hnenah ka la ang ch e u a tih kha a thleng tawh ang. ( Joh. 14:3). Lal Isua chu kan hnenah a awm tiin kan thupui i chhang teh ang. Lal Isua vana lawn hmu-tute khan an hmuh theih chhung chu an thlir reng a, chhumin a hlaih hnu thleng pawhin hmuh leh

chakin an thlir reng ni awm a ni. Vantirhkoh pawh khan Galili rama mite u,engati nge vanlam ena in din reng? a ti hial a nih kha. Isua vana lawn thlahtute kha an lunglengin an khua a har viau kan ring awm e. Chutiangin an khua ahar lo. Lawm em emin Jerusalem khuah an kir leh ta, tih kan hmu,( Lk.24:52). Engvangin nge lungleng leh khawhara an awm loh? Engvangin nge lawm em ema Jerusalem lama an kir leh? Heng zawng zawng chhanna chu hei hi a ni: Lal Isua chu an hnenah, an zingah, an chhungah a chen tak vang a ni. Amah ngeiin, Fahrahin ka kalsan lo vang che u a tih ang ngeiin an khua a har lo. Chuvang chauh pawh a ni lo, Amah Lal Isua ngeiin, Ngai teh u, kei kumkhuain, khawvel tawp thleng pawhin, in hnenah ka awm zel ang a tih kha dawt nilovin, a tak takin a thleng nghal a ni. Lal Isua chu ringtute thinlungah Thlarauvin a nung a. Paula pawhin Krista chu keimahah a nung a a ti a. Ringtuteah chuan Isua Krista chu a awm thin. kawng lehlama sawi chuan Krista Thlarau ngei chu keimahniah a awm avangin khua a har lo. Chutichuan, Lal Isua chu vanah Pa dinglamah min sawisak turin a thu a, kan hnenah Krista Thlarau ngei chuan min awmpui reng bawk a. Tichuan hlim takin Pathian fakin kan awm a nih hi! Lalpa chu fakin awm rawh se! Amen. Sawmna leh Ngenna Tv i en thin em? MMEM chanel hi i hri em? Hei hi Mizoram Media Evangelical Mission lamtawi a ni a. Thu leh hla hmanga rawngbawlna ropui leh pawimawh tak a ni. Heta zai tur leh Thu sawi turin kan kohhran pawh sawm leh hriattir kan ni a. A lawmawm hle a ni. Kan Thalai Zaipawlte pawh inbuatsaih thei se a tha ang. Tin, Sermon pawh inbuatsaih thei kan awm chuan a tha ngawt ang. Pathian leh Kohhran tan. Amaherawhchu, buana hmaa kherh an tih ang deuhvin, Hla sa tur emaw, sermon sawi turin nasa taka inbuatsaih a ngai a. Inchei danah te, Hla thu-ah te, sermon thupuiah te pawh mite hmaa pho chhuah tlak ngaihtuah a ngai ang. Pathian leh mihringte mithmuha mawi taka awm a ngai si a.

Dist. Admin Board Committee neih a ni : Dt. 4.6 2009 hian Dist. Admin Board Committee Aizawl ah neih a ni a, member 12 an tel thei. An Rorel tlang puite chu: 1. Tuna Biak In la neilo, sa tura inbuatsaih mek te, hnathawh a chak theih nan Special Budget pek vat a pawimawha, Local tinah tan la tlang tura infuih nise. 2. Biakin hmun ramte leh Pastor Quaters te hi Dist. property ah dah vek nise. 3. Rohlu chanchinbu kalzel dante, 4. Regional Conference-in a lo rel tawh Regional Spiritual conference chungchangte leh, 5. Local hrang hranga Biak in hmun lei sa leh a sak chhunzawmna hna a kal chak theih nana hma lak te a ni. Pathianin i sualnate a hneh thei a ni: J.W. Sermon Thlarau dana awm, chungril lam sual chambang la nei si, a thil tihna kawng engkimah sual bet la nei si, amaherawhchu, chung sualte tan chuan hmun kian bik si lote hi an tan thiam loh chantirna reng a awm tawh lo tih a ni ve tho ang em? I thinlung chu chutianga a la awm a, i pathian ngaihsak lohnate avang chuan in tilungngai duh suh. I chapona, mahni hma sialna, rin lohna, i thu sawi leh thil tih engkima bet tlat avanga amah anna, pathian ropuina chang zo lo i nih avang khan phunnawi duh hek suh. Nangmah i inhre chiang tluk bawka i thinlung chhung sualna zawng zawng hriat chiana awm tur chu hlau suh. A ni, pathian duh zawng chu hei hi a ni, nangmah i inngaihtuah dan tur aia sang chuan inngaihtuah suh. I tawngtai zel dan tur pawh heti hian ni rawh se:- Ka thlarauvin a tuar theih tur ang zelin, ka chhungril lam sual thukzia min hriattir la, chapona chhunga thuhruk tlat, rin lohna zawng zawng puang chhuak ang che. I tawngtai chhan a nih rualin i thinlung khuhna hawn a ni bawk ang; chutih hunah chuan engang rilru pu nge i nih

tih a entir dawn che a ni. I rinna chu a tling ta lo tihna a ni lo tih hria ang che. Tlawm mai zawk rawh. Vaivutah thuin inngaitlawm ang che. Nangmah kha chu engmah lo, engmah lo aia te zawk lehhlutna reng neilo i nih hria ang che.Chutih hunah pawh chuan In thinlung mangang suh se, hlauh pawh hlau suh se. Pa hnena min sawipuitu, Isua Krista mi fel chu kan nei a ni tih hi vuan nghet tlat zawk ang che. Lei aia van a sang zawk angin, ka sualte ai chuan a hmangaihna chu a sang zawk ti bawk ang che. Chutiang taka mi sual an nih inhria te chungah chuan pathian chui zahngai thei pathian a ni a sin! Chuvangin, pathian ngei chuan a hmangaih tawh che a! A fa i ni e! thil tha lo zawng zawng lakah chuan aveng ang che. Sual hlira khat taksa, nangmaha khen beh nihna nei tawh kha Pathian hmangaihna thianghlim tak chauh lo chu i thinlungah engmah chambang a awm dawn tawh lo a ni. A lawmawm hle lo maw? Thlmuang takin awm mai rawh Lalpa i pathian chu i thinlung zawng zawngin, i thlarau zawng zawngin, i chakna zawng zawngin i hmangaih tur a ni. (Marka 12:30). Rinawmna chu a ta a ni a, a thutiam tawh chu a hlen zel ang. Sipaihote Lalpan a hlen chhuah hma loh chuan, dawh thei taka rinna thil tih chhunzawm zel, hmangaihna bawih nih bang lovin, lawm taka inremna neih, inngaihtlawm taka innghah hmiah mai zel, phunchiar lova tlawm zel, thahnemngai taka beisei chunga lo nghah fan fan chu nangma lam mawhphurhna

Article:

RAWNGBAWLNA

Nl. C. Lalnunmawii

Rawngbawlna han tih hian thil tam tak a kawk a, Rawngbawlna hi chi tam takin a thliar hran theih bawk a ni. Mi tinte hian kan hma zawnah rawngbawlna chu kan nei theuh a, kan nitin nun dan leh kepen dante, midangte tana kan tangkai ve theih na zawng zawng te pawh hi kan rawngbawlna tih hian a huam pha vek awm e. Awle, rawngbawlna tih hian a huam zau thei hle a. Kohhran leh khawtlang tan te, chhuangkua leh thenawm khawtlang tana mi tangkai nih hi rawngbawlna chi khat a ni ve tho a. Amaherawhchu kohhran leh khawtlanga inhmang lo te pawh hi rawngbawlna neilo leh rawngbawllo an ni ngawt lo va, keimahni phak tawkah rawngbawlna chu kan nei theuh a ni. Mihring dinhmun a in anglo ang hian rawngbawlna kan neih dan pawh a in anglo theuh a. Nu-in a fa chu a mawhphurhna leh a rawngbawlnaa a ngaih a, tha tak leh puitling taka a chher chhuak a nih chuan, chu a rawngbawlna chu thatakin a hlen chhuak tihna a ni. Chuvangchuan, mitinte hian mahni phak tawkah hian rawngbawlna chu kan nei theuh a ni. Chu kan rawngbawlnaah chuan kan theih tawp kan chhuah a, pathian rawn chung zela ke kan pen hi a pawimawh takzeta. Rawngbawlna chu kan ngaihpawimawh a, kan tihtur ang kan tih a, kan hlen chhuah ngei hian mimal nunah pawh hlimna min pe a, rinawmna a ni bawk. Hmasawn lehzelna te min thlen a, chuvang chuan mitinte hian kan rawngbawlna hi kan ngaihpawimawh a tul hle awm e. Rawngbawlna chi hrang hrang kan phak tawkah kan nei theuh a, chungte chu a then then han tarlang ila :1. Tawngtaia Rawngbawlna : Tawngtai rawngbawlna hi ringtute nun kawngah hian a pawimawh takzet a, Pathian nena kan inpawl theihna hnaivai ber ti hial ila kan tisual awm lo ve. Pathian ringtute chuan kan tih ngei ngei tur thil pakhat a ni. Midangte tana kan tawngtai hian nasa takin hna athawk thei a, a pawimawh em em a ni.

2. Thilpeka Rawngbawlna : Thilpeka rawngbawlna han tih hian thil tamtak a huam telve thei a, miharsa leh mamawh ngawih ngawih te, tanpuingai te kan neih tawk leh kan theih tawka kan tanpuia thilpek kan pekte hian rawngbawlna a ni a. Inkhawmnaah thawhlawm kan thawh te pawh hi kan rawngbawlna chu a ni tho a, sawma pakhat pathian tana kan hlante hi rawngbawlna a ni vek a ni. Pawisa faia thawhlawm leh thilpek dang dangte kan pe theilo a nih pawhin, kawng danga miharsa te leh tanpui ngaite kan theih ang tawka kan puih chuan rawngbawlna a nivek tho a ni. 3. Thuhril Rawngbawlna : Thuhril rawngbawlna hi mi zawng zawngin kan neivek thei kher lo va, a ti mi leh Pathian kohna dawngbik an awm. Thuhril rawngbawlna hi thil awlsawm tak a ni lo va, Pathian kohna chang te chuan rawngbawlna nei turin hmun hrang hrangah Chanchin Tha hrilin an vak chauk a, an hun zawng zawng Pathian tan an hlan a, mi tam takin chhandamna an chang thin a ni. Tin, Sunday School lamah zirtirtuah tangin Pathian thu naupangte hrilha rawngbawlna neih theih a ni. Naupangte hnenah Pathian thu sawiin nungkawng dik kan inkhawhhmuh thin a, an rilruah Pathian thu nung, thutak nunna, Chanchin Tha puan -chhuahna kan nei thei bawk a ni. Heng bakah hian rawngbawlna chi hrang tam tak a la awma, kan sawi seng awm lo ve. Mi thenkhat chuan Zaia rawngbawlna te neiin Pathian thu an tlangau pui thin bawka. Zaia rawngbawlna nei thin te hian Pathian hmangaihna ropui leh thu tha tak takte hlathu hmangin an aw mawi tak nen an puang chhuak thin a, mi tam takin chhandamna an chan phah hial thin a ni. Heng a chunga rawngbawlna hrang hrang kan sawi tak te khi kan rama kan rawngbawl dante a ni tlangpui hlawm a, heng bakah hian mi tinte hian talent leh rawngbawlna hrang hrang kan nei bawk. A pawimawh ber zawk chu Keimahni leh kan rawngbawl sak kan Pathian inkar a fel em? A rawng kan bawl sak danah hian a lungawi ang em? tih hi apawimawh lai ber chu a ni. Chuvangchuan mitinte hian kan rawngbawlna ngaipawimawh in Pathian ropui nan chauh theihtawp chhuahin kan rawngbawlna te hlen chhuah theuh i tum ang u.