SIMEIKHU KARTIN CHHUAK THINGSULTHLIAH

Dt. 27 October 2012 (INRINNI) PHEK- 2

editorial :
COM. HALL LEH BADMINTON Kan hriat theuh angin Thingsulthliah Community Hall chu sak mek zel a ni a. Community Hall sa kan tih hian Hall chauh ni lovin Bazar a keng tel a, chu mai bakah thalai ten an thlir leh nghahfak Indoor Games chi hrang hrang Badminton, Table Tennis, Judo, Wrestling etc khelh theih anih beiseiin an thlir mek bawk, lung pakhatin sava pahnih mai nilo, pathum lai kan vawm mek a ni a, kan vawm fuh ang nge kan vawm sil chauh ang tih hi ngaihtuah a ngai zui ta niin a lang. Field penga kan Temporary Bazar hi chinchang hre pha chin mikhual te pawhin Temporary a ni emaw nilo emaw kan khaw len phu tawk leh mihring pung zel hisapin a te lutuk min tihsak a. Tuna C/Hall hnuai Bazar tur pawh hi mihring pung zel hisapna chang hre pha chin, thil thlir thui thiam phak ten a te lutuk chu a ni an ti deuh vek. Thingpui Dawr hisap miah lo pawhin C/Hall chin hnuai zawng zawng hi Bazar atan ti vek pawh ni ila, kum reiloteah Bazar lian lo tak a ni thuai ang tih thlir thiam ila a duhawm hle ang. Community Hall hi keini aia thingtlang khua-a kan ngaih te pawhin an Community Hall-ah chuan Volleyball te pawh an beng thei hial an ti a. Volleyball em anih loh pawhin Badminton, Table Tennis leh Indoor Games dang dang tih theia tun, a hun lai taka kan siam lo anih vaih chuan a pawi hle dawn a, Thangthar thinur anchhia kan dawng ang tih a hlauhawm. Badminton khelh theia kan siam dawn lo anih rau rau chuan Indoor Stadium siam tumna tal hi sorkar hian ruahmanna tal siam se. Lo siam pawh nise, kum engzat hnuah nge kan thalai ten kan khuaah Badminton an vuak theih ang tih hi ngaihtuah tham a tling ta niin a lang.
Hall sak a khat ropui mai si a. Tuna kan Hall thiah tak hi kum 1993/94 bawr vela sak zawh a ni a. Kum 20 dawn thaw
hnuah Hall thar kan sa leh chauh tihna a ni.

HMEL - NUNGCHANG
- Lh.Sailo Hmel hi siam that theih loh mah se nungchang erawh a siamthat theih tih thufing mawi tak hi tunlai khawvelah hian a dik mang ta der lo mai ka ti! Hmuh theih loh chhungril thatna leh mawina te, duhawmna leh ngainatawmna te hi pawnlam hmuh theih taksa lan dan te hian a khawih buai pha fo leh ta nghal a. Korean serial thlipui vang ni maw? Khai mah aw Hmeichhe pakhat chu thu tha tinrenga zilh leh fuih chunga seilian a ni a, a lo nulat hnu chuan vel a peihin a che fel thlap reuh a, mi biang biak lamah pawh a harhvang reuh khawp mai. Kohhran leh khawtlangah pawh a lak tlak pawl tak a ni a. Mahse, a lan danah fa lu hlohvin hringnun a vuiliam dawn a ang tlat mai! Eng vang nge ni ang? Fa hrintirtu tur mipa thenkhatte hian en dan leh thlir dan mak tak hi an nei roh a. Khi nula khi felin a mizia tha viau mah se a chhelo lo tlat a! Tu emaw dan takah, a lan danah amah ti sexy-tu tur fu-ke tlawntlai tha leh sakruang mawina a tlachham; tin, kimtlang mawina leh hmel mawina te nei lem lo mah se a hmai tlak tal a la rual lo leh zel a. Ih e, khitah khian fa lu a hlohna chhan tur chu a zo vek nia! Pakhat ve thung chu, sum leh pai paipawn tur a tlachham lova, vala lu tihai tur tawk leka phei khai han chheh rem te hi a timi phian a. A nungchang leh miziain mipui mit a tlung tawk lo tih phat rual ni mah suh se a fu-ke a dik vei thlup a. Phei khai zang vaha a intheh hnalh hnalh tawh chuan val naran hrilh a tihai zo va, puan hmawr deh manah lei chawi ngai pawh ni se a man pek inhuam tur mipa an ther fur awm asin; a chhan chu, a khawivah lawiin mi a cho em alawm! A sakhmelah dar a zam tih mai lo deuh, thlang har la ang zar an tih ang sakhmelin a u en a. Mit meng de ser ser chunga a vawih khat seih man phei chu a sang ngang mai. Heng te vang hian alawm a nun leh cheziain mi mit tlung lo mah se kimtlang mawina pianpuitu a nih tlat avangin a man a to a ni. Fa lu pawh a chawi ngei ang. Hmel siamthat theih lova ngai thintute ramah hmelin that lam a pan zel a. A awlsam zawk nia kan hriat nungchang siamthat kawngah erawh kan hlawhchham tial tial thung si a nih tak ber hi! Mihring hmel chang a ni lo, lirthei chakna thuruk a khawlpui thatna aiin a hmel lan mawinaah kan luangliam zo a. Zirna in sang hmel mawi tak tak ther fur kara mithiam chhuah tlem tawhzia te ngaihtuah thlen phei chuan thinlung hi a hnual lek lek thin. Chenna in a mawiin a tha tial tial a, a chhunga chengte erawh kan mawi zo ta si lo a nih hi. Engpawh ni se, hmel mawina leh hlutna hi hnuchhawn chi a ni lova, a theih chhung chu um zel pawh a pawi lo mai thei; mahse, a phena pawimawh leh hlu zawk, daihrei zawk leh tlo zawk nungchang mawina hi hransan loh a him ang. A felin a nungchang a mawi viau na a, a hmel leh pianin mi a lem si lova, fanau maltluan a chawi ve ta lo alawm maw le, tih ai chuan, a hmel chu a tha hle nain a nungchangin a zir ngang si lova, a hringnun vuiliamtu te tah khua a sei ta lua a ni e, tih thu-ah hian duhthlanna dik chu thuhrukin a awm si lo va.
SELING BADMINTON CLUB LAWMTHU Seling Badminton Club chuan tunkar ni 24 & 25 Oct 2012a Tournament an buatsaihna tanpuina petu heng mite chungah lawmthu an sawi. Tanpuina petute chu heng mite hi an ni:1. Seling V/C : Rs. 3000/2. Pu Chuahnuna, BDO : Rs. 1500/3. Custom, Seling : Rs.1500/- 4. NEREFs Ltd Seling : Rs. 1000/5. Vodafone : Rs. 1200/6. KRT Drop-in-Centre : Rs. 500/7. Pi Hmunzauvi, Seling : Rs. 500/- 8. Pu James Thanmawia, Forester : Shuttlecock bawm 1 NEREFs hian Most Promising player Under-13 & Under-16 te tan Pawisa faiin lawmman an siamsak bawk a ni. Heng tanpuina sum leh bungrua petu zawng zawng te chungah Seling Badminton Club aiawhin President Pu R.Lalnunthara leh Nl Suzane Lalhmangaihi ten lawmthu an sawi tak meuh meuh a ni.

Hall sa mektu sum sen ti hautak lo leh tibuai miah lova kan VC ten hmalak an inhuam anih phei chuan a lawmawm lutuk a ni. An inhuam chung pawha a hlawhtling lo anih chuan mipui leh thalai te ngaihdan hi a kal dik lovang tih pawh a hlauhthawnawm lo maw? TST CHC-AH BAWK AWM LEH Nl Rosaline Zothanpuii, Pharmacist, Sialhawk-a tun hnaia sawn chu Thingsulthliah CHC-ah bawk rawn dah leh a ni a, tunkar thawhtanni khan Tst CHC-ah a hna hi a rawn zawm leh. TAMDIL-AH Tunkar nilaini khan Tst Presbyterian English School naupang Class-VII & VIII leh zirtirtute Field-trip neiin Tamdil-ah Pu R.Lalhmingliana Bus hmangin an kal a, an hlimin an lawm haw hle.