SIMEIKHU KARTIN CHHUAK THINGSULTHLIAH

Dt. 17 November 2012 (INRINNI) PHEK- 3

MIPUI HNENA HRIATTIRNA LEH NGENNA Kan khua Thingsulthliah in Sawrkar chakna hmanga Vawmhraw tui kan ei mek hi a kawng a thui thamin a lo hlui ta deuh a. Repair a ngai ta fo mai bawk. Kan khawchhung line pawh a lo hluiin repair a ngai zing ta hle mai a, a enkawlna kawngah mitin ten neitu chan chang taka enkawl turin kan inngen tak meuh a ni. Monthly fee bak hi Revenue mumal a awm loh avangin Repairna leh M.R. hlawh pawh kan indaih thei ta lova, chuvangin a hnuaia mi ang hian tui enkawl dan siam thar a ni a, mipuiten min hrethiam a kan zawm tlan ngei kan beisei. 1. Chhiatni : Tui a awm chuan man chawi a ngai lo. 2. Thatni : Tui a awm remchan lai a nih chuan Tui trip khat (4000 ltrs) Rs. 1000/- a lei tur a ni tawh ang. (Thlan siam hi tha lam a chhiar a ni) 3. Tui point valve a chhiat chuan a tlan pha chinin a tharin an thlak thin ang. 4. Thawktute tel lovin tui lak phal a ni lo. 5. Tui hi mipui a harsatna a thlen dawn chuan tihral phal a ni lo. 6. Mimal tu hnenah mah hralh phal a ni lo. Heng a chunga kan tarlan bakah Tui semtu ten an lo hralh a nih chuan Tui Committee Chairman hnenah hriattir nise, a tul dan angin Action lak a ni ang. Sd/-C.Lalramchhana, Chairman Thingsulthliah Village Water Committee.
RINHLELH MI MAN Tunkar ni 13/11/2012 khan Tlangnuam ram chhung ramhnuaiah mi pakhat silai keng vak vel hmuh a ni a. Amah hi tunge anih tih hriat anih loh avangin a hmutu ten Tlangnuam VC-ah an hriattir nghal a. Tunlai hian ram lama bungrua leh bungbel te bo a awm fo avangin rinhlelh thil thuah VC leh VDP ten amah chu zawng nghalin an man a. Amah hi Seling-ah hruai chhovin a chinchang an zawtfiah a. Keifang lam mi nia a insawi avangin Keifang lam kal tur Night Busah an thawn chho ta a ni. A silai ken hi VCP Pu C.Lalsiaman kawlsakin silai neitu chhungte nena rawn lam tura tih a ni. Tunlai hian kan sub-town khawchhung leh ram lamah thilbo neuh neuh hriat tur a tam hle a. Mikhual, an chinchang hriat lem loh hmuh tur an tam ta hle mai bawk a. Chuvangin, kan mi hriatchian loh leh rinhlelh hmel pu nia kan hriat reng reng te chu kan VC, VDP leh YMA hruaitute hnenah hriattir vat nachang hre theuh ila a tha hle ang.

AN TI
- Kan sub-town M/S pakhat Headmaster Room chu an hawng thlawn zing an ti. - Sawrkar hnathawk mahni hnathawhna kalsana chhiatni / thatni-a lang zing dup hi tuman an ngaisang lem lo an ti. - CHC ni si, PHC signboard tar a ni ta tlat hi enge a awmzia an ti. - Khawchhak Khual tamna khua apiang hi, tualchhung Thalai hnathawk taima lo khua a ni ang em an ti. - Ber thla hi Camping thla an ti. SELING V.C.NEWS - Village Health & Sanitation hmalaknain Phaibawk tuikhur siam that leh tui chhe paihna pipe thar siam a ni a, Seling Field sirah Zunin tha tak siam a ni bawk. - BNRGSK Building hnuai chu Vantlang puipun khawmna a eirawng bawlna choka atan siam tan mek a ni. - Nimin 16.11.2012 khan Tuilak in-take atanga Reservoir thleng pipe line repair ngai te check a siamtha nghal turin mi pathum tirhchhuah an ni a, Seling tui line hi thingzaitu ten an lo verh thin avanga an harsatna sutkianna atana tih a ni. - Tunah hian BPL leh AAY revision neih thar leh a ni a, Seling khaw chhungah BPL 110 leh AAY 53 an awm. ZIRLAI FIELD-TRIP Tst Govt. H/S Class IX zirlai ten tunkar nilaini khan Reiek Zokhua an tlawh. Bus pahnih hmangin 60 vel an kal. Tunkar thawhlehni khan Tst Presbyterian English School Class VI zirlaite Tuirini-ah an picnic a, kar kalta Zirtawpni khan Lalhnam Sikul Class VIII zirlai leh Zirtirtu ten Berawtlang Science Centre an tlawh bawk. TLANGNUAM-AH ANTI-TOBACCO Ni 3 Nov 2012 khan Mizoram Tobacco Control Society leh Indian Society on Tobacco & Health tangkawp te bultumin Tlangnuam YMA Inah Zuk leh Hmuam chungchang sawihona neih a ni a. Tlangnuam khua chu Zuk leh hmuam tih lohna khua(Free Tobacco Village) siam tura hmalak dan ngaihtuahin hemi chungchanga hma rawn latu hi Pu V.L.Bela niin tunkar thawhlehni khan lo chho lehin VC, NGO leh Kohhran hrang hrang te nen hmalak dan tur te an sawiho a, hma la turin heng mite hi an thlang. Hun remchangah hruaitute hian Committee tur an ruat leh dawn a ni. Chairman : Pu K.Lalchhanhima, Presbyn. Vice Pre : Pu K.Lalzuia, MUP Secretary : Pu Lalthangmawia, YMA Asst. Secy: Pu Lalduhkima, YMA Treasurer : Pi Chawngpari, MHIP Fin. Secy : Pu Ramfangzauva, S.A.

LAWMTHU SAWINA Kar kalta Inrinni chawhnu herah kan nau Tlanzauva, Keifang amiin Electric Current laka accident tawka min boralsan chungchangah kan tawrhna min tawmpui a min lainattu, a boral hriat veleh a kan in lama min lenpuitute leh, a tuk ni 11.11.2012(Sun)-ah amah thlahna hun min hmanpui tura Keifang a min zuitute, chumi hnuah vawiin thlenga min lenpuitu la awm te hi in chungah kan va lawm em. Kohhran Inkhawm hun pawimawh lai tak pawh thlahlel thei lova kan vanduaina min tawmpui a kal zawng zawng te, Sum leh tha senga min lainatna tilangtu zawng zawng te, min tawngtai saktu zawng zawngte hnenah thinlung takin lawmthu kan sawi a ni e. In khawngaihna dawngtu - K. Lalbiakthuama te Unau, Tst. H/A Venghnuai BPL & AAY TUR THLANG Tunkar thawhtan zan khan Tst V.C. leh NGO hrang hrang hruaituten BPL leh AAY a awm diltute dilna en felin an thlang nghal a.: AAY-ah mi 60. BPL-ah 71 an thlang. HNA HMU THAR Tv R. Lalremruata S/o Rohlira H/A chu St. Pauls H/S-ah Teacher atan lak a ni a, Thla thar ni December atangin a hna thar hi a zawm ang.