SIMEIKHU KARTIN CHHUAK THINGSULTHLIAH

Dt. 8 June 2013 (INRINNI) PHEK- 2

editorial : Thingsulthliah

HIGH SCHOOL KAWNG I SIAM ANG U

Thingsulthliah High School kawng han tih hian kan hriat lar ber dan kan han sawi mai a ni a. High School kawng chauh ni lovin, Tst khawchhungah chuan kawng pawimawh ber pawl a ni. A chhan chu he kawng hi Sorkar hmun pawimawh hrang hrang, heng High School, Higher Secondary School, Govt. Middle School, Govt. Primary School, ICDS office, SIRD Office, Forest I.B., BSNL Telephone Exchange te kalna kawng a ni a, chuvangin a zawhtute pawh mi pawimawh tak tak leh khaw hrang hrang a mite an ni thin. Chutih laiin tuna a dinhmun hi chu hnuchhawn ram, Kalkawng Cancel tawh, ngaihsak loh ni mai awm takin a chhia a, lirthei chu sawi loh, ke a kal tan pawh zawh hrehawm khawpin a chhia a ni. PWD enkawl lai a ni a, PWD-ah pawh Aizawl District a awm siin, Serchhip Division hnuaiah kan awm tlat lawi a, hmalatu tur tan pawh a luhaithlakin buaina a tam a, a sawt mawh hle mai. Khawtlang hruaitute pawhin vawi duai lo thlen tawh mahse, ngaihthah pawlah kan awm tlat zel a nih hi. Sorkar lam chakna hmangin siamthat a ni dawn emaw kan ti a, kan lawm tawh teh lul nen, a siamna tura sum ruahman lah chu Central lamah a kir emaw ni? A beidawnthlak hle mai. Kumin October thla chawhma lamah Govt. High School chuan Golden Jubilee ropui taka lawm an tum a, Organising Committee leh SubCommittee ten hma lain an thukhawm zauh zauh tawh a, hemi denchhen hian engtin emaw tal he kawng pawimawh tak hi siamthat dan ngaihtuah a tha hle mai. PWD emaw, Sorkar-ah emaw kan beidawng a nih chuan Internal Road dangte kan chei ang hian Ni 100 inhlawhna sum atanga mipui thawhkhawm hmangin emaw, Material Component sum hmangin emaw a rang lama cheithat ngei chi a ni. Jubilee kan han lawm ang a, hmun hrang hrang atangin mi zahawm leh ropui tak tak an lo kal khawm dawn a, chutih hunah chuan a khaw neitute kan zak palh ang tih a va hlauhawm em! A mawhphurtu ten an ngaihsak loh miau chuan keimahni a neitu, zawh tam bertute hian kan theih ang kawng kawngin i siamtha mai ang u. Internal Road tam tak kan siam tawh a, kawng pawimawh tak High School Road pawh hi Ni 100 inhlawh atangin siam mai ila, mipui pawhin kan hnial lovin a rinawm.//

BAWLHHLAWH PAIHNA KAWNG LAI ZO Tlangnuam atanga Bawlhhlawh paihna tur Tst H/S chhuahlam ami chu Tlangnuam Chhim Veng atanga panna tur tunkar khan laih a ni a, tunah hian an lai zo tawh a, he hna hi ni 100 inhlawhna atanga thawh a ni. TLANGNUAM BRANCH Y.M.A. NEWS Tunkar chhung khan Tlangnuam Branch YMA chuan Laipuitlang leimin tuarte tanpuina tur an khaw chhung In tinah an khawn. YMA Day lo awm tur chu June ni 14 zan atangin hman an tum a. Ni 14.6.2013 zanah Social Meeting neiin hun an hmang ang a, YMA Day(ni 15.6.2013)-ah chuan nilengin Field Item neia intihhlimna hun hman an tum. TEK- IN DENG CHHIA Tunkar Ningani tlai lama ruahsur lai khan Tst P/S-I bula Electric Transfomer(Diakkawn Area supply-tu) chu Tek-in a deng chhia a, a chhia tih an hriat veleh J.E. hovin siamthat an tum a, mahse siamthat mai theih a nih loh avangin ningani zan hian he Transformer atanga Eng dawng Diakkawn Area leh Camp Area veng thenkhatah Current an nei lo. Hetih lai hian BSNL Telephone Exchange Transformer-ah pawh Current a lut thei lova, Simeikhu chhut zanah Internet kan hmang theilo leh bawk. BIO-GAS SIAMSAK MEK Tst Tlangnuam Vety Department chuan tunlai hian an bial chhunga chhungkua 9 hnenah Bio-gas (Ran ek atanga Electric Current siamna) an siamsak mek a. He Chhungkaw 9 ah hian chhungkaw 6 chu kan Sub-town chhung ami an ni. Tst Tlangnuam Vety Department hian tunlai hian Saisih-ah Ranchaw chinna tin 10 hmun vel an buaipui mek bawk. NLUP Phase-II 1st Instalment, Bawng, Vawk leh Ar sum sem turin an inbuatsaih mek a, Rei vak lovah sem thuai beisei a nih thu kan dawng. SIDE DRAIN SIAM MEK NERLP Project atanga Entry Point Activity sum Rs. 50,000/- hmuh hmangin Pu H. Ngaihlira (L) D/A in bul chhak lam, Presbyterian Biakin Gate bul atanga Diakkawn inkarah Side drain RCC a siam tura hma lak mek a ni a, tunkar Nilaini atang khan hna tan a ni. HOSPITAL AREA NGO Jt.COMT HRIATTIRNA Tst. Hospital Area huam chhunga NGO pathum, YMA, MHIP, MUP Joint Committee chuan Hospital Area huam chhungah Ruihhlo, Zu, Damdawi, Ganja etc. zawrh leh lakluh a khap tlat a. He khapna hi zawm turin mitin te an ngen. Ngenna pawisa lova tilui, man an nih chuan na taka action lak ngei an tum thu kan dawng. TLANGNUAM TUILAK Kar hnih zet Tlangnuam Tuilak chu a chhiat hnuah kar kalta inrinni atang khan pangngai takin Tui a haw leh a, Tui pawh a pngngaiin sem anih thu kan lo dawng. Tlangnuam Tui Committee atanga kan lo dawn danin Tui-Line pahnih an neih chu a chhe deuh reng a, Tui Line pahnih hi a in-chhiat-chhawk deuh reng avangin Tui duhkhawp a haw thleng thei lova; siamthat nan a hmanrua lakkhawm a ngai a, a chhe lai zawn lo ngai bawk nen, duh anga chakin an siamtha zung zung thei thin lova, mipuite pawhin lo hrethiam thin tura an duhthu kan palai an hrilh. FOOT-PATH SIAM ZO Thingsulthliah VC chuan TFC sum hmanga Field ko pengthuam laia Foot-path an siam chu tunkar khan an siam zo. He Foot-path hi 24.5m a thui niin a vang Ft. 4 a ni.