Vol.

XV :

Issue No. 24

Dt. 16th June 2013

Pathianni

Phek 1 - na

Inneih ni a mo leh a hriatpuitute Inchei Dan

Biak In hawnga inneite leh Mo leh a hriatpuitute inchei danah a awm tawk leh zahawm zawka inchei nise tiin Inkhawmpui Lian Vawi 45-na, Dt 9.03.2013 chuan a rel a. Central Committee-in lo bawhzui se a tih chu hetiang hian ruahmanna siam a ni. Thuhma : Inneih ni hi a ropui a, tupawhin mawi tak leh nalh taka inchei kan tum ni a ni a. Tunlai hian mo hian kawrfual(gown) hi an duh ber nia ngaiin inneite hian an ha tlangpui a. Mawi pawh a mawi hle a ni. Chutih rualin kan Mizo zia lang thei zawnga kawr var mawi tak leh puanchei bih te hi a mawiin a zahawm a ni tih hre thar leh ila, mi neinung tak tak zingah pawh hetianga inchei duh zawk hi an la awm mek bawk a ni. Mizote hi hnam pakhat kan ni ve a, heng inneih nite hi kan hnam incheina chawilarna hun remchangah hman tum ila, a duhawm ngawt ang. India ram State hrang hrangte kan en chuan inneih ni a an hnam zia rang bo thak khawp a inchei hi an vang viauin a rinawm. Khawchhak lam tunlaia Mizorama mi tam takin an ngaihsan Korean hote hi an inneih niah chuan inneite hi an hnam incheiin an inchei thin an ti. Biak In hawnga innei te, inneih ni a mo leh a hriatpuitute inchei danah a hnauia tarlante hi zawm hram tum ni se. Tin, mo kawr design tu leh a thui thinte pawh, mawi si, zahawm(decent) si a mo kawrte design a thui turin kan inngen a ni. 1. Kawr nghawng hmalam zau lutuk hi a zahawm lova, a hatuin mahni inrintawkna(confidence) a hloh phah thin niin a lang. Chutiang bawkin hnung lam zau lutuk a mawi lam aiin mipui tan hmuh a hrehawm lek lek zawk thin a, a mawi tawk zawn hram nise. Kawr ban nei hak theih hram nise. Ban nei lo ( sleeveless) te, kawr hnuai bah (strap) chauh te hi a mawi lovin a zahawm lo va. Darbah awm lo (strapless) te phei chu Biak In chhunga hak luh atan a mawi lo hle a ni. Kawrfual (gown) hi a hatu san zawng mil tawk zawn thiam a pawimawh. Fual lutuk, midangte zawnpui ngai khawp hi a buaithlakin, kan ram leilung nen pawh a inmil lova. Chetsual palh te pawh a hlauhawm a, chuvangin a hatu ena a awm tawka fual kan thlan thiam a pawimawh hle. Kawr arh uchuak pawh hi a buaithlak lam deuh niin a lang. Mo neitu nena inkutsuih dawn pawha, harsa harsa khawp tur hi chu hak loh ngam a tul. Inneih hriatpui tura kalte pawh kan inchei fimkhur a ngai. Biak In ni lo, intihhlimna hmun danga kan kal anga kan inthuam a nih chuan Pathian kan biakna Biak In kan tizahawm lo a ni tih hriain Pathian ni a Biak Ina kan inchei ang tho kha inneih inkhawmah khan inbel mai ila. Chu chuan thangtharte hnenah Pathian leh Kohhran zahawmna nasa takin a hril ngei ang. Inneih ni a, mo leh mo neitu chhungte inchei dan pawh hi kan inbihchhian a ngai tawh hle niin a lang. Tunlaiin mo leh mo neitu chhung hnai deuhten kawr inang hak kan ching ta pawh hi, a lawmpuitu midangte tan a inthlahrun awm thei niin a lang a, hengah pawh hian kan insum thiam a pawimawh hle a ni. (He thu hi Bial Kohhran Hmeichhe Committee-in bialchhung Kohhran tina chhiarchhuak tura a tih a ni a, mipuiin zau zawka kan hriat theihnan kan han tichhuak a ni Editor)

2. 3.

4. 5.

6.

2013- KOHHRAN AW SEMTUTE: B-1: Lalengkima, Lalruatfeli, Lalkhawngaiha B-2: Lalrinzuala, Zahmingliana B-3: Vanlalruata, Lalfakmawia, Lalruatsanga B-4: Vanlalawmpuii, Lalrinawma B-5: Lalruatkima, Lalramluahkima B-6: Lalawmpuia, Lalmuanawma, Zonunmawia B-7: Zodinmawia, Jonathan Lalnuntluanga B-8: F. Lalremruatpuia, Lalrindika, MS Dawngliana, Zohmingkima B-9: Lalrinhlui,Lalbiaksiami, Lalramtharzuala B-10: Lalhmangaiha, Roluahpuia B-11: Vanlalpeka, Remruatsanga B-12:Lalnunthara, Lalfelkima, New Saron : BL Thanzama, TBC VL Remruatsanga, Lalruatkima

Kohhran Aw na

Pathianni chhuak

Dt. 16th June 2013

Phek 2-

Christian News Mizoram ah pawh rawngbawla lo kal tawh thuhriltu lar Billy Graham-a
tupa tunlai hian Kisumu, Kenya ramah rawngbawlna hlawhtling tak a nei chho mek a. A rawngbawlna hi chhimtu an thahnem thei hle a, a rawngbawlna chhimtu hi mi 21,000 chuang lai an ni a. A rawngbawlna avang hian mi 1,350 an pianthar phah a. Hemi hmunah hian a pu Billy Graham pawhin kum 53 kalta khan rawng a lo bawl tawh a ni. He rawngbawlnaah hian Evangelist Robert Cunville pawhin hmeichhe pual bikin thu a sawi thin a, Will Graham hian Pathian chuan Africa ram tih en a duh hle a, chuvang chuan he rawngbawlna pawh hian rah tha tak a chhuah a ni a ti. Malaysia rama rawngbawl mek U.S. pastor Rev. David Ginter chu thla hmasa khan thia chhar a ni a. He thihnaa mawhphurtu ni ngeia rin man tawh a ni a. He thihnaa mawhphurtu hi Pakistan lam mi a ni. He pastor hian Bridge International Kohhran a enkawl a, thla hmasa May 4 khan thia chhar a ni a, a kut leh a ke ah hliam na tak a tuar a. Malaysia police te chuan a tirah rinhlelh thil thuah mi 7 an man a. Heng zingah hian kum 25 mi Pakistan atanga security hna thawka Malaysia-a awm chu a ni ngei nia hriain an hreng zui ta a ni. He tualthattu nia rin ber hi a hming chu Shahbaz a ni a, he tualthah thuah hian thiam loh chantir a nih chuan thi tura a chungthu rel ngei a nih rin a ni a, July 18-ah hian court ah a inlan leh anga, hetah hian a thubuai hi ngaihtuah a ni leh dawn a. Amaerawhchu, he tualthahna kaihhnawih ah tho hian mi 4 dang hren an la ni a, hei vang hian a thubuai hi rang taka ngaihtuah a la ni lo maithei bawk. Pastor hi thia chhar a nih lai hian a car chu ruk bo a ni a, tualthata puh tak ber hi Malaysia rama a cham theih hun chhung hi ni 43 laiin a lo bawh pelh tawh bawk. He Pastor hi kum 40 chhung chu rawngbawlin a vak kual a, Middle East-ah leh Asia ramah thanemngai taka rawngbawlin a lo awm kual tawh thin a ni. A nupui leh a fa 3-te a kalsan a, a fate hi US ah an awm mek thung. Tun hnai khan nuapang kum 4 mi Silas Endenfield, Lyons ami chu a thih hma nia a thusawi chu internet a video enna Youtube-ah tihchhuah a ni a. A vdeo hi minute 2 chhung lek awh a ni nain mi rilru a hneh hle a. He video -a thu a sawi tukah hian he naupang hi cancer natna avangin a boral nghal ta a ni. He video ah hian vanram a ngeih thu a sawi a, a nuin zawhna a zawh ah chuan vanramah chuan a khua a har dawn em tih a zawh chuan a khua a har dawn loh thu leh Pathian nen an awmdun tur thu a sawi a. Vanram a ngaih thin thu leh engtik lai pawha kal a chak thu a sawichhuak a, vanramah chuan a dam vek tawh dawn thu leh a a cancer pawh a awm tawh dawn loh thu a sawi bawk. YouVersion.com an tih mai intenet kaltlanga miten anmahni mobile-a Bible an chhiar ve theina tura Internet-a Bible download theihna chuan kumin July ni 10 hian kum 5 a tling dawn a. He Bible hi a hmangtu an tam hle a, July 10 ah hi chuan a hmangtu hi mi Maktaduai 100 an tling ngei dawn nia ngaih a ni. He Bible hi kum 2008 khan tihchhuah tan a ni a. He Bible hi LifeChurch.tv pastor, Bobby Gruenewald leh Edmond Kohhran hmalaknaa tihchhuah a ni a, tawng chi hrang hrang 300 a chhiar theih tura buatsaih a ni.

Editorial : Ze Nghet Kristianten kan zui Lal Isua khan hun hrang hrang a tawn pawhin a zia a danglam ngai lo. Pharisaite leh lehkhaziaktuten a tawng sual leh tih sual an chan reng lai pawhin Pathian thu chu a nihna anga sawiin a tih pangngai a ti hmiah hmiah zel a. A lungngaih zanah pawh khan thahnemngai takin a zirtirte thu a hrilh thei a. Ze nghet tak a nei a, amah chimtu boruakin a tawngkam leh chetzia a ti danglam ve lo. Keini pawh hian kan zui Lal Isua awmdan hi kan zir tur a ni. Mahni theuh inenfiah ila. Kan retheihna avangin kan rin Pathian thu kan bawhchhia em? Kan hausak avangin Pathian zuitu nih tul lo kan ti mai em? Hausak kan tumna leh sum leh pai kan zawnna kawngah kan zia kan hloh em? Kan mangan lai emaw kan hlim leh hlawhtlin niah emaw kan zia kan thlak thin em? Politics boruak chhah takin min chim laiin ze nghet tak kan pu thei tho em? Zawhna dang tam tak pawh a awm thei ang a, ngaihtuah zui ila. A pawimawh berah chuan ringtu kan nihna hian kan thinlungah nghet takin bu a khuar tur a ni. Hmun hrang hrangah, boruak hrang hrang kan hipin kan lan dan chu pawnlamah a danglam chang a awm a ni mai thei. Mahse, min nektu boruak hrang hrang hian ringtu kan nihna avanga ze nghet tak kan neih hi a sawi danglam tur a ni lo. Khawi hmunah pawh Kristian/ ringtu kan ni reng tur a ni.

Kohhran Aw

Pathianni chhuak

Dt. 16th June 2013

Phek 3-na

Literature Week Prog.

Kan Branch Kristian Thalai Pawl ten Ni 10-17, June 2013 hian Literature Week an hmang dawn a. A kharna programme hetiang hi a ni : Ni 17.06.2013(Thawhtanni) A hmun : Centenary Hall Chairman : Pu Vanlalruata, Chairman, Lit. Sub-Comt Tantu : Nl. PC Lalchhanzuali Mika Group Intihsiakna : 1) Tawng Upa inhrilfiahsiak 2) Bible inchhiar dik siak 3) Debate : Thupui : Lehkhabu tha chhiar tam hi Kristian nun chawmtu bul ber a ni. 4) Solo : Group tin atangin mi 8 5) Article inziahsiak (Ni 13.06. 2013 aia tlai lovah Literature SubCommittee member-te hnenah thehluh tur a ni. 6) Hla/poem inphuahsiak : Hla sak theih emaw a chham mi pawh a leng vek ang.

Krismas Thawhlawm
Krismas leh Kumthar thawhlawm hi puan tawh angin Collector ten mahni bial theuhah an rawn khawn zel thin dawn a. A hranpain a ipa Pathian ram ip thlakna a thlak ve loh tur a ni. Lo kawl tawp mai tur a ni e.

Damlo Tawngtaipui Ngaite

Pu Lalzarmawia, Pi Sangkhawli,Upa Hrangvelthanga, Pi Zoramthari, Pu Lalhlunthanga, Nl. Zoramthangi, Pi Laltluangi leh Pu T. Lalduhawma te i tawngtaipui zel ang u.

Pangpar Khawitute
Vawiina pangpar khawitute : 1) Pi Lallawmzuali 2) Pi Lalduhawmi(Maseni)

Keyboard Zir Duh Tan

Synod School of Music hnuaiah July - December, 2013 chhung atan keyboard zir duhte tan seat dil theih a ni a. Dil duhte tana hriat turte : 1. Music Department, Synod Office atangin dilna form la chhuakin June, 2013 chhung ngeiin Synod Office-ah thehluh tur a ni. July 2, 2013 ah seat chang turte hming tarchhuah a ni ang a, zir tura thlante chuan July 3&4, 2013-ah admission tihfel tur a ni ang. 2. July 5, 2013 atanga Class tan tur a ni ang. 3. Dilna ah mahni awmna Kohhran lehkha thil tel ngei tur a ni. 4. Hriat tur tul dang chu dilna form-ah tarlan a ni. Sd/(REV. P.C PACHHUNGA) Executive Secretary, i/c Music.

Pangpar Enkawltu Turte

Dt 17-23.06.2013 chhunga pangpar enkawltu tur te:-(1) Pi Lalringi (2) Pi Lalchhandami (3) C. Lalthanthuami (4) Pi R. Vanthangpuii

Vawiin NPSS Zirlai

Beginner Isuan a nu leh pa a tanpui thin Primary Isuan tawngtai dan a zirtir Junior Isuan thlipui a hau reh Inter Sipai za hotu bawih tihdam Sakramen Kohhran Thurin pian chhuah dan Senior Isua Krista hnathawh

Sharing hmang tangkai

Tun Inrinni khan a vawihnihna atan sharing hun hman leh a ni a. Mi enge maw zatin hun an hmang. Hetiang hun hi kan la hmang zel dawn a nih hmel a. Kan rilru a Pathian thu awm te, kan nunin a taka a tawn fiah te hi midangte thlarau nun chawmnan a tha hle thei a ni. Tin, kan Kohhran kalphung atana tha ni a kan hriatte sawi chhuahnan pawh hman a remchang hle bawk. Inbuatsaih erawhchu ching deuh deuh ila, kan sawi tum bak kan rilru a lo lang kan sawibelh hian mite tan a ninawm thei a, midangte hun hman tur kan tibuai thei bawk.

S.S Report : Dt 09.06.2013

Particulars Puitling Naupang Hming ziak 1228 904 Kal 511 725 Kal lo 717 179 Thawhlawm ` 6535 ` 4935

Bial-in Booklet Siam

Vengthlang Pastor Bial Standing Committee in a rel angin bial/ Presbytery leh Standing Committee in kalphung atana a lo rel tawh te chu kum 30 chhung a mi lakkhawm a ni a. Heng te hi a buah siamin Kohhran tinah sem leh a ni. Synod, Presbytery leh bialin Danpui leh dan tesepa an tarlan bakah hian kalphung atana hman tur rel thin a ni a. Thurel tawh te pawh tihdanglam leh siam belh te a awm thin. Hengte hi ziaka dah an nih loh chuan theihnghilh mai te a awl thin a. Hetia a bu hrana siam a ni hi Kohhran mal, Bial leh Presbytery tan a tangkai hle dawn a ni. A copy siambelhnan hian kan Kohhran Xerox khawl hman a ni nghe nghe.

Lehkhabu Lei Nual

Kan Branch KTP-in Literature Week an hman puala Synod Bookroom-in Dt. 13.06.2013(Ningani) a an thil zawrhte 10 % a tlawma an hralh chu kan Kohhranin kan hmang tangkai hle. Kohhran Library a dah turin lehkhabu tha tak tak 27 lei a ni a, ` 3443 man a ni. Hemi rual hian Kohhran mamawh paper chi hrang hrang pawh lei a ni bawk.

Inkhawm Uar Ang U

Tunlai hian inkhawm kan thawl leh tan hle mai. Nun, hun leh hriselna min petu Pathian tana hun tlem te pek ve hi chu kan ba a ni tih inhriat a tul hle mai. Chhuanlam tur dap lovin hun pek hram hram i tum ang u.

Pathianni Zan Tawngtai

Zanin inkhawm bana tawngtai hruaitu Tv. H. Lalhmingliana a ni a, tawngtai turin Kohhran mipuite sawm kan ni.

Kohhran Aw

Pathianni chhuak

Dt. 16th June 2013

Phek 4-na

Darthlalang : Nunna Tui

Khawvel hian thil hriat chakna hrang hrang a neih zingah nunna lo awmna hnar te, keimahni ang thilsiam dang, khawvel danga cheng an awm ve em ? tih hriat chakna te hi a lian hle a. Mahse vawiin ni thleng hian engmah hi kan la hre chiang thei lo a ni. Chutianga thiamna hmanga van thengrenga van lam chanchin zir tur khawl tha tak tak, man to tak tak chu sawrkar lian tak tak ten an buaipui luih luih thin a, hre tam, hre hmasa nih an inchuh a ni. Sikeisen (Mars)a Tui awm leh awm loh enfiaha zir chiang turin USA sawrkar khuan sum tam tak a seng tawh a. Kum tam pawh a la liam lo, National Aeronautic And Space Administration (NASA) khuan khawl thluak nei(robot) pahnih, Opportunity leh Spirit an tih chu tirchhuakin an ni hian Sikeisena tui awm leh awm loh bakah a lo awm tawh thin reng em ? tih an zirchiang ang. Tui a awm leh awm loh a fiah duhna chu a tui mai a ni lova, Tui tel lo chuan nunna a awm thei lova, thil dang zawng aiin nunna a awm tawh thin nge la awm ngai lo tih finfiah tur chuan tui awm leh awm loh hi finfiah a tul hmasa a ni. Sikeisena tui zawngtu khawl pahnih ang bawk hian kum 2000 zet liam taah khan Samari rama Sukar khaw daiah nunna tui zawng mi pahnih an awm a. Pakhat chu chunglai vela khawsa, hmeichhe pakhat a ni a, pakhat dang leh chu Galili bial atanga rawn kal a ni. Sukar hmuna tuichhunchhuahah an intawng a, hetah hian Galili atanga lokal, Lal Isua hian a tui in tur duh a hmu a, Samari hmeichhia hian a mamawh tih pawh a hriat loh nunna tui a hmu bawk a ni. Lal Isua chu Pathian a ni a, amah hi nunna a ni a, mihring a nih avanga taksa tuihalna mai avangin Sukar hmuna tuichhunchhuah hi a pan a ni. Samari hmeichhia erawh chuan khawvela a a nun chhunga nunna atana pawimawh tui awmna a hria a, mahse chatuan nunna a nei lova, khawvelah a thla a muang tak tak lo a ni. Khawvela kan awm chhung hian kan taksa mamawh hrang hrang kan ngaihtuah a tul a, mahse hemi kawnga kan tlannaah hian chatuan nunna tui thal hman lovin, kan taksa mamawh tui chauh kan thal ang tih a hlauhawm thin hle mai.Lal Isua hi nunna tui, kan taksa mamawh mai bakah kan thlarau tan nunna tui a ni tih hriain engkim dang zawng aiin kan ngai pawimawh tur a ni. Samari hmeichhia hian nunna tui dik tak hi a la hre ngai lova, mahse a hriat chinah a hmu ta a ni. Keini hi in ngaihtuah ang u, Lal Isua hi nunna tui dik tak a ni tih kan hre tawh a, amah kan la pan thei lo cheu dawn em ni ?

June Chairman : Upa Vanlalhruaia Sailo

VAWIIN BIAK INPUI

Chawhma : Sunday School Inkhawm S.S Tantu : Pi Darthuami (B-18na ) Zirlai : Humhim dilna Chawhnu : Pathian Biak Inkhawm Tantu : Pi Laltharsari (B-13na) Thuhriltu : T/Upa C. Lallianzauva Zan : Rualbanlote Ni Inkhawm Thupui : Mitin hmangaihtu Pathian Thuhriltu : Upa Lalchungnunga KTP TAWNGTAI INKHAWM Hruaitu : Nl. Laltlanthangi Tantu : Tv R Vanlalnghaka ( Jona Gr) Musical dance : Bial KTP Meet Group II Thusawi(15 mins) : Tv. F. Zosangliana Dt. 17. 06. 2013:THAWHTAN ZAN (KTP - Literature Week Khar Zan) Tantu : Tv. C. Lalremruata Dt. 17. 06. 2013 : THAWHTAN ZAN (Pavalai Inkhawm) Hruaitu : Pu F. Hranghluna Tantu : Pu PC Rosanglura Thuhriltu : Pu Ralkapthanga Dt. 18. 06. 2013 : THAWHLEH ZAN (Kohhran Hmeichhe Inkhawm) Hruaitu : Pi Zosiamthangi Tantu : Pi Lalnipuii Thuhriltu : Pi Zosiami Thilpek la : Pi Remthangpuii (Rakili Gr.) khawmtute : Pi Lalrempari (Rakili Gr.) Zai hruaitu : Pi Lalremmawii Pi Thanzuali Dt. 19. 06. 2013 : NILAI ZAN Tantu Thupui : Pi TC Lalbiaknguri (B -14na) : PCI Danpuiin Presbyterian Kohhran a sawifiah dan Hawngtu : Pi Lalkhumtiri Dt. 22. 06. 2013 : INRINNI ZAN Tantu : Pi Sanghnuni (B-11 na) Thuhriltu : Pu Sainawta

TAWNGTAI INKHAWM HRUAITU

TAHRIK ZING :Dar 5:30 AM TLAI: Dar 4:00 PM 17.06.13(Thawhtanni) : Pu C. Lalngaihthanga Pu Laikhama 18.06.13(Thawhlehni) : Pi Lalzamliani Tv. PC Lalruatfela 19.06.13(Nilaini) : Pu H. Lalrinzuala Pi V. Lalremveli 20.06.13(Ningani) : Pu Thanzauva Pu Biakkhuma 21.06.13(Zirtawpni) : Upa C. Keikhuma Pu J. Vanlalsiama 22.06.13(Inrinni) : Pu PC Laltlanthanga Pu Ralkapthanga 23.06.13(Pathianni) : Pu R. Biaktluanga Tv. Zosangliana

Editor : T/Upa Lalhuapzauva, Jt. Editor : C.Lalthanpuia, News Editor : Robert Lalmuanpuia Adviser : Upa C. Hualchhunga Cir. Manager : Zorampari, Published by Vengthlang Kohhran & Printed at C.K.Offset, Vengthlang. Biak In Ph.: 235380