MEI Padkosgedagtes

Padkosgedagtes Mei 1

Hy is die Vader van lig. Volgens Sy eie begeerte het Hy ons voortgebring deur die woord van
die waarheid om die wêreld te versier met Sy karakter en beeld. Jakobus 1:17,18. Die uur
het nou gekom waar die Vader in gees en in waarheid aanbid word. Jakob se put, of hierdie
heilige berg, en selfs Jerusalem se godsdienstige konnektasie en era is uitgedien en verby!
Johannes 4:20-24. Ons oorsprong is ons ware fontein wat in ons opspring tot die ewige
lewe. Jakop is nie ons herkoms nie. ‘Salig is jy seun van Jona, want vlees en bloed het dit
nie aan jou geopenbaar nie.’ Keer t’rug tot jou fontein! ‘Hy is die oorsprong en die vervulling
van ons geloof.’ Hebreërs 12:2. ‘Deur Hom is julle in Christus wat vir ons geword het
wysheid uit God, en geregtigheid, en heiligmaking en verlossing...’ 1 Kor.1:30. Hy is die bron
van ons lewe in Christus. ‘Dit alles is uit God wat ons met Homself versoen het.’ 2 Kor. 5:18.
‘Ons het Hom lief omdat Hy ons eerste lief gehad het! 1 Joh.4:10. ‘Ons is Sy maaksel,
geskape in Christus Jesus.’ Efesiërs 2:10. Jesus Christus is die Woord wat van die begin af
was, die Woord wat God is, die Woord wat vlees geword het, Hy is die bloudruk van die
mens se oorsprong.

Padkosgedagtes Mei 2

Die bediening van versoening het net een uitsluitlike oogmerk: om die gevalle mens te
herstel in sy oorspronklike status as geesgenoot van God, geskape in Sy beeld in die volle
grootte en gestalte van Christus!

Padkosgedagtes Mei 3

‘Terwyl sommige sê: Ek is van Apollos, of ek is van Paulus, of van Petrus, sit ons vas in ‘n
minderwaardige identiteit wat ons verstrengel in jaloesie en wedywering.’ 1 Kor. 3:4. Nuwe
Testamentiese bediening was nooit bedoel om ons in verskillende kampe te verdeel nie.

Padkosgedagtes Mei 4

Met sy eerste besoek aan Efese, vind Paulus sommige dissipels van Johannes die Doper
daar. Dit is reeds jare na hul leier vermoor is. As gevolg van hulle groeps-verband en
isolasie, het hulle nooit gehoor van die doping in die Heilige Gees nie. Hulle sit toe nog vas
in ‘n lering van ‘n doping van bekering van sonde. Vir Paulus was dit nie ‘n dogmatiese
probleem om hulle weer te doop nie; hy doop hulle toe in die naam van Jesus en toe hy vir
hulle die hande oplê, het die Heilige Gees op hulle gekom en hulle het in tale gespreek en
geprofeteer. Han.19:1-6.

Padkosgedagtes Mei 5

Reeds tydens die bediening van Jesus het Johannes se dissipels hulself afgesonder en hul
eie ding gedoen. Terwyl die dissipels van Jesus eet en drink, vas en bid die dissipels van
Johannes, saam met die dissipels van die Fariseërs. Lukas 5:33. (Om ‘n kans te kry om die
sprinkaan dieet te onderbreek het ‘n ou seker nie ‘n groot verskoning nodig gehad om te vas
nie!) Johannes die doper was Jesus se eie neef. Hy het Jesus openbaar as die Lam van
God wat die sonde van die wêreld wegneem. Hy het Jesus gedoop en gesien hoe die hemel
oor Hom oopmaak en die Heilige Gees oor Hom kom in die vorm van ‘n duif, hy het die stem
van God hoor sê, ‘dit is My geliefde Seun in wie Ek ‘n welbehae het.’ Maar in plaas daarvan
dat hy en sy volgelinge die eerste dissipels van Jesus word, gaan hulle aan om hul eie ding
te doen! Selfs sy styl en boodskap verander nie; hy hou aan om sonde en veroordeling te
verkondig asof die Lam van God nie die sonde van die wêreld wegneem nie. ‘Addergeslag!’
is die titel van sy preek. Hy het so pas die profeet Jesaja aangehaal toe hy Jesus aanwys as
die nuwe en lewende snelweg wat God gemaak het in die woestyn, terwyl dieselfde stukkie
skrif begin met die woorde: ‘Troos, troos my volk, sê julle God. Spreek met deernis tot die
hart van Jerusalem en roep haar toe dat haar stryd verby is, dat haar skuld betaal is! ‘n
Stem van een wat roep: in die woestyn het God ‘n snelweg gemaak…!’ Jesaja 40:1-3.

Padkosgedagtes Mei 6

Dit is so hartseer dat daar vandag nog soveel bedieninge is wat volhou met ‘n boodskap van
veroordeling en skuld en blind staan teenoor die ‘goeie’ van die Evangelie. Die Griekse
woord vir evangelie, eu-angellion beteken juis goeie aankondiging. Jesus is die openbaring
van God se welbehae. Johannes beland in die tronk omdat hy Herodus veroordeel oor sy
broer se vrou. In die tronk begin hy twyfel, en wonder hy of Jesus wel die Messias is. Hy
stuur toe twee van sy dissipels na Jesus om Hom te vrae of Hy die een is wat sou kom, en
of hulle maar sal moet wag vir ‘n volgende koms. (Vandag nog word die verkondiging van
die wederkoms ‘n populêre opsie terwyl ons steeds nie die volle impak en implikasie van Sy
eerste koms besef nie.) Jesus laat weet hom: ‘Gaan vertel Johannes wat julle sien en hoor:
blindes sien weer en dowes hoor, kreupeles loop, melaatses word gereinig, dooies word
opgewek en aan armes word goeie nuus verkondig. En salig is elkeen wat aan My nie
aanstoot neem nie.’ Mattheus 11:2-6. Om aanstoot te neem, vir watter geldige rede ookal,
neutraliseer jy jou geloof!

Fonteinvarsgedagtes Mei 7

Johannes se reaksie is in skerp kontras met Paulus s’n. Hulle was weliswaar nie vir
dieselfde redes in die tronk nie. Johannes was nie tronk toe as gevolg van sy assosiasie met
Jesus nie. Terwyl Jesus vriende maak met die sondaars, maak Johannes vyande. Paulus
was menige kere in die tronk vir dieselfde redes waarvoor die Fariseërs Jesus gekruisig het.
Ons het eintlik geen benul wat Paulus moes ly nie: ‘Ek was talle keer geslaan, dikwels het ek
by die dood omgedraai, vyf maal het ek van die Jode die 39 houe onvang, (In die ‘Passion of
Christ’ wys Mel Gibson hoe ‘n mens se liggaam lyk na 39 houe, nie ‘n stukkie vel op die rug
bly oor nie!) drie maal is ek met stokke geslaan, een maal is ek gestenig, drie maal het ek
skipbreuk gely, ‘n nag en ‘n dag het ek op ‘n stuk dryfhout gedobber. Dikwels op reis in
lewensgevaar, gevare van vol riviere, gevare van rowers, in gevare van my eie volk, gevare
van die Romeine, gevare in die stad, gevare in die woestyn, gevare ter see en gevare van
valse broers; in ontsettende harde werk en moeite, dikwels slapelose nagte, dikwels in
honger en dors, sonder enigiets om te eet, dikwels aan geweldige blootstelling van koue
sonder warm klere. 2 Korinthiërs 11:23-28. Net om hierdie getuienis te lees, vul mens met
afgryse en skok. Maar kyk wat noem Paulus dit in 2 Korinthiërs 4:17, ‘Want ons ligte
verdrukking wat vir ‘n oomblik is, bewerk vir ons ‘n alles oortreffende ewige gewig van
heerlikheid.’

Fonteinvarsgedagtes Mei 8

In hierdie getuienis kry ons begrip van die kwaliteit van die openbaring waarin Paulus
gewandel het. ‘Nie dat ek dit uit gebrek sê nie, want ek het geleer om vergenoeg te wees in
elke omstandigheid. Ek weet hoe om vernedering te verwerk, net so weet ek ook hoe om
oorvloed te hanteer; in elke opsig en in alle dinge is ek onderrig: om versadig te wees sowel
as om honger te ly; om oorvloed te hê, sowel as om gebrek te ly. Ek is tot al hierdie dinge in
staat deur die kragbron van Christus se energie in my.’ Fillipense 4:11-13. Oorvloed is nie
die bewys van Christus se seën en inwoning nie, net so is gebrek nie die bewys van Sy
afwesigheid nie!

Fonteinvarsgedagtes Mei 9
Kompetiesie maak nie van ‘n mens ‘n kampioen nie. Om met oortuiging te besef dat selfs in
die afwesigheid van enige erkenning, applous of klop op die skouer, geen teëspraak my
integriteit, of die spieëlbeeld van God in my kan vernietig nie, is die ware karakter van ‘n
kampioen.

Fonteinvarsgedagtes Mei 10

Geloof is om die indruk van Sy beeld in jou met soveel oortuiging vas te gryp, dat dit
onmoontlik raak om te vergeet watse soort mens jy is. Nou kan jy, selfs gekonfronteer met
die grootste teëspraak, net dit reflekteer wat jy is: ‘volmaak en sonder gebrek en iemand wat
in niks kortkom nie.’ Jak.1:2-4,24.

Padkosgedagtes Mei 11

Die woord van die waarheid, wat die integriteit en volmaaktheid van ons oorsprong en
verlossing openbaar, is die bron van geloof. Geloof is die spontane vrug van die waarheid.

Padkosgedagtes Mei 12

Standvastigheid te midde van versoeking en teëspraak, is die vrug van geloof.

Standvastigheid bevestig dit wat die waarheid uitspel ‘Genade is aan elkeen van ons gegee
volgens die mate van die gawe van Christus.’ Efesiërs 4:7. Sy beeld in ons is die maatstaf
van ons volmaaktheid.

Padkosgedagtes Mei 13

Die openbaring van Christus in ons, is die bloudruk van God se oorspronklike gedagte, en
nie die belonging van ons verdienste of poging om soos Hy te probeer wees nie!

Padkosgedagtes Mei 14

‘Die woord wat van die begin af was, die woord wat by God was, die woord wat God is, het
vlees geword en in ons kom woning maak! En uit Sy volheid het ons almal ontvang; genade,
al het ons niks gedoen om dit te verdien nie.’ Johannes 1:1,14,16. Let op die Griekse teks
sê: in ons, nie onder ons of by ons nie; dan sê die teks : garin anti garin , wat beteken:
genade teen genade; onverdiende guns. Genade is ‘n gawe, nie ‘n beloning nie. Romeine
4:3,15,16.

Padkosgedagtes Mei 15

Daar is twee tipes toetse: ‘n selftoets en ‘n lewenstoets. In die finale hoofstuk van Paulus se
laaste brief aan die Korinthiërs maak hy hierdie besonderse stelling: ‘Ondersoek julleself om
te sien of julle wel in die geloof is; stel julleself op die proef: besef julle nie dat Jesus Christus
in julle is nie!’

Padkosgedagtes Mei 16

Dit is die essensie van die geloof! Dit is waaroor alles gaan! Geloof gaan nie oor God vertrou
vir ‘n nuwe kar, of ‘n groter huis of ‘n beter werk of wat ookal nie, die openbaring van
Christus in jou is die finale slotsom van jou geloof!

Padkosgedagtes Mei 17
In soveel van ons geloofsleringe het ons die klem uitsluitlik laat val op die materiële en die
tydelike. Paulus sê dat selfs al sou dit blyk dat Christus afwesig is in die mens, kanseleer dit
nie die waarheid nie; die waarheid is dat Christus in die mens is! 2 Kor. 13:5,8. Die waarheid
word nie bevestig of bedreig deur ons ondervinding nie!

Padkosgedagtes Mei 18

In Fillipense 4 skryf Paulus dat hy die geheim ontdek het om altyd vergenoegd te wees. Die
goedheid van God word nie bevestig of bewys deur materiële seën nie, net so is tye van
gebrek nie ‘n bewys van Sy afwesigheid nie.

Padkosgedagtes Mei 19

Hierdie toets is amper soos die eindeksamen van byvoorbeeld ‘n mediese student, net voor
hy sou kwalifiseer om volwaardig in die mediese beroep te staan. Voordat hy met enige
vrymoedigheid en outoriteit ‘n Geneesheer kan wees, moet hy tog eers sy eksamen
deurkom! Waarom is dit so dringend dat die mens Christus in hom moet besef? Sekerlik nie
net bloot vir persoonlike verryking en vermaak nie, maar juis vir dinamiese en effektiewe
lewe! ‘Die werke wat Ek doen, sal julle ook doen!’ Die bonus en seën van Sy
teenwoordigheid en nabyheid is onvermydelik!

Padkosgedagtes Mei 20

Nou kom die toetse van die lewe: ‘Ons weet dat in alles wat met ons gebeur, God in ons
guns onderhandel en werk. As God vir ons is, wie kan teen ons wees? God het ons ontwerp
(vantevore verordineer, Grieks: Hy het ons uitgemeet, kunstig ontwerp.) om gelykvormig te
wees aan die beeld van Sy seun. Ons deel dieselfde gietvorm! We are jointly fashioned in
the same mould and image of His son. Wie sal slaag in enige veroordelingsklag teen ons?
Hy verklaar ons geregverdig op grond van Sy opinie van ons (Sy heerlikheid) Wie sal ons
skei van die liefde van Christus? Verdrukking of benoudheid, of vervolging, of honger of
naaktheid, of gevaar of swaard? Nee, in al hierdie dinge is ons meer as oorwinnaars deur
Hom wat ons liefgehad het.

Padkosgedagtes Mei 21

Want ek is oortuig dat geen dood of lewe, of engele of owerhede of sataniesemagte, of

teenwoordige of toekomstige dinge, of hoogte of diepte of enige iets in die ganse skepping,
ons ooit sal kan skei van die liefde van God in Christus nie!’ Romeine 8:28-39. ‘Ag dit louter
vreugde wanneer julle in allerhande versoekinge val, (toetse wat jou egte identiteit bedreig,
en weer minderwaardig laat voel en bewus wil hou van tekortkominge.) omdat julle weet dat
die beproewing van julle geloof, lankmoedigheid bring. Maar die lankmoedigheid moet tot
volle verwerkliking kom, sodat julle volmaak en sonder gebrek kan wees en in niks kortkom
nie.’ Jakobus 1:2-4. Is dit blote uittarting, te goed om waar te wees, of lê hierdie idilliese lewe
sonder gebrek en behoefte binne elkeen se bereik? Dit klink amper soos Psalm 23 ‘…. niks
sal my ontbreek nie, ek sal geen onheil vrees nie, net goedheid en guns sal my volg al die
dae van my lewe’ Is dit bedoel vir die hiernamaals, of nou?

Padkosgedagtes Mei 22

‘n Toets of versoeking verwys na enigiets wat die mens moontlik kan bedreig en oortuig van
gebrek of tekort. Onthou, God toets nie die mens nie. Daar bestaan by hom geen verskuilde
agenda nie. Jakobus 1:13,17. God is oortuig aangaande jou. Hy het lankal Sy ‘mind’
opgemaak oor jou! Sy opinie van die mens is nie nog afhanklik van die een of ander toets
wat geslaag of gedruip moet word nie. Hy het geen behoefte om nog te eksperimenteer
voordat Hy finaal besluit oor Sy liefde teenoor die mens nie. Sy welbehae en guns is Sy
finale uitspraak. Lukas 2:14.

Padkosgedagtes Mei 23

Om te hunker op twee gedagtes sodra jy teëspraak beleef, is om jouself te bedrieg. Geen

mens kan dit bekostig nie. Die manier waarop ‘n mens teëspraak en toetse verwerk is die
sleutel tot ‘n vervulde lewe. ‘…lankmoedigheid moet tot volle verwerkliking kom…’
Lankmoedigheid is ‘n vrug van jou gees. Vrug is die resultaat van ‘n proses. Verwelkom die
proses met opgewonde entoesiasme eerder as om dit weg te wens! Lankmoedigheid is die
geheim tot ‘n lewenservaring sonder gebrek of behoefte. Lankmoedigheid is nie iets wat ‘n
mens erf of oor die toonbank koop nie. Daar is geen kortpad nie; dit is ononderhandelbaar.
Lankmoedigheid in jou geloof, om absoluut oortuig te wees van die guns van God en jou
identiteit in Hom, is die skakel tot die mees gesogte lewensgehalte denkbaar.

Padkosgedagtes Mei 24

Die Griekse woord vir volmaak is holokleroi wat beteken om in volle besit te wees van dit
wat jou wettiglik toekom. Vergelyk die gedagte met Jakobus 1:15; Die woord wat telkens
vertaal word as sonde, is die Griekse woord hamartia: ha = negatief + martia van
meros=toegekende porsie of erfdeel; met ander woorde om nie dit wat jou werklik toekom te
ontdek en toe te eien nie. Dinge wat tradisioneel as sonde geklassifiseer word is eintlik net
simptome van ‘n onvervulde lewe. Vir die hongerige siel is alles wat bitter is, soet. Maar die
versadigde siel vertrap die heuningstroop. Spreuke 27:7.

Padkosgedagtes Mei 25

‘Die meetsnoere het vir my in lieflike plekke geval, my erfenis is vir my mooi’ Psalm 16:6. ‘Ag
dit louter vreugde…’ die Griekse woord hegeomai word hier gebruik, dit is die versterkte
vorm van ago, wat beteken om te lei soos ‘n herder sy skape lei. Die herder was ‘n
gesagsfiguur, wie sy kudde moes beskerm teen die elemente asook rowers en wilde diere
soos leeus en wolwe. Hegeomai beteken om met amptelike gesag leiding te neem; soos
wanneer iemand amptelik aangestel word in ‘n gesagsposisie. Blydskap is nie ‘n verleë,
skaam, aangeplakte glimlag, terwyl ek eintlik myself baie jammer kry nie. Blydskap is die
dinamiese gesagsreaksie van jou gees gekonfronteer deur beproewing.

Padkosgedagtes Mei 26
Die mees sinvolle slotsom waartoe ‘n mens kan kom in enige situasie, hoe negatief ookal, is
blydskap! The most sober calculation one can make is a conclusion which always results in
joy. Onthou, blydskap is nie iets wat jy doen nie, dit is die vrug van iets wat jy weet; die vrug
van dit wat in jou reflekteer soos in ‘n spieël. Dit is om te verstaan dat die beeld van jou
oorsprong onbelemmerd bewaar is in jou gees en in Christus volmaak verlos is.

Padkosgedagtes Mei 27

Hierdie blydskap kanselleer dinge soos selfbejammering, agterdog, ‘n gevoel van

onvergenoegdheid, angs, minderwaardigheid, die behoefte om jou probleme met ander te
vergelyk en simpatie te soek, ens. Dit is juis die dinge wat jou verswak en verarm.

Padkosgedagtes Mei 28

Een van die grootste probleme in Suid Afrika naas die

menswaardigheidsvernietigingsfilosofie (definitief die langste woord in die boek!) van
Apartheid, is die huidige konstante verwysing na die ‘Previously Disadvantaged’ of die
‘Agtergeblewendes’. Ons dink dat deur selfbejammering aan te moedig ons dit kan regkry
om mense te bemagtig. Die teenoorgestelde is egter besig om te gebeur. Niks is so
selfvernietigend soos selfbejammering en die gevoel dat ander my iets skuld nie. Ons is
besig om ‘n geslag mense te kweek wat teer op ‘hand-outs.’ Dit is so maklik om vinger te
wys na al die redes, hoe geldig ookal, hoekom dit so sleg gaan en dan toe te laat dat juis
hierdie redes my verder neutraliseer en noodwendig verder verarm.

Padkosgedagtes Mei 29

Moenie trap in die strik deur te dink dat jou spesifieke probleem so erg is, dat dit definitief jou
kla en kwel noodsaak nie. Die lewe gaan nie oor wat ‘n mens nie het nie maar dit gaan baie
beslis oor die ontdek van alles wat in jou is in Christus en wat mens dan maak met dit wat jy
het!

Padkosgedagtes Mei 30

Blydskap is die stem van geloof. Blydskap sing in plaas van sug. Blydskap neem gesag oor
elke negatiewe omstandigheid en teëspraak!

Padkosgedagtes Mei 31

‘n Mens se praat is soos die roer van ‘n skip, ‘n massiewe groot vaartuig word moeiteloos in
‘n rigting gestuur. Die onmiddellike effek van reg praat is dinamies en moet nooit onderskat
word nie. Selfs ons gedagtes is stil woorde wat net ons en God van weet; daai woorde
bepaal en beïnvloed ons innerlike mens, ons gesondheid en ons hele lewens ingesteldheid.