Professional Documents
Culture Documents
Spoonfeeding 2.0
Spoonfeeding 2.0
o
ni Julius Rocas
Ang “spoonfeeding” ayon sa isa sa mga naging guro ko ay ang makaluma at atrasadong
paraan ng pagtuturo sa mga mag-aaral ng mga kanilang leksyon. Sa ganitong bulok na
sistema ng pagtuturo, ang dapat matutunan ng mga mag-aaral ay ibinibigay na lamang sa
kanila ng wala halos hirap. Yung hirap ng pagbabasa, pag-aanalisa, pagririserts kahit
konti, pagtatanong o pakikipagtalastasan sa iba upang maunawaan ang leksyon.
Noong hindi pa uso ang mga kompyuter, projektor, at PowerPoint; Manila paper, lumang
kalendaryo o mga kartolina ang gamit ng mga guro bukod sa blackboard at chalk sa
pagtuturo. Naroon na lahat ng dapat matutunan ng mga mag-aaral. Ang gagawin na
lamang ng mga ito ay basahin, sauluhin at isulat muli kapag nagkaroon na ng mga
pagsusulit.
Pero dahil gumamit dito ng mga lumang kagamitan, ito ang tinatawag nating
"Spoonfeeding 1.0"
Ngayon sa moderno nating panahon, kung saan ang mga kompyuter at electronic gadgets
ay lalo pang nagiging normal na bahagi ng ating buhay at nagiging normal na kabahagi
na rin ng ating pag-aaral. Sa unang tingin, nariyan ang mga gamit na iyan upang lalong
mapahusay ang ating pag-aaral.
Kung wala namang PowerPoint o transparencies, nariyan ang nakasanayan na nating mga
"dole-outs" este, "handouts" na kadalasan ay binabasa na lamang ng ating mga guro o
kung tila tinatamad sila ay sa ating mga estudyante na lamang ipinapabasa. Pagkatapos
basahin ay isasalin na lamang ito sa Filipino kung sa Ingles ito nakalathala, at Ingles
naman kung ito ay nasa Filipino, at konting sariling paliwanag ay ayos na. Iyon na ang
lektyur sa araw na ito. Huwag ka nang magaksaya ng oras na magbasa ng ibang libro,
magriserts sa internet, o humanap ng ibang sanggunian. Magugulo lamang ang iyong
pag-iisip dahil kapag ikaw ay nagsabi ng mga bagay na wala sa handout o mga bagay na
hindi pa nila alam at nababasa, ikaw ay malalagay sa alanganin.
Basahing mabuti ang mga handouts, tandaan ang pagkakasunud-sunod ng mga slides
dahil ang mga iyan ang lalabas sa mga pagsusulit. Swerte mo kung ikaw ay may
photographic memory dahil kung hindi eksaktong nakasulat sa handout ang iyong sagot,
ito ay hindi tatanggapin, bagkos magiging dahilan pa ng iyong kapahamakan.
Nag-iba lamang ng anyo dahilan sa mga modernong kagamitan kaya ang tawag dito
ngayon ay ang bagong bersyon ng “spoonfeeding”, at iyon ang titulo ng kolum na ito.
Nakakalungkot hindi ba? Marahil ito ang dahilan kung bakit nananatiling pasibo ang mga
mag-aaral sa ating pamantasan. Dahil sa "Spoonfeeding 2.0" hindi na kailangang mag-
isip ng kritikal ang mga estudyante. Tanggap na lang ng tanggap, huwag nang
manguwestyon o maghanap ng alternatibo, lahat ng kailangan mo ay nasa projector na o
nasa isang partikular na stall number. Kunin mo na lang at bayaran, hintayin sa iyong e-
mail o kaya i-save mo na lang sa iyong flash drive, pagkatapos ay basahin, sauluhin at
dahil sa huli ay isusuka mo rin lahat iyan ng buong-buo sa mga pagsusulit, presentasyon
sa klase o pag-uulat.
Pero pasalamat na rin tayo, dahil kahit papaano, sa bawat paggamit natin ng mga LCD
projector, at transparencies, alam natin kung saan napupunta ang ating mga mga
matrikula.
---
Maaaring magbigay ng reaksyon sa http://jrocas.com.ph