SIMEIKHU KARTIN CHHUAK THINGSULTHLIAH

Dt. 28 September 2013 (INRINNI) PHEK- 3

NLUP SEM Tunkar thawhlehni khan NLUP Vety Dept hnuaiah 3rd leh 4th phase 1st instalment Rs. 10,000/- theuh sem a ni a; kan sub-town chhungah Vety hnuaia heng ranvulh, bawng, vawk leh ar-ah chhungkua 118 dawng an awm. Tunkar ningani khan Horti Dept hnuaia 4th phase, 1st instalment Rs. 10,000/- theuh sem a ni a, Horti hnuaiah hian NLUP dawng kan subtown chhungah chhungkaw 20 an awm bawk. JOB CARD ATANGIN INPAIH Seling khua a chhungkaw paruk te chu Kohhran(Rinna) chungchang avangin kar hmasa lam khan BDO Office atangin Job Card atangin anmahni duhthu ngeiin an inpaih tih thu kan lo dawng. Chung mite chu 1) Lianchhingpui D/o Biakkunga 2) Laldawla 3) C.Ramliana S/o Lalkhuma 4) Zatawni D/o Chalkhama 5) Ngunkama S/o Pahmanga 6) Ngaihzuali D/o Lengkaia te an ni. MISSIONS DEPT KHAWMPUI UPC(NEI) Thingsulthliah Pastor Bial Missions Dept khawmpui chu ni 27 29 Sept 2013 chhung hian Tst Kohhran Biakinah neih mek a ni. Vawiin hian Rorel inkhawm neih a ni ang. Khawmpui chhung hian Speaker Bialtu Pastor C.Lalmalsawma a ni. LUITHUAM IWMP TUI LAK IWMP hnuaia Luithuam(Tst) tui lak chu pipe zam zo tawhin tuizem siamna hmun tur Pu KM Lalchhuanga D/A huanah kar kalta inrinni khan tui tih haw a ni ta a. Tui dah khawlna tur zem lian hi RCC-a siam a ni dawn a, hemi atan hian a bul hnaiah lung lak niin rawra pawh chhut mek a ni. Tuizem hi a bial, a lai hawlhtlang 20 ft leh a san zawng 14 ft a siam tur a ni. TLANGNUAM KAWNG METAL Tlangnuam Hmar Veng Thlanmual panna kawng 160 mtrs-a thui chu VC/VEC ten an Black-top mek a, tunkar tawp lam hian an zawh hman loh chuan karleh-ah an zofel ang. He kawng siamna turah hian Commander 24 BRTF-in a lo intiam tawh angin VC te Alkatra Barel 6 an neih bak a tum a, Road Roller leh Labour thahnem tak, a changin 16, a changin 30 rual ten an thawk a. Hetih laiin Road-Roller hi a hlui a nih avangin a thawk tha hlei thei lova, ni khat bak a thawk lo, mihring tha hmanga Metal hna hi kalpui a nih mah zawk a ni. Helai kawng thui zawng hi 190 mtrs a ni a, amaherawhchu kawngpui bul Pu Pachhunga in tual zau lai vel hi Commander-in Pu Pachhunga hnena Metal sak a lo tiam a ni thung a; Pu Pachhunga hian BRTF Gate siam nan hian a ram a sahthlak then ve thung a ni. TST TUI KAWNG CHHIA Tst Vawmhraw tui lak chu tui a haw thei lova, a chhe lai ni 3 chhung an zawn hnuah hmuh chhuah a ni. Tunkar nilaini tlai dar 3:00 velah Tlungvel ramah leimin vanga chhia tih hmuh chhuah a ni a, siamthat hna thawk nghalin ni reilote-ah siam zawh hman beisei a ni. TLANGNUAM COMMUNITY HALL Tlangnuam Community Hall sak chhunzawmna turin Cheng Nuai 5.8 hmuh leh a ni a, a chung Steel structure khawih tan nghal niin karlehah zawh an tum. RANGVA BUNDLE 4 PE Tlangnuam Health Clinic sakna tur atan Bialtu MLA & Home Minister Pu R.Lalzirliana chuan Rangva Bundle 4 a pe a, Tlangnuam VC ten rangva hi an kawl. Health Clinic sakna hmun tur hi VC ten an enthlithlai tawh a, ruahmanna pawh an nei tawh a, mahse la tihchianna erawh an la nei chiah lo a ni. TAWI EAST BLOCK CONFERENCE Nimin ni 27/9/2013 khan Tawi East Block Congress chuan Keifang Com. Hall-ah Conference an hmang a, West Block(Seling, Tlangnuam leh Thingsulthliah) atangin Conference hmanpui tur hian motor thahnem tak hmangin an kal hlawm.

A LO NIH TAK CHU AN TI - Naupang Sande Sikul khawmpui hi Fashion Show te pawh a ang deuh an ti. - Inneih/Lungphun etc hautak chhan chu mahni tlin tawk nilo, a nei zawk te tlin tawka tih ve tal tum vang a ni an ti. Kan sub-town chhunga Chawlhbuk te hi a hnim tlangpui an ti. - Chawlhbuk te hi a chhe tan a, a sak dil nachang hriat ang hian a siamthat leh dil nachang hriat nise an ti. Mahni bawlhhlawh rut lova midang compound leh vantlang ram a hnawl kal chingte hian sim rawh se an ti. - NLUP dawng theuh theuh, a hnuhnung apiangin an dawng tlem tulh tulh a ni lo maw an ti. - Kan sub-town hi Vantlang ZunInah chuan kan intodelh thawkhat an ti. - Thlan laih, mitthi lumen, khawhar In len te hi tlawmngaih vang nge tih dan phung kan zawm mai mai ni ang an ti. - A enkawltu Dept-in sanghal an khuahkhirh lo bawk a, lo lamah a ninawm khawp an ti. - Tst VC Information Mike atanga thupuan hi C/A Veng sang lamin an hre ve theilo an ti. - Zu hi buaipui a ngai lo, zurui leh buaina siam, zu vanga chhungkaw tibuai tute hi buaipui zawk hi a tha fe zawk an ti. DON BOSCO SCHOOL Don Bosco School, Seling chuan ni 25/9/2013(Nilaini) khan Annual Concert & Parents Day an hmang a, ni 26/9/2013-ah Bosconians te nen Re-Union neiin hun hlimawm tak an hmang bawk. TLANGNUAM BRANCH YMA HRIATTIRNA Tlangnuam Branch YMA chuan kan khawchhunga Pioneer Camp a zu rawn lei lo tur leh rawn beisei lo turin mitin a hriattir a, pawisa lova rawn tilui in awm a man in tawk a nih chuan engmah in sawi buai thei lovang. Vai tih hausak nan I sum leh pai leh I hriselna I luanral tir kher hi a tul love. Sd/- Secretary Kumpuan Sub-Committee Tlangnuam Branch YMA