Chechen M.

Tan Kas1 WFV2

2013-79236 G. Kerby C. Alvarez
Adarna Reflection Paper
Ibat iba ang mga imahe ng kabayanihan na ipinakita sa dulang Ibong Adarna kung saan
si Don Juan ang pangunahing bayani. Ipinakita ang kabayanihang pampamilya sa dula, ito ay
kung saan ang bunsong si Don Juan ay nakipagsapalaran upang hanapin ang tanging lunas sa
sakit ng amang si Haring Fernando. Iniligtas din niya ang mga kapatid kahit na patuloy siyang
pinapahamak ng mga ito. Isa pang imahe ng kabayanihan ay ang kabayanihan sa pag-ibig. Ito
ay tatlong beses na ipinakita. Una ay ang pagtalo ni Don Juan sa Higante na siyang nagbabantay
kay Prinsesa Juana upang makuha ang kamay nito, isa pa ang pagtalo ni Don Juan sa
Serpyenteng may pitong ulo upang makuha ang loob ni Prinsesa Leonora at ang huli ay ang
pagsunod sa pitong utos ng hari upang mapakasalan ang anak nito na si Prinsesa Maria Blanca.
Isa pang kabayanihan ay ang kabayanihan sa pagtulong sa kapwa. Makikita ito nang binigay ni
Don Juan ng tinapay ang isang ermitanyo kahit na nagiisang tinapay na lang ito sa loob ng ilang
buwan pa niyang paglalakbay.
Marami ang makikitang pagkakatulad ng konsepto ng kabayanihan sa dulang Ibong
Adarna at sa mga epikong Pilipino. Makikita na ang bayani sa Ibong Adarna ay isang lalaki, si
Don Juan. Siya ay hinahangaan at matipuno. Siya ang tagapagligtas ng hari mula sa sakit at siya
rin ang tagapagligtas ng mga prinsesa mula sa higante at serpyenteng may pitong ulo. Si Don
Juan din ang naging tagapagligtas ng Kaharian ng Berbanya nang maghiganti si Prinsesa Maria
Blanca nang tinangka nitong lunurin ang mga mamamayan sa Berbanya. Si Don Juan ay
nagtataglay ng pambihirang lakas at galing sa pakikipaglaban kahit na siya ang bunso sa
magkakapatid. Si Don Juan din ang naging tagapagmana ng kaharian ng Berbanya gaya ng
konsepto ng mga bayani sa epikong Pilipino na kung saan ang bayani ang tagapagmana ng
kultura at tagapagpatuloy ng lahi. Nagpapakita ito ng mga karanasan sa pakikidigma at pagliligtas
mula sa masasamang elemento. Ang halimbawa ng mga pakikidigma sa Ibong Adarna ay ang
pakikidigma ni Don Juan sa higante at sa serpyenteng may pitong ulo. Ipinakita rin sa Ibong
Adarna ang malakas na ugnayang pampamilya o magkakamag-anak. Ito ay lubos na makikita
nang magkasakit si Haring Fernando at hinanap ng magkakapatid ang tanging lunas na Ibong
Adarna at iginiit ni Don Juan ang mga kasalanan sa kanya ng kanyang mga kapatid. Mas pinili
niya ang dugo at ipinagtanggol pa ang mga kapatid kesa sila ay maparusahan. Ipinakita din sa
Ibong Adarna ang maigting na sistema ng ugnayang panlabas ng mga kaharian sa iba pang
kaharian gaya ng katangian ng mga bayan sa epikong Pilipino. Makikita din na ang mga prinsesa
ang naging kahinaan ng bayani na si Don Juan gaya ng sa epikong Pilipino na ang kababaihan
ang nagbibigay kahinaan sa bayani. Ito ang naging dahilan upang malagay sa kapahamakan ang
kaharian ng Berbania nang maghiganti si Prinsesa Maria Blanca. Ang mga kababaihan din ang
nagdulot ng suliranin sa bayani na si Don Juan gaya ng paglaban nito sa Higante at Serpente na
siyang nagbabantay sa mga prinsesa at sa pagsunod ni Don Juan kay Haring Salermo para
makuha ang kamay ng anak nito. Sa epikong Pilipino, ang kababaihan ang dahilan sa
pagpapakababa ng mga kalalakihan sa pagsuyo sa kamay ng babae upang magpakasal gaya
nga ng ipinakita sa Ibong Adarna.
Sa kabilang banda, may mga pagkakaiba rin ang mga konsepto ng kabayanihan sa dula
at sa epikong Pilipino. Sa epikong Pilipino, ang mga bayani ay ipinapanganak sa hindi normal na
sitwasyon ngunit sa Ibong Adarna ay hindi ito ipinakita. Sa Ibong Adarna ay hindi alam ni Don
Juan ang kanyang magiging kapalaran at ang magbibigay ng mga solusyon sa mga suliraning
kakaharapin niya. Kinailangan pa niya ng tulong ng ermitanyo sa ibang mga suliraning kanyang
kinaharap gaya ng kaalaman sa paghuli sa Ibong Adarna at kinailangan din niya ang tulong ni
Prinsesa Maria Blanca upang magawa ang mga imposibleng utos ng ama ng Prinsesa Maria
Blanca dahil walang mahika si Don Juan, si Prinsesa Maria Blanca ang gumawa ng mga utos
gamit ang kanyang mahika.
Ang Ibong Adarna ay nagpapakita ng kalagayan ng lipunang Pilipino noong panahon ng
Espanyol. Makikita na ang mga lugar sa kwento ng Ibong Adarna ay nahahati sa mga kaharian
kung saan ang namumuno ay ang hari na ang lahat ng utos ay nasusunod. Makikita rin na
parating may bakas ng simbahan ang kaharian ng Berbanya. Makikita ito ng lubos nang ikakasal
sana si Don Juan at Prinsesa Juana sa harap ng isang arsobispo. May bakas din na makikita ng
militar sa Ibong Adarna sa kaharian ng Delos Crystales nang ipinagutos ng Haring Salermo sa
ikatlong utos nito kung saan ipinagawa niya na ang muog ng kastilyo na mula sa bundok ay
tayuan ng gulod na pitong hanay na may mga kanyong paglalagyan ng anim na batirya at ang
mga kawal ay dapat na nasa ayos pakikibaka at magsisiputukan na parang may digmaan. Ang
mga ito ay maihahalintulad sa konspeto ng reduccion ng mga kastila. Ang mga kaharian ay
maituturing na mga pueblo sa panahon ng Espanyol. Makikita na ang mga Kaharian sa Ibong
Adarna ay nasa disenyo ng Iglesia-Ayuntamiento-Fuerza. Ang Iglesia sa pamamagitan ng
arsobispo, ayuntamento sa hari at fuerza sa mga kawal at digmaan. Ang hari ay maihahalintulad
bilang isang Gobernador-heneral na siyang namumuno sa pueblo o kaharian at siya ring
namumuno sa sandatahan.
Isa pang kalagayan ng lipunang Pilipino noong Panahon ng Espanyol ay ang politikal na
Gawain kung saan ang pagpili ng mamumuno ay namamana sa tatay madalas sa pangaay na
lalaki. Bagamat di panganay si Don Juan, sa kanya pa rin ipinamana ang tungkulin sa Kaharian
ng Berbanya dahil sa pagkabigo at pagsuway ng panganay na anak ng Hari na si Don Pedro.
Makikita din sa Ibong Adarna na ang kapareha ng prinsipe ay dapat prinsesa o isang
mahalika. Hindi ipinakita sa Ibong Adarna na nagkaroon ng relasyon ang isang maharlika
(Espanyol) at pangkaraniwang mamamayan (Pilipino). Ipinapakita dito ang purity of blood na
konsepto ng mga Espanyol.