Nisaar main teri galiyon peh..

Nisaar main teri galiyon peh ai watan, keh jahan

Chali hai rasm keh koi na sar utha keh chale
Jo koi chahane wala tawaaf ko nikale
Nazar chura keh chale, Jismo-jan bacha keh chale
Hai ahel-e-dil ke liye ab yeh nazm-e-bast-o-kushaad
Keh sang-o-khisht muqayyad hain aur sag aazad
Bahut hain zulm keh dast-e-bahana-ju keh liye
Jo chund ahel-e-junoon tere naam leva hain
Baney hain ahel-e-hawas muddai bhi, munsif bhi
Kise wakil karen, kis-se munsifi chahen
Magar Guzaarane walon ke din guzarate hain
Tere firaq mein yun subah-o-shaam karate hain
Bujha jo raozan-e-zindan to dil yeh samajha hai
Keh teri maang sitaron se bhar gai hogi
Chamak uthe hain salasil to humne jaana hai
Keh ab sahar tere rukh par bikhar gai hogi
Gharaz tasvvur-e-shaam-o-sahar mein jeete hai
Giraft-e-saaya-e-diwaar-o-dar mein jeete hain
Yuhin hamesha ulajhati rahi hai zulm se khalq
Na unki rasm nai hai, na apni reet nai
Yuhin hamesha khilaye hain humne aag mein phool
Na unki haar nai hai na apni jeet nai
Isi sabab se falak ka gilaa nahin karate
Tere firaq mein hum dil bura nahin karate
Gar aaj tujhse juda hain to kal baham hongey
Yeh raat bhar ki judai to koi baat nahin
Gar aaj auj peh hai taal-e-raqib to kya
Yeh chaar din ki khudai to koi baat nahin
Jo tujhse ahad-o-wafa ustuvaar rakhate hain
Ilaaj-e-gardishe lailo-nihaar rakhate hain.