BALIKDAN ING MILABAS QNG ITAGUMPE NING

BUKAS (Neng: Sonjai Salenga)

J une 27, 2014 at 2:59pm
Qng yatu masaguli dumuruting bie,
Pulayi masalusu dapat misane.
Ing durut na babo at lalam mu pane,
Dapat kang talan ban eka pin miwale.
Nung ken naka mo pin tori ning tagumpe,
Datang ing oras mu tipa kang maglumbe.
Nung e pin biasang balikid at lumawe,
Ketang milabas e ka pin managumpe.
Anya sa ngeni kanaku mong sasabyan,
Ing mengalabas keca sanang balikdan.
Pibulayan mu kecang tatalakaran,
Nung alang milabasala ka kasalukuyan.
Kalupa na ning kawayan qng marangle,
Matas ya pin dapot duruku yang pane.
Simbulu ning kababan at pamagdame,
Deti ilang sangkap na ning pamakyabe.
Dapot e mu alako karing mayatu,
Abitan daka lalam ban lang mipwestu.
Uli ning dewakan at e maka-ustu,
Kislap ning pera at e ustung prinsipyu.
Atin taganang taung e biasang balikid,
Detang sipsip ampon utak da makitid.
Apin ding tuki-tuki , takla-taklayid,
Qng dewakan ning yatu la makatayid.
E tamu pin pautang a lub ing casaupan,
Aduan namu balikid qng kamarinayan.
Uling ing dine mayap ya at kababan,
Nung alang dine, atyu ing kayabangan.
Ngana na pin nitang matwang nang kasebyan;
Ing taung e biasang balikid king kayang ibatan,
Kapilan man e ya miras qng kayang puntalan.
Iting kasebyan tune ya t dapat panualan.
Ngaku naman sasabi qng kasebyan itayid
At ing taung biasang lumawe at balikid,
kapilan man e ya misakab at mitakid,
Pablasang dapat na ustu at matulid.
Uling nung melikid ka pin qng milabas,
Sugradung kayapan keca raiyablas.
Asabi mung tagumpe ing kecang bukas,
Uli pamakyabe mu tapatat wagas.