Kum 100 apha Mission

Mission cihpen USA leh Europe gam aa-om Pawlpi a kipsate in, " Tawntung
Lungdamnathu ahi Vantungmi-3 taangkona" pen teltakin amau nasep hi, cih thei uh
ahihmanin, kipum-aap in piakkhiatna tawh, neihsa sum leh thatang kaikhawmin naseem
ding missionary paisak hi. Conference khempeuh in amau Tithe Sharing a puak uh,
adawldawl a paitoto sumpite GC panin hong kizek kikkik ahi hi. Tithe-sharing bek hilo-in
Conference tuamtuam te in amau septheihna lampi tuamtek tawh Missionary paisakin
Mission phut uh hi.

Gamthak phuutna ding kipawlna khempeuh Mission kici ahi hi. Missions khempeuh in
Conference Status a phak dongin kalsuan ding ahi hi. Gampua-ah missionary a puakzo
keizongin, selfsupport tawh dingzo hamtang ding hi. Selfsupport tawh ding khempeuh
Conference dinmun a tungzo ahi hi.

Mission Masuan.
(SDA Pawlpi in, Christ hong piak ahi, " Note leitung khempeuhah pai unla,
nuntakna nei mikhempeuh tungah hih lungdamnathu hilh un," acih nasep pen
nakpitakin thupiseh hi.)Mark 16:15.

( Amaute in, Rev 14:6-12 sungaa Remnanr Church nasep "vantungmithumte
taangkona" pen a taangko dingin SDA te hong kisamkhia hi, ci-in um uh hi.)

(Leitung aa teng gamkhempeuh, pawl khempeuh, namkhempeuh, paukhempeuh,
mikhempeuh tungah"tawntung lungdamnathu" thupuak pen nasep poimawh hi,
ci-in ngaihsun uh hi. Hih thu hangin, pumpi-thatang, neihsa leh sumlehpaii zangin
leitungbuppi naseem dingin kipia uh hi.)

(SDA in Missionary nasep pen nasep behlapna bangin ngaihsun lo hi. Hih
bekmah Pawlpi nasep hi, ci-in ngaihsun hi. Leitungbuppi pen amaute
lokhawhnamun ahi hi. Leitung beihun ding pen amaute kipiakzawhna tungah
tampi kinga hi, ci-in um uh hi.)Matt13:18. Matt24:14.

* SDA Mission nasepna pen leitunggam 204 pha hi.
* Kamnam 687 tawh thu kihilh hi.
* Kamnam 190 tawh laibu kibawl hi.
* Kumsimin mi-304 missionary kipuak hi.
* Sumpi leitungbup ah $48,167,156/ - kizeek khia hi.
[Seventh-day Adventist Encyclopedia VOL 11. pgg101.]

Missions Aim and Object.
Mission dinmun tawh omcip ding ngimna GC in neilo hi. Mission in a puanbuuk khan
ding hi. Gamkekin pawlpi tampi phut ding hi. Pawlkhempeuh namkhempeuh kiang lut
ding hi. Pawlpi khempeuh Conference Status tundong kalsuan ding hi. General
Conference of Seventh-day Adventist kici kipawlna sungah Reprentative system tawh
kihel ciat ding hi. USA gamah Mission khatzong omlo hi. Mipum khatzong Conference
tawh kizomlo omlo hi.

GC huhna Appropriation Fund bek ngaklo-in, amau thatawh adingzo ding-a kipantah
ahi hi. Tua banah USA te mah bangin missionary puaksawnin Mission Station phut kawi
kawi ding pen MISSION nasep ahi hi. Kum-100 pha napi ding theilo pen mipoi-
mihem ahi hi. GC in zatui tuamkhat a zon kul ding hi. Myanmar Union buaina pen sum
tamlua ahihmanin naseem nuamlo uh hi. GC FUND pen blackmarket tawh khekin hau
uh hi. Khasum khankhan uh-a worker naseem omlo hi.

Approppriation Fund khaktan leh bukaan khia-in an hong zong ding uh hi. Sum kicinglua
ahihmanin paikhia lo hi. Muvanlaite inzong a bukan nuamlo a tate abu panin sawn khia
hi. An vapuak nawnlo hi. Leen kisinsak hi. A kha zaapsak hi. GC panin Appropration
Fund a khawl mateng tua natna dam ngeilo ding hi. GC Fund kicing ahihmanin Source
ngahna memberte thusim lo uh hi. Member te keemin khoi ngeilo ding uh hi. Myanmar
Union of SDA natna a thei ding Specialist GC pan kisam hi. Tua lo-in a tunglampan
kipuak sumtawh kivak ding bek ngaihsun uh hi.

Neihman Hilo, Kipiaknopman.
General Conference in sumbawlna-set neilo hi. Thu-umte piakkhiat sumpi bektawh
naseem uh ahi hi. A piakhiate inzong sum a haulua hituanlo uh hi. Piaknopman bekmah
ahi hi. Ka omna khua pen Pawlpi gollualo hi. Members 160-200 kimpawl hibek hi. High
School khat nei uh hi. Tua banah gamthak phudingin India gam pai uh hi. Khangno
tawm leh Elder pa paisak uh hi.Tua huhna dingin sumpi kidong den hi. Mattang aa
kipan kipia hi. Effort budget cinliailiai uh hi.

Follow-up kisamlai hi. Biakinn leh leitang kisam hi. Piakzawh zahzah lawptakin kipia hi.
A tawpna-ah khangham lamte hong diang uh hi. Avan luite uh, Yard-sale ci-in innmai-ah
hong zuak uh hi. Sabuai-lui, laibu-lui, puansilh-lui, ects cih bang a zuaktheih khempeuh
a ngahzahzah tawh zuak uh hi. Lo leh leitang zuak uh hi. Khanghamte in a omna inn
zuakin, Nursinghome zuan uh hi. Conference cihpen sumhauh luatman nahi tuan
keimawk ei. Upna tawh kipiakhia ngam hizaw mawk ei, ci-in kakhitui hong
sumpelhpalh hi. Nalianpi a semte haulua neilua sakha kei ni. Kipia khia hilel hi.
Dangka bebek paulam pen uplahna namkhat ahi hi. Minam dangte neumuh luat
lawmlawm lah Uplahna leh spiritual leadership sinlohna namkhat ahi hi.

Kum-100 cin Golden J ubilee
Thaandaung Myothit ah SDA tunzawh kum-100 cinna Golden Jubilee pawikham uh hi.
Leitung mihing kum-100 cingte khankhin hi-a mainawt nang lamet khempeuh tawpna
ahi hi. SDA kum-100 cinpawi pen khalamah khangcing leh kilawm mahmah hi. Report
tuamtuamte pen Pawlpi ngimna tawh hong ki-elpuak simsim hi. Union Mission
Secratary pa in, " No Zomite hong kihta keng, worker lakah mi nei ingh. Laymen lakah
mi nei ingh." cita mai hi. Kawlgambup minamte tungah thupha puak ding tavuan kisuan
Union officer pa kampau ahi hi. Zomite aading lamet omlo hi. Hong to ahi hi.

UMM ii sep khantohna khempeuh suksiat sawm ngiau hi. Khantohna khempeuh Karen
makaite langpanna in ngaihsun ngaiu hi. Zomite tungah War-Declare bang lianin, " No
Zomite hong kihta keng" cih kammal hong pusuak ahi hi. Zomite necip ding a hong
paukhiatni pen a sungah Dawi a lutni ahi hi. Khantohnate hong lungdam pihpen ding
hinapi. Aheh pen Pu Satan longal kua hiding hiam? Christian makai khat kampau
dingin khasiat huai kasa mahmah hi. Kilemna bawl dingte in migilo teng kaikhawmin
kivat sak hi. A domto ding leh a lamto dingte in susia uh hi. Gitlohna leh thumanlohna
khempeuh a pantah Union uliante ahi hi.

Zomi SDA te zong Jesu sisan tawh hong kileisa ahi hi. Union power lel tawh sukmai
ding lauluat zong omlo hi. Lawkite leh milim biate sepngamloh ngoltol tak aa a sem
ngam ding hong cial uh hi. Position khan uh hi. Motor Cycle pia uh hi. Golhsum ding
dangka puasak kanghkangh uh hi. Mittawsa-in bangbang hileh semngam takpi mawk
hi. Hong cing Pasian omlo hileh lauhuai takpi mah ahi hi.

SDA Golden Jubilee Pawipi pen Zomite aadingin khimziing hi. Zomite aadingin
maizumna leh dahna ni ahi hi. Karen neihtuam National Day tawh kibang hi. Ahizongin
Jesu sisan tawh hong kileisa lau nang omlo hi. Samzang khatzong kialo ding
hi. Kawlgam in kum-100 sung ih kaihkhop thupha tu-a ih zakteng himai zen hi.

SDA session reports.
Philipine Mission pen 1908 kum pawlin kiphut hi. Kum-20 zong cinglo-in 1926 kimpawlin
Conference dingzo uh hi.Makaite in tawsawn uh hi. Nakpitakin Lungdamthu taangko hi.
Mizo mission zong Conference din a sawm ciangin, Union leh Division te in thapia hi.
Ding un. Hong huh ding hi ungh, cizzawsop hi. Pawlpi mite lawpna ding report hoihnono
kipia hi.

Tulaitak Myanmar Union kikhop simloh, a beisa hunte-ah SDA session a om ciangin
report kipia-in zaknop mahmah hi. Layman a lawpte kipaipihin platform tungah teti
pangsak hi. Circle leader ten lawptakin a nasepnate report pia hi.Local Mission officers
te in amau department ciat thupiang lawphuai nono report pia uh a, mitphialo-in kingai
hi. Session sung mipite mai leh committee sungah Union officer te in lungdam kohna,
thapiakna, a hanciamte pahtawina pulak uh hi.

Soulwinning leh gamthak munthak phutna report kigen hi. Pastor kipumpiakte Ordained
kipia hi. Gamthak phutt nang geelna thakte leh hanthotnate kingai hi. Members te
tungpan sumpi bangzah khang hiam, ci-in kigen hi. Self-support aa dinzawhna ding,
Conference status tunna ding bangzah kisamlai, ci-in thapiakna kinei hi.

Meeting kah khempeuh lungdam takin ciah uh hi. Lungsim khensatsa tawh Pasian
naseem nuamin ciah uh hi. SDA ahih pen-u kipak uh hi. Kisaktheihpih uh hi. Kisuanna
omlo-in hangsan takin teti panding lawp uh hi. Ngakzolo zahin lungsim khensatsa-in om
uh hi. Topa aadingin singam uh hi. Tua pen Christian thahaatna leh nuntak zia ding ahi
hi.

Union Session ah Bang kiza
California state cia phalo Kawlgam khutkuak cia pen, kum-100 sungin 75% in
Vantungmi-3 taangkona zanailo uh hi. Tua in union uliante lungsim lawngkha nailo
hi. "Minam khempeuh tungah hih lungdamnathu" acih kammal in a lungsim
vuttaktakin na um hiam? Platform tungah member te kihtaklohna kammal bek kiza hi.
Moses zaluahte, ahihna to na bekbek kiza hi. Evangelism hanthotna tawm mahmah hi.

GC leh Division personal te a paiciangin, nuntakna haksatna gen uh hi. Vanman
khangkhang gen uh hi. Khasum hong khan un, ci-in dahmai taktawh pulak uh hi. GC
piak Dollar tenghawmin hong ne pihpiah ding uh hi. Sum lamsang adeihdeih un hong
zeek ding uh hi. Tu-a, ADRA Fund leh GC pan aa kipia dollar omzahzah
Blackmarket tawh khekin hauhlawh mahmah uh hi. Amau mah in seempah lai uh hi.
Court tungtaang aa kizang sumte leh ADRA FUND aneih teng gamdangten neileh
gamthak phulna-in zangtakpi ding uh hi.Jungle chapel lamsak ding uh hi. Pasiangam
zai tuam mahmah ding hi.

Mission leh Conference in Policy tuamneihlo
Pawlpi Church Organized khat ahihleh Policy zui-in kiphut hi. Tua pawlpi in, Church
khat neih ding aa kilawm right khempeuh nei pah hi. Minam deilo hi. Pau deilo hi.
Meellehsa a vom a kaang deilo hi. Amun-agam deilo hi. Pawlpi thuneihna right
khempeuh neipah hi. Vantung tawh kizopna pen organized church pan kipan hi.
General Conference pan hilo hi. Division zum pan hilo hi. Union leh local mission zum
pan hilo hi. Local Church pen power lian pen ahi hi.

Local Mission, Union Mission kikhopna khempeuhah ama VOICE kiza tawntung ding
hi. Churchboard thukhenna pen mannuel tawh kituak ahih laiteng aana-power zangin
khatpeuh in phel thei lo hi. Amau keem ding sia zong teeltheihna power nei uh hi.
Tunglam panin zawhthawhna tawh a ukding sia mawkkoih thei lo hi.

Working Policy a tuam omlo hi. Ministries Mannual atuam kibawllo hi. Church Manual
khempeuh leitungbup kibang hi.
Tulaitak eite hongdom hong tawsawn ding, Union pen a lauhuaipen hong suak khong
hi. Pasian hehpihna lianmahmah ahihmanin hibangin ompaisuak lo kha ding hi.
Kipuahkikna hunpha hong omlai kha ding hi. Kipuahphatna pen hih uliante tungpan
piangkikzo-in ka-um kei hi. Amau naseem sanggamte tungpan kikheelna hong pai-in
ka-um kei hi.

Ahih hangin Pasian in a zatdingmi tampi omlai kha ding hi. Minambup lungtang puak
ahihleh bel, Union Mission tungtawnin khanlawhna hun hong omlo ding ahihmanin,
MAC te Pasian in hongzat nangin kiging tawntung ni. Ki-aap ni. Kiniamkhiat ni. Itna
takpi tawh Tawntung Lungdamnathu taangko ni. Eitha tawh kizolo ding hi. Sumhauhna
tawh kizolo ding hi. Minam liante power zangin nasep kizo lo ding hi. "Not by might, nor
by power, but my spirit"" Thagum haatna tawh hilo, vangletna hang hilo, Keima Kha
tawh" nazo ding uh hi.

Pr Thang Siangh. zogampalpi@yahoo. com

A kaikhawm Khenno@Myanmarunionconference.org/myanmaruionconference.blogspot.com