RONDILLA, MIA JANEEKA B.

FIL11/A19

Death Penalty: Dapat ba o Hindi dapat?

Sa panahon natin ngayon ay masasabi nating wala ng kasiguraduhan ang kaligtasan.
Maaari ito sa ating sarili o sa mga taong nakapalibot sa atin. Ang ating paligid ay puno ng mga
gawaing di kanais-nais para sa lipunan, maraming mga krimen ang laganap sa ating mundo.
Pagpatay at panggagahasa, ito ang ilan sa mga krimeng may matinding katumbas na
pasakit sa dignidad at pagkatao ninuman. Walang kahit na sino ang magnanais na mamatayan o
magkaroon ng pamilya o kaibigang nagahasa at nagawan ng iba pang klaseng krimen. Ano nga
ba ang nararapat na parusa sa mga taong nakagagawa ng mga ito? Death penalty ang isa sa mga
sinasabing solusyon di lamang upang mabawasan ang krimen kundi para sa wastong katumbas
na parusa sa paggawa ng pagkakasalang tulad ng pagpatay at panggagahasa. Kung ating titignan,
di ba't tama lamang na buhay ang ipalit sa buhay ring nawala? Di ba't tama lamang na ito ang
parusa sakanila? Ang kahilingan lamang ng taong nawalan ay makamit ang hustisya, ito nga ba
ang makapagbibigay ng kapayapaang ibig kamtin?
Ang pagpataw ng death penalty ay masusi pa ring inaaral sa kasalukuyan kung
nakatutulong ba ito sa pagbawas ng mga krimeng nagaganap. Ngunit sinasabi ring wala raw
nakikitang pagbabago sa porsyento ng krimen patungkol sa pagpataw nito. Ang death penalty ay
ang pagkitil ng buhay kapalit ng isang matinding pagkakasala, at ito ay naaayon sa batas. Kapag
tayo ay pumatay at kumitil ng buhay ng kahit na sinuman, hindi ba ito rin ay kasalanan at
maituturing ding krimen? Ang Diyos ay biniyayaan tayo ng buhay na dapat nating pag-ingatan.
Ayon sa bibliya, ang pagpatay ay matinding kasalanan. Kailanman ay di ninais ng Diyos ang
may mamatay o ang pumatay. Ang death penalty ay mali at matinding kasalanan. Maaari
sigurong mabigat nga ang sala, ngunit di naman nararapat patayin ang nagkasalang ito. Sapat na
ang patawan siya ng panghabang-buhay na pagkakakulong at ipasa-Diyos nalang ang kanyang

buhay at kahahantungan. Lahat naman ng bagay na nangyayari sa buhay natin ay may dahilan.
Ang Diyos ay may dahilan sa lahat. Isa na rito siguro ang matutunan nating magpatawad. Isipin
sana natin, paano kung tayo ay pamilya ng nagkasala, ano ang ating mararamdaman kung
sakaling papatawan siya ng death penalty? Maaring umayon tayo sa death penalty, maaring
hindi, ang buhay pa rin ng tao ang siyang mangingibabaw at mahalaga.
Lahat naman tayo ay nagkakasala, sadyang iba-iba lamang ang bigat ng mga
pagkakasalang maari nating magawa. Mahalaga ang ating buhay at ang naging bahagi nito. Sa
huli rin nama'y lahat tayo ay mamamatay. Lahat ay may hantungan at hangganan. Hayaan nalang
sana natin na ang Diyos na Maykapal na ang maghatol sa buhay nating angkin.