Edukasyon sa Pagpapakatao

Baitang 9
Ikalawang Markahan
MODYUL 5:

MGA BATAS NA NAKABATAY SA

LIKAS NA BATAS MORAL

A. ANO ANG INAASAHANG MAIPAMAMALAS MO?

Isang nakatutuwang tula ni Robert Fulghum ang nagsasabi na natutuhan na natin
ang lahat ng kailangan nating malaman noong tayo ay musmos pa lamang (All I Really Need
to Know I Learned in Kindergarten). Huwag mandaya. Huwag manakit ng kapwa.
Maghugas ng kamay bago kumain. Magpahinga. Mag-ingat sa pagtawid. Ilan ang mga ito
sa kaniyang mga binanggit at kung iisipin, sa dami ng mga nasa batas, sa dami ng mga
tungkulin, sa dami ng mga sinasabi sa ating dapat at hindi dapat gawin, napakasimple lang
naman ng utos sa tao: magpakatao, maging makatao. Subalit, dahil siguro sa sobrang
kapayakan nito, hindi ito mawari ng moderno at komplikado nating pag-iisip.
Inaasahan sa modyul na ito na maipamamalas mo ang pag-unawa sa mga batas na
nakabatay sa likas na batas moral. Ano ang batas na gabay sa ating pagpapakatao? Bakit
kailangang umayon sa batas na ito? Gagabayan ka ng modyul na ito upang maunawaan
mo ang buod ng mga batas na umiiral sa lipunan. Isa rin itong pagpapalawak sa pananaw
na naglilimita sa iisang paraan lamang ang pagtupad sa tawag ng mabuti.

Sa modyul na ito, inaasahang maipamamalas mo ang mga sumusunod

na kaalaman, kakayahan at pag-unawa:
5.1. Natutukoy ang mga batas na nakaayon sa likas na batas moral
5.2. Nasusuri ang mga batas na umiiral, panukala tungkol sa mga kabataan o
tuntunin sa pamilya batay sa pagsunod ng mga ito sa likas na batas moral
5.3. Nahihinuha ang Batayang Konsepto
5.4. Naipahahayag ang pagsang-ayon o pagtutol sa isang umiiral na batas batay sa
pagtugon nito sa kabutihang panlahat

Edukasyon sa Pagpapakatao, Baitang 9, Modyul 5

Pahina 1