Taga-ulat: Johnlyn C.

Bordios
Guro: Prof. Carmela G. Ong

Fil 126 (TFr 10:30-12:00)

Setyembre 29, 2015

Teoryang Makatao
Ang teoryang makatao sa pagkatuto ay nagbibigay diin sa kahalagahan ng mga salik na
pandamdamin at emosyunal. Itoy nananalig na ang pagtatagumpay sa pagkatuto ay mangyayari
lamang kung angkop ang kaligiran, may kawilihan ang mga mag-aaral at may positibong
saloobin sila sa mga bagong kaalaman at impormasyon. Kung ang mga kondisyong itoy hindi
matutugunan, ang anumang paraan o kagamitang panturo ay maaaring hindi magbunga ng
pagkatuto. Kaya nga, sa larangan ng pag-aaral ng wika, kailangang may magandang saloobin ang
mga mag-aaral sa wikang pag-aaralan, sa mga gumagamit ng wika at sa mga guro ng wika.
Tungkulin ng guro na maglaan at lumikha ng isang kaaya-ayang kaligiran sa klasrum at isang
pagkaklaseng walang pananakot kung saan maginhawa ang pakiramdam ng bawat mag-aaral at
malaya nilang nagagamit at nasusuri ang bagong wikang natutuhan. Dagdag pa dito, mas mabilis
na natututunan ng tao ang wika at wala siyang pag-aalinlangang gamitin ito at malaya niyang
nailalahad ang kanyang saloobin. Kailangan ding linangin ng guro ang pagpapahalaga sa sarili
ng mga mag-aaral. Pangunahing binibigyang pansin ng teoryang makatao ang mga mag-aaral sa
anumang proseso ng pagkatuto. Palaging isinasaalang-alang ang saloobin ng mga mag-aaral sa
pagpili ng nilalaman, kagamitang panturo at mga gawain sa pagkatuto. Ilan sa mga metodo sa
pagtuturo ng wika na may kaugnayan sa makataong tradisyon ay ang sumusunod: Community
Language Learning ni Curran; ang Silent Way ni Gattegno at ang Suggestopedia ni Lazonov.
Ang Mga Designer Methods ng Dekada 70
1. Ang Community Language Learning (CLL)
Ang CLL ay isang klasikong halimbawa ng pamaraan na batay sa domeyn na
pandamdamin. Ang pamaraan ito ay ekstensyon ng modelong Counselling-Learning ni
Charles A. Curran na nagbibigay-diin sa pangangailangan ng mga mag-aaral-kliyente
na nagsama-sama bilang isang komunidad na binibigyan ng kaukulang pagpapayo.
Nababawasan ang pagkabahala sa pamamaraang ito sapagkat ang klase ay isang
komunidad ng mag-aaral na laging nag-aalalayan sa bawat sandali ng pagkaklase. Ang

guro ay tumatayo bilang isang tagapayo at laging handa sa anumang pangangailangan ng

mag-aaral.
2. Ang Suggestopedia
Ang pamaraang itoy mula sa paniniwala ni George Lozanov (1979), na ang utak
ng tao ay may kakayahang magproseso ng malaking dami ng impormasyon kung nasa
tamang kalagayan sa pagkatuto, katulad halimbawa ng isang relaks na kapaligiran at
ipinauubaya lahat sa guro ang maaring maganap sa pagkaklase. Halos katulad ng ibang
tinalakay na ngunit ang kakaibay isinasagawa ang mahahalagang bahagi nito sa isang
kalagayang palagay ang kalooban ng bawat mag-aaral at relaks ang kanilang isipan.
Mga katangian:
a. Ginagamit ang lakas ng pagmumungkahi upang matulungan ang mga mag-aaral na
maging panatag ang kalooban.
b. Nasa isang komportable at maayos na kapaligiran ang pagkatuto at may maririnig na
mahinang tugtugin.
c. Inilalahad at ipinaliliwanag ang gramatika at bokabularyo ngunit di tinatalakay nang
komprehensibo.
d. Napapalinaw ang kahulugan sa pamamagitan ng pagsasalita sa katutubong wika.
e. Nangyayari ang komunikasyon sa dalawang dimensiyon; ang kamalayan (conscious)
kung saan nakikinig sa isang binabasaang dayalogo at ang kawalang-kamalayang
(sub-conscious) kung saan ang musikang naririnig ay nagpapahiwatig na ang
pagkatuto ay madali.
f. Isinasanib sa pagtuturo ang mga sining tulad ng musika, awitin, at drama.
g. Bahagi ng ginagawa ng mag-aaral sa klase ang ebalwasyon; walang pormal na
pagsubok ang ibinibigay.

3. Ang Silent Way

Ito ay nanghahawakan sa paniniwalang mabisa ang pagkatuto kung ipinapaubaya
sa mga mag-aaral ang kanilang pagkatuto (Gattegno, 1972).
Ang mga mag-aaral sa isang klasrum na Silent Way ay nagtutulungan sa proseso
ng pagtuklas ng mga kasagutan sa mga suliraning pangwika. Sa ganitong kalagayan
nanatiling tahimik ang guro kaya ang katawagan ay Silent Way.
Sa aklat ni Badayos (2008), inilahad niya ang isang lagom nina Richards at
Rogers (1986) sa teorya ng pagkatuto na pinagbatayan ng Silent Way:
1. Mas mabilis ang pagkatuto kung ang mga mag-aaral ay tutuklas o lilikha ng
mga sariling gawain sa halip na ipasaulo o ipaulit nang maraming beses kung
ano ang natutuhan.
2. Napadadali ang pagkatuto sa tulong ng mga kagamitang panturo tulad ng mga
bagay na nakikita at nahahawakan ng mga mag-aaral.
3. Napadadali ang pagkatuto sa pamamagitan ng mga araling kinapapalooban ng
mga gawain na may suliraning tutuklasin ang mga mag-aaral.
Mga katangian:
1. Pangalawa lamang ang pagtuturo sa pagkatuto. Pananagutan ng mga magaaral ang sarili nilang pagkatuto.
2. Tahimik ang guro ng maraming oras ngunit aktibo sa pagbibigay ng sitwasyon
at pakikinig sa mga mag-aaral; nagsasalita lamang siya upang magbigay
hudyat (clues), pinapayagan ang interaksyong mag-aaral-mag-aaral.
3. Di ginagamit ang pagsasalin ngunit ang unang wika ay itinuturing na
pinagmumulan ng kaalaman ng mag-aaral.