Since 2006
ZAM Information Department
Estd. 2006
Informing People, Transforming Lives
KAMMAL
“.... a ki-it mi, deihsakna lungsim a nei mi, mi hehpih thei mi,
a kiniamkhiat mi, a nunnem mi, a lungduai mi na hi un.” Colosse 3: 12
Hici Zaw Deuh Leh
Lungkim zo taktak lohna kam mahmah hi. Tutung Zomi
Kipawlna (ZAM) Kumcin’ Khawmpi leh Makai Kiteelna-ah
zong, makai ahi zongin, mipi lam pan ahi zongin ‘Hici Zaw
Deuh Leh!’ cihna pen, a kibang khakha tawh aki bang
hetlo veve mah, hici zaw deuh leh, tua pa hizaw leh cih
pen omding hi.
Bangbang hita se leh, ZAM makaite-in hunlap in lai
(THUPUAK) ah hong suah uh hi. Vai thupi tawh ahi zong,
nasepna hangin a paithei lo tampi ih ommah bangin thupi
a sa khollo lel, manloh man hituan lo aa a pailo Zomi
zong omding hi hang. Kipawlna ahih mah bangin, khat
maitang zahtakna cihbang aki khensat, vai kihawm hilo
aa, Zomi bup aa ding en aa gelnate ahih manin ih san’
siam tek ding hoih hi. Hihbang ih gen ciangin, kua khial,
kua maan cih hizaw lo-in, minam kipawlna ahih mah bangin
a maan pen lian sang, a kilawm zaw, a hoihzaw, mipi
lungkim zawkna aa vaihawm aa sep zong tawm tuanlo cih
pen ih theihtek ding thupi mahmah hi.
Galtai-gambel ih hih dung zui-in, huhhuai, donhuai
tampi ki-om hi. A vekpi-in lungkim zahin ki donkim zolo
khathei ding hi. Hih tawh kisai-in, teelcing makaite-in zong
hih mi pen kei sanggam/kei khuapih, kei behte cihdan
lam uangsak lo aa, huhhuai citciatte lakah a huhhuai
pente, donhuai citciat lakah donloh phamawhte ih huh,
ih donkhak hamtang ding hoihding hi.
Kipawlna ih cihkhit nungsang hoihding ih cihtek gen
aa kikup khop ding ahi hi. Kisam hi. A hoihpen ding aa ih
cihtek gen aa kikup khop ding ahi hi. A hoihpen ding aa
ih khensatna-ah ma ih pan’khop ding Zomi-te ih ki
hanthawn hi. Kei thu hong ki sanglo ci aa tangtel sihtan
bat leulau, nuak belbul cihte pen ih picin’ lohna kilatna hi
aa, keelpan aa ih minam lehdo zawzenna te pawl pen
haina takpi hita hi.
Makai teelcingte-in zong, utthu utloh thu pen koihphot
ni. Ih dinmun pen, za neihna leh thu neihna lamin sang
samloin, Zomi-te aa ding theihtawp suahin ka septheih
hun hi ci aa angtang tak aa ma ih pan’ ding ka genbeh
nuam hi. Kei a makai khat hi ingh, kei tung ah kua omtuan
a hiam? Kei sep ku’an semthei na hi uh hiam cih lam ih
uatsak leh nop ih sak loh, ih thalelh galkap kumpite sang
aa sukzaw makaite hikha ding hi hang.
Zomi numei pasal , aneu alian itna sungah ki
suangtuah tekin vaihawm, gamta khawm ni. Ih theihna
saang pen, ih septheihna hoih pen tawh ma pangkhawm
ni. Zomi-te ziakai lua dek zel hang ei, guai! Ih minam bupin
ma khattawh kalsuan aa, ih khan’toh theih na’ng ki
pawlkhawm semkhawm tek ni. Thu ngen ni.
Hici zaw deuh leh cih pen leitung ah a beithei ding
hilo hi. Deihteng kicin’na vantung ah ih tun’ ciang bekin,
Hici Zaw Deuh Leh cih om nawnlo ding hi.
Zomi-te itna tawh ki pumkhat in khangto hen!
Zo Khan Khual
Volume 9, Issue 2
June 20, 2010
Pate Ni Leh Lungsim Puak Zia Khat
Mikangpau a Father’s Day kici pen Zokam in Pate Ni
i ci hi. Tukum adingin June 20, 2010 hi, kici hi. A piangsa
khempeuh pa nei vive ihi a, i pianna pa i pahtawi ni ding
ahi hi. Pahtawi ni ding cih ciang tua banga pahtawi ni a
bawl om a, hong kizel toto in tu in leitungbup hong kizel
suakta a, pianna pa a pahtawilo hih ding kuamah ut
nawnlo ahih manin mi pawlkhat in a patsa uh Ni khat
zatpih zuihpih in pate pahtawina ni a kizang liailiai ding
hihtuak hi.
Zomi khat ii pat hileh bel a vengpa hiam khat beek in
’tua ni ding hi kei veh aw, tua ni ding hizaw veh aw’ ciin
thukimpih lo dinga, zatpih nuamlo ding hi. Tua i cih ciang
Zomi te lungsim puakzia leh founder hih ding thupi isakzia,
ei phuatloh peuhmah a kankuat (oppose, langpan, nial,
zuihpihlo) leh a picin’ ding hazatna i hauhzia gennopna hi
a, tua banga thu tuam sat den a hoihloh lam uang
gennopna ahi hi.
(Hau Za Cin’ laigelh “Pate Ni” Maw “Papite Ni?” pan
ki tengkhia hi.)
Dictionary Kingahta Ding
A neu a lian cilo, USA ahih kei leh Australia tungsa
khat tawh kiho-in la, maban khatpeuh hong nawngkai sak
bang thute om hiam, cih dong le cin, pau leh ham
theihlohna, lai kigelh a khiatna theihtel lohnate hang aa
vai haksa tampi nisim aa kituak thei a hihna thu hong gen
hamtang kha ding hi. Sang ah hong kihilh lel in teh, ahih
kei leh kei ka kum tamta, ahih kei leh ka innkuanpih
khatpeuh in hong makaih thei lel in teh, ahih kei leh a
tangtang khat omlel in teh cihte cikha hetkei in!
Tulaitak mahmah in zong, gammite laimalte ih theihban
loh kawmkal ah, ki sittel taktak le’ng, Mang kammalte tawh
zong buailai mahmah hi hang.
Midangte kammal bek maw; Hilo lai! Zomi-te ih pau
leh ih kammal zatzia zong tampi mahin theikim lo hi hang!
Lung patauh luatding omlo aa, ziakai nailo hi teh!
Nang hong makaih thei ding, Dr. Dal Lian Haokip ii bawl
Mang kammalte pan Ei kam/pau aa letkikna laibu
(dictionary) om gige hi. Mai kaal sungah ki ngahta ding
aa, RM50 tawh Zomi zumpi-ah ki leitheita ding hi.
Kizoptheihna: Zomi Kipawlna Zum (03 2142 6659) leh
Sianu En Cing (016 680 8538)
Laidal/Laitui Manh
ZAM EC Meeting panin khentatna thak khat kinei hi;
UNHCR zum hita leh, zum khat peuhpeuh aa lai khakding
a nei khat peuhpeuhin, palaite lai ih gelhsak ciangin,
printer tui manh, laidal manh aitang beek Kipawlna ih
panpih theihna dingin lampi kihong aa, RM5 ta peuhmah
a kiseh bung sung ah khiat hamtang ding thupi hi.
 Mulkim Huai Leh Pilvang Ding
Malaysia gamah, Zomi galtai-gambel tul tampi-in, zing an,
nitak an ding septheih bangbang leh nasep ngahna zia zui-in
sum thalawh in, mun khatkhatah, nasepna pute simmawhnate,
gawtna, nenniamna, bawlsiatna tuamtuam a tuakkha zong ki
omom ngeikhin aa, tulaitak zong om kawikawi hi. Ngaihsun
taktak le’ng, khua ngaih huai mahmah hi! A thuakte na vei
taktak leh na lungtangin hong sawl khat peuhpeuh om hamtang
ding hi! Ih mipihte vive hi gige hi.
Tg. Lang Muan Lian (Kum 14, Maal Suangzang) leh Tg.
Suan Za Mung (Kum 18, Vanglai) te nih zong, Malaysia ah
gambel aa omte mah hi-in, nisim aa a nuntakna ding un sum
leh pai, nek leh dawn ki sam ahih man un, Puchong Putri ah
Kala boss te khutnuai-ah tadensa (newsletter) tuamtuam
company pan la-in, a hawmsawnna mun ah na sem uh hi. Ahih
hangin, a khasum uh maan takin kipialo ahih manin a lawmte
zong taikhia khia uh hi. A boss te-in, nitak lam simin nasep a
man ciangun tawh kalhkhum zel, ci hi. Ahih hangin, a ni, a
khate hong cing toto-in kha nih bang kha sum a ngahloh tak
ciangun taikhiat sawm uh hi. A boss te-in, a kha khat sum uh
a piak ni-in tai khiat sawm dingin ummawh uh ahih manin, a
UNHCR card leh a handphone te uh laak sakin, khan sung ah
khumcip uh hi.
ZAM zum pen tuazawh ni (3) khit ciangin hong ko uh ahih
manin, Outreach Team pan palaite-in a nasep na munte uh va
en in a inndei aa boss te piakna mun zong, tua mun aa nasem
ngei khat makai sakin va enthei uh hi. Tua ciangin, a boss te-
in a leh lamin a lamhilhpa guta cih tawh, leh matsawm in, palik
te security te sam uh hi. Tua ciangin, palaite-in, “Ko Zomi
Kipawlna pan hih Kawlgam mi galtaite a inndei ah ki khumcip
cih thu za ka hih man un, hong pai hi ungh.” a kicih tak ciangun
a boss nu uh hong laukik in limtak in kihona lawhcing thei hi.
Tua ni mahin Topa’ panpihna mah tawh hong khahkhia pah
uh hi. June 15, 2010 ni-in cidamin a hehpih huai Zomi nihte
hong suakta khia uh ahih manin lungdam mahmah hang.
Tuabek hilo-in, amau zong upmawh loh pi-in a kha sum uh
ki piahak ahih manin, hong taikhiat ding lah sum ngahlo, pau
lah theilo, simmawhna tuamtuam thuak toto khin uh hi. Hih
sanggam nihte genna-ah, “Ni khat an dingin roti pheng nih bek
ngah ungh, tua tawh a sem hi ungh.” ci uh hi.
Hibang hamsatna tuah na khat a om ciangin, UNHCR
Hotline (012 630 5060) ahih kei leh Kipawlna zaksak pah ding
cih pen, kihilh sawn tek ding hi hang. Nasepna munte-ah zong,
pilvang semsem ding kisam hi. A hihtheih aa vai a haksat kei
leh zong, nasep khawl ding peuh mahin na boss te uh a ma-in
theihsak kholh theihna lampi zon’ zawh ding thupi ding hi.
Zomi Bup Tungah Thu Zaksakna
2009 October sungin, Malaysia gam aa om Zomi biakna
tuamtuam pan biakna sia leh makai te-in, ‘Malaysia aa om
Zomi te-in deihloh penin sihna ih tuah ciangin vaipuak zia
tangzang theithei dingin kalsuan theihna ding kikupna’ kinei
hi. Kikupna omto zelzel in, kipawlna min dingin “Zomi Genvai
Malaysia” (ZSM-Zomi Social-welfare of Malaysia) ci-in ki kipsak
hi. October kha aa ki panin, Zomi Genvai Kipawlkhopna pawl
lutna dingin ih pawlpi tekah kha (1) ai mi (1) teh RM1 ta khiat
dingin kiseh hi. Hih kipawlna deihna bulpi-in, Mi (1) kha (1)
RM1 pen olno takin Zomi mimal bupin kikhia kim zo dingin leh
sihna dongtuak khat ih om ciangin vaipuak dingte mi (1) kha
(1) RM1 ih khiat pawl sum tawh olno takin vai ki panpih zo ding
cih ngimna tawh a ki pankhia ahi hi. Thukhunte zong ki bawlzo
khin hi. Ih sepkhopnate hang tawh siluang (13) vaite-ah mapan’na
ki neikhawm khin hi. Gam nawl lam aa omte ahi zongin, biakinn
a zuan manlote ahi zongin, no tawh kinaina pawlpi ahih kei leh
ZSM tanu pawl tungah pawllutna khasim sum ki piathei cih
thu kong theisak uh hi. Zomi Genvai Kipawlkhopna
World Refugee Day 2010
Kum simin June kha (20) ni pen, World Refugee Day
(Leitungbup Galtaite Ni) ci-in, a ki ciamteh hi aa, mun
tuamtuam aa om UNHCR zum nasem ulian makaite-in, geelzia
a tuamtuam tawh ni thupi khatin kinei-in, pawi kibawl tek hi.
Hih ni pen, tuma kum (10) khawng in Zomi-te tawh a kisai
khollo ni khat, Zomi-te theihkhak kholloh ni khat hithei mai
ding hi. Ngaihsun dih ve!
Malaysia UNHCR zumpi pan
CDU te makai-in, gammite vaksuk
vaktohna KL Central ah pawipi
khat vaihawm thei uh hi. June 19
leh 20 ni nih sung kibawl ding hi.
Gammite sung mahmahah a
vaihawmna uh pen, hih gammite-
in galtai-gam belt e dinmun
mahmah hong theihpih aa, telsiamna
tampi hong neihna ding uh ngimna tawh,
a vaihawm uh ahi hi.
Zomi Kipawlna zong hong sapna uh
tawh kizui-in, ngeina vante zuakna leh
Zomi sang naupangte’ ngeina laamte
tawh pahtawina va kinei thei hi.
Zomi Lengla June 15, 2010 ni sunin Kawlgam pan hong
zinpak ahi Pa Zam Dong Thang (Ko Ko Thang), Zo Tang
Express neipa Zomi zumpi hong hawhin, palaite nasepnate
tha hong piathei ahih manin nakpi takin ki lungdam hi.
Thugenna Neithei June 19, 2010 ni-in, Kawlgam Numeite’
ni leh NLD makai Daw Aung Sang Suu Kyi kum (65) cin’na
suah pawi-ah Hau Suan Khai in makainu’ tangthu a tomin
manglai tawh geen theina hun neithei hi. Lasa siam Suih Lun
in zong Zola ngaih mahmah khat tawh pahtawi piathei hi.
Computer Hilhzia Training SPF leh Hartford Academy
te deihsakna tawh computer siate computer hilhzia training
piakna-ah ZEC-Computer Centre pan Sia Nangtak zong, ni
(3) training va kahthei hi. (2010 July kha aa ding, UNHCR pan
Basic Computer Skills laivuan a nihveina om leuleu ding aa, a
phi nuam peuh min piakna kisangta hi.)
SPF Tukpeng Kidemna SPF (UNHCR) pan mapina
bawlin, galtai minam tuamtuam team (16) tukpeng kidemna
‘La League’ ding vai pen, AFC leh kimawlna vanzat company
tuamtuam pan huhna a kingah loh hangin, SPF in a kisam
bangin vaihawm veve ding khentat uh hi. June 22, 2010 meeting
ah, kimawl ding zia, a ni, a hun dingte kikupna omding hi.
(ZAM tang a kimawl dingin zaksaksate tungah, phone tawh,
vai omzia khempeuh ong ki zasak kik ding hi.)
Lai Siangtho Bu A kisamte aa ding Lai Siangtho bu khat
ciang RM15 tawh Zomi zumpi-ah kingah thei hi. Bu tampi
omlo ahih manin, a kisam mahmahte-in manlang takin laakpah
ding thupi hi. Kizoptheihna: Zomi zumpi: 03 2142 6659,
En Cing (016 680 8538),
Zomi Corner Computer nasep tuamtuam ahi DTP Typing,
Design tuamtuam, CD, DVD Copy leh Video Edit ahi zongin
phone sungah MP3 la tuamtuam zong ki thunsak thei hi. Amun
pen Zomi zumpi sung hi-in, nasep tawh kisai vai tuamtuam
dotnop leh sawlnop a om leh: Tg. Mungpi (014 724 3227)
ZAM Card Keng Hamtang Ding ZAM volunteer/palai
te tung tawnin ahi zongin, Kipawlna min tawh ahi zongin, zum
khat peuhpeuh vai tawh kisai lai a bawlsak nuamte leh
panpihna khat peuhpeuh a lunggulhte peuhmahin Zomi zumpi
na pai uh ciang ZAM Card puak hamtang ding kisam hi. Zomi
peuhmah in zong, UNHCR card ngahkhin hita leh, Kipawlna-
ah card te extend tangtang ding thupi hi. Zum tuamtuam vai
khat peuhpeuh ih ki panpih ciangin, pawlmi hihna card omlo-
in thu ki vaihawm theilo hi.