“LALPA ISUA RING LA, CHHANDAM I NI ANG” T.T.

16:31

FOLLOW - UP - II
- K.L. Rochama
Part I-ah khan “Isua Model” tawitein kan zir a. Tun tumah chuan “Khawngaihna leh Thil Tha Tih” thu
kan zir dawn a ni.
KHAWNGAIHNA HLIR
Lal Isuan kan sual man ba zawng zawng min rulh zawh sak avangin Amah ringtute chu Thiam chang, sualna
nei lo, Pathian fa kan lo ni leh thei ta a.
Paula chuan, “Rinna avanga khawngaihnaa chhandam in ni” (Eph 2:8) tiin a sawi a. Timothea hnena a
lehkha thawnah chuan, “Ani chuan kan thiltih angte ni lovin, Ama ruat leh khawngaihna ang zawkin min chhandam
a” (2 Tim 1:9) a ti bawk a. Jentail piangthar Tita pawhin, “Keinin thil kan tih that avang ni lovin, a khawngaihna
avangin min chhandam ta a” (Tita 3:5) a lo ti ve bawk a. Johana chuan, “A khawngaihna famkim atangin khawngaihna
kan dawng theuh, khawngaihna hlir, khawngaihna hlir” (Joh 1:16) tiin Lal Isuaa nunna kan neih hi a bul atanga a
tawp thlengin khawngaihna hlir a ni a ti a ni.
ANTINOMINIANISM
Heti taka Pathian khawngaihnain min kuangkuah a nih chuan kan sual nasat poh leh a ngaihdamna kan
chang tam dawn a ni mai a. Chuvangin, Dan zawm pawh a tul tawh lo tia zirtirna a lo chhuak ta a. Hei bakah
Gnostic hovin hriatna sang bik neite chauhvin Pathian an hmu thei tih leh khawvela thil (matter) hi a chhe vek tawh
a. Siamthat theih a ni tawh lo. Dan zawm a ngai lova, duh ang anga awm mai tur a ni tih a zirtir bawk a. He zirtirna
hi “Antinominianism” tih a ni a. Kohhranhote a tibuai hle thin a ni.
THIL THA TI TURA CHHANDAM
Paula chuan, “Khawngaihna chu a pun leh zual theih nan sualin kan awm reng dawn em ni? Hnai lo ve.
Keini, sual kawnga thi tawh sualin engtinnge kan la nun theih cheu ang? (Rom 6:1f) tiin he zirtirna dik lo hi a hnial
fithla a. Isua unau Jakoba chuan, “Ka unaute u, miin, “Rinna ka nei” ti mah sela, thiltih a neih si loh chuan, engnge
sawt ang? Chutiang rinna chuan amah a chhandam thei ang em ni? Unaupa emaw unaunu emaw saruaka awmin an
nitin chaw tlachham sela..... Thlamuang takin kal ula, lum tak leh puar takin awm rawh u” ti ula, taksa tana thil
chakkhai chu in pek si loh chuan engnge sawt ang? Chutiang bawkin rinna chu thiltih nei lovin amah chauh va
a awm chuan thi a ni” (Jak 2:14f) tiin rinna leh thiltih thliarhran theih a nih loh dan fiah takin a sawi bawk a.
Paula pawh hian khawngaihna avanga chhandamna thu a sawi zawh chiah hian, “Thil tha ti atan Krista
Isuaah chuan siama awmin Ama kutchhuakte kan ni si a; chu thil tha tih chu kan awmna turin Pathianin
a buatsaih lawk a ni” (Eph 2:10) tiin a sawi a. Heta Paula tawngkam hman hi ngaihtuah chian a tul hle.
1. Isua Kristaah tih hi Paula lehkhathawnah hian vawi 82 zet kan hmu a. Lalpaah tih hi vawi 50 kan hmu bawk a.
Ringtute chu Kristaah kan awm a, chuvangin kan him a ni. Chu chauh chu ni lovin Krista rilru kan pu a, Krista
duhzawng chu kan duhzawng a lo ni ta a. Krista lo kal chhan, mibote chhandam leh Setana hnathawh tihboral hi
chhum lo chat lova thawk tur kan ni.
2. Ama kutchhuakte tih hi Carpenter-in a workshop-ah dawhkan te, khum te etc., a siam a. Khum chu mutna
atana siam a ni a, vawkchaw pekna atana hman tur a ni lo. Ringtute hi “Thil tha ti turin Pathianin min siam a ni.
Chumi awmzia chu Thil tha tih hi nunphungah (way of life) kan neih tur tihna a ni. Zaia hlim ringawt tur kan ni lo va,
thu sawi ringawt tur pawh kan ni lo. Thil tha tih, a chhe lai awm apiang siamthat leh tih bak awm apiang tih zawh hi
kan dam chhan ber a lo ni ta a ni.
Johana chuan, mipui tam tak aw ang, tuifinriat ri hum hum ang leh khawpui ri hluah hluah ang thawm a hria
a. “Lalpa kan Pathian, Engkimtitheia chuan ro a rel e..... Beramno nupui neih a hun tak hi; a nupui tur pawh a inpeih
tawh a, Puan zai sin tle takin a inthuam ta. Puan zai sin chu Mi thianghlimte Thil Tha tihte hi a ni” tiin inlarnaah
a hmu a(Thup 19:6ff). Beramno Nupui tur chu Kohhran hi a ni a. Kohhranah hian khawvelin Krista Hmel an hmu
tur a ni. Kohhran lanfiahna leh mawina chu a chhunga awm, Krista taksa pengte “Thil Tha tih” hi a ni.