RAAJNEETI

NARRATION:

Is kahani ke paatra hai,

Brijgopal Sahay jo mar chuke hai. Narayan, jo parivaar ke sabse bade bete hai. Unke baad unke teen bhai
Arjun, Viren aur Ansh. Ansh ki patni Indu.

Ragini, jiski shadi to honewaali hai Viren se, par sab jaante the ke uske aur Arjun ke beech gahera pyaar
tha.

Aur Ajay Viren ka sabse purana dost aur salahkar.

Ye kahani hai, MADHYA PRADESH ke ek aise rajnaitik parivaar ki hai jisme pitaa Brijgopal Sahay,
jo RASHTRAVADI PARTY ke adhyaksh the; unki mrityu ke baad, unke chaar bete, Narayan, Arjun, Viren
aur Ansh; ek dusre ki jaan ke dushman ban jaate hai.

Waise to Adhyaksh pad ke sabse mazbut davedaar Arjun the, kyun ki unke paas apne bade bhai
Narayan aur chote bhai Ansh ke alava apni party ke sadasyo ka bhi saath tha. Lekin har kahani me ek
Khalnayak hota hai kyun ki Khalnayak ke bina kahani me twist nahi aata. Waise to raajneeti me koi bhi
nayak nahi hota par is paristhiti me Khalnayak the Viren.

Viren apne bade bhai aur party ke anya sadasyo se sahemat nahi the aur is liye Viren ne apne
bharosemand saathio ko lekar party me alag group bana diya.

Is tarah Viren ki Arjun ke viruddh me ho rahi vividh gatividhio ke karan, na chahte hue bhi party
me adhyaksh pad ke chunav ki zarurat hui.

Adhyaksh pad ke chunav ko lekar Arjun aur Viren ke beech zabardast mukabla tha. Dono apni
party ke sadasyo ke alava janta ko bhi apne saath lene ke liye pure rajyabhar me party ka prachar kar
rahe the.

Aise hi ek karyakram me apne adyaksh ban ne dava karte hue dekhiye Arjun ko….

( Sab log Arjun ki jay jaykar kar rahe hai. Arjun janta ka abhivadan svikar karte hue stage par aate hai. )

ARJUN: Duniya jaanti hai, 30 saal pahele, sarkar aur uske thekedaro se chinkar, humne, is zameen par
azad nagar basaya tha. Janta jaanti hai, humare dil me garibo aur pichde hue logo ke liye kitna
pyaar hai. Aapko pata hai, hum pichle 12 saalo se aapki pure dil se seva karte aaye hai aur aage
bhi karte rahenge. Aur is liye hum pure bharose ke saath kahe sakte hai ke party ke adhyaksh ki
jagah par aap hume hi dekhna chahenge aur agar upervale ne chaha to aapki duaon se aisa hi
hoga.
NARRATION:

Ek taraf Arjun apni takat badha raha tha aur dusri taraf apne saathio ki madad se party me Viren ke diye
gaye suzavon ko namanzur karke uski takat kam kar raha tha.

To dusri Viren yahi firaq me hai ke kuch bhi karke party ke adhyaksh ka pad hasil kar le. Shayad iski ek
vajah ye bhi thi ke 6 mahine baad rajya me election honevaale the. Par Arjun ki badhti hui takat
ko dekhkar Viren apne sabse bharosemand saathi Ajay ko bulata hai.

Place – Viren’s house.

Viren : Kamino ne 55 me se 12 ummidvaaro ko approve kiya, funds ke liye cheque bhi sign nahi kiye,
ek ke baad ek sab saath chod rahe hai. Hum jaante hai ke ye sab kiske kahene par ho raha hai.
Saala kal ka chokra humara baap ban na chala hai aur tum Ajay, meri koi madad bhi nahi kar paa
rahe ho?

Ajay : Sab thik ho jaayega.

Viren : Khaak thik ho jaayega. Bas dilasa dete rahena humko, bharosa to nahi de sakte na?

( Nashe ki halat me Viren girnewala hota hai aur Ajay usko sambhalne jaata hai to Viren use
dhakka deta hai. )

Viren : Viren Sahay ko kisi ke sahare ki zarurat nahi hai…

Ajay : Agar aap kisi bhi kimat par adhyaksh pad paana chahte hai to mere paas ek raasta hai.

Viren : Batao!! Jaldi batao!! Main ye adhyaksh pad ke liye kuch bhi kar sakta hu, kuch bhi…

Ajay : To dhyan se suniye, ye baat to aap bhi jaante hai ke Arjun Ragini ko kitna pasand karte hai. Aaj
bhi wo dil hi dil me Ragini se pyaar karte hai.

Viren : Tum kahena kya chahte ho?

Ajay : Main ye kahena chahta hu, jab Arjun Ragini se pyaar karta hai aur aap adhyaksh pad se, to
kyun na Arjun ke saamne ek prastav rakha jaae, Ragini ke badle me Adhyaksh pad?

( Viren gusse me aa jaata hai aur Ajay ka collar pakad leta hai. )

Viren : Tumhari himmat bhi kaise hui ye bolne ki ? Hum apni honewaali patni ko adhyaksh pad ke liye
kisi aur ko bech de? Agar tumhari jagah koi aur hota to hum bhi nahi jante ke hum uska kya
hashr karte.

( Ajay dhire se apna collar chudata hai. )

Ajay : Maine jo bhi kaha hai wo bahot soch samaj kar hi kaha hai. Aap maano ya naa mano, Ragini
bhi kahi na kahi Arjun ko pasand karti hai. Aisi ladki ke saath aap bhi kabhi khush nahi rahe
paayenge. Aur waise bhi agar aapke paas koi aur rasta hai, to aap bataiye?

Viren : Phir bhi, is tarah apni honewaali patni ka sauda karna thik nahi hoga.

Ajay : Raajneeti me faisle sahi ya galat nahi hote, unka mol to sirf maksad pura karma hota hai…

Viren : Thik hai, lekin ye prastaav Arjun ke paas, tum lekar jaaoge. Aur uske paas se likhit me ek karar
bhi karvaoge, jisme ye likha hoga, ke wo apni marzi se adhyaksh pad aur party ki kamaan mujhe
de raha hai.

NARRATION:

Is tarah Ajay, Viren ko Ragini ke badle adhyash pad ke saude ke liye mana leta hai. Dusri taraf wo Arjun
ko bhi apne pyaar ke liye adhyaksh pad ka tyaag karne ko razi kar leta hai. Viren ke kahene par
Ajay ek kagaz pe Arjun ke dastakhat bhi le leta hai.

Place – Viren’s house

Viren : Shukriya Ajay, bahot bahot shukriya! Tum nahi jaante ke tumne humare liye kya kiya hai.

Ajay : Isme shukriya ki kya baat hai, ye to humara farz tha.

Viren : Par tumne jo kiya hai na, wo koi aur nahi kar sakta tha. Jaante ho ab hum election me
Mukhyamantri pad ke sabse bade daavedaar hai.

Ajay : Daavedaar kya? Ab to samaj lo aap Mukhyamantri ban gaye.

Viren : Ha. Aur ye sab sirf is ek kagaz ki vajah se… sirf ek kagaz…

NARRATION:

Ek taraf Viren apne adhyaksh ban ne ki khushi mana raha tha to yaha Arjun kisi ko bataye bagair Ragini
se shadi kar leta hai. Arjun apne bade bhai ka aashirvaad lene uske ghar jaata hai. )

Place – Narayan’s house

(Narayan aur Ansh kursi pe baithe hai, tab Arjun Ragini ke saath aata hai. Arjun aur Ragini ko
maala pahene hue dekh Narayan khada ho jaata hai. )

Arjun : Hume aashirvaad dijiye bhaiya, humne shaadi kar li hai.

NarN : Ye sab kya hai? Aur tumne kisi ko bataye bina shaadi kaise kar li?

Ansh : Aur wo bhi kis se? Aap to jaante hai ke Ragini ki shaadi Viren se honewaali thi.
Arjun : Honewaali thi…lekin ab ye meri patni hai. Viren ko Ragini se koi pyaar nahi tha, vo sirf paiso ke
liye is se shaadi karnewaala tha. Aur aaj usne ashyaksh pad ke badle me muj se Ragini ka sauda
kiya.

NarN : Ye kya kahe rahe ho tum? Iska matlab tumne is ladki ke liye party ke adhyaksh pad ko chod
diya? Tum jaante bhi ho tumne kya kiya hai?

Arjun : Ha. Bahot achchi tarah se jaanta hu, maine apne pyaar ko paaya hai.

NarN : Pyaar to thik hai par ye to socho ke ek baar Viren adhyaksh ban gaya aur election jeet kar
mukhyamantri ban gaya to wo kya kar sakta hai? Kohraam macha dega wo, tumhara jeena
mushkil kar dega wo.

Ragini : Main bhi inse yahi kahe rahi thi. Filhaal wo adhyaksh pad ke liye, aap se mera sauda kar sakta
hai, to election jeetne ke baad, aap se dushmani nikalne ke liye wo kisi bhi had tak gir sakta hai.

Arjun : Kya karega wo? Jab hum is desh me hoga to kuch karega na…

Ragini : Aap ke kahene ka matlab kya hai?

Arjun : Maine sab soch liya hai, do din ke baad hum America chale jaayenge. Waha mera ek bahot
achcha dost hai, main uski compny joint kar lunga aur hum vahi rahenge.

Ragini : Aapne itna sab soch liya aur ek baar mujse pucha tak nahi? Ek baar meri ray hi mang li hoti…

Arjun : To ab maang leta hu. Bolo kya kahena chahti ho?

Ragini : Waise to aapne sab soch liya hai par ek baat sun lo, main ye desh, ye jagah chod kar kahi nahi
jaungi.

Arjun : Lekin kyun?

NarN : Bahu bilkul thik kahe rahi hai, filhal tumhe kahi jaane ki zarurat nahi.

Arjun : Ye aap kahe rahe hai bhaiya? Aap to jaante hai na ke agar Viren election jeeta to kya kar sakta
hai.

NarN : Agar election jeeta to na? Lekin agar wo election haar gaya to?

Arjun : Ye kaise ho sakta hai? Viren ke adhyaksh ban ne ke baad uska election me jeetna tay hai.

Ansh : Narayan bhaiya bilkul thik kahe rahe hai.

Arjun : Chote, tuje raajneeti ke bare me kuch nahi pataa. Election to wo sirf party ke naam se hi jeet
jayega.

Ansh : Bhaiya, agar party election jeeta sakti hai to haraa bhi sakti hai.
NarN : Ha. Aur aisi mazbut party me rahe kar haarne ka matlab hai ke uska political career bhi khatm
ho jaayega.

Ansh : Waise bhi election ko 6 mahine ka waqt hai aur itne waqt me bahot kuch ho sakta hai.

NarN : Ansh bilkul thik kahe raha hai. Bahu tum ander jaao. Arram kar lo.

( Ragini andar jaati hai. Ragini ke jaate hi teeno bhai ye sochne lagte hai ke Viren ki takat kaise kam ki
jaaye. )

Arjun : Agar Viren ye election haarta hai to uska political career khatm hai, lekin sawal ye hai ki kaise.

Ansh : Bhaiya kya aap adhyaksh pad ke liye khade nahi ho sakte?

Arjun : Nahi chote. Maine use ek kagaz pe ye likh ke diya hai ke main apni marzi se adhyaksh pad aur
party ki kamaan use saunp raha hu.

Ansh : Is paristhiti me ek hi raasta hai, uske sabse bharosemand aadmi ko kharid lo aur use wo kagaz
lane ko kaho.

Arlun : Uska sabse bharosemand aadmi Ajay hai aur use kharidna namumkin hai.

Ansh : Jaha tak main jaanta hu, raajneeti me kuch bhi mumkin hai. Phir ye kyun nahi?

Arjun : Kyun ki Ajay alag mitti ka bana hai. Use kharidna bahot mushkil hai.

NarN : Koi alag mitti ka nahi hota hai, sab ki apni-apni kimat hoti hai. Kisi ki kam to kisi ki zyada.
Raajneeti me kharid daari to chalti raheti hai. Aaj Viren paise de rahaa hai to wo uske talve chaat
rahaa hai, agar tum thode zyada paise doge to tumhare liye kaam karne lagegaa.

Ansh : Ha. Aur ek baar koshish karne me harj hi kya hai.

Arjun : Thik hai.

( Arjun Ajay ko phone karta hai. )

Arjun : ( Phone me baat karte hue ) Hello? Ha Ajay…?

Narayan ji aap se kuch baat karna chahte hai.

Aap ke fasyde ki hai.

Narayan ji ke ghar pea a jaiye.

Thik hai.

NARRATION:

Thodi der me Ajay aata hai.

Arjun : Aayie Ajay ji, aaiye. Baithiye. Aaj kal to charo or aap hi chaye hue hai.

Ajay : Kya baat hai ?! Khushamat khori chodo aur mudde ki baat bolo.

Ansh : Mudde ki baat to yahi hai, ke Viren ke saath kaam karte hue aapko 5 saal ho gaye hai, aur aaj
tak aapko kuch nahi mila. Sivay ke uske piche khade rahe kar uski jay jaykar karo.

Ajay : To aap ke saath kaam kar ke hume kya milega?

Ansh : Jeetna aapko Viren se milta hai, us se kai zyaada. Aur party ke maha sachiv ka pad milega wo
alag.

Ajay : Baat to humare faayde ki hi hai. Lekin ise pane ke liye hume karna kya hoga?

Arjun : Tumhe bas ek assan kaam karna hoga. Adhyaksh pad chodne ke jis karaar pe humne dastakhat
kiye hai us kaagaz ko hum kat pahochaana hoga.

NarN : Hum jaante hai ke aapke liye ye koi mushkil kaam nahi hai.

Ajay : Ha. Mushkil to nahi hai, lekin apne purane saathi ko daga dene ka afsos to hoga na?

Arjun : Aapke is afsos ko, abhi kam kiye dete hai.

( Arjun Ajay ko paiso se bhara ek bag deta hai. )

Ajay : Waah!! Aapne to humaare gam ko khushi me badal diya. Ab aap bhi dekhna, hum aap ko kaise
khush karte hai.

( Ajay waha se chale jaata hai. )

NARRATION:

Is tarah Arjun paise dekar Ajay ko kharid lrta hai. Aur Ajay, jo Viren ka 5 saal purana saathi tha usne sirf
chand rupayo ke liye usko dhokha diya. Arjun kr kahene par Ajay, Arjun ke dastakhat kiye hue
kagaz ko, Viren se churakar Arjun ko deta hai. Kagaz milne par Arjun party ke adhyaksh pad ke
liye apni ummidvaari deta hai aur party ka adhyaksh ban jaata hai.

Place – Narayan’s house

( Narayan, Arjun, Ajay, Ansh, Ragini aur Indu Arjun ke adhyaksh ban ne ki jhushi manaa rahe hai. )

Ajay : Mubaarak ho sir, aap party ke adhyaksh ban gaye.

Arjun : Aap ko bhi Mubarak ho, aap bhi to mahasachiv ban gaye ho.

( Tab waha Viren nashe ki haalat me aata hai.)

Arjun : ( Haste hue ) Dekhiye to sahi kaun aaya hai? Aaiye Aaiye. Humaare chote bhai hume
mubaarakbaad dene aaye hai.

( Viren Arjun ki taraf dekhta hai. Fir Ajay ki taraf dekh te hue,)

Viren : Saale kaminey, gandi naali ke kide. Maine tuj pe bharosa kiya. Kidhar tha tu? agar maine tera
haath nahi thaama hota, to aaj bhi kisi ki zuthan utha raha hota…apnaa daina bazu manta tha
tuje, aur tune, in kamino ke saath milkar mujhe haraaya. Ehsaan faraamosh.

Ajay : Ehsaan faramosh…!! Kya, diya kya hai tune mujhe aaj tak? Kutte ki tarah kaam karta tha tere
liye aur tune, kabhi izzat tak nahi ki.

Viren : Izzat? Izzat ki baat karta hai, salaa, Izzat ki baat karta hai? Tuj jaise kaminey ko kaun izzat dega?
Chand rupayo ke liye jo apna imaan badal de usko kis baat ki izzat?

Ajay : Dard ho raha hai? Bhul gaya, yahi to is dhande ki jaat hai.

Viren : Jaante hai. Bahot achchi tarah se jaante hai. Lekin ek baat yaad rakhna hum chup baithne
waalo me se nahi hai.

Arjun : Kya kar lega tu, huh? Kya kr lega? Aaj tak tere har sawal ka jawab Ajay tha, ab is sawal ka
jawab kaha se laayega?

Viren : Karaara jawab milega!!

Karaara jawab milega!!

( Arjun gusse me aage aata hai aur Viren ka collar pakad leta hai )

Arjun : Kya jawab dega re, huh? kya jawab dega tu?

( Arjun Viren ko dhakka deta hai aur Viren gir jaata hai. Viren khade hote hue gun nikalta hai aur chillate
hue Arjun pe goli chalata hai. Ansh uske haath se gun chin ne ki koshish karta hai aur Ansh ke
haathon se goli chal jaati hai jo sidhi jaa kar Ragini ko lagti hai. Viren bhaag jaata hai. Ansh apne
bhai aur bhabhi ki lasho ko dekhte raheta hai. )

NarN : Ye kya kar diya tumne? Goli maar di bahu ko.

Ansh : Pata nahi bhaiya…ye sab kaise ho gayaa, main to bas us se pistol chin ne ki koshish kar raha tha
aur haathapaai me mere haatho se goli chal gayi.

NarN : Are par zarurat kya thi tumhe pistol chin ne ki…

Ansh : Bhaiya usne Arjun bhaiya pe goli chalayee…

NarN : Wo sab thik hai par ab to uspe kaanooni kaarvayi bhi nahi kar sakte. Agar kuch kiya to tum bhi
fas jaaoge.
Ansh : To kya aap bhaiya ke quatil ko aise hi chod denge?

NarN : Nahi.

Ansh : To aap kahena kya chahte hai?

Ajay : Narayanji ye kahena chahte hai ke ab jo bhi karna hoga wo hume hi karna hoga.

NarN : Lekin uske pahele abhi jo hua use sambhalna hoga. Indu tum Chote ko lekar andar jaao.

( Indu Ansh ko lekar jaati hai. )

NarN : Ajay, ye kaam tumhe hi karna hoga. In laasho ko lekar ek gaadi me rakhva do aur gaadi ka
accident karvaa do. Kisi ko kaanokaan khabar bhi nahi honi chahiye. Gaadi ka ek purzaa bhi nahi
milna chahiye.

Ajay : Aap chinta naa kare, aapke har kaam ki tarah ye kaam bhi ho jaayega.

( Narayan phone nikalta hai. )

NarN : ( phone pe baat karte hue. ) Hello…Ha, commissioner sahib?....kaise ho aap?

Hum thik hai…achcha suniye aap se ek kaam aa pada hai…dhyaan se suniye….

NARRATION:

Is tarah Narayan apne political power ka istemaal karke apne chote bhai ko bacha leta hai. Ansh kuch
dino ke liye chup raheta hai par Narayan bhaiya ne Viren ka ab tak kuch kiya nahi ye baat use
andar hi andar khaye jaa rahi thi.

Place – Ansh’s farmhouse

( Ansh, Nrayan aur Ajay baithe hue hai. )

Ansh : Aakhir kab tak chup baithe rahenge hum? Bhaiya ka quatil aaj bhi khule aam ghum raha hai.

NarN : Main sahi waqt ka intezaar kar raha tha. Aur wo waqt aa chukka hai. Ek kaam karo Viren ko
phone karo aur use bolo ke Narayan bhaiya us se milke sulah karnaa chahte hai.

( Ansh Viren ko phone karta hai. )

Ansh : ( Phone pe ) Hello…Viren?...Narayan bhaiya aap se milna chahte hai?... Ha. Wo aapse sulah
karnaa chahte hai aur party ki kamaan aapke haatho me saupna chahte hai…Ha. to mere
farmhouse pe aaiye….Thik hai.

Ansh : ( Narayan aur ajay se ) Wo aa rahaa hai.

( Tab hi Ansh ko ek phone aata hai. )

Ansh : ( phone pe ) Ha. Bolo…Main farmhouse pe hu….Nahi tum yaha nahi aa rahi ho….maine kaha na
ke tum nahi aarahi ho….Main baad me baat karta hu.

( Thodi hi der me Viren muskuraate hue waha aata hai. )

Viren : Namestey Narayan bhaiya, Namestey!! Bataiye, kyun bulaaya hume?

( Ansh khade hote hue pistol nikalta hai aur Viren ka collar pakadke use khichta hai. )

Ansh : Abe saale, tuje kya lagta hai? Tuje yahaan baatchit karne ko bulaaya hai?...Thoknewaala hu
tuje.

( Viren collar chudvaakar thodaa piche jaata hai aur Narayan ki or dekhta hai. )

Viren : Ye kya bol raha hai Narayanbhaiya….

NarN : Bilkul thik bol rahaa hai ye…

( Viren Narayan ke pairo me gir jaata hai aur maafi maangne lagta hai. )

Viren : Maaf kardo bhaiya….galti ho gayi humse….hum nashe me the….maaf kardo bhaiya….maaf
kardo hume….

( Narayan use laat maarta hai aur Ansh ko ishaara karta hai. Viren pistol nikaalne jaata hai aur Ansh goli
chalata hai…magazine khatm hone tak goli chalate raheta hai. Lekin jaise hi wo mudta hai to wo
dekhta hai ke Ajay uske sir pe pistol rakh ke khada hai. )

Ansh : Ye kya kar rahe ho? Hatao ise…

( Ajay sir hilakar inkaar karta hai. )

Ansh : Bhaiya, ise bolo ke mazaak band kare…hatao ise…

( Ansh Narayan ki or dekhta hai. )

Ansh : Bhaiya aap kuch bolte kyun nahi? Bhaiya…

( Narayan hasne lagtaa hai aur Ajay bhi hasne lagtaa hai. )

Ansh : Bhaiya, aap has kyun rahe hai?

NarN : Main has kyun raha hu? Jaan na chahta hai? To sun, Aaj main apni manzil tak pahoch chukaa
hu. Raagini ka Arjun se shaadi karnaa, Ajay ka tumhari baat maan na, wo kagaz laakar dena,
Viren ka Arjun ko maarna aur aaj Viren bhi khatm ho gayaa. Ye sab mera plaan tha. Aur ab teri
baari.

( Narayan Ajay ko ishara karta hai aur Ajay Ansh ko goli maar deta hai. )
NarN : ( haste hue ) Aaj mera sapna pura hua hai. Meri barso ki mahenat rang laayi hai….Jis pad ke
liye main barso se raajneeti khel raha tha, wo pad aaj mujhe mil gayaa hai…Ab wo pad mera
hoga…sirf mera….

( Achanak piche se goli chalti hai aur Narayan ko lagti hai. Narayan piche mud ke dekh ta hai aur Indu
dusri goli chalati hai. Narayan mar jaata hai. Ajay Indu pe goli chalane jaata hai aur Indu use bhi
goli maar deti hai. Indu dhire-dhire chalet hue aage aati hai aur ghutno pe baith jaati hai. Phir jor
se chillakar rone lagti hai. )

Indu : Humaare aansu, sukhe nahi hai ab tak, aur inhe sukhne bhi nahi denge hum; jab tak hume aap
ka jawab nahi mil jaata. Bataaiye, kaise bardasht kar rahe hai aap log, hum par ho rahe
atyacharo ko? Abhi humaare haatho ki mahendi ka rang bhi nahi utra tha, aur humaara suhaag,
berahemi se ujaad diya gaya. Humaare pita jaise jeth ki hatyaa kar di gayi. Aur aap sab, ab bhi
chup hai. Kyun?!! Jawab dijiye hume, kya aap, aapke liye aapna khun bahaane waale, humaare
parivaar ko vote naa dekar, kisi aur ko satta ki kursi par bithayenge…? Kya aapka nyaay yahi
bolta hai? Kya humaare parivaar ke balidaan ka, koi mol nahi hai?

Jawab dijiye hume…?!!!