T.E.F.

T.E.F. ZIRTIRNA
ZIRTIRNA
CHUNGCHANGA
CHUNGCHANGA
S.E.C.
S.E.C. THUCHHUAH
THUCHHUAH
1997
1997

Mizoram Presbyterian Church

Synod Office, Aizawl
TMEF Zirtirna Chungchanga SEC Thuchhuah

T.E.F. ZIRTIRNA CHUNGCHANGA S.E.C. THUCHHUAH

Tunlai hian mi \henkhat “The Truth Evangelical Fellowship” (TEF)

invuahte zirtirna \henkhatin Kohhran tihbuaite a neih nual avangin
an zirtirna hi Synod Executive Committee (SEC) chuan zir chian ni se
tiin a rel a (SEC 157:37). SEC chuan hetiang hian a zir a –
(1) Pu Rohmingliana leh a zirtirna dawngtute kawmin.
(2) Sermon Cassette leh ziak leh Sermon lai ngaithlain.
(3) Methodist Kohhran (Myanmar) hruaitute thuchhuah
a\angin.
(4) Mi pawimawh chi hrang hrang kawmin.

Hetianga TEF zirtirna zir a nih lai hian ‘Thurin ziak sa kan nei
lo,’ an ti a; mahse, SEC-in an zirtirna a chhui chian hnuin Thu-in ziak
sa June 16, 1997-a an chhuah (issue) chu dawn a ni leh ta a. He an
Thurin ziak sa tlai khawhnua an chhuah leh TEF mi \henkhatte zirtirna
chu a inpersan hle a ni.

Hetianga ngun taka zir chian a nih hnuah he pâwla mi \henkhatte

zirtirna chu Bible leh Kohhran Thurin a\anga tehin a him tawk lo ngeia
hriat a ni a. ‘A him tawk loh dan te chu Kohhranho hriat atan chhuah ni
se,’ tiin Executive Committee chuan a rel a (SEC 158:38), hetiang hian
kan han chhuah a ni.

T.E.F. Chanchin tlangpui

T.E.F. hi Pu Rohmingliana leh a zirtirna pawmtuten kum 1989-a
an din a ni a, Pu Rohmingliana hi Myanmar (Burma) ram Hmunluah
khuaah March 20, 1955 khan a piang a, 1965 khan Tahan bul Tuingo
khuaah an pêm a, Methodist Kohhrana awm a ni a, 1988 khan Tuingo
Bial Methodist Kohhran Khawmpui chuan a zirtirna hi \ha a tih loh
avangin a hnawtchhuak ta a ni.

Kum khat hnuah a zirtirna pawmtu Kohhran pawl hrang hranga

awmte nen April 4, 1989 khan Tahan khuaah T.E.F. hi an lo din ta a.
Myanmar-ah chuan ‘Thutak mite’ tia hriat an ni. Kum 1992 khan
Mizoramah an zirtirna hi thehdarh tumin \an an la a, T.E.F. dinin he
pawl hming hian \an an la a, kan Kohhranah ngei pawh khawimaw
lai laiah chuan harsatna a lo awm phah ta a ni.
TMEF Zirtirna Chungchanga SEC Thuchhuah

T.E.F. MI |HENKHAT ZIRTIRNA DIK LO LANGSAR ZUAL

LEH BIBLE SAWI DAN

1. Mihring chungchangah
Mihring hi – thlarau, rilru leh taksaah \hen hrangin, thlarau chu
Pathian thil, taksa erawh chu rilru leh finna leh ngaihtuahna kengtu,
mihringa hriatna chi nga awmna, phûrna lo chhuahna, thlarau nena
hrang hlak niin an sawi a. Thlarau chiah chu Pathian chenna tlak
niin an zirtir. Sual nena sawi zawmin rilru leh taksa chu thil tlak tlai
lo, \angkaina reng nei lovin an sawi a, chuvangin, mihring chu chhe
lailet der, thingbul, lungbul, êk lung ang kan ni. Kan chhia leh \ha
hriatna pawh hi Setana min pek a ni a, mihringa awm reng reng, a
chhia a \ha zawng zawng pawh Setana pek vek a ni tiin an zirtir a.
Hetianga mihring chungchang an zirtir dan hian thupui pawimawh
dang an zirtir dante pawh a nghawng tel vek a ni.

Mahse, hei hi Bible-in mihring chungchang a sawi dan a ni lo

va, taksa, rilru leh thlarau hi sawi hran theih chin awm mah se, lâk
hran hlak theih a ni lo. Taksa tel lovin mihring thlarau amahin a awm
lo. Paulan “In taksa leh in rilru leh in thlarau chu kan Lalpa Isua Krista
inlar hunah chuan a puma humhimin awm rawh se” (I Thes. 5:24) a
tih te hi thliar hran a tumna ni lovin, a inpumkhatzia a sawina a ni
zawk. Thlarau chauh hi Pathian lawm tlâk ni ta sela Isua Krista chu
mihring taksa neiin mihringah a lo piang lo vang.

Amahah chuan Pathian famkimna tinreng chu taksa neiin a lo

awm si a (Kol. 2:9).
Chuvangin in taksaah chuan Pathian chawimawi rawh u (I Kor.
6:20).
Inthawina nung leh thianghlim leh Pathian lawm tlâk ni turin in
taksa chu inhlânah ka ngen a che u (Rom 12:1).
tih te hi Bible sawi dan chu a ni zawk a. Leia kan nun chhung hian
taksa, rilru leh thlarau pumkhat hmang hian Pathian kan pawlin a
rawng kan bawl a. Thihnain kan lei taksa a tihchhiat hnuah pawh
ringtute chu van taksa puin min kaitho leh dawn tih hi Kohhranin
kan ring a ni.
TMEF Zirtirna Chungchanga SEC Thuchhuah

2. Suala tlukna thu

Mihring hi ama duh thua Pathian dan bawhchhia a ni lo va, Setanan
a pâwng lâk tak tak a ni, an ti a. Chutianga Setanan a pâwng lâk tâk
avangin mihring taksa leh rilrua hriatna leh ngaihtuahna zawng
zawng hi chu Setana thil vek nia sawiin Pathian ngaihna pawh nei
thei tawh lo a ni an ti a, hei hian kan thlarau pawh a thunun vek
avangin mihring chu sual hlawm a lo ni ta a ni, an ti.

Mahse hei hi Bible zirtirna leh kan Kohhran Thurin nen a inkalh.
Kan Thurin chuan, “Mihring chuan ama duh thu ngeiin Pathian dan
a bawhchhia a, thiamlohna leh chhiatnaah chuan amah a inbarh lût
ta a,” a ti a (Thurin No. V). Hei hi Bible-in mihring suala a tlûk thu a
sawi dan lak tawi a ni. Pathianin mihring chu duh thlang theia a siam
avangin tih tur leh tih loh tur te a hrilh vek a, Setanan a thlêm khan a
tilui lo va, ama duh thu ngeiin thlemtu thu a zawm ta a nih kha. Chu
chang chu a ni lova, khawvela hnam tin zingah Pathian ngaia zawng
ruai ruaitu hi an tam em em a. Hei hi mihring chanchin leh sakhaw
chanchin a\ang te, mahni nun ngei a\angtein a dik zia kan hre \heuh
a ni.

An zirtir dan ang hi a nih chuan –

– Suala a tlûk avangin mihringin sual mawh a phur lo vang a,
amah tak chu a sual miah lo tihna a ni ang.
– Pathianin Eden huana a rawn zawn pawh khan inthiamlohna
neiin Pathian an bihrûksan lo vang.
– Sual hlawm a nih chuan Pathianin mihring chu chhandam
leh a tum lo vang.
– Mihringte hi Pathianin sual sim turin a ko lo vang.

Heng miten sual thu-a mihring inhnamhnawihna thu an sawi

bo hle na chhan hi Bible-a thupui tak tling lote leh hmanlai mithiam
tlem azawng ten Bible pawn lam thil tlawhchhana an zirtirna rinchhan
bera an neih vang niin a lang. Suala tlûkna thu an zirtirna hian a hnu
lam zelah pawh mihring leh Pathian inkar an zirtir dan a nghawng
vek a. Hei hi zirtirna him lo a nih zia a hnu lama kan thuziak hian a
rawn tichiang zel dawn a ni.
TMEF Zirtirna Chungchanga SEC Thuchhuah

3. Simna thu-ah
Mihring hi a thil tihsualah mawhphurtu ni lova an sawi avangin sual
sim tur pawhin mawhphurtuah an ngai lo va. “Sual sim turin mawh
min phurhtir lo,” an ti reng a ni. “Sim kan duhna leh sim tura \an
kan lâkna pawh kha sual tho a la ni a, sim kan tumna pawh sual a ni.
Isuan thiin kan sual min sim sak zawk,” tiin an zirtir a ni.

Hetiang hi Bible leh Kohhran Thurin zirtir dan a ni lo va.

Thuthlung Hlui hunah pawh Pathianin mihringte chu sima a hnêna
kir leh turin a ko reng a ni a (Jer. 4:1, etc). Sual simte chuan Pathian
nena inzawmna hlimawm tak an chang leh \hin (Sam 32:5; 51:17, etc).

Thuthlung Tharah pawh Lal Isuan mite a sawmna hmasa chu

“Sim tur leh Chanchin |ha ring turin” a ni (Mk. 1:15). Lal Isua zuitu
hmasate pawhin sim turin mite an sawm (Lk. 3:8; Tirh. 2:38, etc).
Thlarau Thianghlim hnathawh tur Lal Isuan a sawi lawk pawh, mite
an sualzia hriattir a ni a, hei hi sim tura bul in\anna a ni (Joh. 16:8–11).

Kan Thurin No. 7-na chuan, “Kristaah chuan Pathianin mi

zawng zawng hnenah chhandamna famkim chu a thlawnin a rawn
hlan a, an sualte sim tur leh Lalpa Isua Krista chu an chhandamtua
pawm tur leh Pathian duhzawng lo lang chu zawm a, amah entawna
inngaitlawm tak leh thianghlim taka nung turin thu a pe a,” tiin simna
thu hi a sawi a. Sim hi mi sualin a tih tur leh a tana tihmakmawh a
nihzia a chiang hle a ni. A tisualtu ngei sim a \ul a, mi dangin sim sak
theih a ni lo tih a chiang a. Sim chu a tisualtu rilru leh nun inthlakthlêng
tihna a ni a, tisual lo tan sim tur a awm lo.

4. Rinna thu-ah
Mihring lam an sawi bo êm avangin mihring hi Pathian ring theiah
an ngai lo va. Rinna an sawifiah dan pawh a mak hle.

Rinna chu ‘Pathian thu’ hi ni maiin an sawi a, entirnan : Nova rinna

chu ‘Lawng tuk rawh’ tih kha ni maiin an sawi. Isua kan ring tur a
ni lo, Pathianin Isua a rinna hi kan rinna chu a ni an ti a. Abrahaman
Pathian a ring tih pawh hi dâwt a ni, a ring hlawl lo, tual a that a,
tualthat pa a ni. Mihring chu rannung ang nunna nei, chhe lailet dêr
a ni, chuvangin Pathian a ring thei lo, an ti.
TMEF Zirtirna Chungchanga SEC Thuchhuah

(Rinna hi mihringin Pathian a zawmna pawimawh tak a nih vei nen!).

Mihring leh Pathian inzawm lehnaah mihring thiltih a tel lo, an ti
tawp mai a ni.

Bible sawi dan erawh chu hetiang hi a ni :

Mihring chu Pathian ring tura sawm leh koh a ni. “ring rawh
u” tih te, “amah chu tupawh a ring apiang” tihte hi Chanchin |ha bu
lama kan hmuh dan a ni a (Joh. 3:15–18, etc). Tin, ‘Amah lawm’ tihte
pawh hi ring tihna bawk a ni (Joh. 1:12).

Hebrai 11:1-ah chuan “Rinna hi thil beiseite awm ngeia hriatna,

thil hmuh lohte hriatfiahna,” tiin rinna awmzia sawi a ni a. Paula
pawhin, “Miten thinlungin an ring a, felna an hmu \hin a; kâin an \an
a, chhandamna an hmu bawk \hin a ni,” tiin a sawi (Rom 10:10).

Kan Thurin pawhin rinna chungchanga kan Bible thu hnuk la

chhuakin, “Isua Krista chu an chhandamtu atana ring duh te, Amah
entawn a, Pathian duh ang taka inngaitlawm leh thianghlima nung
tur tein thu a pe a. Krista chu ringa a thu zawmtute chu chhandam
an ni a....” (Thurin No. VII), “Krista ringa, a thu zawmtute erawh chu
a langchanga thiam chantirin an awm ang a, ropuinaa lawm luhin an
awm ang” (Thurin No. X) tiin a sawi bawk. Chhandamna hi Pathian
thilpek a nih laiin hei hi rinna leh khawngaihna avanga dawn a ni a.
Rinna hi mihring mawhphurhna a ni ngei tih hi Bible leh Thurin sawi
dan a ni.

Hengah hian thil lang chiang tak chu – Rinna hi Pathianin Isua
a rawn rinna ni lovin mihringin a rinna hi a ni zawk a. Ring turin
mihringin mawh a phur a, Thlarau Thianghlim \anpuiin a ring thei a
ni tih hi a ni.

5. Ringtu nun thu-ah

Mihring dinhmun an dah hniam hle a, suala a tlûk thu-ah mawh
phur lova an sawi ang zelin Pathian nena a inzawm lehnaah pawh
mawh phurin an hre lova. Chutiang zelin ringtu nun dan turah pawh
mihring tih tur an hre mang lo, \hu thluang nun a ni deuh ber mai.
“Chu khawngaihna mak tak mai chuan a chhanchhuah mihringte chu
a tana nung turin a phût lova, an tan a nun sak ta zawk,” tih hi an
zirtir dan leh an pawm dan khaikhawmna a ni thei ang.
TMEF Zirtirna Chungchanga SEC Thuchhuah
Hetiang zirtirna te hi Bible leh kan Thurin sawi dan nen chuan
a inpersan hle. “An thih aia thia tho leha tana an nun tawh zawkna
turin a ni, mi zawng zawng thih aia a thih ni” (II Kor. 5:15) tih te,
“Kohna phûa awm turin” tih te (Eph. 4:3), “Inthawina nung leh
thianghlim leh Pathian lawmtlâk ni turin...in rilru a thara awmin lo
danglam zawk tawh rawh u” tih te (Rom 12:1,2) leh heng anpui thu
tam tak hi ringtu nun dan tur sawina kan hmu a. Paula lehkhathawnte
phei hi chu a zatve hnuhnung lam zel hi ringtu nun dan tur sawina a
ni deuh vek mai.

Chanchin |ha bu-ahte hian Lal Isuan mite tan rawng a bawl
pahin ringtute awm dan tur a sawi zel a, a tih dan ngei chu entawn
tur a nih zia te a tarlang bawk a (Joh. 13:14, 15). Ringtute Pathian laka
an awm dan tur te, an mihringpuite chunga an awmdan turte chiang
takin a sawi \hin a, lei chi leh khawvel êng anga \angkai turin a zirtir
a (Mat. 5:13–16), khawvel pum puia Chanchin |ha hril turin mawh a
phurhtir bawk (mat. 28:19,20). Isuan hetiang lam thu a sawina hi
Matthaia leh Luka te chuan an dah khawm deuh nghe nghe a ni (Mat.
5–7; Lk. 12).

Kan Thurin pawhin ringtu nun dan tur hi tawi kim takin a sawi
bawk : “Amah entawna, Pathian duh ang taka inngaitlawm leh
thianghlima nung tur tein thu a pe a” (Thurin No. VII). “Ringtu zawng
zawng tih tur chu Kohhrana inpawlho tura inzawmkhawm te...A dan
zawm te....Pathian malsawmna an dawn ang zela pek ve thung te,
anmahniho zingah leh mi zawng zawng zingah Krista nungchang
ang tihlan te....” tiin (Thurin No. IX).

Mihring leh Pathian inzawm lehna thuah leh ringtu nun thua
mihring mawhphurhna Bible leh Thurinin a sawi chiang hi Pathianin
mihring a dah san zia tilangtu a ni a. Khawl leh rannung ang leka ngai
lova mawhphur tlaka Pathianin min ruat hi a ropui a, lawm hle tur a ni.

6. An zirtirnain Kohhran a nghawng dan

An zirtirna a\anga lo harh thar leh chhanchhuahna chang tia sawi
tur phei chu an awm ve teh meuh mai. Mahse, hemi rual hian Kohhran
chhungah inlungrual lohna leh \aidarhnate hi thup sen rual lohva a
nghawng langsar chu a ni si. Hmun \henkhatah phei chuan mi dang
ngaithei lova intihbingna te hial a lang tawh a. A pawi hle mai.
TMEF Zirtirna Chungchanga SEC Thuchhuah

TLANGKAWMNA

Pathian leh mihring inkungkaihna thu Bible-ah Kohhran

Thurinin a puan reng rengah hian Pathian chu a bulpui a ni reng a,
Pathian khawngaihna hnathawh chu mihringin a rinchhan a, chuti
chung chuan a khawngaihna ringtu mawhphurhna chin hi Pathianin
a siam ve zel tih hi theihnghilh loh tur a ni. Mihring chuan a
mawhphurhna a hlen ve dawn pawhin Pathian Thlarau puihna chu a
rinchhan zel tho tih hi Kohhran zirtirna chu a ni.
TMEF Zirtirna Chungchanga SEC Thuchhuah

NGENNA LEH HRIATTIRNA

He zirtirna hi Bible leh Kohhran Thurin leh kalphung a\anga

thlirin a him kim lo hle a, a luhchilh Kohhranahte phei chuan harsatna
a thlen mek bawk a. Chuvangin hetianga zirtirna hi Bible leh Thurin
rema siam \hat leh tihdik a nih loh chuan –
(1) Kan Kohhran mite chu hetianga zirtir \hinte zinga
inhnamhnawih lo tur te, an zirtirna him lo laka inveng tur
tein kan ngenin kan hriattir a ni.
(2) Hetiang zirtirna him lo pawmtute kawng dika hruai turin
kan Kohhran mite chu kan ngen a ni.
(3) Hetianga zirtirna him lo pawmtute leh Kohhrana harsatna
thlentute an awm a nih chuan a \ul anga kutthlâk theihna
pawh kan Kohhran hian kaihhruaina awmsa a nei a ni
(Presbyterian Handbook, Bung 6:7(2) en rawh).

Sd/- Sd/-
(REV. H. ZALAWMA) (REV. VANLALFAKA)
Secretary Moderator

Mizoram Presbyterian Church

Synod Office, Aizawl

Date 4.7.1997