PASTOR MI HRIAT I NI EM?

F Thasiama

Kan naupan laiin kan khuaah Pastor an awm lo a. Kan khua atanga mel 5 ah te, a
aia hlaah te an awm a. An lo kal hi chuan Baptisma chan te, Sacrament sem te, Inneih leh
mitthi vui na te an nei thin. Chutiang awm loa an lo kal leh kal loh ka hre reng tawh lo. Ka
puitlin hnu, Thalai-a ka inhman tam lai deuh chuan Pastor thuthmunah kan awm a. Bial fang
leh duty-a an kal chhuah loh chuan inkhawm apiang leh kohhran programme ah te chuan kan
hmu zel thin a, a thlamuan thlak hle .
Kohhran upa ka han ni ve a. Eizawnna avangin bial ding tharah bul kan tan a.
Pastor Bialah te chanvo kan han nei ve ta hial a. Pastor in min thutchilh bawk a. Pastor
chhungkua te nen kan in hmu fo a, chaw te kan ei ho zauh zauh bawk. Biakin bulah an awm a,
hnatlang thawh leh inkhawm hun awlah te an inah kan lut fova, anni pawh kan inahte an lo kal
ve thin. Kan mamawh hunah lengah te pawh kan sawm thin bawk. Bial fanga an chhuah
dawnin kan kal ho ve fo thin. Bial inkhawmpui te, Rorelna dangah te, ABC leh Assembly-ah te
kan kal chhuak ho fo bawk. Thian ang leh Pa angte, rawngbawlpui angte, chhungkhat angte in
thil kan ti ho thin. Damlo kan te, khawhar in kalah te kan ti ho fo thin bawk. Pastor dangte
pawh kan mikhual ve zauh zauh.
Chung hun chu a liam a. Eizawnna avang bawkin khawpui-ah kan han lut a.
Kohhran ngelnghet tak, mi fel tak tak bulah te kan awm ve ta a. Kan upa thenkhat chu Pastor
ang maia fell eh tha an ni a mahse kan lawina Kohhran chu kan naupan laia kan kohhran ang
kha a ni a, Pastor thurhmun a ni lo a, bialtu Pastor pawh programme pawimawh ah lo chuan
kan hmu meuh lo a. Committee hrang hrang ah bial chhung kohhran tam tak tlawhin a chhuak
thin a, Pastor bula awm fo hnu a hmu phak mang loa awm leh chu naupan laia kan hmu khat
nen chuan a lo dangta daih mai a. Pastor te ngaihawmzia leh an bula nawmzia te min hriatchian
tir hle a ni.
Pastor te hi Lal Isua hna chhunzawm tura Pathianin hriak a thihte an ni a. An
nunah hian Isua hmel hmuh tur a awm thin. An bula awm hi a nuam in a hahdam thlak em em
 2

a. Chu chuan Lal Isua hnena awm min chak zual tir thin. Chuvangin Pastor nu leh pa nihte,
Pastor nupui leh fa nih te leh Pastor chhungte nih hrim hrim pawh hi a hlu hlein ka hria a.
Pathian chhungte tia vuah tlak an ni hliah hliah a ni. BCM chhungkua 24500-ah hian Pastor
chhungkua 120 vel chauh an la awm a. Tun aia tam hi Pastor chhungkua nei ila ka ti hle. Lal
Isua bula awm te mi vannei an ni angina Pastor chhungte chu tunlai khawvelaah mi vannei ber
an ni awm e.
Chutiang chu kohhran mite pawhin Pastor te kan ngaihdan a ni theuh awm e.
Harsatna kan tawh changte, lawmna kan neih laite hian Pastor ten min hriatpui se tih hi kan
chak thin a. Harsatna neilo leh lawmna neilo chhungkua chu tlemte, danglam tak an ni ang a,
thuk takin an mamawh a ni zawk ang. Kohhran upa ten bial chhung mite tlawh bawk thin mah
ila, Pastor te tlawh chu a danglam hle. Kohhran ding tharah phei chuan Pastor hmelhriat nih te,
Pastor in kan hming a min kohte, kan ina an len luhte hi kan lawm thei hle thin.
Pathian mi hriat nih hi nuam tak a ni a, Pastor mi hriat nih hian Pathian mi hriat
nih hlut zia a ti zual leh thin. Pathian khawngaihna zara sorkar department-a ka thawhna
Officer te min hretu aiin Pastor min hre tu hi an tam zawk in ka ring a, nuam ka ti ru ve hle
thin, ka fate pawh hian Pastor an ngaisang a. Pastor an hmuh belh hian “I hria em? A hria che
em?” min ti thin a. Ka mi hriatte (min hretu a ni zawk mah) an nih chuan an lawm hle thin.
Pathian mi hriat kan nih hnu hian Pastor mi hriat ni tura tan lak pawh a ngai ve hle a ni. Chitih
lain Pasotr te hmel hmu ngam lo leh hmelhriat pha lo tur, an in pawh Pastor luhna tlak ni lo
hiala ngai pawh an awm ve mek bawk.
Hmelhriat loh nufa nen Taxi-ah kan chuang dun a. A fapa chu BD zirlai a ni.
Pastor ni ngei turin ka fuih ve a. Pastor hlutna ka hriat ang ang te ka sawi a. Pastor chu khawiah
pawh awm se an in hmeh vek. Sorkar milian ber bulah an te chuang lova, mi hnuaihnung ber
bulah pawh an lian lurh chuang lo. An vela awm apiangte nen an in rem thei zel (etc. etc.) tiin
ka sawi a. A nu chuan chutiang zawnga a ngaihtuah ngai loh thu leh dik hle a a hriat thute a
sawi a. Lal Isua kha Pastor hmasa ber a ni a, Pastor te hi kohhran mite Isua ang an niin ka hria.
BCM-ah hian member 123700, chhungkua 24500, bial vawng Pastor 64, (Pro
Pastor 20) vel kan awm a. Bialtu Pastor pakhat hian chawhrualin chhungkua 383 vel, member
1933 vel enkawl ang an ni a. Tualchhung kohhran 422 kan awm a, chawhrualin khaw 6-7
enkawl ang an ni bawk. Committee leh chhungkaw thil tul vanga an pen fo ngai bawk nen kan
 3

Pastor-te hi an hah hle mai a. Hmun thenkhatah phei chuan an damloh laia an tlawh hman loh
mitthi an vui a ngai zauh zauh mai thei. Tha lam thil tam takah phei chuan an tel hman vek
awm love. Kohhran mite’n Pastor rawngbawlna kan mamawh ang chu tunah chuan an thawk
seng lo hle dawn a ni.
Ram dinhmun a danglam ang zelin Pastor mamawhna pawh a sang zel awm e.
Kohhran Upa leh Rawngbawltu ten chhungkuate tlawh ve thin mahse, chhungkaw thenkhatah
chuan a sawt lo hle mai a. Chhungkaw thenkhatah chuan len luh inthlahrun awm thei hial
khawpa dinhmun in anglo te a awm thei a. Chung hmunah chuan Pastor te ngei hi an
pawimawh zual em em a. Tin, Committee leh hnatlang thawhnaa hruaitu fel tak tak an tam lain
thlarau lam thil a mi dangte hmachhawn hlei thei lo kana wm nual bawk a. Thlarau lam thil
thuk, Pastor te chauhin an luhchilh ngai pawh hi a tam zel bawk dawn a ni.
Chuvangin BCM in pawn lama luanchhuahna (Outreach) Project chak taka kan
kalpui lai hian ram chhung phun nghehna (home-reach) programme hi kan uar a tul ta hle a ni.
Kan hmalam thlirnaah hian Pastor tam zawk kan neih theih dan ruahman ni de. Kohhran lian
deuh phei chu Pastor pakhatin enkawl thei sela. Thingtlang ah chuan Kohhran 3 aia tam lo
enkawl sela. Pastor thuthmun ni loah pawh Pastor bial fang te chenn tur Pastor chawlhbuk
emaw te siam nit a se. Pastor ruai tam tura sum a harsat pawhin Theologian hna neilo te hi
anmahni duhthlanna leh Assembly ruahmanna in Minister-ah nemngheh ni se. Tual chhung or
Bial te contract-a rawih theihna kawngte hawn ni se a tha an gem tih thlengin ka ngaihtuah
thin.
BCM chhungkua te hi Pastor te’n hneh taka min vil chuan ram leh kohhran hi a
lo nuam saw tang a. Miten Pathian kan hnaih zual ang a, a lo nghet deuh deuh ang a, a lo lang
fiah zel dan a ni.
Nang, Pastor mi hriat I ni em?