De La Salle

COLLEGE OF SAINT BENILDE

2544 Taft Avenue Manila

Wikang Filipino: Nagmula sa Baler Hanggang Buong Bansa

Ipinasa ni:

AIZA M. FERRER

Ipinasa kay:

Dr. Dadiva M. Bernabe

 Wikang Filipino: Nagmula sa Baler Hanggang Buong Bansa

Ano nga ba ang Wikang Filipino? Sapat na ba na ang pagsasalita ng Tagalog ay

nangangahulugan ng pagdakila sa ating wika? Marahil ay oo at sa kabilang banda naman

ay hindi. Oo matatas tayong magsalita ng Tagalog dahil maaaring ito ang nakagisnan

nating wika subalit kapag kaharap natin ang isang bisaya o isang bikolano o ilonggo na

gamit ang kanyang katutubong wika ay madalas natin silang pagtawanan hindi lamang sa

tono ng kanilang pananalita kundi pati na rin ang kakatwang salita na iba para sa atin ang

kahulugan. Oo tinatangap ang Tagalog bilang pangkalahatang salita na ginagamit sa ano

mang paraan ng pakikipag-ugnayan nating mga Pilipino hindi lamang sa rehiyon kung

saan ito nagmula bagkus sa buong bansa. Subalit hindi ito nangangahulugan ng

pagtalikod sa ibang pangunmahing salita o dialekto na kumikilala at nagsasaad ng kultura

at paniniwala ng isang lugar na bahagi na ng ating kasaysayan. Kung hindi man pagyakap

o pagtanggap sa ibang salita ay hindi naman sana pagyurak sa ibang aspeto nito at tulad

ng ating nakagisnang wika ay maimulat din ang ating mga mata at matutong igalang ang

ibang salita tungo sa pambansang pagkaka-isa.

Sa pangkalahatang aspeto, papaano nga ba magiging madali ang pag-unlad at

pagkaka-isa kung ang isang lider ng bansa ay kailangan pa ng taga pagsalin ng kahulugan

ng kanyang salita na mauunawaan ng kanyang mamamayan? Gayon din sa iba pang

payak na pakikipag-ugnayan natin sa ating mga kababayan nararapat lamang na

magkaroon ng pambansang wika na mauunawaan ng lahat. Tulad ng aking nabanggit,

hindi ang pagsasalita ng ibang pangunahing wika ng ating bansa o kailangan pang

matutunan ang paggamit nito para lang masabi na nakiki-isa ang isang indibidual sa

kanyang karatig lugar bagkus respeto o paggalang at pagkilala sa kanilang nakagisnang

wika.

Upang matupad ang mithiin na magkaroon ng pambansang pag-unlad at pagkaka-

isa, ipinanukala ni Pangulong Manuel L. Quezon ang isang Kautusang Tagapagganap na

ang Wikang Pambansa ng Pilipinas ay batay sa Tagalog. Tatlong taon makalipas ang

pagpapanukala, ay sinimulan na din ang pagtuturo ng wikang pambansa sa mga

paaralang pampubliko at pribado. Noong taong 1959, ang wikang pambansa ay tinawag

na Pilipino batay na rin sa Tagalog. At sa ating Saligang Batas ng 1986, nakasaad dito na

pinapalitan ang tawag ng wikang pambansa, at ginawang Filipino ang Pilipino, upang

mabigyan ng tamang pagkakakilanlan ang tawag sa tao at sa wika, na ang tao ay Pilipino

at ang wika ay Filipino.

Dahil sa pagpasa ng batas na ito, nagkaroon ng pagkakaunawaan sa bansa ano

mang gamit na salitang etniko o alin man sa walong pangunahing salita sa Pilipinas tulad

ng Waray, Ilokano, Bikolano at iba pa ay naging mas madali ang pagkakaunawaan ng

mga Pilipino. Nagkaroon din ng pangkalahatang pagkakaintindihan sa mga iba’t ibang

pananaw, saloobin at kuro-kuro ng bawat indibidual.

Mula sa Baler kung saan isinilang ang ama ng wikang pambansa, dahil sa

kanyang pagpupunyagi ay isinilang din ang Wikang Filipino na mag-uugnay at

magbibigay ng pagkakakilanlan hindi lamang sa ating mga Pilipino na naririto sa ating

bansa kundi pati na rin sa ating mga kababayan sa ibang panig ng mundo. Pilipino man o

banyaga kikilalanin na ang tulay sa pagkaka-isa at pag-unlad ay ang pagtataguyod at

pagmamahal sa ating sariling wika, ang Wikang Filipino.