Guitarist, Singer & Composer Muang Muang Interview na:

Q : Min, suahni le suahna mun te nong gen thei diam?

A : Ka min pen Cin Sian Muang hi. Muang Muang in ong ki sam zaw hi. Ngente khua ah
December 4, 1979 in Pa, Vungh Do Thang leh Nu, Luan Khan Dim te tapa upa pen ding in na
suakkhia ingh. Khe lam aa suak in, a si sa in suak ci'n ka nun ong gen hi. Ka pu pen Male nurse
hi in thungen kawm2 in nai lang sung bang kalai gui at tat lo in ong bawlbawl ciang nungta kik
dan hih tuak ingh. Mi banglo e hehe..
Q: Kum bgzah na phak in biakinn ah guitar tumta na hiam?
A: Kum 10 kaphak aa ki pan in guitar tum sin to in biak inn ah tum kisin topah ingh. 

Q: Khui bgzah sungh guitar tum khin na hia?

A: Ei la khui 5 khong leh Mizo la khui 4 leh a tuamtuam khui tawh ahilo dawng tam pi Aizawl
ka om lai in tumsak ngei ingh. Pune ka tun khit ciang Hindi la khui nih ah session player in la nih
tum sak ingh. Tulai tak bel ka band Vitamin M tawh mangla khui khat ka hanciam san laitak uh
hi. Tukum sung in zo ding lam en ingh.

Q: Band bgzah tawh tum khin cihleh nuam nasak pen or tha nangah na munpen munte nong gen
thei dia?
A: Yangon ah Dream Zone cih band tawh tum ngei ingh. Lasiam Aungban, Reng Mo, Nayta, Aa
Mo cih te tawh kithuah in Xmas concert nopci khat Bo Kalaymyo, Myuang Mya khua gei ah
bawl ngei ingh. Tua pen nuam mahmah sa ingh. Pune ka tun khit teh Band 4 khong tawh tum
khin ingh. Hard Rock Cafe aa tum nuam sa mahmah ingh. Van zat, equipment te hoih mahmah
ahih man in nuam peuh mah hi.

Q: Bang music lam kiva pen na hia?  Blues,Rock N Roll, Rock, Western Classical music te kiva
zaw ingh adangdang te sang.  Hun tawh kizui aa hong om Modern Rock, Punk, HipHop, Rap . . .
cihte na koici muh aa?
A: Hih khangthak music te pen amau style, genre zui in ahoih na neih ciat in aman phatna zong a
tuam ciat hi sa ingh. Kha sang zaw niam zaw cih om thei lo sa ingh. Art ahih man in niam zaw
sang zaw hoih zaw cih om kei, a ngaite bil tawh ki sai zaw sa ingh. Ahih hang music sang khong
ih kah tak ciang hi te pen kisin masa hetlo mawk hi. Blues leh Classical music te pen ong kisin
masa sak hi. Kei muh na ah bel musician khat in Blues leh classical pen atheih loh pha mawh hi
ci ingh. Tua pan adangdang te kizui thei, ka khia, mengkhia hi.

Q: Biakpiakna ah bg music te tum huai nasa aa?

A: Biakpiakna ah music pen azahtak kai cihik mul atho sak thei, Pasian tawh ong kinai zaw sak
thei music te tumding ahi hi. Biakpiakna ah lasa te'n amal kician tak in sa ding aa , a aw zong
kitel sinsen in  melody pen music sang ngaih zaw hamtang leh hoih hi. Mipi te in a lamal pan leh
a melody pan in tha la uh aa music in tuapen zem khawm ding ahihi. Biakpiakna ah music tum
ten siamna lah nang hilo in Pasian phatna ahih man in ih music tum in mipi te leh Pasian aki nai
sak asuah theih nang in zahtak huai tak in tum in zem in, kisin kul sa ingh. 

Tanglai in music pen khanin hawlkhiatna in kizang a, khasiangtho sapna in zong kizang hi. Tua
ahih man in music tum ten biak inn sung ah bang ci tumding cih pen hoihtak ngaih sut kul
hi.Biak na makai te'n biak inn aa music instrument te a len ding , atum ding mi siam te cial in
khasum pia aa seh kul sa ingh. Atung masa sa in sawk in la zong kisa thei mello khong a ih om
ciang biakpiakna nawngkai zaw ahih man in a siam zaw deuh leh Pasian azah tak mite seh kul sa
ingh.

Pawl khat te in piak inn sung aa vanzat te tawh lovesong khong sakna uh hi. Hih pen alau huai
mahmah gamtat na khat in mu ingh. Belshezzar kumpipa in akizang ngei vetlo biakinn sung a
kham hai akikhoi mawkmawk te na dong  zu dawnna aa azat ciang in Pasian hehna ong tung hi.
Tua ahih man Pasian biakna aa kizang music van te lawpthawp zat mawkmawk ding hi hetlo hi.
Love song pen sia hi a ci hilo hing. Ahih hang amunh tawh kizui in man phatna nei hi. Biakna aa
kizang biak inn sung a Piano , guitar, drums te pen biakpiakna la te bekmah tum leng thupha
omzaw ding um ingh. Tua hi aa zahtak bawl ding, zun,kem,phuahphat kul hi.

Q: Ih gam sung leh gam pua ah guitar siam, musician hoih na sak deuh te nong gen thei dia? 
A: Ih Zomi musician ten tampi khan toh kisam lai hang, a siam zong tam mahmah khin ahih
hang music ih tumciang, bangci dan progression leh form and structure te kician tak in zang ding
cih te kan tohtoh huai lai sa ing. Kei zong a ki sinsin san lai hi ingh. Music ih tumciang phrasing,
dynamic and articulation zat dan zong theih kul a utut aa khuak sung aa ong suak peuh peuh tum
hi khin samlo hi.

Kawlgam ah Chit San Mg( Iron Cross) pen siam sa peuh mah ingh. Pasian zong zahtak ahih man
in hih ciang atung hi ci ingh.Gifted ngiat hi mai hi. Adangdang te zong siam tek lel in ahih hang
C S.Mg akhek ding pen kum 100 ah khat ong piang tam ci ingh. Aman guitar a tum ciang in ala
leh guitar tone color telsiam mahmah ban ah phrasing zat dan siam sa mahmah mai sa ingh.

Zomi musician sung pan Bassist tam kinei zaw in Za Lian,U Cinhpi( Lazy Club), Bo Cinh
( Emperor's former bassist), Zenlian, khangthak sung pan Etuang, Deihpi, Khual Tawng, Kimpu
( Pr. Dothang tapa)cih te siam sa ingh. Khantoh nang bel tampi omlai veve tham hi. Kacih ciang
amau sang thei zaw ing aci hipeuh mah lo hing. Ih tumthei lian sang ih bil in thei zaw kacih na
hi.. Ih gam sung ah musician ten ei tumnop music tawh an nek nang baihlo ahih man in mipi zak
nop ding bek tawh kitai in ei hih nop style te ki tumkhi.a kha nailo hiam ci ingh. Zomi te'n
nidang in siamna sunsun in kivak nan kizang lo in tuhun ciang bel kivak nan kizang zaw deuh
thei ta ahih man lungdam huai hi. Nu leh pa te'n ih tate music hoih tak aneu lai pan mah un
sinsak leng kisik omngei lo ding hi.

La ih phuah ciang in zong utut aa huihut tum tawh phuah suk ziau pen hithei nawn lo hi. Ih la te
ih laih kul ta hi. Tang khat leh sakkik tawh man den kei cih zong hikhin lo hi. Music basic theory
pen sinkul lua hi, Laphuak ding ten. Form and structure kician tak kul hi. Mangla tampi pi ngaih
ding hoih sa ingh. tua ciang choir lam aphuak ding te bang in baroque music, classical period,
Romantic period music te tampi ngai leng nasia thei mahmah in Pasian phatna aa kizang choir
nop ci mahmah  idea te kingah ding hi. Leitung technology advantage hang in deihkhem peuh
phial youtube ah ki ngai thei ta hi. J.S. Bach, Schubert, Mozart , Handel,Haydn cih te tampi ngai
leng idea hoih tampi kala thei ding hi.

Q: Lasak lam tawh kisai kum bgzah na phak in biakinn ah lasa ta na hia?
A: Ka pau theicil aa kipan in ka nu leh pa, ka pu, te in biakinn sung ah la ongsakpih in ong
makaih uh hi .

Q: Lasa siam khat ih hih nangin bg kisam nasa aa?

A: Lasiam khat hih theih nang in lasak uk kul masa hi. Lasiam nuam in la uklo cih bel piang
theilo hi.Lasiam ding te zong apau theih kul hi. Pautheilo in lasiam nuam mahmah cihzong
angaihsut hamsa pi khat hi..hehe.. ciamnuih na hi ei. La tampi ngaih kul aa, lasiam te sakdan leh
singing technique tuamtuam practice kul hi.Lasiam leh aw hoih namnih in kikhen thei hi. Aw
hoih mahmah in la siam lo , aw hoih lua lo in lasak dan siam..etc..,la sasa mai ding, sinsin mai
ding hoih hi. Lower register, middle register, and head register ci'n mangkang ten aw zat dan
nam thum in na khen uh hi. Hih te pen zatdan ih siam kei leh aw hoih mahmah khat in zong pek
len zen in lasa kha thei ding hi. Bang ci sak ding, huih dikdan te misiam te kiang pan sin, dawt
kul hi.

Q: Aw hoihna ding nek le dawn kidop huai nasa hia?

A: Ki dop huai tham hi.Aw hoih nang in nek leh dawn bang hoih hiam bel cian lian  keng, lawm
te khat in Phynsidyle dawn leng aw hoih ci in khat vei show khat ah ong dawn in tuazan pen a
aw hoih cih thadah lehluan gawp hi. Aw hoih nang za thei keng in aw siat loh nang in avot lua an
cih te ice cream cih te pawl leh za( cigarette) cih te ki dek thei leng hoih hi.Q: Laphuak e leh
kum bgzah na phak pan kipan na hia?
A: Kum 15 pan phuak ingh.

Q: Own Tune & Copy bgzah bang phuak khinta na hia?

A: Own tune pen 20-30 kikal phuak khin in ki um ingh. Copy bel 4-5 khong ahi tam maw.

Q: Na laphuak te sungpan Zomi Lasiam te na piak khawng aom hia?

A: Zomi lasiam te ka piak om kei in lasiam nailo te ka piak om hehe..

Q: Na lungsim hong sukha deuh, khitui luang khawng aa na phuah aom leh nong gen thei dia?
A: Topa Muang In, Dahna Khitui, Zeisu hong nai in, Tunnu' Itna etc.. khumnai loh ah "Ka
Zuapa" cih te'n kalung sim ong bun mahmah la te hi a keikia khong ka om ciang hihla te'n hun
beisa thute khong ong phawksak in khitui ong luang sak thei zel hi.. Kala phuah atam zaw pen
Pasian phatna late hi mawtphuah ci omthei kei. Khasiangtho makaihna ngen kawm aa ka puah
vive hi zaw hi.

Q: Khui sungah akisa khin dawng bgzah bang pha khin ahia?
A: Dawng 20 val khin in teh.

Q: Pasian nasepna ah music tawh koici kihel leng ki lawh cingin na um aa?
A: Pasian phatna ah lawh cin theih nang in Khasiangtho om pihna kisam hi.Music pen leipian ma
akipan Pasian biakna aa kizang avanglian mahmah na khat ahih man in limtak sinkul a siam kul
hi.Zat dan siam kul a angaih na ding mun te ah ngaih ding a a niam na ding te ah damtak in tum
heau heau thei leng mipi te lungsim lawng in biakpiakna ah lawhcinna ong ngah sak thei hi. 

Q: Tu aa na omna leh na siamsin nate nong gen thei dia?

A: 2006 pan in Spicer College ah music course kum 4 sung sin in 2010 in B. Mus ( Music BA) ih
ci mai diam  amin in na la khin pong ingh. Trinity Guildhall London pan grade 8 certificate na
ngah ingh. Guitar grade 8, leh Voice grade 8 amin in na zo khin pong ingh.Tulaitak Spicer
Memorial College, Pune ah M. A. Ed ka sin lai tak hi.

Q: Tulaitak aa music uk aa asiamna uh Topa ading apia khia nuam khangthak momte bg kammal
twh tha na pia nuam aa?
A: Khangthak music uk te'n theih ding thupi kasak ah Music pen vantung pan ki pan in a siang
tho mahmah  leh a vanglian siamsin na ( art) khat ahih man in Satan in ahoihlo lam ah zang
nuam mahmah hi. Satan ngiat pen leitung vantung ah musician asiam penpa, Pasian thupha a
sang penpen angah ngeipa hi mawk ahih man in pilvang tak in sinkul a zat kul hi. Pasian in
thupha apiak ciang in alangpang pa hita leh tua angahsa thupha laksak tuanlo hi. Tua ahihman 
asiamngei mah in siam lai ding hi. Music sung ah drugs leh zu cih te kihel kilkel lo hi. Musician
mantak te aa ding in drugs zat nang hun omlo hi. Nikhat in nai 3-6 atawm pen practice kul hi.
Music pen music tawh feel ding hi a music feel theih nang in drugs zat kul lo hi.
Tuni ciang dong kahih theih zah in music sinlai in laibu tampi leikhin hing. Laibu khat mahmah
in music na tum ding ciang drugs zat kul hi acihna laimai gual khat zong mungei nailo hingh.
Music teacher hon khat tawh zong kithuah kha ngei ing, kua man music sin kipat nang in drugs
tawm vat phot ni ong ci ngeilo hi. Tua ahih man in khangno te'n music leh drugs pen bang mah
kilaiguizawp na neilo hi. Music tum man aa drugs, zu leh za zat kul hi peuhmah lo hi. Musician
te lak ah zu leh za duh na omkhazel ahih man tua ten azang hi bek uh hi. Music tum ta kei leh uh
zong zu leh za zang veve ding uh hi. Leitung a aminthang Eric Clapton, Slash te khong in zong
na zang ngei uh aa, akisik dan uh tuniciang dong gengen lai uh hi. Tua ahih man in tua te sin
sawm vet kei un cih ong ngen nuam ingh.

Hih bang hunpha nong piak man un lungdam mahmah ingh. Khat
leh nih in khantoh na in ih neih theih leh nuam mahmah ning. Gen khialh a om leh ong mai sak
un . Topa'n thupha ong pia hen!! Lungdam...
Theihsakna: Revival and Reformation cih thulu tawh April 25-26, 2011 sung Evan Sawm
Sang (AWR Zomi) SDA biakinn, Malaysia aa athugenna pan Praise and Worship Leader Tg
Mungtong in Sia Muang Muang a interview na hi, lungdam!!!