MITTAW NGATE LEH SAI THU GENTEHNA

by – Dr. Dal Khan Mang

Hih gentehna pen buangnai banga akikai kawikawi thei gentehna hi. A zangcilte in thu khat genteh
nadingin na zang khin uh ahihhangin ei zong ih deihdeih genna dingin kizang thei hi. Agol pen
panin
aneu tuak in genni ci leng, biakna lam ah: Pasian ih muhdan, biakna ih muhdan, pawlpi’tawndan,
upna ih sandan, Lai Siangtho ih teldante gentel nadingin akizang thei hi.

Mittaw ngate in sai pen nam nga in mu hi. Amaute muhdan tek mah tawh sai hi, ci uh hi. Tua
bangmahin “Pasian” zong nam nga bek thamlo in mihingin mu tek hi: agilo Pasian, alungduai
Pasian,
a it Pasian, a awi-am Pasian, aciling Pasian, asusia Pasian, asiangtho Pasian, acingh Pasian, van
asangna ah aom Pasian, lei ah mite tawh aom atualbial Pasian, aphat ngai Pasian, leh ama thu bek
thu
asa Pasian, cih bangin muhdan khat leh khat kitum kak hi. Ih muh dan khat tek mah pom in tua pen
mah Pasian ih ci hi. Aman na ciang khat om hinapi, abupin man lo hi.

Mittawte in sai pen nam nga in mu uh hi. Amaute muhdan tekmah tawh sai hi, ci uh hi. Tuabang
mahin “biakna” zong khat leh khat ih muhdan kibanglo hi. Atangpi in: biakna pen kipiak khiatna,
pu le pa ngeina, cihmawhtaina, pawl leh gual kaihna, nainganzi nasepna, kinampi sakna leh biak le
paaina, cih bangin kitel leh kizang hi. Hih muhdan nam khat tekin aman ding abat hangin abupi in
maanlo hi.

Mittawte in sai pen nam nga in mu uh hi. Amaute muhdan tek tawh sai mah ci uh hi. Tua bang
mahin, “pawlpi” tawndan zong muhdan kilamdang hi. Eite theih na ciangciangah: pawlpi in up dan
tawndan kibangteng kipawlna, sivui kipawlna, nasep zonna, unau sanggam khualna, Pasian nasep
kipawlna, gupna hawmkhiatna, khalam cinate khoina, pilna zonna, zi zonna, pasal zonna, ukza
zonna, minam deidanna, cihbangin kimu in kizang hi.

Mittawte in sai pen nam nga in mu uh hi. Amaute muhdan tek tawh sai mah ci uh hi. Tuabang
mahin “upna” zong sandan kibanglo thei hi: Pawl khatte in upna pen gupna ngiat a angaihsun,
zuihna leh thumanna, pianthakna, Jesu gumpa leh Kumpi a sanna, Pasian tate suahna, leinate
nungngat a Pasian lam kiheina, leh ngeina luite nusia a ngeina thak pomna cih bangin kingaihsun hi.

Pawpi tuamtuam dinmun panin enlengh:

Mittaw ngate in saipi pen atuam tekin amuh mah bangun, pawlpi tuamtuamte in zong biakna leh
pawlpipen atuam tekin mu uh hi. Pasian amuhdan uh kibang lo hi. Jesu zong amuhdan uh kibanglo
hi. Laisiangtho zong amuhdan uh kibang lo hi. Gupna thu zong amuhdan uh kibanglo hi. Pasian’
gam zong muhdan kitum kak uh hi.

Tuiphum Pawlpi in pawlpi’ min tawh kizawi tawnin pawlpi ihcihpen “tuiphumna” bulphuh
in thu leh la khempeuh mu uh hi. Christian biakna in aneih dimension ahi Krist sungah Krist
hangin asiangtho nuntakna gen napi in ngahsa gupna tawh akizopna mulo hi. Greek philosophy
zangin Laisiangtho ah mihing thu asim khak uhciangin kha leh pumpi in khenkhamin kha, pumpi
akipaaikanna leh akikhen theihlohna Laisiangtho’ gennate musiang zolo uh hi. Amuh uh thuman
khat pen thuman ie abuppi in pom uh hi.

Pentecostal/charisma bawng pawlpi tuamtuamte in “Khasiangtho” bulphuhin, agen ahawm

khempeuh uh tua tung tawnin khia uh hi. Minam tkhatsim khatsim adingin “power encounter”
pen strategy ahoihpen hikhinlo ahihna, mihing khat leh khat zong emotional feeling level kibanglo
ahihna, Laisiangtho pen tanglai mite tunga Pasian’ kipulaakna hi, kei adding zong Pasian’
kipulaakna
pen kei Laisiangtho hi, cih tawh tawnnate tawh buai lai uh hi. Emotional feeling tamzat uha, mihing
pen emotional being ahihhangin intellectual, moral, and physical being ahihna mukim zo lo hi.
Amau
muh lian thuman khat tawh thuman dangte nawlkhin uh hi.

Jehovah Witnesste in Pasian’ min pen a Hebia laipanin la uha, tua min bekmah leitung bupah pau
nam tuamtuamte in zatpih ding hi, cih uh hi. Ahizongin hih leitang mah luah sawm, Judahmite
ngeina pen leitung laizangah koih uh hi. Jesus Krist sungah innteek tuan omlo, cihte muzolo uh hi.
Aluinate bei dinga athak hong paiding hi, acih pen spiritualized in concrete fulfillment in real life
dingin sanglo uh hi. Thuman khat amuhna uh tawh athuman dangte nawlkhin uh hi.

Lutherante in Martin Luther muhna zui in “upna bek tawh gupna” bulphuh in Laisiangtho hongin
gen uh hi. Naungek tuitheh tuiphumna, sawltak pawlpi cilte nekkhawm nekziate muzo lo a,
apaikhiatna pawlpi zatdan mah tawh kalsuanto hi. Amaute muhkhiat thuman pen THUMAN ie
aphel khat hia, amuhloh uh thumaan om lai hi.

Zawma Pawlpi in zongin leitung ukna leh makaihna, leh pawlpi kipumkhatna bulphuh in vaihawm
uh hi. Church Tradition ultung sakin Laisiangtho phen uh hi. Misiangthote luah nading Van inn pen
leitung hisak a, Nu Mary palai in azat nate uh Laisiangtho bulphuh ding bulkip neilo
hi.Kipumkhatna
in Christian nuntakna ah aphelkhat bek hia, abup thu hilo hi.

Seventh-day Adventistte in thukhenna, kumkikna, Thukham, siangtho nuntakna cihte kisam cih
muhkhiatna tawh dingkhia uha. Genbelin zong nei hi. Thuman leh doctrine pai uha, mi le mi
kizopna ah thanem uh hi. Khat le khat na ki-itna uh mite in amuhciangin KEIMAH’ nungzuite na
hihna mite in amuding uh hi,cih sin ding leh ngaihsut dingin ngaihsun masa zo lo uh hi. Thuman
pen
abucingin atheih uh hangin mihing leh mihing kizopna, mihing lakah Jesu banga tualbialna siamlo
uh
hi.

Methodistte in zong John Wesley ie hehpihna tungtawna upna pen gupna method dik hi, cih mukhia
uh hi. Ahizongin Laisiangtho tawh akituak lianlo pupa ngaina ahi tuitheh tuiphumna, naupang
ngeksen tuiphumna leh asiangtho nuntaknate nelhsiah lai uh hi.Christian nuntakna akipat zia ding
thuman mukhia uh ahihhangin thuman khat hinapi, thuman bucing mutuanlo uh hi.

Mittawte in amau muhdantek mah sai hi, ci uh hi. Amaute muhdan namkhattek pen sai’ ie thu
phel khat bek amu uh na hi hi. Atatakin, amuhdan tenguh gawm uh henla, zom dimdiam thei
uh hileh Sai tuamtuam piang lodingah Sai pumkhat piang sak ding uh hi. Tua bangmahin biakna
pawlpi tuamtuamte in amuhkhiat uh Laisiangtho thumante gawmin zom dimdiam thei le uh, pawlpi
tuamtuam apianna panin PAWLPI piang ding na hi gige hi.

Hih Mittaw Nga leh Saipi gentehna ah mittaw nga bek ahihhangin biakna leh pawlpi muhzia ah
mittaw pen leitungah a tullom in ki om hi.. Mit khua mu ihbat hangin lamkhat panin mittaw ngate

tawh ih kibang uh hi. Ih tha hanta khat tek ah ih thanemna tampi na om hi. Tomkaih kikleng, Atom
Biakna Pawlpi khat sim khat sim in khuavak muh leh bulphuh khattek tawh Pasianin leitungah
thuman azel azek dingin hong zang hinapi, ihmuh khuavak pen phelkhat bek nahia, abukim khua
vak na hilo hi. Abukim theih nadingin aman ah kigawm thei in, amanlo ah kamkum thei zenleng
Topa’n bangzahta in hong zang zaw lai ding hiam?