The Gospel Echo

GraceLinks Series # 001:

Adam le Eve ading Savun Puan

(Coats of Skin for Adam and Eve) LST Bulphuh: Topa Pasian in mipa le a zi adingin savun puan bawl a, amaute silhsak hi (Genesis 3:21). Van-gam Keek Nang Leitung Piangsak 1. Pasian kammal in vaangnei a, thu a piak bangbang vantung nate le leitung nate piang lian lian hi (Psalms 33:6,9). 2. Pasian in leitung innkuan a piansak pen van innkuan behlap ahi hi (Eph 3:15). 3. Pasian in leitung-planet earth le Amah melsuun mi apiansak lai in zingsang aksite lasa khawm uh a, Pasian tapate lungdamin kiko uh hi, (Job 38:7). 4. Adam pen Pasian tapa hi a, hih leitung-planet kibawl lai in planet dangah teeng Adam bang Pasian tate in zingsang aksi vanmite tawh Pasian pahtawi khawm hi ci in ka um hi (Luke 3:38) : Note: Vanmi = Vantungmi 5. Satan a suak Lucifer pen Pasian tapa hi lo hi. Pasian mai van ah Pasian tate kikhopna ah Satan va pai hi (Job 1:6). 6. Tua mah bangin, Topa Jesus pian lai in Bethlehem tuucingte ngiahphual ah vanmite in Pasian phatna lasa uh hi (Luke 2). 7. Moses in San Tuipi ah gualzawhna la a sak bangin, hih leitung pan gualzo in van ii tun ciangin limlang tuipi geiah Pasian tapa/tanute in vanmite tawh kham tumgingte tum in, Moses le Tuuno la ii sa khawm ta ding hi. Tua ni hong tung meng meng ta hen! Topa Jesus aw hong pai ta in! ((Exodus 15:1-21; Revelation 7:9-12; 22:20). 8. Tua mah bangin, van ah kum-1000 maan khit lei kibawl thak ni ciangin, vanmite tawh Pasian ii phat khawm lai ding hi. Tua ni hong tung mengmeng ta hen! Hong tun ding kal ngakla lua zo ve hing! (3BC 598).

Vantung Neuzaw - Miniature of Heaven 1. Eden pen nopsakna - pleasure/delight hi a, Adam suanh le khakte ading inn ahi hi. LST thak sungah paradise a kici kammal tawh kibang hi. 2. Pasian in Adam le Eve huan a zemding leh a kem dingin to dress and to keep vaipuak-tavuan ap a, Eden Huan pen cimtaak huai het lo hi (Gen 2:15). 3. Pasian in amaute thupha pia a, ci pha in tampi pha un la, leitung dimin zo un uk ta un, ci in thupia a, mihing a dim tawh kizui in leitungbup pen Paradise ahi Eden Huan nuam bang sak ding TOPA deihna ahi hi (Gen 1:28). Adam le Eve Kumpipa le Kumpinu 1. Pasian in Adam le Eve kumpipa le kumpinu dingin, uknaza pia hi (Gen1: 26, 28). 2. Eden Huan pen vantung neuzaw, van maleep hi a, Adam le Eve in bangmah kisapna nei lo hi. 3. A-ki-khaam singgah a nek lai in gilkial hi vet lo hi. Lucifer Satan Nungzui in Adam le Eve Puuk 1. Tua singgah na nek ciangun na mitte uh kihong ding a, a pha le a sia thei in Pasian tawh na kibat ding lamtak uh Pasian in thei hi, Tua hangin Pasian in hong haza hi cih gul khemna um in Eve puuk masa a, Adam zong Eve nungzui in puuk hi (Gen 3:5 cf. v.6). 2. Lucifer in Pasian tawh a kibat nop man in Pasian dem a, van pan hawlkhiat thuak ahi hi (Isaiah 14:12-14). 3. Pasian in a universe khankhan a, hih leitung-planet earth a ki piansak lai in trinity thumgawm Pasian te kikupna ah Lucifer a kihel nop hangin amah zong piansak-created hi a, Piangsakpa Creator hi lo ahih ciangin, tua kikupna ah kihel thei lo ahih manin, Pasian Tapa ih Topa Jesus dinhmun eng hi (Gen 1:26). 4. Lucifer in vanmi thum-khen, khen-khat khem zo a, lightbearer khuavakpuakpa Lucifer takpi adversary langdopa Satan suak in who is like God -Pasian tawh kibang Pa ahi Michael takpi gal in na do ta zen hi (Rev12:4,7). Michael Kua Hiam? 1. Michael pen NT sungah mun nih bek ah kimu thei a, Hebrews pau in Mikael who is like God Pasian tawh kibang pa ahi hi (Jude 9 cf. Rev12:7).

2. Pasian tawh kibang archangel ahih kei leh Michael pen ii Topa Jesus lo midang tungah kibulh thei lo ding hi (Daniel 10:13). 3. Tedim LST in Vanmite a ukpa Michael ci a, Mang LST in Michael, the archangel ci hi (Jude 9). 4. Ii Topa Jesus hong kum kik nading thu Sawltak Paul in, Topa mah in kikona tawh, vantungmi mangpa kikona tawh, Pasian peengkul tumna tawh vantung pan hong kumsukin ci in gen hi (1Thessalonians 4:16). 5. Vanmi mangpa-archangel pen NT ah mun nih bek ah om a, Hong kum kik ni ciang Michael-Topa Jesus aw mah mah ii za ding hi (1Thess 4:16; Jude 9). 6. Lucifer in Michael a lel ciangin lei ah khiatsuk thuak a, Satan suak hi (Rev12:8,9 cf. Jude 9). 7. Israelte Canaan gam zuan in a pai laitak un a makai Angel Vanmi pen Michael Topa Jesus ahi hi (Exodus 23:20,23; 32:34). Adam le Eve in Tanglai Gulpi Satan Pawm 1. Eden huan ah gul lim in Satan hong pai a, Eve na khem ahih ciangin, Satan pen tanglai gulpi ci in min kivawh a, akhial vantungmite tawh lei ah khiat thuak in dawi gilote a suak hi (Rev 12:7- 9). 2. Singgah neek ziau lel banghang hih zah in mawhna lian hiam ii ci kha ding hi. Eve le Adam puukna pen thaneemna mawk mawk hi lo hi. Lucifer in Pasian tawh kibang nuam in Pasian demna hangin Satan a suak bangmah in, Eve zong Pasian bang nuam in singgah ne ahih manin, Pasian langdopa Lucifer-Satan suul zui in Pasian dem, Pasian langdote a suak uh hi (Gen 3:5). 3. Adam le Eve in Pasian thugensa a up ding kimlai, Satan thu taksang zaw a, Pasian a pom ding kimlai, langdopa Satan pom zaw ahih man hi. 4. Adam le Eve in vantungah gallelpa Satan kimlai leitungah galzopa suak sak in, kumpipa kumpinu ahih na za Satan ap uh a, leitung ukpa-prince of the world dinh-mun na ap uh hi (Gen 1:26,28; John 12:31;Matt 4:8,9). 5. Adam suante pen PT tate kimlai, dawimangpa tate Satan silate ii suak tazen hi (Luke 3:38; Matt 5:9 cf. John 8:44; Rom 6:16). 6. Hih leitung - planet earth zong Pasian universe sungah Pasian langdo a mang gam the lost planet khat hong suak ta hi (Luke 19:10). 7. Tuu zakhat lak ah khat mang thugentehna pen universe sungah planet tampi lak ah hih leitung-planet earth mang hong thei sak hi (Luke 15:cf. John 3:16).

Adam le Eve in Khuavak Puan Taan 1. Adam le Eve te nupa guaktang in om hi lo a, vanmite bangin khuavak puan robe of light silh in etlawm mah mah, vangnei mah mah uh hi. 2. Tua bang a etlawm kimlai, mawhna in a mit uh a hon sak ciangin Pasian piak khuavak puan na ki-la-khia zo ahih manin, a zumhuai guaktang in a om lam amau le amau hong kimu uh hi. Tuaciangin, theiteh khiltuah in silh uh hi (Genesis 3:7). 3. Amaute hahkat tawm na ahi theiteh pen tawmvei sung in vul a, maizumna a seel zo kei hi. Tuamah bangin mite hanciamna, gamtat hoih pen Pasian mai ah kicinna mal khat zong nei lo in, kih-huai puansia bang bek ahi hi (Isaiah 64:6). Theiteh Khiltuah-puan Taangin Savun-puan 1. Theiteh-khiltuah-puan taangin, savun-puan silh ding Pasian in sawl hi. Savun puan ngah na ding tuuno a si kul hi. Hi tuuno in bang mawna nei hiam? Pasian in a cih ciang, Bangmah mawhna nei kei, ci-in Adam le Eve in aw tau kuapkuap in kah-aw tawh a dawn kik uh ka bilkha in a za hi. Go/that/si cih bang a thei ngei nai lo, singteh pul bek nangawn a muh uh ciang, ei mawhna hang hi ci in tasen, tamom sihsuah bang phetin a kap Adam le Eve nupa in kap kawm in tuuno ngawng na at ding uh hi. Khuasakte khat in, Ka pa luang phaam a, pa ngawng takpi ka tanh vabawn nuam ba het ei! a cih bangin tuuno ngawng a tan lai bangzah in cizeet huai sa in nuammawh ding hiam? 2. Eden huan ah tuuno kigo pen, Pasian Tapa, kumpite Kumpi, topate Topa dinhmun pan mi dinhmun hong la in, a zumhuai pen sihna tawh singlamteh tungah hong sihna ding lim ahi hi. En un, leitung mawhna a puakhia Pasian Tuuno!, Baptaiz Johan cih bangin Si kibua loin mawhna maisakna a om kei hi, (John 1:29; Hebrews 9:22). 3. Adam le Eve na mawh kei tapeuh leh, mi le ganhing si kul lo a, tun ahih leh, ganhing le mihing ta a min piang a si ban ah, nih-vei sina pan suatak nang Pasian Tapa hong si kul lai lai ding ahihlam a thei Adam in khitui luang kawm le khutliing sa in tuuno ngawng na at ding hi (Gen 3:15). 4. Savun puan in maizum a seel thei nang tuuno a si mah bangin, Pasian Tuuno sisan kibua a, zumna tawh ii kipelh nang ei tangin Aman zumna thuak hi (Heb 12:2). 5. Bang in ka mawh sawp siang thei, Bang dang hi lo Jesuh si hi. Bang in hong dam sak kik thei, Bang dang hi lo Jesuh si hi. Manpha hi hong luang si, Vuk bang hong ngo sak si., Tuidang ka thei kei hi, Bangdang hi lo Jesuh si hi. 6. A mun pen Mualbeem, 1969 kum May kha 22 ni, zingsang nai 9, thu-um masa

hon khat tui kiphumna ah hih la ka sa uh a, ih sak zel la hi na pin Khasiangtho in hong tuam a, lung nehno na tawh khitui luang san ka sa uh hi. Tuuno Sisan Sungah Kisawpsiang Puantual Paak 1. Adam le Eve savun puan a silh sak Pa in LST tangkalh-nget lo khiltuah tawm theiteh puan ahi gamtat hoihna tangin, Calvary Tuuno sisan sungah a ki silsiang apaak puantual hong silh sak nuam hi. Ii sang tek kei diam (Revelation 7:14)? 2. Topa Jesus in, Na zunek na khel khit ciang hong pai in Na za-tep na nusiat khit ciang hong pai in hong ci lo hi. Van gik pua a, a gim mi khempeuhte aw, ka kiangah hong pai ta un, tawldamna ka hong pia ding hi, hong ci zaw hi (Matthew 11:28). 3. Amah kiang zuan phot phot peuh leng, Amah in a kisam bang bang hong sui, hong puah in, hong zem ding hi. Tua hi leh, tawldamna-mawhmaina kong pia ding hi, ci in Topan hongsam hi. 4. Mawhmaina siangthona pen ei hawihna hi lo hi. Ei hawihna pen bem-0zero ahi hi. Topa hong piak dikna pen full mark - a zabit-100 percent ahi hi. Topa Piak Dikna Puan Anialte 1. Kumpipa tapa mopina pawi ah a hawhte silh ding molakna puan kihawm hi. Ahihhang, a hawhte uliante khat in sang nuam lo in, amah pwe-nay pwe-htaing nai puan tawh hong lut hi. Kumpipa a hawhte en ding a lut ciang in, Zawl aw, molakna puan silh loin, bang ding hong lut na hi hiam, A khut le a khe hen un la, pualam khuamialna ah paai un, a ci hi. Kahna le hagawina a om ding hi. A kisam mite a tam hangin, a kiteel mite a tawm ding hi Matthew 22:1-14). 2. Van Tuuno Mopawi a siim ding peuh mah dikna puantual silh loin kisang lo ding hi. Tua puan pen vantung siambu ah kigan a, mihing tate hoihna khauzang khat zong kihel lo hi. Bangzah ta a hawih pen gamtatna hi taleh, Topa a kihel kei leh, theiteh khiltuah tawm puan ahi lel hi. Mephibosheth Khebai, David Annek Sabuai in Sel 1. David pen Saul tapa Jonathan in ama pumpi zahin it a, kumpi kizepna puantualpi suah in David silh sak hi. A galhiam - namsau, thal le kawngngak zong pia hi. (1 Sam 18:1-4). 2. Apa Saul lungsim nei lo Jesus lim neih Jonathan in David tawh kiciam zel a, nang Israel kumpi na hi dinga, keimah in nangma zom ka hi ding hi, ci hi. Ahihhang, Jonathan si a, David kumpi suak hi (1Sam 23:17). 3. David kumpipa in Jonathan hangin, Saul kumpi innkuan migitna lak nuam in a zonh sak ciang, Jonathan tapa Mephibosheth kimu hi. Ahihhang, Mephibosheth a khete bai hi (2Samuel 9:3).

4. Hih taleh, kumpi annek sabuai ah David kumpipa tawh a tut khop ciang, Mephibosheth khebaina - apoihna, ahemhna a kimu kei hi. Banghang hiam ci leh, sabuai in sel hi. Ahih hangin, tua hemhna a sel pen sabuai ahi kei zaw a, Jonathan thusiamna ahi zaw hi. Jonathan hangin Kumpi David in Mephibosheth migitna a lak man bek in, kumpipa tawh ankuang umkhopna ngah ahi hi. Tua mah bangin, Jesus dikna hang bek in Pasian mai, Tuuno Mopawi ah ii kihel thei ding hi. 5. David in a zawlpa Jonathan hang in Saul innkuan mawhna maisakin, migitna lak hi. David in Jonathan a it man in Saul mawhna ciamteh lo hi (1 Cor 13:5; 1 Pet 4:8 & Prov 10:12). Jesus Liamma Eite damna 1. Nang dei bang Topa, Nang dei bang bang; Nangmah beel- sek-pa, kei tungman bang; Nangma deih bangin, Kei hong bawl in, ci-in ii kam bek tawh lasa hi lo, lungsim takpi tawh ii ki-ap leh, Topa in a thak in hong bawl pha dinga, Amah liamma hangin damna nin ban na, sa tonna om loin mel kilawmna ii neih ding a, sabuai sel ii kul nawn kei ding hi. Hallelujah! (Isa 64:8; 53:5; Eph 5:27). 2. Topa Jesus in sanggam hong cih ding a maizum kei a, ei hauhna ding Aman zawngkhalna thuak, ei dam nading Amah liam,hi. Ii thanemna ah Ama thahatna, ii tel thei lo na ah Amah ciimna, ii zawngkhalna ah a kang thei lo Amah hauna, ii kilawm lo na ah Amah dikna tawh hong khel nuam hi (Hebrews 2:11; 2 Corinthians (1 Corinthians 8:9). 3. Ka hi bangin paulap nei loh, Kei ading na si luang sim loh; Nong sap sim lo thudang omlo, Pasian Tuuno. Kong zuan, kong zuan, ii ci diam? 4. Ta taimangpa a ciah ding a pan a ngak gige bangin, van ii Pa in ii ciah kik ding kal hong ngakla hi. Ta taimangpa a pa in a galmuh phet in ulian pipi cin miko ding khual lo, maizum loin del pah a, pumkawi in a zumhuai puan niin puansia amah puantualpi tawh khuh ahih ciangin, a tapa zumhuaina a kimu nawn kei hi (Luke 15). 5. Van ii Pa in mawhnei eite puantual hong khuh nuam in Hong ngak gige hi. Theiteh khiltuah puan nusia in, Pasian hong piak puantual-paak sang tek ni! (Rev 19:7, 8, 13). 6. Adam masa hang a, ii taansa Paradise Eden pen Adam nihna - Jesus hang a ii ngah kik ding Eden-Paradise tawh genteh thei vet lo - New Jerusalem ahi ding hi. Eden kongpi ah cherubim-vanmiin meikuang namsau tawh cing taleh, New

Jerusalem khuapi kongvang ah vanmite in vai hong muak ding uh hi (Gen 1-3 cf. Rev 20-22). 7. Limlang tuipi ah puantual-paak silh, nisuh hiang tawi, kham lukhu khu, khamtumgingte tum in, Moses le Tuuno la ii sa ding a, ii taansa Eden sangin a hoih zaw Jerusalem khuathak ah TOPA ii phat ding hi. Nang le kei ii kihel takpi na diam? 8. TOPA in thupha hong pia ta hen! Amen.