Siyin Christian Community

Pathian a bulphu Minam. Ps.33:12

Lom.1, Hawm 1
SCC LAIHAWM Siyin Christian Community (SCC) laihawm taw kisai akua mapo in thupi kisa tek mama a, tha kinga theitek mama hi. 2010 hun sung thu tatuam hang in hong kihawm suak zongawl a, khat le khat kitel thiam tek tawng. Lampuite le mipite lungngulna om bang in tha (3) ciang khat vei NI KONG HONG lai hawm tu kithukim a, tutung a sia April, May, June 2011 atu hi tu hi. Topa in akuama theampo thupha hong pia tahen. Amen SCC lai hawm a hi bangma "Minam atu LTT thu, Tha ki piakna, Heak tu kilawm tatuam, ih omna mun tek pan thu piang pan kipan thu tatuam" ahikom khat le khat ki tel thiam mama kul tu hi. Hi laihawm taw kisai mailamsang ah bangbang hi leang ih nasepna cialcing thei tu ci akua mapo in vaipuak kinei ci phawk tek tawng. Ngaisutna phate ngawmtua in mainawt kalsuan tek tawng. BANGHANG IN PATHIAN IN MOSES SAM ZIAM? Pusauna 3:1-22 na sung ih et ciang, Pathian in a mite a suatak thei natu in Moses a sapna thu kimu thei hi. Israel mite Pathian thu a nit uh lai in Pathian in thupha pia a, A thu a nit nawnngawl uh ciang, daan pia in Egypt ngam ah kum '400' sung bang sal taang in ngual sila na om uh hi. I. Sapdan Tatuamte (Types of Calling): 01. Isaiah (Kamsangpa): Kamsang Isaiah sia Pathian in, khuangai a Biakinn sungah thungen a omna panin sam a, Pathian taw a kimu ciang a nuntakna kiphawk in, kei mikiihuaipa, Pathian sia Thiangtho, Thiangtho, Thiangtho hi ci-in pok a, a nuntak hunsung tawntung thianthona in keamcing (Control) hi. Pathian taw a kimu po ciangin, "Topa aw hiak om ing hong sawl tan," ci hi. Tuni nang le kei zong in Pathian sapna za a, Thu-um mi a suak ih hi manin ih nuntak ziate ei le ei ki-enkik tawng, Kamsang Isaiah taw bangbang ih hi ziam? 02. Ezekiel (Kamsangpa): Kamsang Ezekiel sia Babylon ngam ah sal taang in a na sepna luisung pan Pathian in, hui suangval vasak a, tua taw na sam hi (Ezek. 3:16-21). 03. Moses: Moses sia Pathian in sawlhing khat kaangsak (Burning bush) in tua taw na sam hi (Exo. 3:10). A nuntak hun nunung kum '40' teng sia tua sapna in keam a, lampui (Control) hi. A mite Pathian thu niingawl le a langdo ciang zong in Pathian mai ah ding a, kamite mawna maisak in, na maisak zo batu le keima min sia Vantung Laibu sung pan phiat in ci-in ama atu sangin a mite atu a bulphu zaw lampui pha mama khat ahi hi (Exo. 32:12, 32).

April, May, June 2011

II. Pathian in Moses a sapna ii ngiimna (The Purpose of his call by God): 01. A mipui Israel te tha a piatu: Israel mite in Pathian thu ninuam ngawl uh hi kale daan thuak in haksatna, zawnsaknate a thuak uh ciang kisik a, Pathian tungah kapin, tau in, au in hong kiko uh tak ciang Pathian in tua a mite ii kaana le huu ngen in a kikona uh awte a zak ciang om thong thei ngawl in, a suatak thei natu a lampui tu le, 'Na kaa, na tauna uh le na au nate Pathian in hongza a, hong hun tu hi,' ci-in a mite tha a pia tu in Moses a teal ahihi. 02. Pharaoh Kumpipa mai-ah Amite luangin maitang kisi in a dingtu (To stand vis-a-vis before King Pharaoh): Moses in a mite ii ngim thuakna te huvau a thin na in, Pahtian mai ah thungen bek hi ngawl in, Kumpi Pharaoh mai ah maitang kisi in a din tu zong laungawl in kita ngawl hi. "Ka mite pusuak sak in," (Let My People Go !) naci hi. Tu lai lampui khat hi leang ei zong Moses bangin Kumpite mai le Pathian mai ah ih ding ngam tu ziam? Tu laitak ih Zomite le ih Zongam ii dinmun lungngai leang, ih ngam le ih lei ah nuntakna haksat hu le ih ukna a phat ngawl hu in, ngual ngam ngual lei ah, ngam thumna zong in kipai tek hi. Tua thu taw kisai in mi pawlkhatte in, leilot thu taw a pai uh hi a, hamsiatna thuak tu hi, ci-in a ngaisun zong ki-om a, tabang hibo paitu a kul hizo hi a ci zong ki-om hi. Bangbangpo a hizong in, khat le khat ih muna le ih mudan kibang ngawl ahikom, a pai thei te pai in, inn sang pan in ma a pangtheite in ma pang a, ih omna papo panin hanciam a, Pathian it in, Pathian min le a ngam zainatu le ih ngam le ih minam atu in ma ih pantu ahi hi. 03. A Mite Sal Tanna Panin a Suatak tu: Pahtian in a mite ngual ii nenniamna le vawt siatna thuak a omna uh panin suatakna a nga natu ngiimna taw Moses a samna hihi. Lampui khat ii dinmun zong mite in leitung thu, tha thu ah nenniamna, le vawt siatna a thuakna pan a suatak tu in Pathian hong teal ahihi. Saltanna pan suakta in suatakna pan thupha a san thei natu sia lampuite ii vaipuak Pathian piak ahi hi. Moses in a mite ii suatak natu bangza ngim thuak a, bangza in haksatna le vawt siatna thuak cisia Lai thiangtho tungtawn in ih tel le ih heaksa ahihi. Tua ahiman mihing khat papo in a dinmun lui le a omna lui pan thupha a sang thei bale, thupha a santheina mun a zuat tu hi zaw hi. Tua atu in a buaisak thei le a nawngkai sak thei tatuamte sia lampuite in Moses bangin kumpite mai le Pathian mai ah dingin vaipuak la a, vaihawm saktu ahihi. Pahtian in Moses a sapna a thupi bel in, saltanna, vawtsiatna le zawnsakna pan a mite suatakna le thupha sanna khuinoai le khuaitui luanna mun ah lampui in paipui tu ahina thu hi bang kicing ba kale khat le khat tha kipia in, a kihanthawn nuam ih hi hi. Moses bang lampui pha ih ngam le minam sung panin Topa Pathian in tampi hong piangsak tahen. Amen. by: Rev.Langh Go Laang, SRBA, E&M Secy.

(toif;awmftwGif;uefUowf) Laimai ( 1 ) Ni kong hong

KIPAWLNA II MAN PHATNA Leitungah ngam tatuam, minam tatuam om a, eima omna mun le ngam taw kizui in Biakna, Kipawlna, Kizopna a tatuam om ci thu sia ih heak tek sa hi. Biakna taw kisai eima ii upna tungtawn Pawlpi tatuam in kikhen hi. Tua sung pan a dadawl in kipawlna mun tatuam ah Office kinei tek hi. Minam le ngam taw kisai zong a tung a ih son thu bang linlian ma hi. Tua hi a, SIZANG mite zong lampui masate ii ngaisut khol theina tungtawn a, SCC ci in min kivaw a, tu ni ciang dong ki doidanna om ngawl a, biakna tatuam kipawl in nasepna lianpi kinei hi. Ih paunak sungah " Sial vom le Sial vom kingai, Sial kaang le Sial Kaang kingai" a ci bang a kuamapo ih thubulphu bangin "Pathian a bulphu minam" kipawlna lam ah thalawp, tha nuam tak in kalsuan tek tawng. Nang le kei ii ngaisutnate ngawmtua in mailamsang kalsuan in nung tatek tawng. Primary laisin bu sungah ih heaksa bangma in " Pu huai khat in a tute sam a, Hi ciangkang thiaktan in ci a, olno tak thiaktan zo pai, Ciangkaang a lom in ngawmtua sak a, tuazawk ciang thiak sak a, thiaktan zo ngawl" hi thu bangma in ih minam bup kipawl in naseam khawm po leang matutna ngualzawna ih mu tu sia a kuamapo in phawk tawntung tawng. PA DIN MUN 19 June 2011 ni Pate ni kivawt tek hi. Siyin Baptist Church (Siyin Ywa) ah kum (70) val Pa (17) pha a, tua ni in ih khua ngaisutna tam mama hong om hi. Pate din mun son tu tam mama om ahi ta zong thulu (3) taw tha la khawm tek tawng. 1. Upna ih pa Ih pu Abraham sia Pathian in sam a, na pai ngeingawlna mun ah na pai tu a, thupha tampi tak kongpia tu ci in kamciam hi.(a) Suan le paal (b) Nei le lamh (c) Minam lian kong suak sak tu ci hi. Abraham sia Pathian ci bang thunii ahikom kipan takpi a, nopsakna mun le ngam ah a thet natu, a phul thak tam mama hi kale hong tangtung takpi hi. Pathian sapna bang muanna nei thei ahikom " Upna Pa" min le za nga hi. Nang le kei bangba minam le Pawlpi sungah " PA" hong kici tu na um ziam? 2. A puicing Pa Abraham in a tupa tungah ih ngannote Pathian in thupha hong pia a, pung mama ahikom ngantha natu mun le ngam ih ngancingte in kitu le dikngawlna om tu ahikom ih hawm tu hi ci hi. Na deina mun teal masa in a, na dei ngawlna mun le ngam sia kei atu ci tawng ci in a pu Abraham in a tupa kung ah son hi. Hi thu ih et ciang " A pui cing Pa" a hina ki langh hi. 3. Thu mang Pa Abraham kum (99) a phak zawk ciang Pathian in Isaac tapa khat pia ahikom lungdam mama hi. Ni khat Pathian in Abraham paupui a, na tapa taw hong bia tan ci in ngen hi. Abraham in kamkhat zong pau ngawl in a hiba tu ziam ci a, ni thum bang paina mual sang belna mun Morriah ah a tapa paipui hi. Biakna tau tungah a tapa biakpiakna pia tu in kipan sia Lai Thiangtho sungah ih mu sa hi. Ta sia hun laitak in biakpiak natu atapa luang in Pathian in Tuu khat pia hi. Hi thu ih et ciang Pathian in thu mang tatak ahina ciamtee hi. Nang le kei 'e' Pathian thu mang PA hong kici tu ziam?

A BABEL NGANHINGTE ~ A lian babel nganhing sia ih heaksa hi a, (WHALE) ngasa hi a, Metres 33 sau in, Ton 145 ngit ahikom leitungbup pi minthang mama hi. ~ A lian babel nganhing Africa ngam ah a om (SAI) hi a, Pi 25 bang sau, Pi 11 sang, Pound 14,000 ngit, kum 69 bang nungta ahikom leitungbup pi minthang mama hi. ~ A taihat babel nganhing sia PAWLBEAM Sahang nam khat hi. Nai khat in tai 70 bang tai zo zen ahikom leitungbup pi minthang mama hi. ~ A lian babel vacim im OSTRICH hi a, Metres 2.74 bang sang ahikom leitungbup pi minthang mama hi. ~ A no babel vacim in HUMMING bird nam khat hi a, Cuba ngam ah kimu thei bek ahikom leitungbup pi minthang mama hi. ~ A len ciang a manlang babel vacim nam khat in FALCON a kici SIMBU nam khat hi a, Sa vai in a delh hun ciang naikhat tai 180 manlang in leang thei ahikom leitungbup pi minthang mama hi. SCC ANNUAL MEETING VAWT THEI A (4) veina SCC Annual Meeting cum A(1) veina SCC Triennial Meeting sia 4 April 2011 nin Hiangziing Baptist Church ah nuamtak vawtthei a, anuai abang 2011-2014 OB kiteal kikna kinei thei hi. President Rev.P. Suangh Cin Pau Vice President Upa Khup Za Lian Vice President Rev. Dongh Cin Vice President Rev. Hang Khan Nang Ex. Secretary Rev.James Nang Khai Joint Secretary Rev. Tual Khan Nang Joint Secretary Pr. E Cingh Niang Treasurer Pa Mang Za Khai Asst. Treasurer Rev. Lian Cin Nang Accountant Rev. Kam Khen Pau Advisors : 1. Rev. Dr. Vungh Lian (YSBC) 2. Rev. Lian Khua Hau (Limkhai Zo) 3. Maj. Kam Cin Lian (YSBC) 4. Sya Ngo Nang (Hiangziing) 5. Pa En Za Pum (Australia) 6. Pa Kam Za Pau (Australia) 7. Pa Ngo Cin Thawng (USA) 8. SOM Chairman (Malaysia) Auditors: Pa Tuang Za Khai (LSBC) Pa Ngin Za Lian (Buanman) ZAPZANG MINAM PUAN VAI SCC - EC te vaipuak piakna om bang in Committee te hong hanciamna taw Sizang Zapzang Pa puan hong vawt a, pha kisa tek in leitung mun tatuam ah theng kakoai zo hi. Maisang ah zong a hanciam nuampo in Sizang Minam Zapzang Pa puan bang vawt a, hanciam thei tu ci thu kimna kinei hi. SCC in Sizang Zapzang Pa puan a pian natu in a hanciam anuai ateng tung ah lungdamna kiciamtee hi. 1. Nu Man Za Dim @Zomang nu 2. Nu Dim Man Cing @Thangpau nu 3. Nu Kai Za Dim @ Kappu nu Kawl ngam sungah minam tatuam ki om a, ei Khamtung Zo ngam zongah a tatuam in minam kikhen lai a, Pa atu le nu mei atu in a hunzui in design hong vawt tek a, khua hun zui in ei zong kikalsuan thei tu kipan zo ih hikom lungdam huai mama thu khat hi.

(toif;awmftwGif;uefUowf) Laimai ( 2 ) Ni kong hong

THUKLAI AG SECTION LAMPUI 2-4 February 2011 hun sung teng Ngalzang pan' Thuklai AG Section ah 2011-2013 zum naseam tu a nuai a bang in kiteal ahikom thungetna taw panpui tek tawng. Superitendent Rev.Tual Khan Nang Secretary Rev.Suak Khua Hau CA Pr. Do Khan Langh WM Pr. Dim Khat Vung MM Rev.Thawng Za Khai HM Rev.Thang Khan Pau Evangelist Sya Ngo Lam Cin HIANGZIING BAPTIST CHURCH 2-3 April 2011 hunsung teng Hiangziing Baptist Church ah Follow His Step I Pet 2:21 na bulphu in Silver Jubilee SCC Triennial Meeting a pai thei teng taw thanop huai tatak hun kizangh thei ci thu kiza hi. LIMKHAI BUNGH AG 14-17 April 2011 hun sung teng a(11) veina Thuklai AG Section CA khawmpi Limkhai Bungh ah thalawp huaitak kivawt thei ci thu kiza hi. VOKLAAK BAPTSIT CHURCH 27 April pan 1 May 2011 hun sung teng Men Fellowship CAMP ... Mi theampo ngupna nga a, thuman heak tu Pathian in dei ... I Tim.2:4 bulphu in Voklaak Tuiphum biakinn ah vawt thei ci thu kiza hi. A thupi bel sia innkuan sung, Pawlpi sungah PATE ahikom mailam sangah ih zop suak tu thupi mama tu ci thu kiza hi. Rev.E.Ngin Khai in Church and Administration Lophei Pastor & Rev.Thang Za Pum Men & Assurance Salvation SRBA-AGS te in lampui ci thu kiza hi. SIYIN BAPTIST CHURCH-CE CAMP 27-29 April 2011 hun sung teng CE Camp Rev. Nang Khan Mung, Sakhangyi & Sm. Dim Khawm Niang Leipui te lampui in patang (125) ka thei uh a, Rev.P.Suangh Cin Pau in mi (31) tuiphumna nei ci thu kiza hi. ZCLS PAN LAI AT THIAM KIDEMNA ZCLS pan kum sim lai at thiam kidemna nei uh a, 2010 atu in "Kiim le paam kep siam ni" ci thu lu hi a, ZCLS Trieenial hun sung anuai a bangin tel piakna nei uh ci thu kiza hi. First Tg. Tin Sawm Thang, ZBC Champhai Ks.50,000/Second Pa Zam Pome Howe, Tedim, CMBC Ks.30,000/Third Pr. Pau Suan Mung, Mualkoai, BC Ks.20,000/NKBA-CE TAW KISAI 3-6 May 2011 hun sung teng Pr.E.Cingh Niang NKVBA-CE Secretary lampui in Grace baptist Church, Liyingsuh ah Church School Sya/ma Trainning mi (68) ka thei ci thu kiza hi. Pr.E.Cingh Niang lampuina taw CE ii Computer Laptop khat upna kamciam Sya/ma teng tung pan le thu um mi pawl khat tung pan nga ci thu kiza hi. 11 May 2011 ni Siyin Baptist Church ah Pre School nei teng kimu khopna nei uh a, maisang kalsuan dan tu thu tam mama vaihawm thei ci thu kiza hi.

WF GOLDEN JUBILEE VAWTTHEI Voklaak Baptist Women Fellowship te 1961 kumn TBA - WF Secretary Pr.Cing Khua Vung le Rev. Ngiak Za Dim taw kop in Women Fellowship kiphot sia tu kum 30 April 2011 ni kum (50) hong cing hi. 6-8 May 2011 hun sung teng ..Na naseam nu hong mangil heak in... 1 Sam.1:11 bulphu in Golden Jubilee vawt ci thu kiza hi.Tua hun sungteng thusinna taw kithua a anuai a banghn hun kizangh hi. Rev.D. Cin Za Dal - Maisang kalsuan natu Rev.Thang Za Pum - LTT simdantu Rev.Langh Go Laang - Thunget dan Pr. Dim Hau Cing - Numeite taw kisai Jubilee Khansuang sia 8 May 2011 ni zingsang nai 10 hun in Rev.D. Cin Za Dal GS, SRBA, Rev. J. Nang Khai Church Pastor & Pr. Dim Hau Cing WF Secy, SRBA te in hong uh ci thu kiza hi. SCC-OB MEETING 13 May 2011 ni 2011-14 hun sung teng hong lampuitu OB thak teng Siyin Baptist Church, Siyin Ywa ah meeting nei thei uh a, Pr.E.Cingh Niang in muk le niangtui taw leangna do ci thu kiza hi. A (2) veina SCC Concert DVD sia tu laitak Pa En Lam Khup@ Khuppi in Mi nuamsa, Tahan vawt san a,July 2011 tha sung suasak tu in kihanciam ci thu kiza hi. THEIZANG CENTENARY CRUSADE 9-15 May 2011 hunsung teng ... Na dam nuam ziam? John 5:6 bulphu in Theizang Baptist Church Centenary lungdam ko Crusade vawt a, tuasung ah Rev. Nang Khan Mung (Sakhangyi) in Tintan piakna nei a, thanop huai mama bek domngawl a piangthak mizongh kibelap cithu kiza hi. THUKLAI AG CAMP 25-29 May 2011 hunsung teng Thuklai AG Pawlpi ah Rev. Vungh Kap (Tuilangh) lampui nataw Camp vawt a, Tintan ka mi (40) val bangh pha a, thanop huai mama cithu kiza hi. SRDP MEETING Limkhai Bungh le Voklaak Motor lampi taw kisai 25 May 2011 ni Pa Awn Khua Kam, Limkhai Bungh ah SRDP meeting vawt a, lam zong Thanlui zang dong en thei ci thu kiza hi. Sepna sa tungtawn ah ih hanciamnate lungdam huai mama a, maban teng thalawp tak seam khawm tek tu ci in vaihawmna nei ci thu kiza hi. PR.KENNETH SUAN ZA NANG AWARD 1-5 June 2011 hun sung teng Montego Bay, Jamaica ngam ah General Conference of the Seventh Day Adventists pan Communication Department te lampuina taw Conference a kivawtna sung ah Pr.Kenneth Suan Za Nang in " 2011 Adventist Net Awards" nga ahikom SCC pan in ki lungdam pui mama hi. Syapa sia abosa hun sungah Myanmar Union Mission of Seventhday Adventist lampuina taw Adventist Development and Relief Agency ADRA le Union Mission ah Communication Director a sep zawk ciang tu in Pension la in Yangon ah teang uh hi. GCCF MEETING PAI 4-9 June hun sung teng Thailand ngam Chaingmai ah Gobal Chin Christian Fellowship (GCCF) Central Committee meeting kivawt a, tua sungah Rev.D.Cin Za Dal, GS sia Regional Treasurer ahikom meeting sungah kihel thei ci thu kiza hi.

(toif;awmftwGif;uefUowf) Laimai ( 3 ) Ni kong hong

LIMCI TATAK IN NI THUPI KIVAWT May tha sung sia ni thupi a khom khatma om a, Khamtung Zongam bup ah khuavak mu cil Pu Pau Suan & Pu Thuam Hang ni sia thupi tak in hun kizangh thei cithu kiza hi. Kum sim in ngam a omte in May 4 ni sia SIALLUM ni ahikom thupi kisa tek a, ngam tatuam a om suapuite in liimci tatak vawt thei tek ci thu kiza hi. BASIC MUSIC TRAINING KIVAWT 23-29 May 2011 hunsung teng Khuasak Baptist Church ah ZBC Youth min taw Basic Music Training thanop huaitak kivawt thei cithu kiza a, Tintanka mi (56) pha cithu kiza hi. Pr. Benjamin Thawng Nei Lian, FBA (Keyboard & Vocal) le Rev. Tial Hre Ling, TABC (Compossing & Tonic Solfa ) ten Tintan piakna neipui thei . Khuasak pan Donation ahikom khatma kinga bek dom ngawl Australia pan zong panpuina kinga ci thu kiza hi. SCC LAI AT THIAM TEL PIAKNA Kum sim lai at thiam kidemna kinei tawntung a, 2010 kum Zangsi Lianu thulu taw kidemna pan 4 April 2011 ni Hiangziing Baptist Church Pan SCC lampuite in tel piakna kinei uh hi. 1stPrize Pr. Cing Khawm Dim Theizang (1) Syapi Sing Cin Thang Tedim (2) Bo Sing Za Nang YSBC (3) Pa Zam Pum Howe Tedim (4) Pa Ngin Khua Pau Thuklai A (3) VEINA SCC CONCERT ATU LA 2011 kum A (3) veina SCC Concert atu La Committee in ih muan mama mi pawl khat tungah hesuak ngen in la hong phuak sak ci thu kiza hi. Hi la a kiphuak teng sia June tha bo in ngawmtua tek tu thukimna bang vaipuak neite kungah pawl khat theng zo ci thu kiza hi. ECOLOGY SUNDAY Kum sim in a kivawt tawntung Ecology taw kisai 12 June 2011 ni hi a, thalawp tha nop huaitak in kivawt thei ahikom lungdam huai mama hi. 1.Ih tenna leitung/ ih omna mun le ngam sia eima na ih pua a, ih keam cing bale vantung mi hong pai in hong sep sak ngawl tu hi. 2. A hun zui in kiim le paam ih kep cin tu sia nang le kei tungah vaipuak kinei hi. (Khuakhal hun NGAM HAL NGAWL TU, Tuk hun sung THINGNO suan tu.....) 3. Ih omna mun papo ah (HAUSA, opfawm?Pawlpi tatuamte, Khangnote taw kop in 2011 kum THINGNO suan hun sung teng naseam khawm tek tawng. Siyin Green Group te in mun tatuam ah THINGNO MUN TATUAM AH SUAN CI THU KIZA HI. SCC ANNUAL, TRIENNIAL & EC NATU SCC Annual Meeting natu munte sia anuai a bang in kum sim kivawt tu hi. 2011 April - Hiangziing, A (1) vei na SCC Triennial 2012 April - Limkhai Zo, A (5) veina SCC Annual 2013 April - Voklaak, A (6) veina SCC Annual 2014 April - Thuklai, A (2) veina SCC Triennial SCC- EC natu mun teng: 2011 October Mualpi 2012 October Khaikam 2013 October Bekan 2014 October LSBC, Leipui

NUTRITION Nutrition a brand min sia Reliv ki ci hi. Nutrition ci ciang in pumpi cidamna tu akisam an cina hi a, hi zatui in na pumpi a tu akisam vitamin teng ama mun tek ah akisam bang in hong behlap sak ahikom natna lungnote hawl keak a damna kinga hi. Zunthum, Chithum, Ngu le taangna, TB, Cancer, le natna tatuamte dam sak bekdom ngawl in, Ih toi thaisak in mut nuam khanlaw nuam a, Ih ci ih sa hong nosuak sak hi. Hi zatui a ne theampo ama natna taw kizui in nipi khat, nipi (2) sung nuam tuam pai ahikom ki vaitha vazia hi. Kawlngam ah a brand a om ngawl lai hang in a kisam te in nuamtak a, a lei thei natu in ki vaihawm sak siat zo hi. Pa Thang Khen Pau (Tedim) Tedim ngam ah hizatui a ne masa bel pa hi. Hi za tui sai a zak ciang nuam tatak mu thei a, a cisan suak in hoi sa lei ahiman in zatui a leisak a tapa Dongmang (UK) tung ah lungdam ko tawntung hi. Nu Thawng Khan Cing W/o Sya A ZTwang (Tedim) Chikhang, Zunthum, Ngu le taangna, Kalsung suang om a, zato tatuam ah pai kakoai Yangon nangawn pai in damthiang thei ngawl, a cibawk, zan sim, zung thapai ahikom a ci le sa ko hi. Hi zatui a neak zawk nithum sung in a cibawk hong kiam in nuam tatak mu hithiat thei pai hi. Nipi (2) hong cin ciang lamdang kisa mama hi. Zatui phatna hong puak masa Dongbawi & Dimnu Phone: +44 208 694 6332, Mobile: + 44 782 830 7331 London, UK hi a, tu in Pastor Kai Khan Khual Phone: +95 94 308 1125 Yangon, Nu Hau Luan Cing Phone : +95 94 707 2878 Kalay & Nu Thawng Khan Cing Phone: +95 7050356 Tedim pan kinga thei hi. by Syama Niang Lam Vung@Lamno Magazine Committee Kum sim Magazine kisuaksak ahikom Article nong puak tek natu hesuak kong ngen uh hi. SCC Magazine puak natu mun sia (Rev.Vum Khat Pau E-Mail: <vumkhatpau@gmail.com> Editor - Rev. Vum Khat Pau Chairman - Rev. P. Suangh Cin Pau Secretary - Rev. James Nang Khai Treasurer - Pa Mang Za Khai Members - Maj. Kam Cin Lian - Pr. Cing Khawm Dim - Rev.Tual Khan Nang HESUAK NGETNA SCC laihawm NI KONG HONG pan in ih minam atu, Khantona, Ki thapiakna, Heak tu kilawm, Han thotna pan kipan Article, ih omna mun/ Ih Pawlpi a hibale biakna min taw ih kipawlna pan nasep vaihawmnate zong nong puaktek natu hesuak kong ngen uh hi. Hun sim in ih minam sungah thu kizak sakna zong hi pai ahikom Committee khat papo tungah thu nong puak hamtang tu ki thangai mama hi. Nikong hong Committee Rev. James Nang Khai Rev.P.Suangh Cin Pau Pa Mang Za Khai Pr. Esther Cingh Niang Pr. Hang Do Pau

(toif;awmftwGif;uefUowf) Laimai ( 4 ) Ni kong hong