KA HUNTAWN, KA NGHILH TAWH LOH TUR

( A True Story)

- Mr. Conductor

Chutia KTP Half Yearly Meet intihsiakna atana kan in buatsaih mup mup lai chuan kei pawh chu hla zir turin Biak In lam pan chuan ka chho hnak hnak a, kei a hminga a-hui zai tu han nih ve takah Ni Ropui Nia ka hak tur, ka kawr neih ve chhun pawr ve tawh tak tak te chu a eng ber nge ka hak ang aw tiin ka rilruin kan thlang kual dan dan hlawm a. Biak In kawt ka thlen chuan kan khaw nula, huai ve tawh tak, a tleirawl lai atanga ka lo iai loh ruk tawh hian, ka sum neih loh zia chu a hre ru ni tak maw, kumin chu kawr lei sak che ka rilru-ah a lang tlat mai a rawn ti hlawl mai chu sawitur ber pawh hre loin ka lawm lutuk chu ka haihchham ni ber hian ka in hria. Chutah le!!! nula dang an rawng lang leh, kei in Necktie ka lei sak ang che a rawn ti, chumai a la ni lo, nula dang leh in keiin kekawrte ka lei ang a rawn ti leh bawk. Kei thil thar nei khat ve tak, tui let hnu ata tawh Krismas leh Naupang Inkhawmpui baka thawmhnaw thar nei ve ngai ta lo chu, a va han hlu tehlul em!!! Chuta ka hlimna chuan man nei ni ta se khawvela pawisa hian a lei phak kherin ka ring bik love. HLA ZIR AIIN EI LEH IN LAMA HLAWKNA: Hla chu kan han zir a, kei chuan rilru hahdam leh hlim tak chuan kan hui zai pap pap a, a thalo lai te chu (Ka naute) mithiam zawk ten an rawn siam tha zel bawk nen, ka thil thar neih tur rilrua cham reng bawk nen, a va han hahdam thlak em. Hla zir chawlh lai chuan ina kan ei phak loh thil tui tak tak hlir Aigupta sabel chhunga mi ang hlial a tuihnai min han hlui leh nghal a, chumi zan chu ka tan chuan zan chhinchhiah tlak tak theihnghilh mai mai chi hi a ni mawlh lo. Hla zir kan ban hnu chuan kan hotunu pakhat chuan hei kan ei ban ho hi a la tam si a, i fate hawn rawh a rawn ti chu; chu zan chu a tifamkim chiang kher mai. Pakora disposable bowl-a an dah khah tan leh chawtani tui ka tih em em a hlang pawh a ka ei teuh ngei mai kha disposable no khat tlat mai hian min fun haw tir ta mai a. Hemi zan hian kan tingtang tum thiam-pa Hmingtea motor-ah ka chuang haw ve nghal a, ani pawh chu bang bik lo, kan momo ei ban chu pathum vel hi a lo fun haw ve bawk a. Chutia a motora kan chuang haw dun chu kan ngiahtuah a in ang chiang hle mai, eitur kan fun haw avanga in kan thlen huna kan nupui te lo hlim hmel tur chu kan ngaihtuah nauh nauh dun tih chu ka hre ru kar a, in biak pawh kan tum em em lo, kei chuan inthlahrung tak chung hian Bial Zaipawl an zai huna a tingtang perh dan tur te chu kan zawt lui hram a. Ani lah chuan a rul tawk lek hian min chhang duh chauh a. Ka vui chuang lo, rilru hlim tak chuan kan haw dun ta ral ral a. CHHUNGKUAIN KAN HLIM : In ka thlen chuan ka nupui fanau te chu an lo mu thap tawh a, chutah room lam ka pan phei a, kan nu chuan muhil chung hian kan naute duhawm tak chu hnute a lo pe mek bawk a, kei chuan ka zuk kheuh tho zeuh a, ka thil hawn chu kan hmuh zauh bawk a, hetiang thil hi ka vawikhat tihna a ni lo bawk a, kan nu chuan hrethiam tak chung hian nui deuh saihin min rawn melh a, rang mang kheng hian a naute hnute pek lai chu a pawt phawi sawk sawk a ka eitur hawn chu ko-ham hmel tak hian a rawn ban nghal a. Chutah ka fate chu an muhil emaw ti a thlamuang taka awmhmun kan siamrem laiin an rawn harh ve nghal bawk, kan eitur nen chuan sitting room lam kan pan phei ta diah diah a. Eitur chu kan ei mek laiin kei chuan intithei tak hian kan hlazir na a kan thil ei tui zia te chu ka sawi bawrh bawrh a, kan momo ei chu a chhungah sa ngat a awm mawle kan ti a, ka fanu upa ber chuan engmaw sa maw awm a rawn ti vat a, kei chuan chapo takin aw sa ngat a awm kan ti leh sak a, keini ang duh duh huna momo ei phak ve lo, ei ve chhun pawh a -1-

iskut momo bak ei phak lo tih takah, momo a chhunga sa ngat awm kan ei thu vel ka sawi lai chuan ka nupui fanau te chuan an ei ve chak tih hriat fahran hian ka thusawi lai chu min lo thlir reng a. Ka fate chuan ka Pakora hawn zinga a lian tha tha te chu an han in chuh leh nak nak bawk a, chu veleh kan nu chuan in ti thu fahran in inchuh suh u, in inchuh dawn chuan kei man ka ei zawk ang an ti vel te chu ka tan chuan ennawm ropui tak hi a va han ni tehlul em!! zan tina hmuhnawm ti taka ka Hindi film serial en ziah Karam Apna ai pawhin a let tam takin an hmuhnawm si a. GOOD MORNING : Zing a lo in her chhuak a, dan pangngai angin kan nu chuan min rawn kai tho leh a, a hma zana eitur tuihnai tak ka hawn avangin kan nu zing min rawn kaitho pawh chu tuk dang aiin a danglam kher mai tho tawh rawh, vawiinah in zir leh dawn em? enge in ei leh ang le? an ti zawm nghal zat a, kei chuan thawhchhuah pahin dar 11-ah kan zir dawn tiin ka chhang nghal vat a. Kan tho chiah chu ka tih dan pangngai bawkin kan naute chu kan paw nghal a, Chutah zing dang ang lo tak maiin kan nu chuan khawi naute kha ka lo la ang i tlai ange, chaw te ei la insiam vat vat rawh tih pah chuan ka naute puak lai chu min han chhuhsak nghal vat a. Chutah kei chu in phih faiin chaw te chu kan ei a, a hma zana ka chawtani hawn ngei, ka nupui fanau te ei ban chu ka hmeh sak bawk a, duh ai tam ei a awl khawp mai. THIL THLAWN PEK DANG : Hla zir tura ka chhuah hma chuan ka kekawr hmanthiam ka neih chhun ni bawk a rawng dum ngei mai nitina hnathawhna-a ka hak ziah leh Sunday apianga a tlukpui pawh awmlo (ka neih loh vang) a tha ka hak thin chu kan la chhuak leh te te a, ka han thlek vang vang a, duh ai chuan a chul tawhin rei pawh min dampui tawh hmel loh khawpin a hlui tawh tihte chu en mai pawh hian hai rual a ni lo. Kawr thar leh Necktie thar leh kekawrte thar nen chuan a in mil dawn lo tih chu kei designer pawh zirchhuak lo hian ka hre nghal mai a. Kekawr thar han nei leh sak ila chuan ka famkim leh zual dawn tih hrereng chung leh a thar han neih belh chu chak tak chungin Biak In lam chu ka pan leh ta hnak hnak mai a. Biak In ka thlen chhoh chuan kan khaw nula dang pakhat, fel leh nui mawi em em mai, a pian erawh duh aia pan deuh hret, hmana ka bialnu hlui ni tep tawh, mizingah phei chuan ka bialnu hlui ang hiala ka lo insawitheih tawhna hian kekawr thar min leisak a chak ve thu hi min rawn hrilh leh thut mai chu(h), Ka va han lawm teh reng em! Hmana min iai thin khan tuna ka solfa vai lai vel a hmuh hian min hnar bik tawh lo aniang han ti dawn ila pawm lai nei ka ni tawh si a. Min melh no eih lo tih lah chu a khawpumin an hre chiang ropui si. A enga pawh chu nise ka lawm tho tho e, thilthlawn pek min petu tur a ni miau a. ZAWLNEI DER : Hla chu kan han zir a, kan hotupa ber ni thin (tunah chuan min pension san tawh) Pu Mahindra-a kan tih mai, kan hlauh em em thin, kei phei chuan kan Chief Minister ai pawh a ka hlauh zawk chuan thusawi-na te a nei a, ka thil thar neih tur thu te chu a lo hre ve kiau chu ni in! zawlnei ni awm a mawiin Sunday zinga thil thar chikim nen inthuam si a, sa hmeh loa ka awm tur te chu min khawngaih thu sawi in, an inah Sunday zinga chaw ei ve mai tur chuan min han sawm nghal a. Ka rilru chuan ka ngei ru hle a, chaw vawikhat ei a ka zahawmna hralh mai ka tum lo. A hriat phakin ka chhang ngam si lo, keima hriat phak lekin kan hmeh awm em mai tiin ka han phun sap ringawt a. SUM LEH PAI KA TLACHHAM LO : Hla zir kan han ban chiah chuan, ka beisei ruk ang ngei-in kan hotunu (Thil min petu) bawk chuan kan thil ei tui lutuk mai, bawngsa leh paratha leh chhang cake kan ei ban chu i fate tan hawn sak rawh a rawn ti leh siah a, rang fahrana kan en chu(h) alo tam -2-

ropui leh nghal a, lawmawm thin tak chu ani. Pathian hian a mite hi min la theihnghilh lo tih lanchianna pakhat chu a ni. Chumai ala ni lo, hnung lama sa barh an tih ang hi a thleng , kan khaw nula ngei U-Lamz-i kan tih chuan rawmawl thar hlak tuma la hman loh, a lehkha khawng pawh la in bel thlap hi min rawn pe, ka tan chuan he thil mawlh hi a hlu, hman ata tawh nula thil pek hrim hrim la dawng ve ngai lo tan chuan hlu tak a ni. Chutah le, kekawr thar min lei sak chk tu nu ngei kha a rawn phei, cheng 500/- hi a rawn phawrh, hei contralto hoin kan thawhkhawm a nih hi, adaih a ngem? nangmahin lo in lei mai rawh tiin pawisa chu min rawn pe a, kei kekawr cheng 300/- man aia tam la ha ngai lo chuan tim na nei eih lovin daih teh reng mai ka lo ti vat a, ka rilru te te chuan cheng 300/- man ka lei anga cheng 200/- ka hlep ang ka ti rilru rauh rauh a, Kei economic lama rilru chak tak hian. BAZAR : Bazar lam pan chuan ka thianpa leh ka thiannu pakhat nen chuan kan han liam thla ta a, kekawr dawrah chuan kan han lut a, kekawr chi hrang hrang a man pawh inang lo nuaih hi an lo dah tlar tuarh a, ka iptea pawisa awm zat hre reng chungin kei chuan ka han thlang dan dan a, adum ka duh ka han ti a, ka duhber chu a man ka han zawt a cheng 450/ - hi a lo ni a, chu pawh dil tlawm hma hauhin. A dum kher ka duhna chhan chu ka hnathawhna-ah leh Biak Ina hak pawlh pawhin tuman an hre dawn chuang lo tih ka hriat ruk kar vang a ni. Mahse kan thiannu chuan i Necktie thar chu eng rawng nge a han ti a, a uk ti a kan chhan chuan kekawr uk hlir a en ta mai a. A uk ka lei chuan nitin ka ha leh awm sia, mi in ha ngun min tih ka hlau ve tho si. A uk dum nalh zet mai chu a rawn phawrha, kei chuan a man ka han zawt vat a, cheng 550/- man hi a lo ni a, mahse ka buai eih lo, cheng 500/- man chinah tawh chuan cheng 5/- emaw cheng 10/- lek lekin an in hniam ngai lo;cheng 100/- dawn dawnin an inhniam thin tih mi in an sawi chu ka lo hriat ve tawh avang chuan cheng 500/- in ka lei theih chu ka ring nghal a. Kei pate dulkiar tan chuan a kwnga ka tawk chiah chu a sei lamah chuan a fual tha kher mai, a kawnga ka lungawina kha a seilam feet 2 dawn paih a ngai zel bawk si. A hlehna bang chu hman tangkai dan ngaihtuah rilru leh nghal chungin ka han fit that tir a. A neitupa chuan cheng 480/- in min pe ta hlauh mai a, ka lawm kher mai. Cheng 20/- la bang chuan mi faten an hak thin, kei chuan ka hak ve ngai loh, pawisa nei deuhte tana siam, thil tul em em ni loa ka ngaih tawnzau an tih ang chu kan lei leh nghal a, thil thar khai chung chuan hmanhmawh leh hlim tak chung hian kan in lam chu ka pan leh ta a ni. JOCKEY IN QUIZ A TIBUAI : Hemi zan hi Inrinni zan a ni a, Bible Quiz-a intihsiak tur kan ni a, kei leh kan tingtang tum thiam-pa nen chuan kawn lamah kan KTP pui dang te va fin ve tur chuan kan phei dun a. Kawn kan va thlen chiah chuan, kan khaw nula a hmeltha ka tih pawl tak, koh duat nan Bawngi (amah hi a bawng a ni chuang lem lo) kan tih mai chuan kekawrte thar min lei sak ngei chu min han pe nghal vat a, ka han en chuan ka phu nghal zawk a. A hria ten an sawi danin kekawrte man to chi Jockey an tih emaw ni, a lehkha khawng bawma la intuam thlap mai chu min han pe a, rilru hi a ruk hian a hlim veng veng mai. Kei kekawrte ah pawh T-ara bak ha ngai lo bazar kawng sir ami ngei, tuamna pawh nei ngai hlei lo ha thin khan, a man to chi ngat kan han ha tur ka ngaihtuah ringawt pawh chuan a hak a nuam dawn hian ka ring nghal a. En pawh en tha ngam lo chuan ka bag-ah chuan ka thun nghal vat a. Biak in kan zuk thlen chuan khuangpu ah phur fahran hian ka tang nghal chat bawk a. Tichuan Inkhawm chu kan tan chho ta a. Bible Quiz pawh chu kan han inzawt tan nghal ta a. Mahse, ka rilru ah engdang a lang thei lo, ka kekawrte thar chu eng rawng nge ka la hre tlat lo. Biak In chhunga han en chi lah a ni bawk si lo, ka bag chu kan keu ru thin a, -3-

mahse a lang thei tlat lo, ala in tuam tha tlat. Chutia ka rilrua ka kekawrte thar chu eng rawng nge ni ang le, bekang rawng nge, chhawhchhi buhpawlh nge, nawinawk rawng ni ang le.... ti a ka ngaihtuah melh melh lai chuan...KAREIII!!!!! ka harh chhuak hlawl mai, Bible Quiz zawt tupa chuan ka Bible chang by-heart sa ngei mai, mit siai, khawngkhaw bai leh thaw miah lo pawha ka sawi chhuah theih chu a lo zawt mek chu niin...! Mark 5 pu lehnghal.. Ka piaha nula thu hnenah chuan tute nge a zawh ka va ti vat a, ani chuan keimahni a ti ta mai... Rilruah kekawrte thar hlir ka ngaihtuah avang chuan hun a kal liam hnem tawh nge, enge thil awmdan engmah ka hre tawh si lo, ka han ding chhuak hlawl mai a. Ka thin lah chu a phu dut dut tawh mai lehnghal, min rawn pump up up tawh bawk nen, ka by-heart sa leh ka kekawte thar rawng tur vel chu ka sawi pawlh ta nuaih mai hian ka hria. Min zawt tupa lah chuan han sawi tha leh teh a han tih phei chuan, maimichhing meuh chung hian ka han sawi tha leh a. Ka ni up up bawk si, buh deuh nuaih chuan kan sawi ta hram a. Ngai teh, a hma daih tawha thei leh thei lova ka lo by-heart sa erawh a dik thlap chuan ka sawi chhuak thei ta ngang lo a ni. Ka ui lutuk chu inkhawm chhung zawngin ka rilru chuan ka sawi dikloh lai chu ka sawi nawn awn awn ta ringawt a. Ka kekawrte thar rawng tur mawlh kha lo buaipui ta lo ila chuan tha takin ka sawi chhuah theih hi ka la ring tho tho mai (He thil ka ziah lai mek pawh hian ka ui na chu a la reh hlei thei lo). Inkhawm kan bang a, Biak In kan chhuak fel chiah tihah chuan kan khaw nula dang, kan khaw nula ah chuan fel pawl tak mai hian mawza (socks) thar hlak hi min rawn pe leh ringawt a, ka lawmna chu belhchhah in a va awm chiang em!! A hmaa thil thleng vanga ka rilru na leh ui lutuk chu a tih zaiawm phah hle a ni. Hemi zan hian ka muhil thei lawk lo a, zan lai dar 1:30 vel chuan ka thil thar neih zawng zawng chu ka nupui fanaute mutthilh hlan chuan ka la chhuak vek a, a nih tur ang takin ka han in bel chhin a. Ka nupui fanau ten min hmu ang tih hlau ru deuh si chunga darthlalang hmaa posi-te ka han la kual vel chhin chu nuam ve tak chu a ni. Tichuan a tuka thawmhnaw thar hlir inbel hun nghakhlel tak chung chuan mut zai ka rel fel ve thei ta hram a. ZAWLNEI DER HRILH LAWKNA A THLENG DIK : Zing khua a lo var a, kan nu chuan tuk dang ang bawkin min rawn kaitho leh a, thawh phan pawh nei lovin rang em em in khum ata chu ka zuang chhuak nghal vat a. Hemi zing kher kher hi chuan rilru dang put a har kher mai. Hmanhmawh takin ka in phih fai sawk sawk a, ka thil thar ho chu ka han inbel ta chu nuam tih tawngkam mal hian a hril seng bik lo ta ve ang. Hetih laia ka hlim na hi mihausa faten motor thar nalh tak tak an neih a, an hlim na aiin a nep chuang bik hauh lovang. Tukthuan chu chhung te aia ei hma a ngaih avangin chaw ei tur chuan dawhkan kan kil chiah chuh....Uiiii KAREIII!!!! ... Zawlnei ni hauh si lo Pu Mahindraan zawlnei ni awm fahrana a thu lo hril lawk chu a thleng dik ta tlat mai, eng sa mah kan hmeh lo........, Thawmhaw thar hlir ka inbel ve tawh si. Sunday zinga thawmhnaw thar chikim nena sa han hmeh loh chu rilru chu a khingbai duh ang reng khawp mai. Pu Mahindra-a chu zawlnei tak tak ni ta te hian ka ring rum rum a, ka ngaisang zual deuh sauh te hian ka inhria. Icon emaw Idol tih velah emaw han tel ila(h), Judge ten khawvel-ah tunge i ngaihsan ber tiin min han zawt ta se, Pu Mahindra-a han tih sak ka chak thinna te chu a rawn thar leh ta chuaih chuaih mai a, mahse chutiang ti tur chuan ka kum a over deuh tawh bawk si. A enga pawh chu nise engpawh hmeh ta teh reng ila hemi zing kher kher hi chuan engmah ka eitui tak tak chuang lovang, ka helhhawlh tlats. Hmanhmawh fe-a tukthuan ka ei zawh chuan phur fahran in Biak In lama hla ennawn tur chuan ka chhuak ta a. Hmalam hun hre lawk tumah an awm lohna khawvelah hian Ni Ropui hun hmang tur chuan rilru tawngtaina leh beiseina duham tak chunga ka chhuah hnu a, ka lei taksa lah tu hmuh atan pawha zahpuiawm loh khawpa thuam thar inbel chunga khaweng han tawn phei pap pap mai chu Confi tih tawngkam hi keima mila an phuah emaw tih tur hial a lo ni. (Chhunzawm leh tur Part II-ah....................)
Editor thu khawchang : Mr. Conductor hi hetianga a chunga Malsawm ruah a sur lai hian Mipa hoin engemaw tihsak an tum a, mahse malsawmna chhiar sen loh chu tu khaw chhiarsen rual zuk ni suh. Hun kal tawh an ngaihtuah -4let a, an zar a pak khu a lo chhak sen kumtluan ve mai mai a nih tih an hriatin, ngawih an chuh leh ta zawk a ni

E ditor : Pu Saka,Tv. Ma Zualtea. Proof Reader-te : Pu Mahindra-a te nupa,Nl. Seni, Nl. Masiami
Printed @ Kan In. Published By Pi Sangtei, 2011 Copies - 100....