BMA AW

An Official Organ of The Bangalore Mizo Association Registered Under Societies Act of Karnataka No. BLU-S188-2007-08 Date 7 May 2007
Vol. XVII Issue No. 16 Bangalore Mizo Association Pathianni Tin Chhuak Chanchinbu Date: 24th July 2011 Phek Khatna

TUALCHHUNG
&& Nl. Zaithanmawii, committee member chu Ningani (21st July) khan Mizoram lam panin a chhuak. Ani hi a han zin chho lawk dawn a, a tum dan chuan July ni 30 hian lo chhuk leh a tum. Tv. Samuel Lalrozama Hmar pawh Aizawl lam atanga a rawn chhuk hnu lawkin nimin piah mai khan Hyderabad lamah a zin chhuak leh.

BMA Football Tournament

Kum nga lai mai Bangalore Mizo ten HVLT Mawia Memorial Trophy; member inhmelhriat nan leh intihhlimna atana football inkhelh kan buatsaih thin chu kuminah pawh neih leh tura ruahman a ni. Kumin erawh chu kum dang aiin tlemin a kalphung leh ruahmanna te tihdanglam hret a ni bawk. He football tournament hi August ni 13 leh ni 15 (ni hnih chhung) ah khelh tura ruahman a ni a. Team te chu category hnihah then a ni anga, Category A ah chuan a thiam leh khel thang deuhte, Category B ah chuan a khel ngai lem lo te dah an ni ang. Tin a pawimawh em em chu, he football tournament a khel turte chu BMA a inziaklut ngei an ni tur a ni. August ni 10 ral hma ngeiin team inziahluh tur a ni a, player te passport photo thehluh ngei tur a ni bawk.

Article Descamisado p-2 Dawn Tisei p-3 Lirthei population p-3 FIMKHUR RAWH p-3 Fiamthlalang p-4 Pets Corner p-4
&& Nimin Inrinni khan BMCF Music & Sound Committee te buatsaihin Sound system lama mi thiam Tv. Francis Masawmkima ruaiin, technical training neih a ni. Kal an tam lo na a, an hlawkpui hle. && Helaia BMCF lama hruaitu pawh lo ni reng tawh thin Rev. R. Chhuanliana chu tunah Vellore ah in check-up in a awm mek a, a tha viau niin kan hria. BMA membership form a lak chhuah theih reng a. Inziaklut theuh turin kan ngen a che u. Form hi August 29 hma ngeiin thehluh tur.

Bangalore a Mizoram House hmun nghet tur en a ni

July ni 10 khan Mizoram House hmun nghet tur Karnataka sawrkarin Mizoram a pek tur chu en a ni. Karnataka sawrkar chuan hmun pahnih Mizoram sawrkar chu a kawhhmuh a. July ni 10 khan hmun pakhat chu kan President leh Vice President ten Kolkata Senior LO Pu Talo Rosanga hoin an va en nghe nghe a ni. He an va en hi Hebbal flyover leh Hennur Main road inkar lai tak velah a ni a, (a hnuaia a lema entir ang hian) Airport atangin kilometre 30 chuang hret a ni ang. Hennur main road atangin 2.3kms vel a hla, ring road pawn deuh chiaha awm a ni. Mizoram sawrkar hian a hmun tur hi an neih fel chuan hma chak taka lak an tum niin kan hria. Engpawhnise, Bangalore khawpuia Mizoram house awm hi a pawimawhin a tangkai tial tial dawn a, heti ang kawnga Mizote tana kan ram hruaituten hma an la thei hi a ropuiin a lawmawm tak zet a ni.

BMCF INKHAWM
7th August 2011, 3:00pm
Hruaitu: Pi Saibuangi Tantu: Tv. Emanuel Lawmkima Thawhlawm: Pu NSL Moses Special No.: Tv. PS Lalnunthara Thuhriltu: Rev. H. Lalthlamuana Changvawn: Jakoba 5:16 Mifel tawngtaina chuan thil nasa tak a ti thin

Vol. XVII Issue No. 16 Bangalore Mizo Association

Editor Mdawnga Hauhnr Joint Editors Dr. Lalhmingmuana Sailo MC Zirsangzela Contributor Amos Lalremtluanga Circulation Managers Lalnunfeli A.Hmingthanzuala BMA AW lak man: Thla khat Thla thum Thla ruk Thla sawmpahnih Rs.20 Rs.50 Rs.90 Rs.180

Pathianni Tin Chhuak Chanchinbu

Date: 24th July 2011 Phek Hnihna

Article

Descamisado
- Thara Tlau Orkut-ah chuan ka hming tawpah descamisado ka dah a. Thian thenkhatten a awmzia mi rawn zawt fo mai a. Thenkhat chu fumfe takin a historical significance nen lama hrilhfiah pahin ka chhang a, thenkhat erawh chu a awmzia chiangkuang vak lovin ka hrilh satliah mai a. Descamisado hi Spanish tawng thumal a ni a, Mizo tawng chuan kawr ha lo emaw kawr ruak (shirtless) tihna a ni mai a. Amaherawhchu, kawr ha lo han tih mai ai hian a thu awmzia hi a ril a. Argentina politics sawinghing khawpa thawm lo nei na tawh a ni nghe nghe a. Eva Peron, Argentina rama hmeichhe piang tawh azawnga lar ber, hmeltha em em, a ram mipuitena ngaina taka Evita tia an koh kha kan hre hlawm awm e. A hming hmasa chu Eva Duarte a ni a. Juan Domingo Peron-a nena an inneih atang khan Eva Peron tia a hming thlakin, nupui satliah mai ni lovin a pasal tan adviser tha ber leh rinawm ber a ni nghe nghe a. An inneih hnu kum reilote 1946 a Juan Peron-a Argentina President atana thlantlin a nihna pawh kha tamtakah chuan Evita-i vang a ni a. Eva Peron-i kan hriat awlsam zawk theihna tur pakhat chu kum 1996/97 a musical lar tak Evita tih Madonna-i channa atang khan a ni awm e. Kha musical kha Eva Peron-i chanchin behchhana siam a ni a. A la en ve lo emaw hre lo te pawn MTV a Madonna-in thiam taka Dont cry for me Argentina tih a sak kha chu kan hre theuhin a rinawm. Eva Peron-i pasal Juan Peron-a kha Argentina sorkara Labour Minister a nih laiin diklo taka man (arrest) niin tan inah khung a ni a. A chhan leh vang ber chu, a thiante Fraser leh Navarro tawngkam takin, President ni lo mah sela the most powerful man in the Argentine government a nih vang leh mi hnuaihnung ho zinga a tlak nat em avanga President a hliahkhuh mai dawna an hriat vang a ni. Chutia an man atanga ni ruknaah chuan mi nuai thum (3 lakhs) chuang zet chu Casa Rosada (Argentine Presidential Palace) kawtah an pung khawm a, Juan Peron-a chhuah tur chuan President chu an nawr a. Heta mipui pungkhawm te hian nisa hnuaiah chuan an kawr an phelh a, an lungawilohna an lantir a. Hei hi kawr ha lo descamisado lo intanna chu a ni. Chu an dilna chu President pawh chuan pawmpuiin zan dar 11.00 ah Juan Peron-a chu tan in atanga chhuah a ni a. Argentina rama kut hnathawk, mi hnuaihnung zawk te, a bik takin Juan Peron-a support tu te chu Descamisados tih an lo ni ta a ni. Kum 1945-a Juan Peron-a leh a nupui Eva Peron-i ten Presidential election campaign a Argentina ram dung leh vang an fanna rel (train) pawh kha a hmingah El Descamisado an sa nghe nghe a ni. (He article hi BMA Aw ah tihchhuah tawh a ni a, kan rawn chhuah nawn leh a ni e.)

E-mail: bmanews@gmail.com Website: www.bangaloremizo.info

I mobile-ah khan JOIN BloreMizo tih type la, 567678 ah thawn rawh. Bangalore Mizote tana Hriattirna leh thutharte ilo dawng thin dawn nia.

Editorial

Chanchin thar
Chanchin thar hriat hi a bengvarthlak in, a hre tam leh chhiar tam apiang mi rawntlak leh thil hria an ni chawk. Khawvel changkanna lo thang zelah chanchin thar kan hriat theihna hmanrua lah a tam telh telh bawk a. A thu mai nilovin, a lem nen ngei pawh kan hmu thei thuai zel ta mai chu a ni. Chanchin thar kan hriat duh zawng erawh a inang lo nuai thei lawi si. Ka thian pakhat chuan chanchinbu ka chhiar reng rengin, mitthi chanchin, chetsualna rapthlak emaw pawngsual emaw te chanchin vel hi ka chhiar hmasa deuh ziah a, a awm lem loh phei chuan chanchinbu hi ka chhiar lutuk teh vak lo a ti a. Khawvel changkanna zar zovin, thil thleng a chhia a tha kan in hre tawn zung zung a. Bangalore Mizo te hian chanchin thar kan thawh ve hi a lungchhiat thlak lam nge a lawmawm lam ni thin ang le? (Dr. Mahminga, Jt. Editor)

The great hope of Society is Individual Character

Vol. XVII Issue No. 16 Bangalore Mizo Association

Pathianni Tin Chhuak Chanchinbu

Date: 24th July 2011 Phek Thumna

Dawn tisei
Vawikhat chu tlangval pakhat hi tuipui kamah a leng a. Chutia a len vel naah chuan nula hmeltha leh duhawm zet mai hi a hmu fuh ta a. Chu nula thatna leh duhawmna chuan a zem a ta vek a. Mahni intheihnghilh thak khawpin a rukin a zui ta a. Darkar khat vel dawn lai a zui hnu chuan chu nula chu a ding a, a rawn lehhawi ta thut mai a. Tlangval pawh chu a ding chawt a, han relh bo mai na tur awm tawh hek lo le, inhmachhawnin an ding ta a. Chu nula chuan engvanga chutia zui zel chu nge anih a han zawt a. Tlangval chuan, chu nula anga hmeltha leh duhawm chu a piana hnulamah a la hmuh ngai loh thu te, a hmuh tirh atanga a hmangaih nghal bur mai thu te chu hrilhin inneih puiah a sawm ta ngawt mai a. Chu nula chuan, Ngawiteh tlangval, kei aia a let sawma hmeltha ka unaunun tha a tih em avang chein nichin atang tawh khan a zui zel che a, hnung lam I hawi loh avangin I hmuh hmaih mai mai anih kha, a ti a. Chu veleh chu tlangval chu beiseina nen a han hawi let a, a hnungah chuan nula satliah ve tak hi a lo ding a. Chutah, a hmaa nula ding hnenah chuan, Engahnge dawt min hrilh le? a han ti a. Chu nula chuan, Nang pawn dawt min hrilh ve tho a alawm a lo ti sam et a. Hmangaihna te hi zawng thawklehkhata piang mai thei a ni lo asin. - James CVL Thafamkima
-------------------------------------------------------------------

Bangalore Vehicle Population

Nikum 2010 December ni 31 thlenga Bangalore-a lirthei thenkhat awmzat dinhmun hetiang hi a ni. Two Wheeler - 2551441 Light Motor vehicle - 790692 Bangalore khawpui chhung ringawta two wheeler chu Mizoram mipui aiin an tam zawk a nih hi le. A chunga tarlan loh pawh hi lirthei chi hrang dang tam tak a awm bawk a, chungte nen vek chuan Bangalore ah hian lirthei 3693086 a awm a ni. Hetiang taka lirthei a tam lai hian a khalhtu te lam pawhin dan hi an zawm lo em em a. Kumin January atanga June thla chhung khan park na hmun tur nilo a park lirthei 299618 man a ni. ---------------------------------------------------------------

FIMKHUR RAWH Autorickshaw Hman Chungchang: Bangaloreah hian Autorickshaw chuan man hi khawpui dangte ngaihtuahin a to deuh bik a. Khawpui dangah pawha kan hriat thin angin driver te hi an tihmawh duh tlangpui a, Bangalore ah pawh hian a fel tak tak hi

awm ve nual mahse Autorickshaw driver sual tak tak hi an tam em em ani. Chuvangin fimkhur em em a tha. 1. Autorickshaw driver te hian kalkawng hria leh hre lo te, mikhual leh khual lo te, hausa leh retheite, fing leh finglo te an hre hrang duh ang reng khawp mai. Chuvangin, mi bum mai theih an tawn chuan bum an hreh lo em em a ni. 2. Autorickshaw i lak dawnin a meter hmang ngei a kal i tum dawn nia. A driver-in a duh loh chuan hnial buai lo a a dang lak mai a tha. An duh ang zat zat a i kal chuan hausa hle mah la chutiang bawk chuan i hnampui te chungah an beisei ang. 3. Autorickshaw driver nena in hnial buai hi a awl hle mai a, a dik zawkah pawh awm mah ila thiamloh chan a awl hle, chuvangin Autorickshaw i hman dawnin chiang takin be fel hmasa ang che. 4. Bag leh bungraw dangte kenga Autorickshaw a i chuanin, a hnungah bungrua dah loh a him. Theihnghilh a awl. 5. Chhunah pawh zanah pawh, nangmaha Autorickshaw a i kal a, kalkawngah midang an lo chuan dawn chuan phal suh ang che, an tangruala, mi suam an tum a ni duh thin. 6. Zan rei tawh taka (mipa tan pawh hmeichhe tan pawh) mahni a Autorickshaw lak hi fimkhur em em tur a ni. A driver mai pawh nilo, misual dangte pawhin a driver tenen lamin suam mai an ching. Veng kilkhawr taka kal tur i nih phei chuan fimkhur hle ang che. 7. Autorickshaw atanga i chhukin chuan man i pek hmain i bungrua leh thildang i ken te a kim leh kim loh i enfel hmasa thin dawn nia. 8. Bangalore-ah hian zan dar 9:00pm hnu lamah hian a tlangpuiin a chuan man pangngai bakah a chanve an tuk belh thin a, dar 11:00pm hnu lamah phei chuan a let in a tuk belh thin. Hei hi dan ang a ni lo mai thei a, mahse driver tam zawk hian an ti thin. 9. Autorickshaw a i chuanin (zanah pawh chhunah pawh), i chuanna Autorickshaw registration number leh DL number te (driver hnungah tarlan a ni thin a) chhinchhiahin i chhungte emaw i thiante emaw sms-in i thawn thin dawn nia. 10. Autorickshaw driver nena intihthiamloh palhah mahni a tihfel tum emaw hnial ve vak emaw loh tur, Police koh emaw Police hnenah kalpui emaw a tha ber. A thiam zawk ni mahla, an thiante an pungkhawm a a thiamlo zawk nih a awl. Kan nun hi fimkhur takin i hmang ang u.

Vol. XVII Issue No. 16 Bangalore Mizo Association

Pathianni Tin Chhuak Chanchinbu

Date: 24th July 2011 Phek Lina

FIAMTHLALANG
Kimtea Pa Pathianni zingah Russell Market-ah rawtuai thar lei tur a awm reng thei ang em? Mizote hi lehkhabu hawh bo ching hnam kan ni ang em? Thlaraumite temper hi a hot ve thin ang em? Tunlai hian discount sale a tam lutuk a, discount lohna dawra mi hi a tlawm (reasonable) zawk ang em? Buizova kha tunlai mi ni ta se plastic surgery a ti ang em? Phai ramah hian lungte kam loh lungpui hi amahin a awm thei tho ang em? Tawngtai rual neih hian nula tlangval thu dun te hi an tawngtai ring tho ang em? Vangpui kutah mitdawivaih kan thlir ho leh ang em? Zoram Thar A Awm Thei Ang Em? tih bu zuartuho hian an hralh thei ang em?
Dr. Mahminga Sailo

Second hnih dan zel ah, Ui in mihring seh in, darkar chanve tina Ui a hri vang a thihna thleng ang a nih chu!! Sawrkar leh tlawmgngai pawlin theihtawp chhuah in hma la thin mah se, tun ang mai mai a thil an kalpui chuan tual Ui hi an rem dawn lo a. Chuvangin, khawilo kan chhuah na ah kan fimkhur a ngai hle. Ui hmuh ngailoh chhaih emaw, an thin ti rim zawng a chet loh hram a tha. Chutih mek laiin chetsualna hrim hrim erawh a pumpelh vek theih loh thung. Ui in a seh che in, a rang thei ang berin tui leh sahbawn nen, a sehna hmuamhma silfai tur. Damdawi In pan a, Ui a Hri danna (Post-bite vaccination) lak ngei ngei tur. Tin, Doctor te thurawn ang ngei a injection lak kim a finthlak ber bawk. Ui a hri ngeiawmna ber chu; kum hnih kum thum hnu ah chauh te a langchhuak thei a, inringhlel leh awm nuam lo deuh a awm reng ai chuan, a invenna tha tak a lak mai hi a him ber fo. Thufingin,Tihdam aiin Inven a tha zawk a tih ang khan.
(Kan ranvulhte chanchin leh an enkawl dan chungchang a zawh theih a, kan rawn tarlang thin bawk ang. Zawhna te Dr. Mahminga +91 90083 40677 hnenah zawh theih ani) --------------------------------------------------------------------

Ui a hri (Rabbies)
Ui a hri (Rabbies) hi, ranvulh/ramsa atanga mihringa kaichhawn natna (zoonotic diseases) tlanglawn leh tihbaiawm ber a ni. Mihring a a thlen tam chhan ber chu; ranvulh zing a kan bula cheng tam ber; Ui in he natnahrik hi an thehdarh theih vang a ni. Ranvulh dang Sakawr, Bawng leh Ramsa: Chinghnia, Sihal, Zawng leh a dang ten an vei thei bawk. India ramah hian Ui maktaduai 25 (aia tam?) vel awmin; chung zinga, za a sawmhnih (20%) te hi pangngai tak a enkawl (pet animals) an ni a. A bak zawng (80%) erawh vulh tu nei ve si, enkawl that lem loh te; tual Ui hrim hrim ah pawh, awmna bik nei lo a vak kual mai mai nen a fawmkem vek awm e. India ram ah, tual Ui (stray/street dogs) an tam em em a. Heng tual Ui zawng zawng hian Ui a hri an pai vek tihna a nilo nangin, an pailo ang tih theih ngawt lah a ni hek lo! Kum tinin Indian mi, maktaduai 15 lai ui in seh in, chung zing a mi 25,000-30,000 chu Ui a hri vang nunna chan a ni.

Scooter Activa grey color, kum 2009 a lei, uluk taka enkawl tlan pawh a la tlan tlem khawp, la tha tak mai chu Rs.35000/- in tih ral duh a ni e.
Contact: +91 98869 26088

-----------------------------------------------------A nuihzatthlak miah loh!!

$$ BMA in football tournament a buatsaih ata club turu leh tha ber tur chu kar hmasa khan ropui takin din a ni. A enkawltu tur pawh mi turu tak tak an ni a, tun kumah hian champion ngei an tum. Club Profile: Hming SandRays, Moto - Born to Win $$ Awi tunlai chu ka biak theih meuh loh a nih ber hi motor khalh zir ngai nen, buai thei lutuk, fb lamah nuih vak vak a ngai bawk sia hehehehahahahahihihihihi - Angel Sailo