Since 18th Nov 2007 An official weekly newspaper for the Hyderabad Mizo Association Vol.11 Issue-21 Dt.

21stAug,11 (p-1)
TLAWMNGAIHNA Lalterema Chhakchhuak A hming ringawt pawh hian thu tam a hen a, sawi fiah a harsat tluk zetin nunpui pawh a harsa thin. Zonun ze mawi chi hrang hrangte parfung chawina kuhmum a ni a, hmangaihna leh lainatna aihnahpui, thatna leh ngilneihna sangawi zawnpui, felna leh rinawmna nena chhulkhat chhuak, huaisenna leh chhelna nena laikhat tla a ni ti ila kan sawi sual tampui awm lo ve. Mi chanhai leh riangvai te vaihna laka an hnungdawla chhawmdawltu, mi hausa leh neinungte hmahruaisaktu, phutlet nei miah lova vantlang mipuite kaihza vensaktu hi kei chuan TLAWMNGAIHNA bak a awm hian ka hre lo. A lo awm anih pawhin ka hriatna a zau tawk lovin hre tur hian ka beng a hlai tawk lo a ni tal ang. He TLAWMNGAIHNA nun neitute hi chuan an nunah thu an nei phal tawh lo va, midang tan an nun an hlan a, an thisen leh thlantui, an tha leh tui midang tan an luanraltir thin. An finna leh an theihna te chu mahni hmasial nan an hmang tawh lo va, mi dangte hmasialsak reng rengin a thim a var pawh thlu lovin an thawk thin. An nunah KEI tih hian hmun a chang pha lova, mi dangte hahchawlh nan an hah a, tuihalte dang hnawn nan an dang a rovin an dang a char a, tui taka mi an mut theih nan an meng a, mi dangte puar nan an tam thin. Chu chang a ni hleinem midangte nun nan an nunna hial an la hlan phal nia. He tlawmngaihna nunpuitute hi chuan an buk tawk rangkachak hi an hen tak meuh meuh hian ka hre thin. Sakei rum ri chu hlauhawm viau mahse nunau thlabar rum ri hriat ai chuan an bei thin. Hling leh hlang inkarah an ring an rawlh a, an thatlai hun zawng zawng midang tan hlanin thih leh dam an thial tak meuh meuh thin a ni ber e. Serhmun khaw pasaltha Zingkela leh Vungtawna-te thlafam chantirtu, Taitesena zingphula tir liamtu sakei kha hrangin a hun lai khan rum ring viau mah se an tlawmngaihna ri hi a ri ring zawk hial awm e! Thih an chak vang leh dam an thlakhlel tawh miah loh avanga nunna chan huama phek chhuak ni lo, a tulnain a namseh tawh zawk avanga thi ta te hi Zofate thinlunga dam rei ber ber chu an va ni si em! Buhtui tumphit khat lek a in pawh a,Ka va puar tak em! Randala sairawkherh ang pang mai ka ni ta Vanapa tih tirtu pawh kha a tlawmngaihna bak a ni hleinem! Chutiang bawk chuan an ramvahnaa riltam lutuka an awm lai pawha theipui hmin a hmuha thiante ko hmasa te tea pum khat pawh hmawm duh lova lo siamtu pawh kha a tlawmngaihna tho hi a ni. Ni e, mahni hmasialna leh tlawmngaihna hi chu a inchemhar tlat reng a ni. Sem sem dam dam, ei bil thi thi tih thu pawh hi tlawmngaihna atanga rawn in-irh chhuak leh tlawmngaihna chhul rawn keutu a nih ka ringhlel lo (phek hnunglamah a chhunzawmna) LAWRKHAWM **Dt.20 Aug(Inrinni), nimin khan Southern Afghanistan-ah Bus chetsual na avangin mi 35 thiin mi 27-in hliam an tuar. Driver fimkhur loh vanga chesual nia rin a ni.
th

**Zirtawpni khan Ghondi,Pakistan a Jamia Masjid-a Islam ho tawngtainaa bomb puakah mi 53 aia tlem lo thiin, mi 123 chuang inhliam an awm. He bomb puak hi suicide attack nia rin a ni. **Anna Hazare Lok Pal Bill pass ngiata chaw nghei mek chuan Aug 30th hmaa an pass hman loh chuan thihthlenga nawrh chhunzawmzel a tum. Vawiin hi ni nga chaw a ngheina chiah a ni ta. KAN CHHUNGKUA **Dt.20.Aug(Inrinni) khan kan memberpui ZD-a, Davida leh Aawmi-te chuan mizoram lam min pansan ta. **JNTU leh SPA zirlaite chuan nilaini khan Nl Malsawmtluangi-te inah Dika Memorial-a champion lawmna leh HMA sport Jersey tlangzarhna neiin, ruai nen hlim takin hun an hmang. **SPA-a architecture zirthar tur pawh tunkar khan mipa 2 lo thleng tawhin, midang pakhat lo la thleng lo a awm. ** Tunkar kal ta khan Pu Vana-te nupa pawh Mizoramah thil pawimawh tiin an chho. **Nunui Zote, Sun City ami chu a thyroid zai a ngaih dawn avangin tunkar chhoah hian Mizoram panin a ho chho dawna, tawngtainah I hre theuh ang u.

Published and Edited for and on behalf of Hyderabad Mizo Association by SPA Mizo

An official weekly newspaper for the Hyderabad Mizo Association Vol.11 Issue-21 Dt. 21stAugust, 11 (p-2)
( phek hmalam ami chhunzawmna)

EDITORIAL BOARD Editor : Lalmalsawmkima Sailo Jt.Editor: Francis L Khiangte News Editors :Lalhruaitluanga Ralte
David L Renthlei

(Email : puarak@gmail.com) Phone no : 7702898419 9032831996

EDITORIAL
Kan upaten Lungpui pawh lungtein a kamki loh chuan a awm thei an lo tih thin ang hian mitin mai hi mahni ringawt chuan kan nung zo lo a, midangte tanpuina hi kan mamawh tlat thin a ni. Chutiang bawkin,Vengte do ai chuan khaw sarih do pawh a tha zawk tihte kan lo hre tawh thina, hengte hi hre reng chunga kan nitin nun pawh hi kan hman atul a ni. Hyderabad-a Mizo awmte pawh hi kan inpuihtawna kan inlungrual tlat loh chuan khawdamg lakah kan hmai kan inti bal thei a ni. Thu bel chiang hmasa lova lo awih leh lo sawi chhawn ringawtte hi kan chin loh hram hram a pawimawh hle a ni. Kan hmalawkah Hyderabad-a Mizote kum 25 kan lo awmtlin tawh lawmna kan hmang dawn a ni a, he hun atan pawh hian kan hruaitute kan ring ringawt emaw lo sawisel vak vak mai lo a, kan theih tawk chinah kan finchhuah leh kan tanpui hi a tul hle a ni..

Kan pipute nuna thil hlu ber chhawmnun leh vawnnun atana duhawm tawp thang, an tuchhuante thlenga tangkaina leh hlutna la hloh eih lo, hunina a hlutna a tihkiam theiheih loh, tuiek leh sul rulin-a a eichhiat theih miah loh; mahse thlahthlam luat avanga kan hloh hlen theih ni bawk si chu TLAWMNGAIHNA hi a ni ti ta ila thu kan ngam lutuk em lovang chu maw! U Mafaa dan takah kuhva ka ei ngai loh avanga ka hnar hi tlawmngaihna a ni lova, ei chak reng chunga midangin an chang lovang tih hlauh avanga ka hnarna hi a ni tlawmngaihna chu a tih ang deuh khan kan phur zawng leh nuam tih zawng kan hlenchhuah hian kan tlawmngai ta em em tihna a ni chuang lo a ni. Chuvang chuan ka lo tlawmngaiin midang tan malsawmna nge ka nih anchhia tih hi I in zawt nawn leh thin ang u. He ka thil tih avang hian mi hian min ngaisang sawt ang nge min ngainep zawk ang tih te hi ngaihtuah thin ilang chuan tlawmngaihna nunpui turin kan nun kan inbuatsaih tanin kan inzir tan tihna a ni thei ang. Kan hmaichhana min fak dertu ten hnunglam atanga min nuih loh nan kan nunkhua hi kan chheu zawk tur a ni! Kan nuna tlawmngaihna-in hnahpui a chhuana duah taka a than theihna atan chuan kan taksa vaivuta siam hi a tawk em em a ni! kan thlantui hi tlawmngaihna tualto theih nana chawmtu a ni thei bawk a, parfung mawi taka a chawi theih nan chuan kan incheina mawi lam ai mah chuan kan nungchang mawi leh mawi lovah te a innghat zawk a ni. Zofaten zotawng kan hmang chhung hi chuan TLAWMNGAIHNA tih thumal pawh hi a awm rengin kan nunpui reng tur a ni dawn lawm ni? TLAWMNGAIHNA nunpuitu nun chu midang mithmuhah a tlawm thei tak tak ngai lovang.

FRESHERS DAY 2011.. Dt.15thAug(Thawhtanni) tlailam dar 3:30pm khan kumtina kan lo neih thin angin Freshers Day 2011 chu St. Goerges Church Hall-ah tluang taka hman a ni. Hetah hian hun hi session hnihah thenin, session khatna hi Tv.K Lalromawia(UoH) chuan kaihruaiin Nl. Lalchhanhimi chuan tanna hunserh a chang thung a ni. Pu Samuel Lalnghatliana, HMA V.President hnen atangin Presidential Speech tha tak kan ngaithlaa, Nl ZD Lalawmpuii pawhin mawi takin kalkhawmte hlaina awi a ni. A session hnihna hi Kan Master Of Ceremony zei tak Tv Francis L Khhiangte(SPA) leh Nl.C Lalrinsangi(EFLU)-te chuan kaihruaiin kaltharte inhmel hriattirna hun an hmanga, Mister Fresher atan Tv. Vanlalvenpuia (UoH) leh Miss Fresher atan Ruth Lalmuanzuali, Legend Academy for C.A zirlaite chu thlan an ni. HMA FRESHERS DAY-A SUM LUT LEH CHHUAK Income Khuangchera Bial(City)- Rs3200 Vanapa Bial(Secbad)- Rs 3400 Taitesena Bial(Kukatpali)- Rs3400 Chawngbawla Bial(UoH)- Rs5300 Freshers Day nia lut-Rs 9700 Total Income- Rs 25000 Expenditure Hall hmanman- Rs 3000 Ruai Rs 9707 Refreshment Rs 1786 Stage Decoration Rs 1200 Prog. Sheets/Hla copyRs 366 Cook & Tent houseRs 6235 Mineral water Rs 420 Surf Rs 95 Total Expnt. Rs 22809

Sairawkherh
Freshers Day-a kan MC mipa zawk kha zei bawn tops. Nui Khawlhring(EFLU) FRESHERS Day khan mi ka fawp tam lutuka, tunlai chu a nu lam hian rilru ala tlat. Puipuii (EFLU) Nimin chu nuam ngei mai.. samsei bula han tal nilen thak mai chu Bara Bena(JNTU)
V

PICTURE OF THE WEEK

Tun Freshers ho zingah khan ka nakruh bo ka hmuin ka hria HZ Siama

Published and Edited for and on behalf of Hyderabad Mizo Association by SPA Mizo