Fa enkawl hi chu a awlsam ania ti reng reng ka la tawng lo va. Ka tawn pawh ka ring hek lo.

Amaherawhchu nu leh pa tam tak chuan hei hi chhuanlam tha taka hmang an awm ve tlat mai. An fate tana tha tur ni a kan hriat han hrilh ve te hian, an fate diklohna leh anmahni thiamtawklohna thup nan Fa enkawl hi a lo harsa ani an ti daih zel. (Heta an sawi awmzia tak tak chu nang pawh fa nei ve la i thiam bik tak tak dawn chuang lo, min advise ve khanglang lo mai teh an tihna daih ani) A nuamin a harsalo teh ania tiin kan hrilh pawh ani si lova! Mi tin mai kan mizia a dang angin, naupang enkawl kan thiam dan chin kan duat duh dan chin te, kan discipline duh dan chin te, thil kan zirtir dan hmang te chu a dang theuh mai. Tin, nu leh pa hmun kara piang reng si hi mahni zia hranpa te te hi an rawn pianpui ve lehnghal a Thildang ah ka sawi thei lo, amaherawh chu hei hi chiang takin ka hria: Fanaute hi Lalpa laka kan rochan anni. Pathianin he ro hi ama duh dan anga enkawl turin min beisei tih hi. Tunlai Mizoramah misual leh mi diklo kan tam ni a kan hriat chuan a enkawltu nu leh pa ten an mawhphurhna an hlen zo lo tihna ani. Kohhrana mi fel tak tak te, khawtlanga mi chhuanvawr tak tak ten an fa te an chhuah zero ve leh tlat zela. Chu mai nilovin tunhma deuh te phei kha chuan Pastor/Kohhran Upa fa te hi a sual sual leh ruihtheih thil a inhnamhnawih anni ti ten miin an sawi thin anih kha. Hei hi chhan tha tak a awm niin ka hria. Nu leh pa tam tak hian mahni chauh fel an duh, an fate felloh an vei lutuk lo. An han vei meuh chuan a tlai fe tawh hnu a inhmuchhuak anni tlangpui. Chanchintha leh Pathian thu hi anmahni tan chauh an duh, an fate tan a takin an duh lem lo. He statement hi ka sawi huai viau inti mai thei a. A dik tlat si ani. Kan fate thutaka an awm hi kan hlauh ber anih chhung chuan sikul tha anih vang ngawt in kan kaihhruai phak lohna tur hmunah kan dah ngawt dawn lova. Mami, mama inkhawm ru, a tha ania tih mai ah kan duhtawk bawk lovang. Tin, a bik takin nute, Kohhran leh khawtlanga an inhman lutuk chuan tuin nge a fate zirtir a, enge anmahni room ah computer ah an tih pawh ngaihtuah/hre hman lo an nih chuan a dik tawh lo ani. Anmahni khawtlang hma a felleh tha tak anga lan kha an duhtawk a, khawhar ina kal tur an fa te tirh ai chuan anmahni in tih an duh a, hnatlan leh khawtlang/kohhran thiltihah an fate lang ve lo mahse pawi an ti lova. Mizo zia hre hauhlo mahse an pawiti vak lo. English an thiam kha pawimawh an ti zawk!!!

Nu leh pa tam takin an fate Lalpa thutak a an awm aiin rual an pawl loh te, thenawm fate aia an thiam theihloh te, hna tha an hmuh loh te, an changkanloh te an hlau zawk daih. Chu chu an fate tan hai chi rual ani lo. Naupang thang chhovin engmah an hai lo. Keini hian enge kan hlauh ber thin le? He laia kan awmna hmun a vai pastor retired tawh pakhat chuan tihian kan thianpa a lo hrilha, Dam nawmna pawh ka hre tawh lo, kan fanu neihchhun pasal nei tawh chuan US atangin nitin a thiante a rawn phone thei a, keini a nu leh pa te hian thla khat a vawi khat call pawh kan hlawh ngai si lo. Sum leh pai ka tlachham love, in lian tak kan nei a, a luah man ringawt pawh kan eiseng lo. Kan fanuin lehkha a thiam lovang tih hlauvin sikul tha tha ah kan kal tir a, engineering a zir chhuak a, hlawhtling takin pasal a nei a, min ngaihsak leh si lo Ka rilru in aw, a fanu chuan khawvel zirna tha ringawt a neih umin, thlarau zirna a lo thlahthlam tir anih chu mawle ka ti. Pathian malsawmna zarah a tul angin Kristian nu leh pa te fa chuan zirna te pawh a nei ve ang. Hei hi Pathian thu a chawm leh enkawl seilen aia kan dah pawimawh anih vaih erawh chuan, pawi kan la ti anga, Naupang chu a kalna awm kawng ah chuan zirtir la, alo upat hnu pawhin a thlah lovang tih thu hi dik lo se kan tih rum rum hun a la thleng mai ang.. Tunlaiah inelna a sang a, thiamna a sanga, mi zawng zawng an intlansiak a. Chumi boruak ah chuan keini hian fate enkawlna challenge kan hmachhawn mek zel a. Lei lam intlansiakna hi chuan chin lem a nei lo. Thlarau lam intlansiakna ah kan fate kan hruailut hmasa em? Tunlai thangtharte ah phei chuan, mahni pawh nu leh pa te chawm lai khan, an chawm belh tur nupui nei ve ngawt in fate an han nei a, an enkawl chhoh dan tur hi ka ngaihtuah a, tan lak a ngai hle in ka hria. Kan sawi tak ang khan a inti thiam ber pawhin fa enkawl hi ka thiam tawk an ti thei ngai dawn lova. Kan theihloh leh phakbak a awm ngei dawn. Chuvangin fa nei apiangin Lalpa hnenah hlanin a tanpuina dil ila, a duhzawng anga enkawl leh thutaka hruailut turin i inbuatsaih ang u.