KUMPUAN : KHAW TLA NG NUN SI AMT HAT

VOL. XXV

NO 35 INRINNI

DATED 24th September, 2011 MIMKUT THLA

11

Tunkar nilaini khan Rosangzuali d/o Rothuama, Kawn veng leh Vanlalrema, Vengthar te chu man hlanin an innei fel ta.

UNIQUE IDENTIFICATION ENROLLMENT KALPUI TAN A NI

Sihphir, the 24th September : Unique Identification Authority of India hmalakna hnuaiah India khue leh tui zawng zawngte identity chhinchhiahna danglam leh felfai tak neih theih vekna tur Unique Identification Aadhaar chu kalpui chhoh tan a ni ta. Mizoramah pawh Mizoram Postal Department hi Registrar a nih angin phase-I enrollment hi Aizawl Head Post Office, Treasury Square-ah a duh tan bul tan a ni ta. Phase-II atan District khawpui dangah te Enrollment Centre hawn thuai an tum. Aadhaar hi digit 12 number a niin, Mizotawng chuan tantu tihna a ni. Mimal identity chhinchhiahna tur a niin, chenna kimchang, taksa a midang laka a danglamna te, a thlalak te chu database hmunpuiah dahkhawm a ni ang a. Mi an chhinchhiahna zawng zawng te hi rang tak leh awlsam takin a en chhuah zung zung theih tawh ang. He chhinchhiahna number hmang hian mimal leh sorkar thil leh sumdawnna a thil diklo leh felfai lo zawnchhuahna kawngah te, misual man chhuahna kawngah te a tangkai tawh dawn a, awlsam takin a chhui zung zung theih tawh ang. Chutiang thil diklo tih tumte pawh a veng hle tawh turah ngaih a ni. He Aadhaar number hian miin a sakhaw vawn, a chenna hmun, a hnamah te thliar hranna a nei lovang. Aadhaar enrollment tih nan hian pawisa chawi a ngai lova. India ram hmun hrang hrang a enrollment centre khawiah pawh Identity leh address tihchianna kengin enrollment hi a tih theih. Chung atana Identity document pawm te chu :- Photo ID, Voter I.D, School/College Photo ID, Driving license, passport, Govt. Servant ID, PAN Card te an ni. Tin, address tihchianna atana pawm te chu :- House No. lanna document, passport, Tui bill, telephone bill leh elctrict bill thla 3 aia upa lo pekna, motor registration tihna, Post Office passbook, Address lanchianna VC lehkha te an ni. Heng document pakhat tal neih hian enrollment a tih theih. Tin, chhungkaw hotu berin document kimchang a nei a nih chuan chhungkaw member dangte tan hriatpuituah a tang thei bawk. Chhungkaw hotu berin document a lo la nei lo a nih cheu pawhin Enrollment centre a thawk te kha hriatpuituah an la tang thei zel a ni. Unique Identification Aadhaar hi mahni identity tihchian nan a kimchang em avangin khawi hmunah pawh document ken teuh teuh ngai thin kha a ngai tawh dawn lova. Bank account hawnna, Driving license dilna etc. ah a tangkai hle tawh dawn a ni. Mi harsa zawk te tan pawh awlsam takin sorkar leh thildang atanga hamthatna an hmuh ve tur teah rang takin hma an la ve zung zung thei tawh bawk ang. He Aadhaar hian Insurance leh Bank lam te pawh a huam vek dawn a. Mipuite hamthatna atana Sorkar hmalakna te dawng thei vek turin India khua leh tui te a pui thei bawk. VC ten mahni khua leh tui te tana enrollment tih a awlsam theih nan an duh chuan Mizoram Postal Department hotute hnenah a hriattir theih a. Zawhfiah duh tan pawh 0389-2328024/2328023 ah te biak pawh theih a ni.

11

Naktuk Pathianni hi UPC Kohhran din champha (Missionary Day) a ni a. Zoram a UPC kohran hrang hrang ten urhsun takin an hmang ang. UPC, Sihphir te pawhin thingpui ruai nen hun an hmang dawn. Karleh thawhtanni zan atanga ningani thleng awh turin Evan. Lalhmuakliana Hnamte Speaker a hmangin Crusade an tan ang.Tin, dt.30.9.2011 - 20.10.2011 chhung hian Sihphir UPC Biak Inah Sihphir Bial Mission Department khawmpui vawi 15-na an hmang bawk ang.

11

Tunkar thawhlehni atang a Neihbawi Presbyterian kohhranin Chhandamna Camping an buatsaihah Camper 45 lutin, vawiin zing hian an chhuak ang. He Camping-ah hian Pu Hmingthanpuia, Synod Revival team chu Speaker-ah hman a ni. Tin, Sihphir kohhran pawhin tunkar thawhtan zan atanga Crusade an buatsaih pawh, an remruatna ang chuan naktuk Pathian zan thleng a awh ang. Speaker-ah Tv Lalhriatkima, Prayer Team an hmang. Isua Krista Kohhran, Sihphir te pawhin Pu Malsawmdawngliana Speaker a hmangin tunkar thawhtan zan atang khan Crusade an nei a. Naktuk Pathianni zan thleng a awh ang.

11

Nimin zirtawpni chawhnu atang khan Govt. M/S - II, Neihbawi chuan Sikni Eng Kut a an chanvo tur a ruat Khuallam an zir tan ta.

11 11

Tunkar chhungin Retailer hrang hrangah Ration Buhfai sem a ni a, mipui an lawm hle. Infiam mite tana hman theih lohvin tunlai hian hnimin kan Playground a bawh khah vek avangin kan infiam miten Vengthar playground an pan tauh tauh thin a, rualawh pui an na duh hle. He playground hian ngaih saktu a mamawh tak zet ta niin a lang. September thla chhiatni thatni mawhphurtute:
Pu HV Lalhrangliana, Pu T.C Chhuanmawia, Tv Lalengkima,Tv Malsawmkima, Nl K Lalremtluangi

SIHPHIR BRANCH YMA Thlabi COMMITTEE KOHNA A hun : Dt. 30th Septtember, 2011, Zirtawpni zing dar 6:15 a.m A hmun : Tv JS Thara te In (Sawiremtlang bul) Executive Committee member ten kohna kan hmu lo palh a nih pawhin hei hi kohnaah ngaih tur a ni e.

HIV/AID LAKA I HIM THEIH NAN I NUN FIMKHUR RAWH

AW I R E M T L A N G

CH A N C H I N B U

Phek

Hnihna

EDITORIAL BOARD
Editor : Z Hnamte 9436390185 Jt. Editor : PC Lalrinliana 9612585927 News Editor : TC Lalchhuanmawia 9862362515 : Vansangliana 9612320146 Cir. Manager : R Lalsawmliana 9862531790
email : sawiremtlang@gmail.com blog : sawiremtlangccb.blogspot.com

SIHPHIR-AH HSLC EXAM CENTRE, 2012 ATANGIN A AWM VE DAWN TA

Mizoram Sorkar chuan Govt. High School, Sihphirah High School Leaving Certificate (HSLC) Exam Centre a rawn dah ve ta. He kan Exam Centre thar hian kum 2012 HSLC exam a hmachhawn nghal ang.Centre hmingputu tur Govt. High School, Sihphir hi Golden Jubilee meuh hmang tawh, Mizoram a High School zingah chuan a upa pawl tak a ni tawh a. Chutiang dinhmun a ding chung a HSLC Exam Centre a la ni lo reng mai hi mutmawh hnar mawh a neiin, Ministry hmasaah te pawh khan dil a ni tawh a, a hlawhtling ta lo hlauh a ni. HSLC Exam Centre dilna hi Govt. High School Golden Jubilee lawmna, April 2, 2011 min rawn hmanpuitu Education Minister lokal hnenah lo theh luh leh a ni a, a hlawhtlinna erawh hmuh a ni lo. Dt. 11.8.2011 a min bialtu MLA zahawm tak Pu R Lalrinawman Sihphir a official visit a rawn neih khan V.C leh Sihphir Teachers Association ten dilna an lo theh lut leh a. He dilna hi MBSE lamah kal zelin, MBSE hian security chungchangah harsatna a awm tih chhuanlamin phalsak kan nih rih loh thu kan VC te an rawn hriattir a. Chutiang thu-in khawtlang min den laiin bialtu MLA Pu R Lalrinawman dilna thlen nawn leh tura min tih angin, STA lamin Committee hmanhmawh an ko chuk chuk a. Dilna pawh MBSE lamah thehluh leh nghal a niin, a copy pawh bialtu MLA hnenah pek a ni. Kan bialtu MLA Pu R Lalrinawman theihtawp chhuah tak meuh a lo bawhzuina leh a thahnemngaihna a vang liau liauvin MBSE chuan HSLC Exam Centre chu min rawn pe ve ta a ni. He kan thil tawn hi Sihphir khaw dintirh atanga mel lung pawimawh ber te zing a mi a ni kumkhua tawh dawn a. Kan tu leh faten mahni tualzawl ngei a HSLC/Matric an han exam ve thei tawh tur hi a va lawmawm em !! Khua leh veng tam takin neih an chak em em, an neih theih si loh thil a nih lai a kan khaw history a hmun pawimawh tak luah reng tawh tur mel lung min phun saktu kan MLA Pu R Lalrinawma, Chairman, Mizoram Law Commission hi khawtlang mipui zawng zawngten chawimawina i hlan ang u. Sd/- Robert Rualzakhuma Sd/- Ch. Sanglura Secretary President Sihphir Teachers Association India ramah hian Consumers Act hi a chungnung larh a, consumer te dikna hi humhim a tum tlat a ni. Consumer tih hian a huam zau hle.Tun tumah hian nitin a kan hmang tangkai theih lam chi lo thlur ta ila. Khawilai dawr atang pawha kan thil lei, kan duhthu a sam loh emaw, a chhiat avang emaw, company rate bituk sa aia to va kan lei emaw vanga thleng let kan tum, kan thil leinaten an lo remtih loh emaw, kan lungawina zan amin lo tih sak duh loh emaw chuan min chhan turin District Forum a inring reng a. He District Forum-ah hian kan lungawilohna kan thlen thei a ni. Kan thil leina chu tualchhung emaw, khawpui emaw, State dang emaw pawh nise danglamna a awm chuang lo. Silchar pawh a mi pawh lei ila Mizoram a District Forum-ah kan thlen thei tho. Amaherawhchu, kan thil leina Reciept/Cash Memo hi neih ngei ngei a ngai thung. Dan hian Dawrkai leh thil hralhtu te reng rengin Cash Memo an neih ngei a phut a. Mahni inventhawn thilah thil lei dawn reng reng hian Cash Memo etc dil ziah tur. Hei hian Electricity, Cooking Gas etc. te pawh a huam vek. Cylinder phai leh dik tawk lo nia i hriat, agent lamin thleng let lo phal lo ta se Cash Memo i neih khan a pui dawn che a ni. District Forum thutlukna a lungawi lo tan a kal zelna tur leh a lal zawk State Commission a la awm cheu a ni. Tih dikna : Nia, Miss Universe - 2011 Nl Leila Lopes kha ft. 10 leh a chanve ni lovin 5 ft 101/2 inch. zawk a nia, 5 kan han chhut hmaih leh ta thawt pek a nih kha. Zanrei power supply chak hun leh mi zawng zawng mut reh tawh lam a chanchinbu han remkhawm tan chang chuan fimkhur sen hi a lo har tawh thin. Uluk taka in lo chhiar thinna erawh chuan min ti lawm, min han hrilh kauh kauh zel rawh u.

Editorial
Midangte tana Malsawmna
Mahni intheihnghilh a mite tan a malsawmna nih hi Mizo zepui, Kristian nun dik tak pawhin a ken tel tlat a ni. Mi thatchhe tan chuan midangte tan a malsawmna nih hi a lo har ngang mai. Taihmakna hi mihringin Pathian hmel a cheimawina pakhat pawh a ni. Thian chhan thih ngam, rethei leh chhuanchham zawk te khaichhuak thin hnam kan nihna kha taihmaknaah hian a innghat tlat bawk. A bik takin hmanlai chuan thalaite chu tanpui ngaite tanpuitu, sa leh ral hmaah khawtlang thlamuantu, tlawmngaihna leh rinawmna, taimakna thuam inbel an ni thin. Kan tunlai hunah hian eng thilah pawh kan thatchhe tual tual a. Thatchhe deuh pawh nise hmui mistiri leh tawng chak, a inti langsar thiam thiam dingchang angin an lang duh ta fu mai ni te pawhin a lang. Kan nunna hi a tawp dawn tak tak hunah chuan In leh lo, sum leh pai kan neih zat lam aiin, mite te tan engzat nge kan lo pek chhuah a, mi engzat nge kan lo tanpui ? Midangte that nan hian kan tha leh zung te hi engzat fakau nge kan lo seng ral ve tih te hi miten rawn hriat an tum leh min hriat zuina zawk tur a nih a rinawm. Kan tunlai hunah hian mahni veng chhung tak ngial pawh a midang te dinhmun hriatpui lo, midangte ngaihsak hman lo lek a mahni tawk a buai kan tam viau tawh a. Damlohna leh retheihna avanga tanpui ngaite thawm hre pha lo hi kan thahnem sawt viau a ni. Nu leh pate, fate fuih leh nun kawng tha kawh hmuh thawm pawh hriat tur a awm ta mang lo ni te pawhin a lang. Kan nitin khawsakna atan a pawimawh a kan buai em em theuh rual hian kan hnam zepui leh Kristian nun pawhin a ken tel tlat Midangte tana malsaawmna nunpui tel zel thei tura kan mit leh beng kan tih var deuh deuh a, taihmak kan chhuah leh zual hi a ngai hle a ni. Enge a sawi ? : Khawvel hi ka ta ni sela chuan hremhmuna hnutchhiah ka nih lohna turin a pumin ka pe phal ngei ang le! Aw Lalpa, min tanpui rawh! Aw Krista, min pui lul teh! Ka kiangah hian lo awm ve hram teh aw! -Tom payne A hnuaia zawhna te hi chhang la, i chhang dik vek chuan Rs.50/- i hlawh theih ang.Chhan hun chhung dt.28 th Sept.,2011 nilaini thleng. I chhanna chu Pu R.Lalsawmliana, Cir. Manager c/o Society-ah i theh lut dawn nia. Bible bik hi a bung leh chang zawnchhuah tur a ni e. 1. Ka duhtak ta chu ka ni a, ka duhtak chu ka ta a ni.. (Hla thlan khawmte) 2. Hemi hi chuta piang chu a ni tiin an chhiar ang... (Sam) 3. Mipa laka chhuak anih avangin hmeichhia tih tur a ni ang...(Genesis) 4. Mihringin ama hun pawh a hre si lo va...(Thuhriltu) 5. Hmanhmawh la,chutah chuan tlan rawh....(Genesis) 6. Tute nge mit sen rem rum thin le ?.... (Thufingte) 6. Pathian, lainatna a khat, mi khawngaih thei tak, thinnel tak ngilneihna leh thutak ngah.... (Exodus) 7. Mitinin in nu leh in pa in tih tur a ni a....(Leviticus) 8. Mipa laka lakchhuah a nih avangin hmeichhia tih tur a ni ang..(Genesis) 9. Kal pawh a kalsan tawp lovang che hlau suh la, zam hek suh a ti a... (Deuteronomy) 10. Sihphir VCP hmasa ber tunge ?
(Handset siam tirnaah inbox an lo delete palh hlauh avangin in sms te kan rawn thangkhawk tir thei lova, a rawn thawntuten min lo hrethiam hram dawn nia. Issue leh atan bul tan tha leh mai ang aw - Ed)

CONSUMERS ACT

Quize

(Cheng sawmnga man theihna)

MAHNI NUN THUNUN ZO LO CHUAN A BUN TUR KHAIDIAT A CHHER TIHNA A NI

AW I R E M T L A N G

CH A N C H I N B U

Phek

T h u m na
- Zualbawihi Pu

AW !! FAVANG
Soccer City Stadium

Barclay Premier Leaque Fixtures

Man City Arsenal Chelsea Liverpool Newcastle West Brom Wigan Stoke City QPR

Dt. 24.9.2011 (Inrinni zan) Vs Everton 5:15 Vs Bolton 7:30 Vs Swansea 7:30 Vs Wolver 7:30 Vs Blackburn 7:30 Vs Fulham 7:30 Vs Tottenham 7:30 Vs Man United 10:00

Dt. 25.9.2011 (Pathianni zan) Vs Aston Villa 8:30

Dt. 26.9.2011 (Thawhtan zan) Norwich City Vs Sunderland 12:30 Pathianni kalta zing a Las Vegas MGM Grand Garden Arena a WBA Welterweignt title fightah Manny Pacquiao hmachhawn loh dan zawng a chhuanlam siam kual chhen Mayweather Jr. chuan round 4-naah Ortiz hnek thlu-in, Ortiz hnen atang hian title a chhuh sak. A hmun a entu mi singkhat chuang leh TV hmaa lo thlirtu mi maktaduai chuang hmaa Ortiz inring lo lai hnek thlutu Mayweather Jr. chet dan hi khawvelin fair lo a tiin, a hnua a nungchang pawhin demzui a hlawh hle a. Chutihrualin he thil thlenna chhan ber nia an sawi chu tawnhriat nei tlem Ortiz chet dan awmze nei loh luattuk vang kha a ni an ti bawk. Pacquiao chuan Ortiz hnek thluk a nih danah khan bawhchhiat a awm lo. Mahse kha rilru kha infiam mi dik tak te tih ngai loh, rilru bawlhhlawh a ni thung a ti. Mayweather Jr. hian Dollar maktaduai 30 chuang zet he inhnekna atang hian a hlawhchhuak leh ta pek a nih kha.... Tunkar thawhlehni khan Sihphir-ah SSA Hockey Academy hawn a ni ta. He hawnna neih hi Pu Lalthazuala Royte, Gen. Secretary, Mizoram Hockey Association in a kaihruai a. Pu R. Lalrinawma, Bialtu MLA in he Academy hi a hawng. Bialtu MLA hi Pu Hmingdailova Khiangte, MLA, President, Mizoram Hockey Association leh Pu H Zosangliana, Vice President, Mizoram Hockey Association ten an rawn tawiawm. He Academy a zir tur hian mipa leh hmeichhia (rawlthar leh tleirawl) 36 in admission an la. Sihphir Games and Sport Association chuan 7th CEMs Cup Invitation Football Tournament Haflong, Assam a khelh zawh tak a Champion an nih chu tunkar thawhtanni khan Pu RK Lalzarliana, (SDO, PHED) President, GASA, Sihphir te In, Dinthar vengah a lawmna an nei a, zanriah tuihnai tak an kilho nghal. He hun hi an sawmna angin Branch YMA hruaitute leh VC ten an hmanpui.
Mizoram S &YS Deptt. chuan Sihphir Village Level PYKKA Comt. a din thar a, Comt member 13 an awm. tunkar nilaini zing khan Committee an nei. Chairman : Pu Zaneihthanga, VCP Secretary : Tv Vanlaltluanga, Secy, GASAS Kridrashre (Coach?) atan Pu Gosen Rammawia an ruat bawk.

Mayweather Jr. chak

Hockey Academy hawng ta

Sihphir FC Champion Lawm

Vawkhniahzawnthla ruah phingphisiau kan do han a. Mizo thlaserh Thitin thla in min tinsan leh hnuin chunglamah Buh rai nghawr khawpui ri a kal ruih ruih a. Ber thla hmahruai, Savunga Mim thla chawhnu kan lo her chho va. Chhura sapui ki tiat zetin Khuangchawi thlafang a lo de a. Ni pawhin leikiar leh lamah min her phei sanin, boruak a lo dai tan a. Upa te chuan Pang zarah thlasik arpui tiat a tum an lo ti thin a ni. Tunah zet chuan boruak a thengthaw nuam tanin leilung pawhin hul lam a pan tan ta. Zing ni chhuakte pawh a mawi danglamin a favang ni ta ruih mai. Sava ten Favang nilum aiin thingzarah thla an zar pharh tan ta siau siau mai. Chinrang leh Thangfen te meuh pawhin zo puallawi thingse buk hnuai a Varung nupa inchuk puk hlit hlet hlette chu an awt bik lo. Zotui lengkir chung leikhan hluiah vangpui kawl eng lawmin mei an phut kawh ve ta ngeuh ngeuh mai. Murpui leng te chuan vangpui buh tlim cham durh mai chu chibai an lo bukin, thlam char mual leh rawlkhang hrutin an leng leh zer zer mai a. Hnuhlak nisat vanglai atang tawh a an lo buaipui ber an fanau chawi tlei te te te chuan vau lui lungpui hnuai atanga vangpui boruak nuam chhim tur, aikem rawn phar chhuak ha ha te leh lengphar leh nghalim inlenthlak zak zak te nunkhua reng ngaihtuahpui hauh lovin an nu leh pate leng vel chu la hmun kangpar hreu atang te leh thlam namthlak ban filawr atang te chuan an lo thlir fan deuh deuh va. Kan pi leh pute hunah chuan Sechhun leh khuangchawi, chawn leh lam a mualtin an thaina tur chakkhai, Sathing zar tur a nula leh tlangvalte an inzui chhuah kawi diah diah hun a ni. Chawngbuh dennaahte chuan hlim takin thenrual tha leh an di-te nen sumdeng zu an khawn zain an lo inleh tawn zak zak tawh thin a ni. Fur chhum ruahtui pai te chu thlasik rim hlauvin luipui ruamah an inhnawhkhawm a. Zan khaw thimah rawn inlar chhuakin, Favang zing nichhuak chuan rawn hnawt tiau leh zel thin mahse tlai ni tla tur nghakin kawlkilah pahmei-nu bai nam lek lek chu an la insehmur khawm tiau tiau a. Vangpui kawl eng Pangzar a thlasik arpui tia a lo chhuah tum chuan chhehrawp karah Mitthi savawm te leh leipui ruam a thian pangang te chu Phengphehlep eng chi-ah leh tial mawi chi-ah te rawn kai thovin nunhlui ngaih leh lunglen reng hre lova partin zu thlum tha tha lawrin boruakah an leng phar der der a. Chutiang zelin vual leh leihrik te pawh buh leh thlai tawn vuai tir phal tawh lovin, rengchal, uleu, ngirtling leh dawlremah te a rawn thlawh chhuah tir a. An aw neih tawp chhuahin ngaw thing zar mawiah siamtu Pathian fakin he khawvel hi an awi fawn fup dup mai zu nia. Thal romei leh vaivut khu zawng zawngte kha fur ruahtuiin a lo tlen fai hin hen tawh avangin thing hnahte chu a fai tle siau va. Fur lai a hnim hming hriat loh leh hling hnawk huh phing-pheng te kha tunah chuan thianghlim leh mawi takin an lo par chhuak ta. Vangpui par leh Khampa par te, Lawhlei par leh Derhken, Nauban par mawi zia te hi hrilhfiah zo tunge awm ? Bel vawtu-in hlum satliah atanga bel mawi tak a vaw chhuak thin angin heng hnim to satliah mawl te te hi Favang boruak chuan Pangpar mawi ber berah a rawn par chhuahtir thin a ni. Favang awm ta lo se par an chhuahin hming pawh an nei fumfe ngut namaw chu !! Favang hun nawmna leh mawi zia hi sawisen rual a ni dawn em ni le ! Khuangchawi thla eng mawina petu, Favang boruak thiang zar mawina silhpuan sin zawng zawngte mawina zar zo ve thei tur a kut ke kim leh mi ang sa ang a min dinchhuaktu Pathian hnen a lawmthu sawi hi kan va ba nasa tak em !

Lawmthu sawina
Keini Sihphir Games and Sports Association ten ni 213.9.2011 a 7th CEM Cup Football khel a kan zinnaah a hnuai a kan rawn tarlan te chungah hian kan lawm em em a ni. 1. Pu Lalzarliana, President GASAS in phal tak a pawisa min puk tir a vang leh a lawmna tur ruai min buatsaih sak a vang te, 2. Sihphir VC ten pawisa min pai avang te, VC leh Sihphir Branch YMA in players te hmuahna min lo buatsaih avang te, 4. Kan players sawm te leh veng chhung players te zawng zawng chungah lawmthu kan sawi a, anni vang a champion thei kan ni. 5. Kan thang chhung zawnga min lo tawngtai saktu te leh min ngaihventu te zawng zawng chungah te, 6. Pawisa min paitu Pu Lalrinliana Royte leh Pu R.Lalduhzuala te chungah te. Sd/- Secretary, Games and Sports Association, Sihphir

PYKKA Sport Committee

THI MAI TUR NI LA, TUNGE I LAM ANG A, I KOH ANG.... ?

SAWIREMTLANG

W E E K LY VO L X XV

I S S U E N 0. 35 IN R I N N I . D a t ed 24 th September, 2011

Lawrkhawm
Vawiin Inrinni hian Sihphir Branch YMA Evangelicall Cell chuan Hermon Children Home leh Hmangaihna In, Durtlang an tlawh. Rawngbawlhona an neih bakah thil pek chi hrang hrang an hlan nghal bawk ang. Home tlawhna nan a sum leh pai, tha leh zung thawhtute zawng zawng chungah Sihphir Branch YMA Evangelical Cell chuan lawmthu a sawi tak meuh a. Thilpek hrang hrang petute zawng zawng Lalpan a let tam takin malsawm rawh se. Kan khawtlang a sual vanga hliam tuar te chhanchhuak turin theihtawp an chhuah chho mek reng a, mitinin i tawngtai pui theuh ang u. Pu C.Lalthanzuala s/o Thangkhumi, Theihaingaw chuan Middle School zirtirtu hna a hmu thar. A thawhna hmun tur hi Lunglei District lam a ni. Tin, Nl Lalnunhlu-i d/o C.Lalmawia, Tlang veng pawhin Vapar Primary School-ah Zirtirtu hna hmu tharin a hna a zawm fel ta. Anni pahnih hi kan lawmpui hle a ni. Saron Branch YMA, Aizawl leh V.L.Press, Saron veng, Aizawl te chuan Sihphir Branch YMA te hnenah Khawhar In leh a tulna hmun a pianga hman tur Lunglen Hla Bu (Khawhar hlabu) min rawn present a, an chungah Sihphir Branch YMA a lawm tak zet a ni. Dt.25-27October, 2011 chhunga YMA General Confrence, Kolasib a neih turah Sihphir Branch YMA kan thlenna tur chu Counter No. - I, Kolasib Vengthar, Sawmtluang Workshop bulah a ni dawn. He Counter-ah hian Branch hrang hrang 9 te nen thlenho a ni ang. Sihphir Vengthar Branch thlenna tur chu Counter No. - III, Diakkawn Square a ni ang. Kar kalta Pathianni khan Sihphir Kohhran Biak Inah Sihphir Pastor Bial Senior Department khawmpui neih a ni a. Pakhatna Neihbawi Kohhran Senior Department niin, Pahnihna Sihphir Kohhran Senior Department an ni. Venglai Kohhran leh Vengthar Kohhran Senior Department te pathumna ve ve an ni thung. Dt. 22&23.9.2011 chhung khan Vanapa Hall-ah Mizoram State Library leh Raja Rammohan Roy Foundation, Kolkata ten Library Seminar and Training programme an buatsaih. Raja Rammohan Roy Foundation, Kolkata tanpuina hnuaiah YMA Library te hian lehkhabu engemaw zat kan dawng tawh a. Kan Library Building pawh hi an fund atanga tanpuina kan hmuh hmang a sak a ni nghe nghe. Tv James Vanlalthlenga, Assam Regiment, Biak In veng pawh chawlh a hman zawh hnu-in a awmna thar tur Jammu lam panin a haw thla leh ta. Tin, Bangkok a India Sepaktakraw Team hruai a zin Pu Lalrinliana Royte, Dam veng pawh tunkar nilaini khan damtakin a lo haw leh ta.

Home tlawh

Dt.19.9.2011 khan Pu RK Lalzarliana, Dinthar veng In leh Arpu inkarah Rangkachak thi ka ti bo a, lo hmu emaw lo chhar emaw chuan khawngaih taka min pe leh turin ka ngen a che u. Lawmman tha tak ka lo pe dawn che u nia. Gosen Rammawia Sihphir Arpu veng

Bo zawnna

Hriattirna
Kan hriat theuh angin khuarel chhiatrupna/buaina chi hrang hrang te eng hun leh eng hmunah pawh a thleng thei a. Hetiang hun a mipuite tanpui/buaipui turin Aizawl D.C Office-ah Control room siam a ni. Rikrum thil a hman tur hmanrua/bungrua pawh dah a ni a. Hetah hian chhun zan zawmin duty dah an ni. Heng hmanrua leh bungrua te hi a mamawh te tan hawh theih a ni bawk. Hetiang khurel chhiatna a lo thlen palh pawh a tangkai taka kan hman theih nan mahni veng V/C leh YMA hriatpuiin ngaihven leh ngaihchan theih a ni e. Pinky Zosangpuii Block Development Officer Tlangnuam Block, Aizawl. Health Care Scheme Sub Centre-ah October 15.2011 thengin a tih thei e. Natna Bill theih loh te : 1. Admit ngai lova enkawl theih natna 2. Sterilization leh Fertility kaihhnawih 3. Natna bik avanga serh tan ngai a nih loh chuan serh tan hrim hrim a bill theih loh 4. Vaccine lakna 5. Accident/natna vang emaw a nih loh a conmetic leh Plastic Surgery hrim hrim 6. Tarmit, contact Lens leh beng dar man 7. Admit kher ngai lova ha enkawlna 8. Chau satliah vanga damdawi In a inenkawlna investigation tihna 9. Congenential external diseases, nunna a khaihlak phah chauh a huam ang 10. Fa nei thei lo leh hmeichhiat mipat hmansualna-in natna a thlen te 11. Mahni leh mahni intihnatna leh zu leh drugs nghei duh vanga enkawlna te 12. HIV leh AIDS (Mizoram State AIDS Control Society-ah a thlawn a inenkawlna a awm vangin) 13. Investigation tih duh vanga damdawi In a admit 14. Vitamin leh Tinics doctor in a chawh loh 15. Naturopathy 16. Indo avanga natna 17. Nuclear Weapons vanga natna Hmun awl atan 18. Hormone Replacement Therapy, Sex exchange 19. Psychiatric Physchosomatic leh a kaihhnawih 20. Ayurvedic Hiomeopathic enkawlna te

Zirtirtu hna hmu

Health Care Scheme a tihtheih e

Hlabu Present

Counter No. I ah

Lawmthu sawina
Kan MLA zahawm tak Pu R.Lalrinawma, Chairman, Mizoram Law Commission hmalakna a zarah Matric Exam Center, Sihphir Govt. High School-ah kan lo nei ve ta te, khawchhung mamawh hna hrang hrang workers ten an thawk mek bawk a. Heng kan khaw mamawh hrang hrang min nawr chhuah sak a hma min lak sak thintu Sihphir khua-in MLA kan nei hi keini Sihphir Group Congress chuan kan chhuangin a chungah kan lawm tak meuh meuh a ni. Sihphir Group Congress Committee Indo pui lai a sipai pakhat ruang bul a an chhar thuziak Ih e..Pathian, ka la be ngai miah lo che a, mahse tunah hian I dam maw? ti a bul tan ka duh. Miten i awm lo ti a dawt min hrilh thin kha mawl takin ka lo pawm ve mai a. Nizan khan ka bih rukna hmun leikhuar atangin I van te khi ka han en chiang a. Chutah chiah chuan mite chuan dawt min hrilh a ni tih ka hre ta. I thil siam te en a, zirchianna hun lo nei ilang chuan thudik min lo hrilh lo tih ka hre daih tawh tur !! Pathian, nang chuan I hrethiam thovin ka ring. He hmun hrehawm taka ka lo thlengte pawh hi mak ka ti rum rum e. sawi tur tam tak ka hre lo na a, vawiin a ka tawn che avang erawh chuan ka lawm a ni. Nakin lawkah indo a hun leh mai ang a, mahse nang I hnai tih ka hria a, ka hlau ta lo. Chu !! ralkhel dar a ri ta, Lalpa, ka kal mai a tul. Ka duh hle

Senior Khawmpui nei

Library Seminar

Haw thla/Lo haw

mai che a, hriatchian che ka chak a ni. He indona-ah hian inbeihna rapthlak a thleng ang tih a chiang a. Zaninah pawh hian I hnenah ka lo hawng mai thei a sin. Tunhma in I lakah that ka chhuah ngai si lova, Pathian, I kawngkharah min lo nghak a ngem? tih te ka ngaihtuah a ni. Min en teh, kei meuh ka tah ve tak hi !! Ka mittui te a tla zuk nia, ka hun kaltaah te khan Nang hi lo hre tawh che ila ka va ti em !! A nih leh, Pathian, ka kal mai ang e, mangtha le..A mak hle mai, nang ka tawn atang che hian thih ka hlau ta miah lo mai..!!!

Published by Sihphir Branch YMA : Printed at Lois Bet Chanmari Aizawl (0389) 2349250