Myu Sha Zuphpawng Htunghking Shana kabu gara awngdang ai hte galaw la lu

Ninghtoi Aten Shara : : : Oct 23, 2011 (Laban) 4:00pm 8:00 pm Trinity River Hotel, Fort Worth, Texas, USA.

Jinghpaw Wunpawng Htunghking hte Laili Laika Hpung (DFW, Texas, USA) kawn woi awn galaw ai Myu Sha Zuphpawng Htunghking Shana hpe Dallas/Fort Worth, Texas, USA hta shanu nga ai Chyurum Jinghpaw Wunpawng Myu Tsaw Mung Tsaw Myit rum ni yawng 100 ram sa du kanawn mazum hpawngde shanglawm ai hte wu wu di di kabu gara awng dang ai hku galaw la lu sai. Zuphpawng mahkyen hpe numdaw (2) hku nna galaw la lu sai. Numdaw (1) hku nna tingnyang up Slg. Htingnan La Sam kawn du sa ai shawa masha yawng hpe hkalum ga tsun ai hte hkap tau hkalum la ai hpang Rev. Labya La Seng kawn hpawng hpaw akyu hpyi ai hte Myu Sha Zuphpawng Htunghking Shana hpang wa lu sai. Slg. Lahtaw Zau Yin kawn woi awn let Mungdan dawnghkawn hkungga jaw ai lam, myu tsaw share shagan yawng hpe hkungga jaw ai hte Mungdan mahkawn rau jawm hkawn sai. Dai hpang Slg. Lagwi Chang Hkawn kawn wuhpung shachyen ai hte wuhpung a yaw shada ai lam ni hpe tsun sanglang lai wa sai. Ramma ni woi awn mahkawn ai Jinghpaw Buga mahkawn hpe du sa ai shawa masha yawng buga marit maroi myit hte ka manawt let hkawn la lu sai. Matut nna Shd. Maran La Hpum kawn Jinghpaw Wunpawng Myu Sha ni a htunghking lam, Myu Sha hkrun lam hte seng nna laksan tsun sanglang hpaji jaw sai. Slg. Htingnan La Sam kawn tinang ka shalat da ai mahkawn yutai hte Myu hte Mungdan hpe

shakawn shagrau sai. Matut nna ramma ni kawn majan pa hta tinang a sinda hpe kaduk shatai let Myu hte Mungdan a matu asak ap nawng nga ai Myu Tsaw Share Shagan ni hpe GASAT group song hte shakawn shagrau sai. Shd. Sinpraw Seng Jum Awng kawn 1994 ning kawn daini du hkra byin nga ai Anhte Jinghpaw Wunpawng Myu Sha hkrumlam (Sut masa, Shinggyim ahkaw ahkang, Mung masa), Rawt malan lam hpe matut nna tatut karum madi shadaw na matu tsun sanglang sai. Ramma ni kawn Tinang lagaw tinang tsap mahkawn hkawn woi awn let JLH alu jarik hpe hta shinggyim la lu sai. Tsaw ra Pawng Jinghpaw Sha ni e shawa mahkawn hpe du sa ai Myit rum ni yawng wu wu di di hkawn ai hte Rev. Labya La Seng kawn Shaman akyu hpyi sai. Zuphpawng mahkyen numdaw (2) hku nna Nu num ni a shawang tsaw ra myit hte daw jaw daw ya ai htunghking shat kajam hte majap sihtu hpe rau sha jawm sha sai. Dai hpang gaw Htunghking htawng ka hpe kabu gara mani sumsai lahkrip ra ra hte ka manawt sai.

Myu Sha Zuphpawng Htunghking Shana Mahkyen

Daw (1) 1) Hpawng hpaw akyu hpyi na - Rev. Labya La Seng

2) Mungdan dawnghkawn hkungga jaw/hkawn na - Slg. Lahtaw Zau Yin 3) Jinghpaw Wunpawng Htunghking hte Laili Laika Hpung shachyen ai hte Yaw shada lam tsun sanglang na 4) Mahkawn (Jinghpaw Buga) 5) Jinghpaw Wunpawng myusha ni a hkrun lam 6) Mahkawn (gasat) - Shawa Masha yawng - Shd. Maran La Hpum - Ramma ni - Slg. Lagwi Chang Hkaw

7) 1994 ning kawn daini du hkra na myu sha lam - Shd. Sinpraw Seng Jum Awng 8) Mahkawn (Tinang lagaw tinang tsap) hkawn nga yang JLH alu jarik sa bang na 9)Shana ra ai lam 10)Shawa mahkawn ( Pawng Yawng Jinghpaw ) 11)Shaman Kyu Hpyi ya na 12)Malu masha sha na Daw (2) Htunghking htawngka ka manawt na - Committee - Shawa Masha Yawng - Rev. Labya La Seng - Sr. Dashi Gum San