Satua Bali : Nang Cubling

Kacrita di desa anu ada anak mapungkusan madan Nang Cubling. Sedek dina ia masangin bojog di tukade, lantas ada bojog gede teka tur matakon, Nang Cubling, basang apa ento kaumbah? Nang Cubling masaut, Basang I Lut. I Bojog tusing buin matakon, nglantas magedi. Buin kesepne buin ada bojog gede teka, masih ia matakon, Nang Cubling basang apa ento kaumbah? Nang Cubling masaut, Basang I Lut. I Bojog lantas magedi. Liu bojoge teka matakon, nanging pasaut Nang Cublinge patuh dogen. Critayang jani ada bojog cenik matakon, Nang Cubling, basang apa ento kaumbah? Nang Cubling masaut, Basang I Lut. I Bojog buin nyekenang, I Lut ento celeng? Nang Cubling nyautin, Tusing I Lut ento, I Lut, I Lut, I Lut... tung. I Bojog buin nakonang, Apa, kerasang te! Nang Cubling nyautin, I Lut, I Lut, I Lut, I Lutung! Mara I Bojog ningeh munyin Nang Cublinge ngorahang I Lutung, lantas ia malaib morahan teken timpalne. Tusing makelo liu bojoge teka, lakar ngrejek Nang Cubling. Lantas malaib Nang Cubling tur morahan teken kurenanne. Nang Cubling lantas katunden marurub baan kasa. Buin kejepne teka bojog ajaka liu pesan, dapetanga Men Cubling ngeling. Bojoge lantas matakon, Ih Men Cubling, nguda ngeling? Men Cubling masaut, Kurenan icange ia mati. I Bojog masaut, Ento apa ya di balene? I Bojog makejang kemo, tur ngungkab rurub Nang Cublinge, dapetanga Nang Cubling nylempang, tusing makrisik-krisikan. Makejang bojoge ngaden Nang Cubling saja mati. Men Cubling lantas ngomong, Ih Bojog makejang, tulungin ja icang ngae bangbang ane gede tur dalem, lakar tongos nanem bangkene Nang Cubling! lantas bojoge makejang ngae bangbang gede tur dalem. Sedek bojoge ngeduk bangbange, lantas Nang Cubling bangun nyemak bedeg anggona nekepin bangbange. Men Cubling ngenggalang nyemak yeh anget, anggona nyiam bojoge. Dadi bojoge makejang mati, lantas bangbange kaurugin.

SATUA BALI (ANGSA TEKEN EMPAS)

Kacerita ada Empas lua muani nongos di telagane. Ditu ada bunga tunjung magenepan tur suba nedeng mabunga. Lega pesan keneh Empase ditu wireh tuara kuangan amah. Kacerita ditu masih ada Angsa ajaka dadua lua muani. Lega pesan kenehne mandus di telagane ento. Makelo kelo ditu dadi I Angsa makakasihan ngajak I Empas. Ditu ia pada kapepekan amah tur malali lali ngulurin kalegan I Empas mapaguruan teken I Angsa. Makelo kelo masan panas banteng dadi enyat yeh telagane ento. Dening keto I Angsa lua muani lakar matinggal uli telagane ento. Ditu ia ngomong teken I Empas ngorahang lakar magedi uli ditu. Dening ia tusing dadi kuangan tekening yeh. Ditu I Empas sedih lantas naging milu dening ia masih tusing dadi kuangan yeh. I Angsa medalem I Empas lantas ia ngomong : Yan keto idep caine ne ada daya melah. Ne kayu atugel dangal basa tengahane. Sabilang tanggu deweka lakar nangal ajak dadua lakar kakeberang. Salantang jalan eda pesan cai nyai mamunyi api tui ada anak matakon eda pesan sautine. Ingetang pesan ento eda pesan engsapina. Yan tusing nuutang sing ja buungan cai nyai lakar mati. Gelising satua I Empas jani suba keberanga baan I Angsa. Kacerita di tegale ada cicing lua muani maembon di batan kayune mara ane lua nulengek iwasina ada Angsa ngeberang Empas. Ngon pesan ia lantas ngomong : Ih nanang ceninge tingalin ja Angsane ento ngeberang Empas. Masaut ane muani : Ah idong ja Empas buka munyin nyaine. Ento tain sampi tuh ane keberanga baan Angsane. Bakutise di tain sampine mula amah amahan Angsa. Mara dingehe baan I Empas omong i cicinge keto dewekne orahanga tain sampi tuh tanperah gedeng basangne. Ia lakar nyander i cicing, bungutne enggang lakar masaut. Dadi ia ulung maglebug ditegale. Kala ditu dengela baan i cicing. Lega pesan kenehne, betek basangne ngamah Empas. Payu mati I Empas tanpa puara, dening tusing nuutang pituture ane melah. Buina tui tuah gedege makerana sengkala.

8. SATUA I BALU KAJANAN TEKEN I BALU KELODAN Ada kone tutur-tuturan satua I Balu Kajanan teken I Balu Kelodan. I Balu kelodan muani, I Balu Kajanan luh. Kacrita I Balu Kelodan ngencebang lalang di tukade, lakar anggona ngraabin bale gede. Ni Balu Kajanan tau teken I Balu kelodan ngencebang lalang lantas palinga lalange I Balu Kelodan teken Ni Balu Kajanan tur engkebanga di glebegne. Mara I Balu Kelodan ukana nyemak lalangne, ilang lantas. Ditu lantas I Balu Kelodan ngetutang lalangne nuut cretcetan yehne. Dening keto, kema lantas aliha lalangne. Suba neked di umah Ni Balu Kajanane, dapetanga Ni Balu Kajanan sedek nyampat, lantas takonina teken I Balu Kelodan kene, Eh Balu Kajanan, nyai ane mamaling lalang Beline? Sing. Saja nyai tusing mamaling? Saja, kema ja Beli natasin! Yen tepuk nyen dini lalang Beline, bani iis titike? Bani. Dening keto, alihina lantas lalangne, laut ampakanga jlanan glebegne, tepukina lantas lalangne ditu. Nah Balu Kajanan, ene apa lalang Beline, jani nganti payu miis gelah nyaine. Nah. Sajaan lantas iisa gelahne I Balu Kajanan, tur pejanga di sisin pancorane di duur don candunge tur pastuna, kene abetne, Ih gelah anak, yen mai masiram Raden Mantri Kuripan, deket men gidatne! Suba keto, kalahina lantas tur lalangne jemaka abana mulihne. Kacrita Raden Mantri Kuripan lunga ka beji makayun masiram, kairing baan parekanne. Sasubanne rauh di beji, lantas Ida Masiram. Mara Ida maraup, lantas deketa gidatidane baan gelah anake. Beh geli lantas Ida Raden Mantri tur tulung-tulung ngandikaang parekanne ngediang. Tulungina lantas Ida baan parekanne nanging tusing sida-sida baana ngediang. Dening keto ngandika lantas Raden Mantri, Ih parekan, yening kene, jani gelah tusing ja juari mulih, kema suba parekan dogen mulih, aturang gelah luas ngumbara. Yan tonden ilang gelah anake di gidat gelahe, sing ja nira lakar mulih. Suba jani keto ka puri lantas parekanne. Sasubanne neked di puri, aturanga lantas saindik-indik Ida Raden Mantri ring Ida Anake Agung, lantas Ida masesangi, Inggih Ratu Betara yening rauh pianak titange, malih pidan ja, titiang masesangi ngodalin gegeden. Keto kone sesanginidane. Kacrita pamargin Ida Raden Mantri rauh lantas di alase wayah, manggihin lantas Ida punyan sumaga tur mabuah nged pesan. Ngandika Raden Mantri, Ih gelah anak, makaad malu dini di don sumagane! Makaad lantas gelah anake. Suba keto munggah lantas Raden Mantri ngrereh buah sumaga. Suba usan ngrereh sumaga, tedun lantas Raden Mantri. Mara Ida rauh beten, buin lantas deketa gidatidane baan gelah anake. Dening keto mamargi lantas Raden Mantri sambilanga nangis. Suba joh pamargin Ida lantas manggihin punyan juuk mabuah nged, ento lantas penek Ida, tur gelah anake genahang Ida di don juke. Suba Ida uusan ngrereh juuk, tedun lantas. Rauh beten buin deketa gidatidane baan gelah anake. Buin lantas Ida mamargi, lantas nepukin punyan poh mabuah nged pesan. Ngandika lantas Ida Raden Mantri teken gelah anake, Ih iba gelah anak, dini malu iba nongos di don pohe, nyen lamun ada anak nagih nuduk ulungan pohe da baanga! Inggih. Mara keto munggah lantas Raden Mantri. Sasubanne rauh ba duur, lantas ngejor Ida pohe, ditu lantas gelah anake ngulah celeng, nanging tusing nyak magedi. Mawanan gedeg lantas gelah anake, deketa lantas kuping celenge. Napi malaib lantas celenge, tur gelah anake bareng palaibanga. Dening keto lantas Raden Mantri tedun tur gelisang raris Ida mantuk. Tan kacrita di margi rauh suba di purian, beh ledang pesan kayun Aji muah Biangidane, lantas Ida Anake Agung naur sesangi ngodalin okanida tur ngawentenang rame-rame pitung dina makelonne.