Van Lal Buatsaiha (Prayer Letter: Mar, 2012)

SIM Kenya, Post Box No. 60875. Pin- 00200 City Square, Nairobi, KENYA 7875-50280/ +254-7015-61923. Skype: van.lal.buatsaiha Contact:-Mob: +254__________________________________________________
Unau duhtakte, thiante leh Kohhranho (Pathian chhungte) zawng zawng, In zavaiin Kenya khawlum leh ro tak atangin duhsakna chibai ka buk vek a che u. Kumin chhungin in hnena ka lehkhathawn hmasaber a nih avangin kumin 2012 ah hian malsawmna tamtak in chan theuh ka duhsakna ka hlan theuh a che u. 1. LAWMTHU SAWINA: (a) Kohhran, pawlho leh thenrual tha ten thahnemngai taka min tawngtaipui reng thin avangin in zavaia chungah lawmthu ka sawi e. (b) Lalpan S*li M*lim (khawvel hnam hrang hrang zingah a hnam ang zawng pawha Chanchin Tha hril harsat ber te zinga an sawi thin)-te zinga A rawngbawl hna thawh min phalsak ve hi a van lawmawm em! Kum 1 leh a chanve vel chu helai Horn of Africa-ah rawngbawl hna thawkin ka lo awm ve ta a, Lalpa hnathawh leh thiltihmak tak tak hmu leh chang theia ka awm hi ka lawm takzet a ni. (c) S*li M*lim te zinga rawngbawl tak tak chuan mahni nunna atana hlauhawm tawn changte pawh a awm fo thin. Chutiang huna kan awmlaite pawhin Pathian min chhanchhuahna mak tak tak kan chan thin zia te pawh sawi tur a awm nual bawk. Lal Isuan a thu min tiam: kei kumkhuain khawvel tawp thleng pawhin in hnenah ka awm zel ang (Matt 28: 20) a tih kha a takin kan chang fo thin a, ka van lawm thin em! Heng atangte hian Pathian rinawm zia leh innghahna tlak a nihzia a van chiang thin em! Lal Isua hming chu fakin awm rawh se. (d) Lalpan kan tawngtaina chhangin BCM leh SIM thawhhona in Nl. Mary Hnamte (d/o. Rev Lalthangliana Hnamte) pawh March 9, 2012 hian Kenya Field-ah min lo zawm dawn ta a, a va lawmawm em! A awmna turte pawh kan lo buatsaih tawh e. Lalpan keini Zofate hi S*li hnam te zinga thawk turin min hmang duhin min ko takzet niin ka hria. Thawktu tam zawk a lo tirhbelh zel theih nan ka tawngtai fo thin. Kan rawngbawlna atanga Lalpa hnathawh mak tak tak leh in tawngtai chhanna duhawm tak takte lo hrilh che u ka tum a, heng zawng zawng hi Lal Isua hming ropui nan ni rawh se. 1. Drought/Famine Relief Project Lalpan hmanrua ah a hmang: Nikum 2011 khan hmun thenkhat (north-eastern Kenya lam)-ah chuan kum 2/3 vel lai ruah a surloh vangin Khua a kheng nasain tam nasa takin a tla a. Mi tamtak ten an intunnunna lo/ranrual tam tak an chan rala, mipui an mangang hle a ni. Lalpan he khawkheng leh tam hi remchang leh hmanruaah min siamsak a, kum danga rawngbawl pawha kal rem/theih lohna hmunah-te pawh he Drought Relief Project hmangin rawngbawl theihna kawng min hawnsak niin kan hria a, kan lawm hle a ni. Drought Relief Survey uluk taka kan neih zawh hnuah hma lakna runpui kan nei a, nikum 2011 chhung khan tum 10 chuang lai kan fehchhuak a. Khawvel ram hram hrang

atangin Kohhran/mimal atanga Donation kan dawn atangin USD 250,000/- chuang lai senral a ni a, Chhungkaw 10,000 chuang hnenah tanpuina chaw leh damdawi pein he drought relief hi kalpui a ni. Lalpan he project hi mal a sawma, mi thenkhatten Lal Isua an lo rin/hmuh phah hialte pawh an awm a, kan lawm hle a ni. 2. Tleirawl Kululu-in Lal Isua zui a thlang: Dt 25-27 Aug, 2011 chhung khan Isiolo khua-ah S*li/Borana Team ten Drought Relief Project kan kalpuidan tur te ngaihtuahin meeting pawimawh tak kan nei a, kan zingah chuan Borana hnam (Borana- Bor* hnam hi S*li hnam te ang bawk a Cushitic tribe ve bawk an ni) ringtu pakhat Abdi Khadir (M*lim Background Believer- MBB) leh a farnu Kululu-i (tleirawl kum 15 mi) chu kan hnenah an lo thleng a, zan lamah chuan kan thlenna kan thawhpui 1 (American ) te inah Bor* tawngin ISUA FILM kan chhuah chu Kululu-i chuan a en ve reng a, zana a mut hmunah a Lal Isuan a thinlungah thu a sawi a ni awm e, a tuka an khaw lama an haw dawnah, kei pawhin Lal Isua zui ve ka duh e tih thu a sawi ta reuh va. Kan van lawm kher em! Pathian hnena lawmthute sawiin huaisen taka Lal Isua a zui zel theih nan kan tawngtaisak bawk a. Lalpan thil ropui takte min tih saka; kan lawm hle a ni (Sam 126: 5). Kululu-i leh a u Abdi-a chauh hi an chhungkuaa ringtu awmchhun an ni a, an nu leh pa, unau te leh chhungte dang zawng zawng chu M*lim an la ni. Lal Isua an zuina kawngah huaisenna leh chhelna an mamawh hle. A bikin Abdi-a hi rawngbawlna lamah thahnem a ngai ve hle a, a chang phei chuan kan hlauhthawnpui zawk hial thin. A chhungte leh a thenawm khawveng ah pawh huaisen takin Lal Isua chanchin a sawi fo thin. Mi thenkhat phei chu Lal Isua ringtuah a siam hial tawh bawk. 3. Harsatna min siamtu leh min dodaltute pawh Lalpan a titlawm! Dt. 9-12 Sept, 2011 chhung khan North Eastern Kenya (Ethiopia border)-a Kiina, Rapsu, Bishars village leh a chhehvelah keini SIM Missionary te AIM (Africa Inland Mission) Kijabe Hospital doctor leh nurse-te leh Convoy of Hope (Assembly of God) Missionary ten nen intiamrualin Relief beihpui thlakin kan thawkchhuak a. Chaw sem tur Truck lian tak full load nen, damdawi sem tur eng emaw zat keng telin kan thawkchhuak a. Kiina khua ah kan inkulh a (he khuaah hian tunhma kum 10 liamta kha kohhran pakhat awm thin chu M*lim community ten Kristiante an umchhuah vek a, Biak In compound ram zau tak pawh khawtlang mipui ten an insem vek nghe nghe. Biak In pawh kel leh bawng ten riah nan an hmang mai mai tawh a, thinlung a khawih hle). Kiina khuaa kan luh tan hian a Sheik (An Mosque-a an zirtirtu/leader, an M*lim Pastor), a hming- Bilal-a a awm a, Kristiante min haw em em a, kan chaw leh damdawi semte pawh an khuaa mipuite lak a phal sak lova. Chu chuan min timangang hle mai a, kan tawngtai a, Lalpan kan tawngtaina min chhansak dan a mak khawp mai. Khua-a mipuite chuan an sheik thu chu an awih duh ta lova, Kristiante chaw leh damdawi min pek lak i phal loh chuan nangman i pawisa atangin lei la min sem ta che, chuti anih loh chuan keini pawhin kan sheik atan kan duh tawh bik lo che an ti a. A hnuah a hlauthawng leh si a, kan hnenah lokalin, Tanpui in ngai em? Engtin nge ka lo puih ve theih ang che u a lo ti a. Kan inhrethiamtawn ta bawk a, amah chu mipui ten felfai taka eitur an dawn theih nan rem min ruatpuitu berah a tang a, kan chamchhung zawngin min buaipui nasa em em a ni. Keini pawn Lal Isua chanchin leh Pathian hmangaihnate kan hrilh theih phah a, kan lawm hle a ni. Harsatna min siamtu leh min dodaltute pawh Lalpan kan chaw atan min pe a van ropui em!

4. S*li nutling 1 pawh Lal Isua zui turin a lo penchhuak: Dt. 10/9/2011 (Sunday) zing dar 5:30Am ah inkhawmna leh tawngtaina hunte kan hmang a, dar 7:00Am atangin kan hna ngai damlo check up, damdawi sem leh chaw eitur semin kan buai a, Keipawh S*li tawng ka thiam nial nual avangin tawnglettu berah ka tang a, damlote natna Doctor te hrilh leh Doctor-ten damdawi an chawh eidan tur hrilh tu berah ka tang a, a changa tawngsual vangin kan nui leh bawk bawk thin. Ogaden S*li nutling kum 40 mi chuan ti hian a sawi a, Nangni Kristiante hian keini M*lim-te hi eng vang nge hetiangin a thlawn veka min tanpui a, chaw te min pe a, kan damlo te min enkawl mai le? tiin min lo zawt a, a hnuah a falin kan kawm a, heng zawng zawng hi Issa Al-Massih (Arabic- Lal Isua tihna)-avanga kan tih vek a ni tiin kan hrilhfiah a, Pathian Thlarau Thianghlimin a thinlungah thu a sawi meuh chuan, Keipawhin in Pathian (Issa Al-Massih) hi ka zui ve duh a ni a ti a, chumi ni la la chuan a duhthlanna ngeiin Lal Isua zui turin a inpe ve nghal a, hmun fianrial-ah Pathian hnena lawmthu sawina leh atan tawngtaisakna hunte kan hmang a, kan lawm hle a ni. Matt 5:16 thu-a Lal Isuan Tlang chunga a thusawi kha a takin a lo thleng dik a ni: In eng chu mi mithmuhin eng rawh se, chutichuan in thil tih thatte an hmu ang a, in Pa vana mi an chawimawi thei ang. 5. Bishar-a, S*li Ogaden Tribe-a an lal (Chief) nen kan intawng: Hemi ni vek chawhnu hian thian thenkhatte nen Mobile medical clinic leh Chaw eitur semin khaw dang hrang hrang kan tlawh a. S*li Ogaden tribe ho chenna khaw pakhat a an lal (chief) Bishar-a chu kan hnenah lo kalin an khua pawh tanpui ve hram tura min ngen angin kan kal a. Min hruai pahin kan zingah a lo kal ve a. S*li Pathian hla ka thiam ve zawng apiang chu motorah chuan sa pahin a awmzia te ka thiam ang angin ka hrilhfiah pah zel a. Khua kan thlen chuan Bishar-a chuan a khua leh tui te chu a ko khawm a, keinin kan kalchhan te sawiin Isa Al-Massih min tirhna angin anmahni tanpui tura tirh kan nih zia te kan sawi a. Damlo tamtak check up an ni a, tawngtaiasakna neih duh apiang tawngtaisakin damdawi leh chaw eiturte kan sem bawk a. An lawm ve hle a, an lalpa ho ho chuan hahipin lawmthute mi an hrilh ve hial a, a mak kan ti hle. S*li hnamzia (kan hriatna tizautu atan sawi peng zawk ila) -ah chuan heng magical words kan tih thin: Khawngaih takin (Fadhlan)/Ka lawm e (Mahad sanid)/Ka tihpalh (Raale iga ahow)/Min ngaidam rawh (waxaan ku dhib ahay)etc tih te hi an sawi zen zen ngai lo. A chhan chu, an hnam hi hnam kawlhsen/rorum leh chapo tak an ni a, an hnam thil thlirdan- world view-ah chuan heng tawngkam te hi chu mi chaklo, mi tlawm leh nep nihna ah an ngai tlat zu nia!). 6. ISSA AL-MASSIH HI TUNGE A NIH KA HRIATCHIAN HMA CHU KA HAW LOVANG (Bishar-a, S*li Ogaden tribe chief): Nairobi a kan haw hnu chawlhkar 2 hnuah chuan Abdi Khadir-a chuan phone in kan thiante a lo hrilh a, Bishar-a Ogaden tribe-a an chief chuan Abdi Khadir-a chu lo tlawh lehin Hmanni kan khuaa kristiante lo kal tuma Chinese pa (keimah hi Chinese emaw min ti a lo ni awm a)-in S*li hla a sak a, Issa Al-Massih a chungchang a sawi kha min hrilh chiang teh. Ka rilru ngaihtuahna ah a lo lut nasa lutuk a, zanah pawh ka mu thei lo, Issa Al-Massih hi tunge a nih ka hriatchian hma chu ka haw dawn lo a lo ti a, Abdi-a inah chuan kar 1 dawn a chamin Abdi-a chuan Lal Isua chanchin- Pathian a nih zia.Khawvel chhandamtu, Mi zawng zawng hmangaiha a Thisena kan sualte min tlenfai saktu a nihna te a lo hrilh a. Lal Isua a hriatchian hnuah chuan Amah zuitu nive turin a inpe ve ta hial a ni tih thu a lo sawi a. Chu thu kan hria chu

kan van lawm tehreng em!! Bishar-a (chief) hi an khua mipui 1000 vel zingah amah chauh Lal Isua ringtu a la ni rih a, a chhungte leh a khua leh tuite hriattir pawh a duh em em a, mahse, fimkhur taka hmalak a pawimawh ziate kan inchah mawlh mawlh mek a ni. Lalpa tan finna leh remhriatnate a neiha, rinna kawnga a thanlen zel theih nan tawngtaipui a mamawh hle a ni. 7. S*li Christian Fellowship Advent Christmas Program: Krismas ni takah S*li Christian Fellowship angin a hranpaa inkhawm a rem loh vangin kum hmasa lama kan lo tih tawh angin a vawi 2 nan Nairobi khaw daipawnah a ruk/mipui mimir te hmuh phak lohna hmunah Dt. 17th December, 2011 (Inrinni) khan Advent Christmas Celebration Program hun tha takin kan hmang a. Kan vain mi 50 (puitling leh naupang te nen) chuang kalkhawm vein Inkhawmna, Intihhlimna leh ruai ten nen kan lawm a. Kan hlimin kan lawm takzet a ni. 8. Rawngbawlna hmalak mekna te: Nikum October thla atang tawh khan SIM Kenya S*li outreach team-te chuan rawngbawlna hmunhma (Ministry Focuss Area) thar tur ngaihvenin survey ngawrh takin kan buaipui a, Garissa khawpui (S*li chenna khua) ah bultan kan tum zet tawh hnu, inluah turte pawh kan intihfel hial tawh hnuah East Africa Pentecostal Church (EAPC) Biak In compound-a Pastor quarter-ah Pastor hovin rawngbawlna hma kan lak-ho dan turte relin kan thukhawm a. Meeting-na atanga kan haw hnu lawkah chuan S*li helpawl (Al-Shabaab) ten Biak In compound kan chhuahsan hnu lawkah Grenade bomb an vawm lut a, mi 4 lai an thi a, Lalpan keini erawh chu min venghim hloh a ni. A hnu leh zelah pawh Garissa khua leh khaw dang dangah te pawh Kristian Biak In leh Ringtu punkhawmnate an bei zui tak zel avang leh nunna chan an awm tak fo avangin SIM Kenya-a kan hotute chuan kan sahim zawk nan kan insawn te pawh chu mi an remtihpui leh ta lova (Setana hian S*li M*lim te zinga Pathian ram lo zau zel tur hi a do nasa hle niin a lang). Chuvangin, hmun him zawk lamah rawngbawla hmalakna tur hmun research/survey kan neih leh a tul ta rum rum a ni. Tunah hian hmun thenkhatah rawngbawlna bul tan mai tura inbuatsaihin hma kan la mek a ni. Keima mimal bikah chuan Kajiado district huamchhung Namanga Town (i.e. Kenya chhimlam, Tanzania bordering town)-a awm tumin hma ka la mek a. He khua hi Nairobi atang chuan motorin darkar 3-4 vel kal a ni. He khuaa Pastor thenkhatte pawh kawmin hmalak theihna hrang hrangte kan dapho tawh bawk. He khuaah hian S*li M*lim community cheng an tam hle a, sumdawnna leh dawrkai lian zawng zawng chu S*li hnamho ta deuh vek a ni. Missionary hnathawka awmchilh tumah an la awm loh bakah Kenyan kohhran ding tawhsa te pawh an la nep ve hle bawk. Chung avangte pawh chuan rawngbawlna atan strategic place (hmuntha tak) niin ka hria. SIM Kenya Director leh Area Council meeting-in min pawmpui a nih chuan he khuaah hiana rang thei ang berin rawngbawlna bultan thuai turin ka inpuahchah mek a ni. 9. Tawngtaina-a hriatturte : (1) S*li hnam pumpuite tan tawngtai ila, Lalpan kan chanpual atan min pek theih nan i dil ang u. S*lia ram phei chu tun thlengin kum 20 chuang an indo tawh a, M*lim firfiak pawl (Al-Shabaab) te awpbeh in an awm mek a, an ralmuang lo hle a ni. Sual setana kulhpui thiaha a awm theih nan leh heng helpawl te hi tihchimih der an nih theih nan.

(2) Namanga town-ah Lalpan rawngbawlna kawng min hawnsak ngei theih nan leh SIM missionary-te atangin thawhpui nei thei rih dawn lo mah ilaaram mite atangin Lalpan thawhpui tur thatak min pek theih nan min dilpui bawk ula. Tin, kohhran awm tawhsa leh an hruaitu (Pastor) hrang hrangte nen thawhhona tha ka mamawh dawn khawp mai. Lalpan Finnaa min thuam zel theih nan min dilpui bawk ula. (3) Namanga town hi S*li hnam ten khawvel hmun hrang hrangah a ruk a rala an kalchhuahna kalka ber leh an tawmhinna hmun ber (Transit and hiding place of S*lis) an ti thin a. Chuvangin, Education leh literacy lama hmalak hi a hlawk hle turah ka ngai a. A chhan chu mipui nawlpui hian English an thiam loh bakah an rambuai vanga sikul kal ve theilo puitling ziak leh chhiar thiamlo an tam hle bawk. Heng avangte hian English Learning Centre leh Adult Literacy Program Centre hawn ka rilruk bawk a. Lalpa tanpuina min dilpui bawk ula. (4) Mamawh hrang hrang a tam hle a, Sum leh pai maia bakah Chenna in (residence) luahtur atan leh Language Learning Centre (class Room/Office) tur remchang tak Lalpan min pek ngei theih nan min lo dilpui bawk dawn nia. Kan Lal Isua a lokal hma ngeiin S*li hnamte Krista Chanchin Tha Eng-a hruai luh an nih theih nan leh a tam thei ang ber Lalpa beram huangah kan sengluh theih nan thahnemngai takin tawngtai leh thiltihin tan i la zual sauh sauh ang u. Lalpan malsawmna tamtakin vur theuh che u rawh se.

He ram Chanchin Tha hi hnam zawng zawng hriattirna turin Khawvel zawng zawngah hrilhin a awm ang; Chumi zawhah chuan tawpna chu a lo thleng ang.
(Matthaia 2:14)
Lalpa grep huana in rawngbawlpui

Buata Vandir (Farhan) Nairobi, Kenya.

Sending Office Contact (For further necessary Information and Contribution): SIM NEI address: - SIM NEI, GPO Box 66, Shillong-793001, Meghalaya, India. Email: - sim.in.nei@gmail.com SIM East Asia: - SIM East Asia Ltd, 116 Lavender St., #04-09. Pek Chuan Building, Singapore- 338-730 SIM website: www.sim.org