Motto : Zir la. Tanpui la.

Humhim rawh

Theme :Pathian zarah huaitakin kan ti ang - Sam 108:13

ZIRLAITE KHAWNVAR
Vol. VII Issue No.16 An official organ of the Mizo Students` Association, Bangalore Sunday February 26. 2012

ZIRLAITE TUKVERH
#. KLE College-a Dental zirlaite chuan tunlai hian Internal exam an nei mek a. Thlaleh ni 4 hian an zofel thei ang. #. Darshan College-a PUC 1st yr. zirlaite pawhin tun thla ni 22 atang khan Semester exam an nei mek a. Thlathar ni 1 hian an zofel thei dawn a ni. #. SEA School of Nursing-a Nurse zirlaite chuan naktuk, ni 27 tlai dar 3:00 hian Lamp Lightning function ropui tak an hmang dawn a. Hemi ni hian MSA member a tam thei ang ber chhim ve turin min sawm a ni. I ngaipawimawh ang u. #.Khristu Jayanti College zirlaite erawh chuan tunkar kalta khan Internal exam an nei zo chiah a. Tunah hrih chuan an hma lawka an college day lo thleng turah Mizo lam mawi tak Cheraw lam mawi taka pholan ngei tumin an zir nasa tawh hle. #. Hetih laiin Krupanidhi College-a MCA 1st. sem zirlaite chuan tunlai hian semester exam an nei mek a. Naktuk, ni 27 hian an zofel dawn a ni. #. Kum 2011-2012 MSA term pawh a lo tawp leh dawn tawh a. Thlaleh ni 24 hian BMA hruaitu thlan rualin kum 20122013 chhunga MSA hruaitu tur thlanna a awm ve nghal dawn a. A hmun tur hi tihfel a la ni lo.

GLORY! GLORY!!! - GEMINA BASKETBALL TEAM

Kum 2012 MSA Basketball Tournament chu ni 18th. Feb. khan tluang taka zawhfel a ni ta a. He tournament-ah hian a zavaiin team 8 a tel a. Group 2-ah inthenin an in khel kual a. Chuta point hmu sang pahnih ve ve te chuan semi final an lut a ni. Tournament hi ni 11th. Feb zing dar 10:30 khan Koramangala Basketball Court-ah neih niin kan senior member Pu B.Kapthuama`n min hawnsak a. Thawm a tha nghal hle. Beisei leh rin phak bakin mipuiin an hlutin entu pawh an thahnem hle a. A bik takin champion team Jemina Basketball Team te thawm a na hle. 1st prize hi Uncle MP-a hriatreng nana Tv. Emanuel Lawmkima te thian hovin an sponsor a ni a. Tin, 2nd. prize leh MVP lawmman hi Jyoti Nivas College-a BA zirlai mek Nl. Chirstina Renthlei in a pa hriatreng nana a sponsor niin Pathumna erawh hi chu kan Adviser Pu Lalhriatrenga Chhangte in a nau Buangpuia Kawlva hriatreng nana a sponsor a ni. Medal erawh hi chu MSA Asst. Secretary pawh lo ni tawh thin Tv. Tetea Sailoin MSA tan hrim hrima min sponsor sak a ni a. Tlawmngaia min sponsor sak tu zawng zawngte chungah MSA chuan lawmthu a sawi tak meuh meuh e. Hetiang hi result kimchang chu a ni : Champion 1st. Runners up 2nd. Runners up 3rd. Runners up Jemina Basketball Team Huzz & Phots UTC H.D. Tv. Lalhriatkima Chenkual, UTC Team

Most Valuable Player -

JEMINA BASKETBALL CLUB - CHAMPION TEAM

Published & Edited by K.Remruatfela on behalf of Mizo Student Association, Bangalore

ZIRLAITE KHAWNVAR, MSA, BANGALORE SUNDAY, FEBRUARY 26, 2012. Editor : K.Remruatfela Mob. : 9036515569 Email:Zirlaitekhawnvar@rocketmail.com Jt. Editor: David Lalrinliana Mob. : 8147702583 KHAWVEL TI DANGLAM TUTE
1. Adolf Hitler : Khawvel mipui tam takin Nationalism champion puitu ti-a an sawi hial, German pa rothap, Indopui pahnihna chawkchhuaktu Adolf Hitler hi kum 1889 khan Austria thingtlang khaw pakhatah a lo piang a.Mahse, German rama piang leh seilian a ni. Mi . tumruh leh hrat khawkheng niin mi huaisen theihpatawp zam ngai lo a ni a. Juda ho phei chu a hming lam rik atang ringawt pawhin an khur a. Sakeibaknei ai hial pawha hlauhawm a ni an ti hial thin. 2. Winston Churchill : Ram ni tla seng lo, British Prime Minister hlui Sir Winston Chrchill hi kum 1874 khan England thingtlang khaw pakhata Bleinheim Palace an tih hmunah a lo piang a. A naupan tet lai atanga pa tumruh leh ngawltawt tak a ni a. German pa hrat khawkheng Adolf Hitlet meuh pawhina a tukdal zawh loh a ni. Indopui 2-na a lo chhuah a, German leh a thuihhruai ram ten ram tak tak an lak duai duai lai khan Sir Winston Churchill hi British Prime Minister ni lo hlauh se la chuan khawvel map hi a danglam ngei ang. 3. Karl Marx : Democracy leh Communism thuthlung indona muala hnukluttu Karl Marx hi Juda pachal a ni a. Capitalist class paihthlakna tura a idealogy thar Communism hian khawvel a khawih danglam nasa hle. Amah hi Social Philosopher niin sawrkar a do nasa a, mi zawwg zawng intluktlanna thu a tlangaupui thin. He, a ideology thar avang hian Cold war a chhuah phah a. Khawvel history-a dai tawh ngai lo turin hniak ropui tak min hnutchhiah a ni. 4. Charles Darwin : Charles Darwin tluka khawvel mipui inhnialna chawhchhuah tirtu hi he lei mihring zingah hian an tam kher lo ang le. Naturalist ropui niin Evolution Theory hmuchhuaktu a ni a. He a theory ah hian mihringte hi zawng thlah kan ni tiin sawi dawt lo mah se, rinhleh theih tur thil a zam chhuak a. Chuvangin, khawvel mipuite zingah inhnialna tawp thei lo a chhuah phah a ni. ---- phek 3 ding kilah chhunzawm a ni e---

Editorial:
DECENTRILIZATION
Chanchinbuah leh Cable TV lamah te tawngkau chheh kan hriat lar tak Decentrilization (decentrilization of powers) an tih hi Mizo tawnga a awmzia chu Thuneihna semzia tihna a ni a. Hnampa Gandhiji pawhin vawi duai lo a lo auchhuahpui tawh kha a ni.

Parliamentary form of government hmanna leh Unitary form of government kalpuina hmunah reng reng chuan he decentrilization of powers hian hmun a chang langsar lo hle a. Hmunpui atanga awhkhawmna Centrilization of powers hian a luahlan zo fo. Amaherawhchu, tunlai khawvel thiamna leh finna sang zelah hian he Centrilization system hian ngaihhlut a hlawh lo tial tial a. Thuneihna hi mipuite hian an nei ve tur a ni tih hi sawichhuah a ni fo ta. Kan ram dinhmun leh tuna kan dinhmun ngei pawh han thlir- ila thuneihna inkhaidiat chho awm lova mal taka awmhlawm tawp hi chu a thatlohzia hretute vek kan nih a rinawm. Kan ram politics kan thlir pawhin Regional Party chawbel zenna ber chu Central sawrkar tho a ni tih kan hre theuh ang a. Hei hian thuneihna pumbilh lova awpkhawmtu neih hlutzia thui tak min hriatchhuahtir awm e. Mihringte hi inmamawh tawn vek kan nih avangin tanpuitu tur chak tak neih hi a thlamuanthlak em em si a...

Kan Chanchinbu hi Pi Angela Sailo te unauin an nu Pi Lalbiaksangi Sailo hriatreng nan min sponsar sak a ni a, an chungah kan lawm tak zet a ni. Published & Edited by K.Remruatfela on behalf of Mizo Student Association, Bangalore

ZIRLAITE KHAWNVAR, MSA, BANGALORE SUNDAY, FEBRUARY 26, 2012.

Eng nge an sawi ??? Science & Technology-a hmasawnnain a hrinchhuah Social networking site chak tak maiin min awhbeh tawhna karah hian Zirlaite Khawnvar Chanchinbu hi zirlaite hian eng ang chiahin nge an la bengkhawn tih i lo thlir ho ang u : @. Tunah hrih chuan la chhunzawm hrih theih chuan a la tha hrih ka ti khop mai ka lo ngaihdan ve mai mai ah chuan.. Mahse in tih dan dan ni mai... Remtea, St. Joseph College

@. Zirlaite Khawnvar Chanchinbu hi a hlu ka ti takzet. Tunlai social networking-a group tam lutuk hi mi thenkhat tan chuan ninawmah a kal thei a, thil thlengte pawh a hriat loh theih. Chuvangin, ziak ngeia chhiar tur awm hi a tha thlawt a ni. Ruby Bawihtlung, Mt. Carmel College
@. Ka hmuhdan ah chuan hmasawn ngai ti a sawi duh tan pawh sawi tur awm nual dawn tho mah se; Zirlaite Khawnvar chanchinbu hi a chhiar a nuam in a bengvar thlak thin a,hun chep tak kara a buai pui tu ten tha leh zung an senga hetiang anl a chhuah thei hi a thain zirtirna pakhat atling ka ti ve a ni. Min phuar khawmtu tha tak ni in ka hria. Peka, Dr. AIT @. Zirlaite Khawnvar chanchinbu hi kan tangkaipui khawp mai. College dang chanchin hriatnan te a pawimawh a. Thalai thuziak tuimi hriat nan te pawh a tha ka ti. Chhiar a nuam thin khawp mai, la chhuak zel rawh se. Hmingpuii, Jyoti Nivas College @. Zirlaite Khawnvar Chanchinbu hi kan lo chhiar ve thin a, a bengvarthlak thei hle mai. Chanchinbu enkawl hautakzia ngaihtuahin hetianga zirlaite chanchinbu ngei mai chhiar tur a la awm hi a thlamuanthlak takzet zet a ni. Chanchinbu hlutna chu a chhunga thu a nih angin zirlaiten thu thawhkhawm lamah a enkawltute kan puih thar erawh a ngai dawn khawp mai. Chanchinbu hi zirlaite hmel tihlanna pawimawh tak a nih angin, a that leh that lovah kan zavai mawhphurhna a ni e. Lalremruata (Tetea), KLE College @. Keichuan Zirlaite Khawnvar Chanchinbu hi a theih chhung chu chhuak thei se ka ti. Mahse, Mizoram angin a sem darh kawngah harsatna chu a awm bakah,keinin kan lo chhiar that peih leh si loh chuan sum,hun leh tha sen thlawnna mai mai a ni a. Social networking lam kan uar chho zel anih law law chuan Facebook ah te chhiar theih turin a group top te hi awm mai se,Bangalore chauh nilo hmun hrang hrang ami te pawn an lo chhiar ve theih nan...Facebook,etc,hrat tak tak,tihtur ber hreloa luh kual mai mai ho tan hun khawhralna tha a tak anih ngei ka ring. Thuneia, Darshan College

@. Zirlaite khawnvar Chanchinbu hi chhiar manhla ka ti hle a, bengvar thlak ka ti bawk a. Hei aia changtlung tur hian hma la zel ang u. In kal zelna turah duhsakna ka hlan a che u.. Angaihi, Krupanidhi College @. Bangalorea Mizo zirlaite kan inhriat pawh theihna awlsam tha tak a ni a. Thu leh hla lama kan inpawlhona a ni bawk. He chanchinbu thawhhlawk tak hi Literature lama hmasawn nan i hmang zel ang u... Lalnunpuia, UVCE

---phek 2 chhunzawmna--5. William Shakespeare : Khawvel mipui tam takin Father of Arts ti-a an sawi hial William Shakespere hi England chhulchhuak a ni a. Khawvel mihring zingah Literature khawvela hnuhma hnutchhiahtu ropui ber a ni hial ang. A thuziak te hi khavel hram hrang hrangah a darh nasain chhiar a hlawh na ngiang reng. International Language-a Englsih kan pawm theihna chhan pawh hi William Shakespere-a thawhrah a ni kan ti thei hial ang. 6. Ch. Saprawnga : Mizoram hi khawvel map chhunga awm tho a nih avangin Zofa mi ropuite pawh hi khawvel miropuite zingah chhiarluh an thiang thovin ka hria a. Chung zinga sawihmaih theih loh chu hruaitu ropui Pu. Ch.Saprawnga hi a ni. Pu Saprawnga hi Zoramin hun pawimawh ber a tawn laia Zoram hruaitu ropui a ni a. Mizo Union party hruaitu hlui niin District Council hunlaia hun rei tak chhung CEM (tuna Chief Minister dinhmun ang) lo ni tawh a ni a. Zoram insingsak fellai khan Pu Saprawnga hi Zofaten nei lo hlauh ila chuan Zoram hi sap awhbehna hnuaih hrehawm takin kan la kun ang a, Zofaten hian mihring kan nih anga kan dikna pawh chang zo lovin dinhmun hrehawm takah kan awm tlawk tlawk hial ang. Chung thil chu a hmuh lawk vek avangin nasa takin Zoram chhan nan a tha leh zung a seng a. Ram khat hruaitu ve meuh si Bawrhsap ben pawh a tuar phah hial a ni.

Published & Edited by K.Remruatfela on behalf of Mizo Student Association, Bangalore

ZIRLAITE KHAWNVAR, MSA, BANGALORE SUNDAY, FEBRUARY 26, 2012.

Thlirna : Legal watch :

FRENCH REVOLUTION
Khawvel history-a revolution hlawhtling bera ngaih, mi rethei hamthatna chang ve pha ngai loten par an chhuanna hun ropui French Revolution chungchang hi zirlaibuah te leh lehkhabu dang dangah te a hming hi chu kan hre fur tawh a rinawm a. Nationalism tih tawngkam lo irhchhuahna bul a ni tih pawh kan hre theuh awm e. Amaherawhchu, beng hriatnaa hriat satliah mai chu a tawk loh thin avangin tun tumah hian tawi kimchang tak siin kan rawn dek eng zuai ang e. Kum zabi 18-na chhova British awpna hnuaia America in talchhuahna kawng a zawn khan French lal chuan theihtawpin a pui a. Chumi avang chuan French ram chu sum leh pai harsatnain a leh-tuam ta a. Hetihlai vek hian khawvel hmun hrang hrangah Zalenna (Liberty), Intluktlanna (Equality) leh Inunauna (Fratertiny) hnuaia khawsak ho dial dial dunnain khawvel hmun tin a fang nasa hle a. Chu ram dinhmun a lo buai em em takah chuan French lal King Louis XVI chuan kum 200 dawn an lo koh tawh loh Estate Genaral an tih mipui rorelna (People`s Assembly) chu kum 1789 khan a ko ta rup mai a. Estate General (mipui kalkhawmin ro an relna) hian kalphung thar duang turin danpui siamtu tur committee a thlang chhuak a. Chutia mipui rorelnain chak taka hma a lak ta tak tak takah chuan mipui an phur tharin nasa takin ram hmel a sawi danglam hman a. Amaherawhchu, King Louis XVI chuan chutia an vung tak viau si-ah chuan a lalram paihthlak an tum mai ang a tiin hmun hrang hrang a sipai a chahkhawmin a thuam chak a. Chutia, sipai lo lut ta mup mup chuan a ram mipuite a ti ralkhel nasa hle a. An lal ang bawkin, mipuite chuan an lal chu an ringhlel a. Sipaite chet hmaa chet khalh chu thaa hriaiin, hmanrua an hmuh ang ang hmangin, an ram tanin pui ber Bastille Jail chu an bei ta thut a. He ni, dt. July 14, 1789 atang hian khawvel revolution awm tawh zawng zawng zinga thawm na bera ngaih French Revolution chu a intan ta a ni. Hetih mek lai hian French ram chu Prussia (German) leh Austria ram pahnih tangrualten an rawn runzui a. Chutih lai vek chuan French ram chu tualchhung buaina chuan nasa takin a tuam mup mup reng bawk a. An rinhleh tawh phawt chu an lu tansakin an that hmiah hmiah a. Thisen a luang zeih-zuih a ni ber a ni. Chutia nasa taka an inbeih hnu chuan a tawpa tawpah French hnam sipaite chuan hnehna an chang ta a. Kum 1795 chuan sawrkar thar pawh an siam ta a. Lal thlawptu pawlte chuan er let leh ngei tumin an la bei ve reng tho va. Chu chu tukdawl ngei tuma sawrkar tharin a sipaite hmanga a beihzuina lamah, sipai pawl chak tak (Military Emperror) nia hriat hlawh tur, Napoleon Bonaparte-a hun a rawn inherchhuahpui ta luah mai a. He French revolution atanga mitin leh sawrkar tinin zirchhuahpui tur tha em em mai kan neih chu intluktlanlohhna leh inthliarhhranna hian helna a pawchhuak thuai a. Chu chuan revolution hring chhuakin tharum thawhna a tihluar a. Hum tin kil tinah thisen a luan zei-zui tir thin. Chutiang hun a thlen loh nan chuan mi kan mi hausate leh ram hruaitute pawhin he revolution atang hian zirlai ropui tak zirchhuah tur a awm a ni. Chuti lo chu revolution rapthlak tak hi a lo thleng leh riau riau palh hlauh ang e...

ART. 20 Kan ram danpuia Art. 20 hi mihringte dikna lungphum inzamna a nih avangin a paimawh em em a. A awmze tlangpui kan hriat ve theih nan tihian sawifiah han tum ila :Ex Post Facto Law: Mi tupawh pawikhawiha an puhna thiltih laia dan hman kalha che a nih loh chuan thiam loh chantirna (convictin) pek loh tur a niin, pawikhawihna thil a tih lai dan hmanlaiin hrena a pek theih chin aia sanga hrem tur a ni lo. A awmzia chu thil tisualtuin thil a tihsual laia danin hremn a bituk zat chu tunah a hremna lo pung tawh pawh ni se, thil a tihsual laia danin hremna a bituk zat aia tamin hrem theih a ni chuang lo tihna a ni. Double Jeopardy: Mi tumah pawikhawihna chikhat/pakhatah tumkhat aia tam thubuai pek leh hremna pek tur a ni lo. A awmzia ber chu kan thil tihsual avanga hrem thei tu (Competent Authority) in kan chungah hremna a lekkawh tawh a nih chuan tumahin chu kan thil lo tihsual tawh avang chuan hremna min pek belhchhah thei tahwlo tihna a ni. Self-Incrimination: Mi tupawh pawikhawiha puha chu ama thubuaiah mahni inhriatpuitua tang turin turluih tur a ni lo. Hemi awmzia chu mi tupawh hi mahni leh mahni inhek turin min tilui theilo tihna a ni.

CAREER GUIDANCE
Tuna sikul naupang ni mek, mahni career tur la thlang fello ten kawngdik an zawh a, kaihruaitu tha an neih theih nan facebookah CAREER GUIDANCE & COUNSELLING CENTRE FOR PRE-UNIVERSITY & BELOW tih group siam a ni a. Hetah hian an zawhna te chhansak a nih thin dawn bakah educational news update thin a ni dawn bawk a. College la kallo, naute facebook thin kan nei a nih chuan i join tir zel ang u. Member ni thar duh tan pawh a group hminga click a, request thawn mai tur a ni e.

Published & Edited by K.Remruatfela on behalf of Mizo Student Association, Bangalore