ZIRTIRTU KAN DUH MAI NI LOVIN KAN MAMAWH A NI E.

Zonunsanga

Mizoram Sawrkar Council of Minister thu khawm 8th July 2008 Dar 11:00 a.m chuan School Education chu chak zawk a a kal theih nan leh inkaihruaina tha zawk (effective administration) a awmtheihna turin, Sub Division 10 awm mek tangin a thar pasarih a hawn belh leh a. (Memo No.J.11012/2/2008 POL / VOL IV) Tichuan , Department of School Education chuan 21st August 2008 ah (No.A.11017/ 1/95 EDN) hmangin Notification a chhhuah ve leh ta a. Chungah chuan Sub Divisional Education Office pawh a taka hman nghal niin a lang a. Hei hian zirna lamah leh administration lamah nasa takin a pui ang tih a rinawm. Mahse Sub Divisional Education Office pakhat huamchhung khaw hrang hranga sikul zirtirtute dinhmun en erawh chuan rilru a tina.

Khaw 15 aiawhin ka ding dawn:

Rahul Gandhi khan vawikhat chu session neih laiin a

thusawi tur a ding chu eptu pawl lam ten an lo au buaia, an bengchheng hle a, he thu hi chiang fekfawkin a sawi a, Tunah hian kan party angin ka ding lova, min thlangtlingtu mipui maktaduai tam tak aiawhin ka ding a, ka thusawi hi in ngaihthla lo anih chuan chung mipuite chu in zah lo tihna a ni ang, a han tih chuan an ngawi ta duk mai. Tunah hian khaw 15 (Khawkawn, Sialhawk, Riangtlei, Khawhai, New Chalrang, Tualte, Chawngtlai, Aiduzawl, Kawlkulh, Saichal, Changzawl, NE.Khawdungsei, Lamzawl, Mimbung, Hrianghmun) aiawh hian ka ding dawn a, hei hian thuneitute ngeng chhun mawlh rawh se.

Zirtirtu pakhat (ONLY ONE) chiah kan nei:

Zoram mipuite u mak in ti em!? Hei hi

chuan kan rilru tina takzet a ni. Kan khua min bial tura SDEO sawrkarin a dahte hian an theihtawpin hma chu min lakpui tih hi kan pha lo. Mahse anni pawhin tih theih chin an nei a, rilru na tak, tihngaihna awm si lovin min thlir ta mai mai a nih hi. Tu thiam loh nge? Kan khawtlang hruaitute em ni? Ka ring chiah lo kei chuan. Chutihlai chuan khawpuiah zirtirtu engzat nge awm? sawi a ngai lo. Zoram mipui hian an hre vek ang chu!. Sikul pakhatah zirtirtu pakhat chauh kan awmlaia sikul thenkhata an tlar dul hmuh hian rorelna dik chu luipui angin luang sela, felna chu luipui kang ngai lo angin tih chu a har deuh thin. Hei hi thudik a ni zirtirtu pakhat chiah kan nei tih hi. Hei mah mah Primary section chauh ala ni lehnghal!

Heng hi Zirtirtu Pakhat (1) awmna School leh an zirlai zat a ni: As on 2011

Sl.No 1 2 3 4 5 6 7 8 9 10

School hming Hrianghmun P/S Mimbung P/S II Lamzawl P/S NE.Khawdungsei P/S I Changzawl P/S Saichal P/S Kawlkulh P/S V Aiduzawl P/S Chawngtlai P/S I Chawngtlai P/S II

Zirlai zat 58 40 45 40 46 101 11 54 108 32 1

11 12 13 14 15 16 17

Chawngtlai P/S III Tualte P/S New Chalrang P/S Khawhai P/S I Riangtlei P/S Sialhawk P/S I Khawkawn P/S

55 122 52 45 58 105 40

Engnge a chhan? : Chhuanlam tur tam tak a awm thei ang tih a rinawm. Mahse a nihna takah chuan ngaihsak kan nih tawk loh vang a ni mai. Lehlamah heng sikula atang hian Voluntary Retirement Scheme a chhuak leh E.V Teacher (SSA) eng-e-maw zat an thawh tak loh vangte pawh a ni thei anga, chung avang chuan heng School 17 laiah hian zirtirtu Pakhat chiah kan nei ta niin alang a, hei hi SDEO pakhat bial chhung/ huamchhung mai ala ni. Mizoram dung leh vang, a dang bial 16 (emawni?) dinhmun erawh ka en hman ta lo. Hei aia tam pawh hi a nih ka ring hial! Kan la bihchiang zel ang.

Thil ni thei te (Hypothesis): A chunga table en vang vang khian zirtirtu posting chungchangah hleihbik kan nei a ni tih a lang reng a, hei hi chu phat rual a ni lo. Chutihrual erawh chuan students enrolment en khian thenkhat chu an tlem ve tho va, engnge a chhan tih kan inzawh chuan Private English Medium lo thangchho zel vang a ni ang. Kan sawrkar sikul hi luhna tlak lohvah kan ngai ta a ni ang. Khawtlang hruaituten an ngaihsak tawk lo ve bawk a ni. A chhan dang dang a awm thei awm e.

Continuous and Comprehensive Evaluation (C.C.E) hi:

Mi State-in an lo practice tawh, an

hlawhtlinpui tawh a ni e tiin kan mithiamte ringin kan sawrkarin kan tana thilthar min duansak a, 1st term exam kan thlen lek lek tawh laiin engtia kalpui tur nge tih pawh hre lovin kan la hawihai a, mang hi chu a ang a ni. Kan mithiamte zingah, hranghluite lo duahchhuah - evaluation, kan hman renglai - marking system, a hmusit zawnga tawngchhuak an awm thin hi kan ngaihtuah chiang ngai em aw? Kha leh chen kan hman avanga tun hun thleng thei kan ni tih hi hriat a tha. Tin, kei chuan marking system hi ka sit chuang lo. Error tihhniam nan C.C.E- hi a tha e an tih pawh hi ngaihtuah a ngai a nia. State pawnah pawh hei thalai tamtak kan kal a, anni aia kan that lohna ka hre chuang lo. Topper te pawh kan zuk ni a, Foreign thleng thleng pawhin chhuanawm tak tak kan la awm thei zel a, chuvangin marking system hi a chhe ta bur e tih hi chu a fuh ber lo vang. Ka hlauh tak ber chu C.C.E kan ti anga, a hlawhtlinna tura hmanrua leh a ken telho hi kan inpek leh theih si loh chuan kan zirna kalpui tumdan hian min tichiri vek thei tih hi. Khing sikul angah khi chuan C.C.E hian awmzia a neih tam ka ring lo hrim hrim. C.C.E hrim hrim hi chu a theory chuan a tha. Practical erawh ngaihtuah a ngai ang. Kan ti ta rau rau, a implementation lam hi kan ngaihsaka, kan bawhzui a hun takzet a ni.

Awle, hei hi inenlet nan hmang ila, kan thuneitute pawhin kan tih dik loh a awm a nih pawhin pawm ngam ila, siam tha turin kan tha tichak bawk ila, a nihna takah chuan a hruaitute lam hi chuan sawisel hi kan chan a ni ve hrim hrim a, mahse chung chu hmasawnnan kan hman hlauh chuan malsawmna a ni ve thei tih kan hriat kha. Kan khawpuia zirtirtu tam tak, enrolment nen pawha inmil lo lutuk erawh hi chu kan enfiah ngam a hun hle a nia. Hei hi uar takin - Thingtlang lam hian zirtirtu kan duh mai ni lovin kan mamawh a ni e. 2