BMA AW

An Official Organ of The Bangalore Mizo Association Registered Under Societies Act of Karnataka No. BLU-S188-2007-08 Date 7 May 2007
Vol. XVIII Issue No.14 Bangalore Mizo Association Pathianni Tin Chhuak Chanchinbu Date: 8th July 2012 Phek Khatna

Khawpui Zin Thu II

Tualchhung
BMA in sum tuakna atana lucky ticket a buatsaih chu lei theih tura peih fel ani tawh a member tin te tan ngaihven theih ani e. Tunlaia kan hman tangkai tak tak lawmman atan dah anni a, member ten lei ve ngei I tum ang u. A lei hmasa tan lucky number duh ang ang thlan theih ani e. Mizo Cultural Nite sub-committee chuan chak takin hma a la zel a. He hun min hmanpui tur hian Mizoram Art & culture Minister pawh sawmna pek a ni tawh a, lo tel thei ngei tura beisei ani. Hun hman dan tur kimchang hun remchang hmasa berah puan zar ani ang. BMA Freshers Social 2012, atana mawhphur turin heng mi te hi ruat anni. Convener : Tv. Emanuel Lawmkima Secretary : Tv. Amos Lalremtluanga Members : Tv.Lalhriatkima Chenkual Nl. Blessy Sailo, Pu Joel Sailo, Tv. Lalhruaitluanga Sailo Kan member Joela chu Jaundise natna avangin vawiin tlai khan Manipal Hospitalah admit ani a, chutih laiin Ngaihawma UdKz Mario chu unconscious a awm thut in, Vikram Hospital, Miller's Rd ah tunah hian investigation neih mek ani a. Brain scan result chu tha tawh an ti a, mahse a chhan la hriat hrih loh ani. An la check zel e. Tlawmngai tak2 te'n an awmpui mek a tunah hian. Member te'n tawngtaina ah i hre reng ang u. Tun hnaiah Bangalore a hnathawk tura rawn kal, an tum anga awm leh talo te an awm thina, hemi chungchangah hian keini Bangalore Mizo tepawhin theih ang tawkin tan la ila, kan hmelhriat te, khua/veng te emaw rawn kal tur an awm anih chuan theih ang tawkin fimkhur a ngaih thu hrilh darh zel i tum ang u. ********************************

Dr. Mahminga Sailo

Rahsiveng ka ni tlat! Thingtlang khaw mawngping; lirthei awm chhun te lah thlangra, belval leh kawi te an ni mai a. Chu thingtlang atang chuan khawpui, Leitlangpui tia an koh duat ngatah lehkhazir chhunzawm turin, mi inhnuaiah kan invawm lut ve a. Mahse, khawpui tlangval ni tura ka rilru inpuahchahna erawh beisei ang a ni lem lo. Khawpuia awm ve e ti lovin, Rahsiveng mawng; tawng mawi lo ni lo se, zu zuar tamna vengah rawlthar hun ka hmang ta a. Thingtlang atanga danglamna ka neih awmchhun chu nitin alu-kan leh dal hang-hhum kan ring kha a ni mai awm e! Hei vang hian maw; Rahsiveng tlangval tam zawkin, Kei chu Rahsiveng tlangval ka ni tlat tia hmai zangthal he hawa an sawi thin kha, ka tan sawi ve chi reng a ni lo. Zawlkhawpui pan turin Mumang a an zawk hial! Mizoram khawpui ber, Aizawl hi ka dam chhunga hmuhna hun ka neih ka ring ngailo. Amarawhchu, pi leh pute sawi angin, thing delh loh lung delh loh chu, mahni tawktea seilian vein, lehkhazir chhunzawm zel ka tum avangin Zawlkhawpui pan turin ka inbuatsaih ta. Kan thiante Aizawl zinin, lirthei a tamzia te, Aizawl ngaihtuah chuan, Lunglei chu thingtlang khua ang an tih te chu hre rengin, Aizawl hmuh hlan chu ka nghakhlel ta hle. Mahse, Aizawl ka zin hmasak berna chhan erawh exam bei turin a ni thung. One day Congress Party! Vanneih a siamin, a thlawna Aizawl kalna lirthei remchang a awm hlauh mai. Pu Hawla pawlte, Vana Pa Hall-a inhawrkhawm turin bus pahnih an hmang dawn a. An ruala kal theih kan inbeisei ta. Exam atan pawimawh tur leh aizawl cham chhunga mamawh tur suitcase te fel ren rawna khai ap chungin, inla-congress party em emin congress bus hmanah chuan ka chuang ve ta. Nang khawi unit nge? min tih hlauh a, Rahsiveng unit atangin tia chhanna inring rengin bus-ah ka thu ta. Kalkawngah chuan huphurh ru bawk si, phur deuh tak bawk siin, helhhawlh urhin bus hnunglamah kan thu a. Hruaitu titi ngah deuhvin, congress party chungchang an sawi te, Pu Hawla an fakna awka leh ministry an chan leh thuai tur thu an sawi te chu, mahni party niawm takin, an thu leh hla ka thlawp der a ni tih entirnan thuthmunah lu ka bu nileng ve zak! Ramhlun North Presbyterian Biak In bul Vawikhatmah Aizawl ka la zin loh avangin ka thlen in tur awmna ti hian ka pan min hrilh. Bawngkawn atangin in tlan phei ang a, Ramhlun North Presbyterian Biak In lianpui chhak chiah ah khan a ni mai a ti a. Tin heti hi a ni a. Zemabawk kan lut a, lirthei chu an sawi ang ngeiin a lo tam na ngiang, tawt tak tak in an tawt. Bawngkawn an tih kan thleng phei a, Ramhlun North Presbyterian Biak In chu khawilamah tak awm ang maw? ti rirlu rauh rauhin kawngpui tawt em em chu ka thlir phei zel a. Aizawl zawng, khawpui tak tak a lo ni e tiin, motor atanga chhuk thlak hlauhawm hial khawpin lirthei a lo tam si. A ni, Rahsiveng mawnga mi inhnuai luah ve mai tan chuan zam loh chi a ni lo! Ka van vannei tak em! Hranbana college, a thlalak ka hmuha ka ngaihsan em em ah exam kan nei dawn a. Kal dan erawh ka hre map lo. Vanneihthlak takin, ramhlun North atanga exam tura ka chhuah chuan, high sikul-a kan warden, aizawl a hnathawk ta ka hmu hlauh a. A bike-in ka exam-na hmunah min va thlah a. Khami tuk kha, sir kha hmu ta lo ila, ka che buai viauvin ka ring. A hun takah hian tanpuitu an lo lang leh thin. Lalhmingmuana Sailo a awm em? Kan exam zawh ni chuan, phur takin ka exam paper ka pe lut dawn tihah, exam vengtu atangin, Lalhmingmuana Sailo, Lunglei Rahsiveng a awm em? tiin an au lauh lauh a. Kei lahin phur takin aw awm e ka ti a. Kan exama min duhsaktu tur an awmta em maw ni? tiin beisei sang takin min kohna lam chu ka pan phei a. A teuh lo lutuk! Kha pawnah khan police-in an nghak che, police station-ah va zui phei rawh! An ti ta mai. Ka van bangbo teh reng em! (phek hnihna ah chunnzawmna)

LUCKY TICKET a lei theih ta e. ***************************

BMA

Vol. XVIII Issue No. 10 Bangalore Mizo Association Pathianni Tin Chhuak Chanchinbu Date: 3rd June 2012 Phek Hnihna
Editor Lalhruaitluanga Sailo Joint Editors Lalmuanzuala Zaithanmawii Hnamte Contributor Benjamin Rualthanzauva Dr. Lalhmingmuana Sailo Circulation Managers Diki Hnamte Hmingthana Ralte BMA AW lak man: Thla khat Rs.20 Thla thum Rs.50 Thla ruk Rs.90 Thla sawmpahnih Rs.180

(phek khatna chhunzawmna..) Scooter tawng tak leh constable driver Scooter tawng taka min phurtu constable chu, inthlahrung takin min hruai chhan ka zawt a. Min hrilh tha duh miah lo lehnghal. Aizawl vawikhat ka zinna, Hrangbana college chiah ka thlen chin a ni si. Ka la kal ngai miah lohna lamah chuan min phur phei zel a. Mahni lo maha rilru hah nak alaiin, constable lumuma lah chuan, aw heng tleirawl nalh tak tak te hi, kan tih miah lova pasal nei mai mai tur atan chuan ka va ui tak e tiin nula kawngkal te chu a hisap phei mawlh mawlh! Thin phu dup dupa, eng tak thleng ang maw? tia ngaituah laia; ani nula hisap kual vel chu, a tukhuma kuk lawlh tak ka nap. Ka hming chu Police station kan thleng a. ASI Pi BM-i (Biakmawii a ni mai thei) room-ah min hruai lut a. Min koh chhan hre bawk si lovin mak ti takin Pi BM-i ka zawt a. I thianpa admit card I laksak, I pe leh si lova, a exam theih tak loh avangin FIR an thehlut a a ti ta mai! Fur ruah sur lai, khawdur nguih lai mah ni se, thlan a sa phat phat. Chutih nak alaiin, Pi BM-i lah chuan, kal rawh damdawi inah min va kalpui lawk the tiin damdawi inah te ka va kalpui leh vel. Damdawi ina a hmehriat a hmuh te hnenah chuan, thuzawh fiah ngaite hi ka chhuahpui fo a nia te a ti tak deuh deuh a. A chala va pen fawk mai kha a chakawm lek lek. Chuti chuan, ka statement a la tan ta. Ka hming chu.., chumi khuaah.., chumi ni leh thla.., kum.., ah ka piang a, ka pa hming ka nu hming.., ka thianpa pakhat admit card ka laksak.., midang a admit card laksaka min puhtu engmah ka hriatpui lo tih zawng zawng chipchiar takin ka inpuanna chu muang chang fahranin a ziak a. Ka chanchin chu Aizawl police station file-ah a let ve ta reng mai a nih chu! Police min koh chhan Ka thianpa, (kan senior) exam pe ve turin, Aizawl a lo thlen har dawn avangin, a admit card laksak turin min ngen a. Ka laksak ve mai bawk a. Admit card ka lak ni hian, ka u pakhatin min kalpui a; kalpui awm lo chuan kal ngaihna hre hek lo i. Tichuan , ka thianpa admit card chu laksakin, ka u chuan ka thianpa admit card zawnah chuan ngaihtuah chiang mang lovin signature a pe ve ngawt a. Ngaihtha takin kan haw a. Hetiang hian buaina a chhuak ta. Kan thianpa thianpa ve leh chhawng, admit card ka laksak miah loh chuan admit card a hmu zo ta lo. A exam theih dawn loh avangin a mangang chuan FIR a lo thehlut niin. A zeldin kal zelah mi a rinhlelh thu zawng zawng police hnenah a lo sawi vak mai a! Police-in an han chhui takah chuan, ka thianpa admit card ka laksak a, signature ka u-in a lo pek ve ngawt avang chuan ka rinhlelhawm ta ber a nih chu. A thianpa pakhat admit card a lakchhuah sak a, signature inang lo a hmang, admit card bo pawh hi a laksak tho a niang ti ringhlelin thu zawhfiah turin min ko a lo ni a. Lam ang letin Leitlangpuiah Rilru nuam lo takin ka haw phei a. Engemaw thubuai a kal thui chuan lungleiah pawh haw mah la, thu zawhfiah che a tul chuan, police-in an rawn hruai ang che tiin Pi BM-i chuan thuin min thlah a. In ka thlenin, thil thleng chungchang ka chhungte ka hrilh chuan an mangang khawp mai. Engatinge thu chiang awm lova I rawn haw min ti. Ka thiamna leh ka tihdikloh ni miah lovah chuan ka buai na chhan tur ka hre bik si lo. Thu a kal a kal kual chuan thiam loh I chang daih thei asin tiin min sawithaih ta deuh deuh a. Rilru a hah tan. Jail chaw kan ei dial dial ang chu Rilru hah takin ka thianpa, admit card ka laksak chu thuphung sawipui ve hrim hrim a tha e tiin an inah ka han leng a. Joseph, tum loh deuhin admit card bo chungchangah, police-in ka lakchhuah angah min puh a, I admit card ka lo laksak kher bawk che nen. Engtinge ni dawn ni? ka chhungte rilru a buai riau mai kan ti a. Ani lah chu, thu tung at tu chung hian a nui ta kur kur mai a. E, a pawi hlei nem. Kan tihdikloh pawh ni lo, kan thiamna renga min puh lui tlat a nih chuan, jail chaw kan ei dun rial rial ang a ni mai alawm a ti duh chauh mai si! Ka thianpa fiamthu thawh a zawnga ka nuih tiza lo ber a ni. Mahse, kan thiam lohna a awm lova, a ruka thil ka tih a awm lo na na na chu; kha thubuai khan min tihbuai chhunzawm ta lo. Tichuan, Pathian zarah Aizawl vawikhat ka zin ve hnu chuan, vanneihthlak takin zir chhunzawmna remchang ka hmu ve ta hlauh va. Mizoram khawpui ber, Aizawl chu zin mai ni lovin kum nga chuang lai ka chenchilh a. Bawng/vawk/ui rulhut zawng ten, khuantevikah zawlkhawpui kan fankual zak zak chang a awm fo nia!

E-mail: bmanews@gmail.com Website: www.bangaloremizo.info

Editorial
Kum bul kan tan chauh emaw tih laiin kum chanve chu kan lo hmang zo leh ta der mai! Mi intluk tlang lo tak tak te pawhin a thil in ang kan share theuh chu hun (time) hi ani a. Hun hi a hmang tu a zirin a hlu in a hlulo thei viau. Kan hun hman dan hian kan nun a ti danglamin kan mizia leh nihna pho lang tu ber ani awm e. Thenkhatin thahnem ngai takin an tha leh zung sengin hun an hmang a. Thenkhat erawh chuan an hun mai bakah midangte hun khawhral zawngin an hmang ve thung bawk a. Engpawhnise, mimal tin ten kan dinhmun kan hria a, khawvela mi hlawhtling tak tak te, langsar lemlova midangte tana tangkai leh rawngbawltu hlawhtling tak tak te hi en ila. An phenah hian, hun hmang tha an nihna hi a lang zel thin. Chuvangin kan dam chhung hi chuan mahni tan chauh a nung thei kan ni silova, midangte nen a kan khawsak ho naah te hian ngaihtuahna fim tak leh duhthlanna fel tak neih a ngai fo thin. Chuvangin kan hun hi engtin nge awmze nei lehzual in kan hman ang? Mahni tan chauh nilo, midangte tan a tangkai turin engtinnge hun kan hman ang? Tih hi I inzawt nawn fo ang u.

****************************
Enge an sawi?
Tunlai chu scooter thar kan nei a kan chhungkua pawh "Damlai par tlan" an tih ang hian kan awm... -Rev. Laldingluaia of UTC Freshers Social chu Junior te hmuh ah camera nen vei fua fua teng -Johnson D Khiangte *********************************