Editor: H.

Malsawmtluanga
Ph: 9615425400 / 9436784572

Thingsulthliah Students Union

Jt. Editor: Lalromawia Ph:2370285 Correspondents: K.Khualluna : 9436392830 Lalbiaktluanga : 9612322711 Ramngaizuala : 9862386148

Thingsulthliah Sub - Town Weekly Newspaper

VOL. VII

No. 18 THINGSULTHLIAH

Ni 18 May 2013

(INRINNI)

CYCLONE MAHASEN(THLIPUI) AVANGIN Tunkar chhung chu Cyclone (Thlipui) Mahasen ti a a hming an vuah chuan Sri Lanka, Bangladesh, Myanmar leh India ram hmun thenkhat a nuai chungchang a lar hle a. Thi leh hliam, chin hriatloha bo a za tela an awm laiin he Thlipui avanga chiai leh tuartu Nuai tam tak an awm bawk a. Mizoram-ah pawh kan buaipuiin he Cyclone hian Mizoram hmun thenkhatah thli na tak tleh tur anga sawi a ni a, Mizoram Sorkar-in tunkar Ningani chawhnu leh Zirtawpni chu School chawlh-ah a puang ta hial a ni. He Cyclone Mahasen hian Tst Sub-town pawh a tiralkhel nasa hle.
- He chanchinbu kan chhut ni (ningani) hian nileng deuh thawin ruah a sur a, News lakkhawm pawh a buaithlak-in phone signal tha lo bawk nen, tlai lamah current awm lo bawk nen, zankhuain current a awm lovang tih hlauin Chanchinbu buaipui dan kan ngaihtuah nasa a, Hei Mahriati, Tlangnuam-in a Laptop min hawhtir a, chanchinbu kan tichhuak thei ta chu anih hi. - Thlipui hi zan dar 10:00 hnulama tleh tur anga sawi a ni a, chutih laiin zan rei tawh lam emaw, zirtawp zinglam a tleh tur anga sawi rik a awm bawk a. Hemi avangin chhungkaw tam tak te chu riak chhuakin chhungkhat leh thian thate In(thli na lo zawk leh rinawm zawk) belin himna an zawng bawk. He thu kan chhut lai hi chuan Mizoram a thlawhkhum daih tawh tih thawm kan lo hria. - Pawl thenkhat chuan Ningani zana Committee leh thildang an lo ruahmansa pawh an thulh phah a, Kuthnathawktu eng emaw zat ram lama feh chhuak ngam lovin, in-ui tak chunga ina awm an thahnem hle bawk. - Kan sub-town atanga State danga zin chhuah tum eng emaw zat ticket pawh la tawhte, Bus/Sumo leh Flight cancel avangin an rawn haw phah bawk. - Thingsul-Tlangnuam Tobacco Free Village a puan tur Programme, Zirtawp zana neih tur pawh he Cyclone Mahasen avangin thulh a ni a, a hun tur hi Anti-Tobacco Committee, Tlangnuam in an ngaihtuah tha leh dawn a ni. HSSLC PASS LAWMNA KARLEH-AH Thingsulthliah HSS chuan kumina HSSLC pass thar te lawmna karleh nilaini hian neih an tum. Pass lawm chungchang hi Tst HSS Managing Board-in tunkar nilai zan khan an ngaihtuah a, School Education Minister Pu Lalsawta chu khuallian atan beisei niin S/Edn Director pawh he hun hmanpui tura sawm tum a ni bawk. Pass lawmna hunah hian Pu PC Lalbiakchama te chhungkua-in an fapa PC Zosangzuala hriatreng nan I Division leh a chunglam hnenah Award an hlan dawn bawk a ni. he hun hmanpui tur hian TTA member te bakah NGO hrang hrang hruaitute pawh sawm tum a ni. NREGS NI 8 INHLAWHNA Kar hmasa issue-ah khan kan rawn tarlang a, NREGS ni 14 inhlawhna a awm hnai dawn tiin. Mahse, ni 8 zawk anih thu BDO hnen atangin kan lo dawng. BDO Office atang chuan ni 14 inhlawhna proposal siamin thawn thlak a ni a, mahse ni 8 inhlawhna work order a lo chhuak a, tunkar khan VC ten order hi an dawng hlawm.

LUNGNGAIH DAR RI Ni 12/5/2013 chhun dar 12:00 khan Pu Seikhamliana(78) F/o T.H. Pauva, Edenthar, Seling chu Awmlaiin a boral a; hemi ni tlai dar 4:00-ah Pastor C.Lalmalsawma, UPC(NEI)-in a vui. Pu Seikham-liana hi Seling Thlanmual thar, Samaritan Complex-ah phum niin Thlanmual thar a phum hmasak ber a ni. INNEI Ni 16/5/2013 khan Zoramthanga S/o F.Vanlalrawna C/A leh Hmangaihtulalliani D/o Challianzinga, Chhingchhip Venghlun te Tst UPC(NEI) Biak-Inah an innei. CRUSADE Tunkar thawhtan zan atang khan Seling Presbyterian kohhran chuan Crusade an nei a, Speaker Tv Johny R.Lalhmangaiha, Gospel Nehemia Team a ni. Tunkar chhung zantin inkhawmna neiin ruahman dan chuan vawiin hian Bethel pui neih tum a ni. Naktuk Pathianni zanah Crusade hi a tiak ang. POOR FUND-AH RS 1000 PE May ni 12, 2013 kha Nurses Day a ni a, he ni denchhen hian RIPAN B.Sc(N) zirlaiten Thingsulthliah CHC Poor Fund atan Rs. 1000/- an pe. CHC Doctor leh staff ten lawmthu an sawi. RAWN TLAWH DAWN Naktuk Pathianni hmang hian Salvation Army, Tst Corps chu Central South Division SAY Rally Information & Publicity Sub-Council member ten an rawn tlawh dawn a, Zan inkhawm thleng an awm ang. I&PSC member hi 9 lo kalin Rally thlenna hmun tur Thingsulthliah khua-ah Verification an rawn la dawn a ni. VAWIIN-AH PASS LAWMNA Thingsulthliah VC leh Teachers Association(TTA) ten HSLC & HSSLC pass lawman nimin zirtawpni-a neih an tum chu Khuallian Pu R.Lalzirliana, Home Minister remchan hun tinzawnin vawiin hian neih tum a ni a. He thu kan buatsaih laia kan lo dawn danin vawiin inrinni dar 1:00 pm-ah C/Hallah neih tur a ni a, programme pawh lo duan law kanga kalpui tum a ni.