Bum Chyangau hpang de shagun ai Laika

4th,August-2013
Hkungga ai Hkri+Sha, Ndai Ntsa Ba Duwa Zau Bawm ka kau da ai Laili Laika n-kau mi hpe Copy shagun dat ai. Ndai August Shata (24) ya shani Shi hpe Karai Kasang woi la ai (16) -ning hpring sai. Kade Machyi tim Kanu e.Ngai n-si ai yawGaloi n-si ai.nga nna n-gun jaw chye ai. Shi Nsa hkyet na jahpawt Ni Ba hpe Ga grai shaga abrawp nna Nsa hti mat wa sai. Hkri eNang ka ai Laika ni grai Kaja ai. Ni Ba grai hti ra ai.Hkri nang ka ai ni-dan dan pra pra,Mu mada chye na hkra grai chye ka nga ai. Dai hku rai ra ai. Anhte Jinghpaw Wunpawng sha ni n-mai yup nga ai. Dum hprang ra sai. N-dum n-dam myit mu,Simsa n-mai nga ai lam ni hpe Hkri hku nna ka dan,Htawng madun dan ai lam ni grai hkrak sai. Anhte mung-shanhte hpe dang ai Laknak myu hkum sumhpa lu tawn shajin tawn ra sai. Laknak ngu ai hta Machyu pala,Sinat Amyawk sha n-re. Hpaji Machye machyang, Zai Ladat, Kasi Kamang,Myit hkrum kahkyin gumdin,shada kam ging ai hte teng man ai,Masu magaw nnga ai,Rep kawp Tara lang ai,Ka-ni koi gam ai. Ndai Laknak ni mung ahkyak ai lam ni hkrai rai na re ngu nna kam ai. Hkri hpe Ni BaShingdu de na Akyu tut hpyi n-gun jaw nga na yaw. Hkungga letLahtaw Nang Bawk (Ni Ba) ( Jinghpaw Prat/The Kachin Time Shi Laika Sara Kaba- Lawdan Duwa Zau Bawm jan). Na Pa,Califonia, U-S-A.

 Ganang rai mat sata?

-Jiwoi Jiwa Prat kaw nna Hpan Karai Wa shaman ya ai Wunpawng Sha ni a Mungdan Anhte a Buga hpe Prat mi hte Prat mi Tsawra nga na ga ai.

-Ja, Lung Seng,N-hprang Sutgan jawng ai Tsit Hpun Kawa, Hka Nu ni Tsawm htap ai Bum, Pa, Layang yawng gaw Anhte a Sutgan sha rai.

-Panglung Zuphpawng kaw nna Munghpawm Mungdan tai ga nga Mungchying Sha yawng Ahkaw Ahkang maren sha lu la Rap rap ra ra nga pra saga nga ai Bama Takyat, Kachin Takyat Ngu ai Ga Sadi shakat da sai rai.

-Ya- Shaning (50) du wa Dai Ten na Ningbaw ni Si mat jang Kachin ni lu ai dai Takyat gaw Ganang kaw wa tsat taw mat sai kun?

Gauri Pan Lawng (Jinghpaw Prat- Duwa Zau Bawm).

Matsun Shagawp

Myit hte Masin Dai shara kaw Du nga nngai. Ngai a Kraw Lawang ndut ndang hte Pyaw li ai. Hpawng shingra kaw Shawng ningnan e Jahpat ya ai ni a Ngwi pyaw Labau Hkai dan na ma ai. Ndang tsun lu ai gaw Dai Ja Chyum Laika rai

Anhte grau shakut shaja ga Ndai Laika tat kau nmai Shawng de sharawt ga Myit hte Masin sharawt ga Shawng lam de she tsut Loi pyi nmai htingnut ai. (Gauri Pan Lawng) Jinghpaw Prat- Duwa Zau Bawm (Shing nrai)

Gauri Pan Lawng (1927-1997)

Duwa Lawdan Zau Bawm gaw- Lawdan Duwa Zau La hte Sarama Maran Doi Bu yan a Kasha marai (11) kaw nna kaba htum rai nna, 1927-ning November (1) ya shani Manmaw Ginwang, Nmawk Buga, Lawdan mare e shangai ai wa re. Lawdan,Nam Hkam,Manmaw (ABM) Jawng ni hta Jawng laika sharin lai wa sai. Hti Hkum (2) Mungkan Majan, Japan ni hpe gasat shapraw ai Ten (1943/45)-ning hta American Ranger (101) hte Jinghpaw Ranger ni a pawng hpawn Hpyen Dap hta Agyi (Sergeant) Madang kaw du hkra Lit Magam ni hpe gun hpai lai wa yu sai. 1947-ning hta May Myo (Pyin Oo Lwin) Gold Gate Jawng e Laika Hpaji ni hpe bai matut sharin sai. Dai hpang 1948- 1952 ning du hkra Rangoon Mare (Cushing) Jawng e High School Final du hkra bai matut lung sai.

1952-ning hta, Jinghpaw Mungdaw Rung kaw Lawu Tsang Chyare shang galaw sai. 1954-ning hta Jinghpaw Mungdaw Shiga Dap e Laika gale ya ai lam ni hpe galaw nna, Munghpawm Myen Mungdan Thamada Mann Win Maung hpe Jinghpaw Laika sharin ya lai wa sai. Dai ten hta Myen Mung ting hta kadai mung rai n-galaw yu ai Wa Madai Pan hte kaga Nampu Nampan Li Shalun, Li Pawng hpawn hkai nna Indonesia de woi dut shalai sai. Japan, Indonesia Mungdan ni hte matut mahkai nna Dut/Mari Hpaga Yumga lam ni hpe woi awn galaw sa wa sai. 1956-ning January shata (10) ya shani- Myen Mung Nsen Shapoi Dap (BBS) Mungchying Sha ni a Nsen Shapoi ai Lamang hta Jinghpaw hku shawng nnan lang na Kachin Section hta Nsen Shapoi ai Announcer gaw Duwa Lawdan Zau Bawm rai nga ai. Dai ni du hkra jai lang taw nga ai Hpaw hpang Madum Sumpyi (Signature Tune) hpe Duwa Lawdan Zau Bawm woi awn galaw hpang ai rai nga lu ai. Dai hpang., 1958-ning hta, Jinghpaw Mungkan hta shawng nna na Labau shang JINGHPAW PRAT Shi Laika (The Kachin Time) hpe Bat shagu awng dang ai hte woi hpaw Ninghtan dip shapraw hpang lai wa sai. 1962-ning hta lam amyu myu a majaw-Dai Jinghpaw Prat Shi Laika hpe jahkring kau ra sai. Dai Shi Laika gaw Jinghpaw Wunpawng Myu sha ni a Myi,Na, Machye Machyang ni hpe shalat jahpat ya ai Shi Laika hku nna Labau shang tai lai wa sai re. Dai ni na Prat hta dai zawn re ai Jinghpaw Shi Laika hte Shi Laika ka Sara ni kade Ahpre tam yu tim mu lu na n-loi mat sai. Prat mi hta kalang sha dan dawng pru lai wa yu sai JINGHPAW PRAT Shi Laikahte dai Shi Laika hpe woi shalat lai wa sai Duwa Lawdan Zau Bawm(shn) Gauri Pan Lawng gaw Anhte Kashu Kasha ni tut nawng Arawng la, Labau shang Masat masa shagrau da ging ai Kaji Kawa nan rai nga sai. Galoi Prat wa mi she dai zawn Anhte Wunpawng Myu sha ni hpe Sawnrawm Nhtoi jahtoi ya ai Laika Shanan ni bai lu pru lu sana kun?...ngu Marit maroi,Shingran bai mu, Yawn Myi Prwi mayut let- ndai Laika Hkrang hpe tang madun ai hku rai li ai. 1963-ning hta Duwa Lawdan Zau Bawm gaw Myitkyina de htawt nga nna,1964-ning May shata(12) ya shani e Sarama Lahtaw

Nang Bawk hte Hkristan Dinghku de sai. (1974/1982)-ning du hkra Myitkyina Yuzana Lawk Council e Ningbaw galaw sai. 1977-ning Latsa Ning Jaw Masat Poi hte 1987ning Lawdan Mare Jubali Zup hpawng kaba ni hta- Duwa Lawdan Duwa Zau Bawm hpe Chyalai Hkridun ngu ai Laili Laika hte seng ai Ja Dazik hpe shagrau ap ya masai re. Lawdan Duwa Zau Bawm hte Ning-rum ningtau rai nga ai Sarama Lahtaw Nang Bawk hte seng nna, Shanglawt KIO Ningbaw Kaba Maran Brang Seng Jan Na Hpaw Kaw Mai gaw Lawdan Duwa Zau Bawm Jan Lahtaw Nang Bawk(May Nang Bawk) gaw lai wa sai 1960-ning grup yin Aten ladaw ni hta Anhte Myu Shayi Num ni kaw na Tsawm Shayi rai nga ai. Ya du hkra shi hpe(May Nang Bawk) ngu yang she chye ma ai. Lawdan Zau Bawm gaw Laili Laika hte seng ai kaw Myu Sha lam yan hku shakut nga ai Ten, May Nang Bawk mung Yangung ga Hkrang shalat Tsawm Shayi langai hku mying Satang dan hkung nga lai wa sai rai. Shi a Kahpu gaw Pilot Zau Mai ngu ai wa re. Jinghpaw Ma ni kaw Nbung li gawt ai (Pilot) shi langai sha nga yu ai rai nna, shi a mying mung Pilot Myinghkawt lu mat ai. Pilot Zau Mai, May Nang Bawk,Gauri Pan Lawng ngu ai mying ni na hti hkrup yang Anhte ni Shagrau ra ai ni re hpe saw lajin dat ai law..nga nna Ka masat tawn ai hpe mu hti lu nga ai.(Ref: N-gun Ja Wa Blog.com) Duwa Lawdan Zau Bawm gaw1982-ning hta Pai maga na Hkri Hkraw daw mat nna Hkam ja lam ning ra mat wa sai. Dai majw 1997-ning August Shata (24) ya shani,Jahpawt Hkying (3:30) hta Gauri Pan Lawng(shn) Jinghpaw Prat Duwa zau Bawm(shn) Ledo Zau Bawm (shn) Chyalai Hkridun Lawdan Duwa Zau Bawm gaw shi Tsawra dik ai Wunpawng Myu sha ni hte Madu Jan Sarama Lahtaw Nang Bawk,Kasha ni rai nga ai- Nang Hkam, Nang Awn, Ja Roi, Nang Lum, Nang Hpang, Zau Du Li- ni hpe shakram kau da let Mungkan Ga kaw na Wundoi mat wa sai re. Ratim Ngai Nsi ai yawGaloi Nsi ainga nna Madu Jan hpe htet kau da ai hte maren-

-Wunpawng Myu Sha ni hpe tsawra ai majaw- Japan Hpyen Matse ni hpe shi a Asak pyi n-lahpawt ai Gasat Shaten lai wa sai.. Agyi(Sergeant) Duwa Lawdan Zau Bawm -Hpungtang Nbung Nsen hku nna Myu Tsaw,Mung Tsaw lam Shiga ni Shapoi Htinglet ya lai wa sai ..Duwa Lawdan Zau Bawm -Ga Shagawp ni ka nna Sindai Kraw salum kata na hkam sha ai lam ni hpe Alun Shapraw,Hpaw hpyan dan chye ai Ga Shagawp Sara Duwa Lawdan Zau Bawm -Mung Masa, Hpyen Masa, Htunghking Ningli lam ni hpe Aten jaw ap nawng nna W-P myu sha ni hpe Myi Jahpaw,Na Jahpaw lai wa yu sai JINGHPAW PRAT Shi Laika a Shi Laika Sara Kaba..Duwa Lawdan Zau Bawm -Laika Mying Hkawt- Gauri Pan Lawng mying mying ai Laika ka Sara Duwa Lawdan Zau Bawm -Chyalai Hkridun Shingni Shingteng Amying mying ai.Duwa Lawdan Zau Bawm e, Duwa tsun ai hte maren- Nang gaw, Masha she si mat tim Mying galoi Nsi ai Chyurum ai Wunpawng sha ni a (N-Htoi Gintawng) nan rai nit dai. Anhte Kashu,Kasha ni. Nang Kaji/Kawa hpe.Tut nawng Tsawra Hkungga, Myit dum nga na ga ai lu yaw.

Myu Sha Lam yan hta-

Bum Chyangau.