SIMEIKHU KARTIN CHHUAK THINGSULTHLIAH

21 September 2013 (INRINNI) PHEK- 2

CAREER GUIDANCE Nimin Zirtawpni khan Thingsulthliah Development Committee, Aizawl hmalaknain Zirlaite pualin Career Guidance neih a ni a. TDC, Aizawl atangin Dr. Lalchhuanawma Tochhawng, Er. R. Lalrammawia, Pu C.Lalnunthara leh Dr. C. Lalramnghaka te an lo chho. Chawhma Dar 11:00 atangin Tst HSS-ah he Career Guidance hun hi hman a ni a. Hetah hian High School chin Naupangte kal khawmin Tst HSS naupangte bakah Govt. Tst H/S leh Radiant Hearts School, High School Section te an tel a. Aizawl atanga lo kal Resource Person te hian Technical Line, General leh Civil Service lam hawi te an sawi a. Zirlai naupangten hlawk thlak an ti hle. Aizawl atanga lokal te hi heng High School pathumte hian zanriah lo buatsaih sakin TTA Executive te nen tlaiah chawhlui an kilho. Tin, Naupang te tan Refreshment hi Aizawl atanga lokal ten an buatsaih sak bawk a ni. FOLLOW-UP NEI Tst Presbyterian Kohhran ten kar kalta lama Camping an buatsaih chu tunkar Thawhlehni zan atanga nizan(Zirtawp zan) thleng khan Follow-up Programme an hmang a. He hun hi Gospel Witness Team Speaker Upa H. Zoliana leh Team member 4 ten an rawn hman pui a ni. PYD CONFERENCE Vawiin leh naktuk Pathianni awh tur Mizoram UPC Kohhran PYD General Conference Bilkhawthlir-a neih mek hmang turin Tst Pastor Bial PYD te pawh nimin Zirtawpni khan Pu K. Zatluanga D/A Bus hmangin an kal. ZEMABAWK TLAWH Naktuk Pathianni hmang turin Tst Bial UPC(NEI) PYD te chuan Zemabawk Kohhran tlawh turin vawiin hian Pu Malsawma, H/A Bus hmangin an kal. KHAWRUHLIAN LAMAH Vawiin Inrinni hian Nunna Lalhnam ten Khawruhlian-ah Mim Kut an hmang dawn a. Mim Kut hmang turin kan Sub-town atang pawhin lehlangin an kal. SELF DENIAL BEIHRUAL Salvation Army Thingsulthliah Corps chuan tunkar Nilai zan thleng khan Camping Follow-up programme an hmang a, Nilaithawhtan zan atang khan Self Denial Beihrual inkhawm an tan. Mimal inah inkhawmin, Inrinni leh Chawlhni zanah Biakin-ah an inkhawm ang a, karleh-ah mimal inah inkhawm an chhunzawm leh ang.

Article : MIHRING HLUTNA HI AVA INCHEN LO EM..!!

- Challiankhuma Mizo hnam zia hi ava ropui em! Pi pute vanglai ni kha- han thlir kir thin ila, kan nun hlutna hi ava inchen lo tehlul em. He thu ka han sawi duh chhan chu, Thingsulthliah mi hmingtha te vawiinah hriat hlawh tawh lote hi thinlungah an thar thin. 1890-ah British sorkar Sap hovin min hneh a, kan ngam loh leh vawiin thlenga mi tam takin tluk loh ena kan en an la ni a. Kan Mizo Lalte, pi pute an lo tlawm kha an demawm love. India ram leh Myanmar kan tih tak Kawl lal ropui tak tak Siam pa Hranga te, Tipera Tripura kan tih tak lal ropui tak tak te, Mysore Reng lalte pawh an tlawm vek a, tlawm hnuhnung ber kan ni a. Pi Ropuiliani phei chu tlawm ve lova Jail a tang hlum thak kan nei a. Tlem si hausa silo, ralthuam nei tha silo, tlawm hnuhnung ber kan Mizo an ni hi, kan ropui lo chuang love. Tichuan, 1894 vel atangin, Phut luih Kuli, hlawh nei lova sal chhawra min chhawrin, lamlian kawngpui lai turin lal khawtin ami kha phut an ni ta a. Aizawl Lunglei, Aizawl Champhai, Aizawl Silchar leh a dang te an lai ta tlut tlut mai a. Sal chhawra chhawr an ni bawk a, tih duhdah an tuar hle a ni awm e. Mizo zia chu, hna an han thawk dial dial a, meizuk chawlh hi an nei thin a, vaibel hi pa in an zu vek a ni. Khawilai hmun nge tih hi ka hrechiang ta lova. Suakpuilala khua Thingsulthliah nge Vaituichhun, a engemaw zawk chu a ni ang ti ila a sual lovang chu. An mei zu chawlh hahdam paha tui ti taka vaibel a dawng chil thli uai diah diah a an zuk thin chu, Sap-Sakeia (2nd Liutenant) an ti mai a, chu chuan a paih sak hlawm thin a, an thin a ur hle thin a ni. Mahse a tih ngaihna an hre vak lova, Sap(English) mi ho hian Mihang hi an ngainep em em vek a, an ngam ta lo tlat bawk si a, an ning hle a ni an ti thin. Ni khat chu le, Thingsulthliah paho zing ami, mi huaisen, a hming chu Kapthanga a ni a, a tuar ta lova. Vawiin chu a tul chuan kan thih chilh ang e a ti ta mai a. Vawi thum mi paihsak chuan ka sat ang a, ka hneh loh leh ka thih phah mai ang tih rilru pu ranin thingluang chunga thuin vaibel chu an zu leh ta talh talh mai a. Sap Sakeia chu a lokal a, a paih sak ta. Thinrim hmel pu chuang miah lovin a va la a, a thutna pangngaiah thuin a han zu leh ta vang vang mai a, Sappa chu a lokal leh a, a rawn paih sak leh a, a pangngai bawkin a chhar a, a thutna pangngaiah thuin a zu lui leh a. Sap-Sakeia chuan a paih sak ngam ta lova, E khai, nang chu hnathawk ho vengtuah tang ang che a ti ta ringawt a. Chuta tang chuan a paih sak ngam ta lo an ti a. Mihuaisen ten mipui hi an lo chhanhim thin a, he thu hi thangthar ten theihnghilh phal chi a ni lova, theihnghilh hlen mai atan a uihawm ka ti a ni. (Article kut ziaka kan dawn thenkhat hi kan chhiar hlei thei thin lova, Mihring hming emaw hmun hming etc chhiar hleih theih loh a tam hian kan buai rei thin khawp mai. Fel fai tak, chhiar nuam leh awlsam ni thei thei thin se a tha ngawt ang. Ed) MIPUI HNENA LAWMTHU SAWINA LEH NGENNA MUP te chuan kan khawtlang a lo fai a, a lo thianghlim theih nan V/C te hruiaina hnuaiah Ui khuahkhirh hna chu kan kalpui mek a. Ui Kan mansak tawh te leh ui neitu ten hlim taka chawi ngai pawh chawi a, kan khawtlang tana kan thawkho zel hi lawmawm kan ti a, Ui neitute hnenah lawmthu kan sawi a ni. Kan thil neih te vantlang leh khawtlang tan an hnawk em tih ngaihtuah chunga kan khawtlang a chenho zel turin mipuite kan ngen tak meuh a ni e. Sd/- F.Rohmingthanga Sd/- H.Lalruala Secretary Chairman MUP JOINT COMMITTEE, THINGSULTHLIAH.