Editor: H.

Malsawmtluanga
Ph: 9615425400 / 9436784572 sawma6970@gmail.com

Thingsulthliah Students Union

Jt. Editor: Lalromawia Ph:2370285 Correspondents: K.Khualluna : 9862217691 Lalbiaktluanga : 9612322711 Ramngaizuala : 9862386148 ramngaiahmar@gmail.com

Thingsulthliah Sub - Town Weekly Newspaper

VOL. VII

No. 39 THINGSULTHLIAH

Ni 12 October 2013

(INRINNI)

INKHAWMPUI HRANG HRANG NEI MEK October thla kan chuangkai a, Kohhran hrang hrang ten Inkhawmpui an nei mek a; kan sub-town nena inkaihhnawih inkhawmpui nei mek te chu a hnuaia mi ang hi a ni:CATHOLIC NAUPANG KHAWMPUI : St. Thomas Church, Thingsulthliah-ah Seling Paris Catholic Naupang Inkhawmpui tun Pathianni hmang hian neih mek a ni a, Naupang te Thu leh Hla hmangin intihsiakna an nei ang a, Zirtirtu ten Hla-ah intihsiakna an nei bawk ang. SDA INKHAWMPUI : Seventh Day Adventist Kohhran ten Seling Biakinah Aizawl East Bial Danial Pawl Chhantu Khawmpui an nei mek a, Thupui- Mitin mamawh Isua tih a ni. Speaker bik awm lovin Pastor leh Tirhkoh hrang hrang ten Thupui hmang hian Pathian thuchah an sawi thin ang. Khawmpui hian chhim lamah Darlawng, hmar lamah Darlawn thleng huamin Aizawl khawpui chhungah Republic veng leh chhuah lam zawng a huam a, Khawmpui mikhual te hi Seling M/S leh P/Sah te thlentir an ni hlawm a, an ei leh in pawh a huhovin an thlenna hmunah siamsak an ni. TUIRINI PRESBYTERY : Tuirini Presbytery vawi 8-na chu Kepran-ah neih mek a ni a, nimin leh vawiinah Rorel inkhawm neih a ni ang. Tun Khawmpui-ah hian Upa nemngheh tur paruk an awm a, chungte chu- Hospital Veng kohhran atangin Pu Rosiamliana leh Pu C.Zosangliana, Seling kohhran atangin Pu H.Lalhleia, CTI atangin Pu V.K.Lala, Pehlawn atangin Pu Tawnluia leh Khawruhlian Vengthar atangin Pu CD Lianchungnunga te an ni. Naktuk Pathianni chawhma inklhawmah nemngheh an ni ang. Upa sun tur pathum awmin, chungte chu Upa Dardfailova, Seling, Upa PC Rokhuma Kepran leh Upa Rothianga Khawruhlian Vengthar te an ni. Naktuk chawhnu inkhawmah sunna hi neih a ni ang. Tun tum Khawmpui-ah hian Pro-Pastor hna dil pathum an awm a; Khawmpui hmanpuitu Rev K.Lalthangmawia, Statistician, Mizoram Synod leh ATC zirlai pahnih an awm bawk. UPC(NEI) LAD KHAWMPUI : UPC(NEI) General LAD Conference chu Zermabawk Vengpuiah neih mek a ni a; Tst Pastor Bial atangin nimin khan kal an awm nual a, vawiin hian thahnem tak an khawmpui hmang hian an kal leh ang. LALCHHUNGKUA UNITY : Lalchhungkua Unity, Mizoram Hqrs Khawmpui chu Serchhip-ah neih mek a ni a, vawiin hian kan sub-town atangin khawmpui hmang tur an kal hlawm ang. PANDAL SA TAN Tunkar Thawhtanni atang khan Central South Division SAY Rally thlenna tur Pandal chu Thingsulthliah Playground-ah sak tan a ni a. Pandal Structure hi Central KTP ta hawh niin, a dung feet 123 leh a vang feet 100 a ni. Structure hi Masihi Sangati khawmpui turin an hawh ve avangin a tira ruahman aiin a zim ta a, kan thu lakkhawm lai Ningani khan a Structure fit zawh a ni.

KAISANG Pu Vanlalsawma, MF&AS, Dy. Director(Accounts), PHED-a awm chu Jt. Director-ah a kaisang a. Lunglei-a Account & Treasuries Office hawn thar a enkawl dawn a ni. Pu Vanlalsawma hi Pu K.Lalrema, D/A fapa a ni a; a kaisang hi Simeikhu-in kan lawmpui tak zet a ni. TRANSFER Pu H.Roliana, D/A, Horti. Extension Officer, Chhingchhip-a thawk mek chu Tst Circle-ah sawn a ni a; Inthlan zawh lamah a rawn zawm beisei a ni. YMA CONFERENCE KARLEHAH Karleh Thawhlehni atanga Ningani thleng awh tur YMA General Conference Khawbung a awm turah kal turin member te an inpuahchah mek a. Kan sub-town Branch hrang hrang atang pawhin kal tum an awm nual a ni. SIKUL HLA Tst Govt. High School Hla, Pu Siamhnuna phuah(a thu leh thluk) chu Zaipawl te sak turin Pu Lalruatfela S/o L.Suana, Durtlang chuan School hotute ngenna angin a hun chep tak karah Solfa-a dahin(Harmonized) a rawn peihfel ta a, High School Jubilee Zaipawl ten hun remchang hmasa atangin an zir tawh dawn a ni. SELING TUILAK CHHIA Tunkar thawhlehni atang khan Seling Tuilak mek chu a chhia a, a chhe lai hji ngawrh taka zawn nghal niin tunkar ningani thleng khan a chhe lai hi an la zawng hmu lo. Hetih laiin Seling Tuilak phase-II buaipuiin tunkar chhungin Seling atangin hnathawktu mi 5 ram lamah an riak lut bawk. YMA KUMPUAN DUTY NGAWRH Tlangnuam Branch YMA Kumpuan sub-Committee te khawchhung leh Pioneer Camp Gate-ah chhun zan zawmin an duty ngawrh hle. Duty dan tur Routine mumal tak karleh atangin siam an tum niin kan lo dawng. Tun thlenga zu an man zat chu a sen chi um 16 leh rakzu fun 12 a ni.