1

Ga Shagawp LaiKa A Matsun Maroi Mungga Ni

Ga Hpaw
Ga shagawp laika gaw Shawlumon (1:1; 10:1; 25:1) ka ai ga
shagawp hte Shawlumon a matsun maroi hta mahta nna kaga masha ni ka ai
ga shagawp ni rai nna, shi si ai hpang shaning tsumra na ai hpang she
kahkin mahkawng da ai laika re. Ga shagawp laika hta hpaji-byeng-ya a
manu dan ngu ai hpe tsun sang lang da nga ai. Hpaji byeng-ya a n pawt hte,
gindai hkri dun gaw Karai Kasang re ngu ai lam hpe tsun da ai re. Ga
shagawp laika hta lawm ai lam ni gaw, shani shagu na Hkristan asak hkrung
lam a matu manu dan ai mastun maroi mungga ni rai nna; Karai Kasang a
ntsa, tinang hkum tinang, masha wa a ntsa, ganing re ai myit jasat tawn let
asak hkrung ra ai ngu ai lam ni hpe matsun madun da ai re.
Hpaji Byengya:- Ga shagawp laika gaw hpaji byeng-ya a lam hpe
tsun da ai rai tim, mungkan lam hku, mungkan hpaji ni hpe sharin hka ja
nna, lu la mai ai baw n re ai sha, shani shagu asak hkrung lam hta Karai
sharawng awng ai hku asak hkrung hkawm sa let she lu la mai ai lam
matsun madun da nga ai. Hpaji byeng ya hpe gara hku lu la mai ai lam;
Hpaji byeng-ya a maka kum la hte manu dan ai lam ni hpe matsun madun
da ai re. Hpaji beng-ya hpe machyu ai ni a asak hkrung lam hte, hpaji bengya hpe n tam ai (sh) n gawn n sawn di ai ni a asak hkrung lam ni n bung ai
lam shara law law kaw matsun da nga ai hpe laawu na chyumga ni hta mu
lu ga ai.
(1) Hpaji beng-ya :- 2:6 Yehowa gaw hpaji beng-ya jaw nga ai; shi a
n-gup na, chye chyang ai hte zai byeng ya pru nga ai.
(2) Hpaji beng-ya a n pawt : - 1:7 Yehowa hpe hkrit hkungga ai myit
gaw hpaji byeng ya a n pawt rai nga ai; myit n gring ai ni chyawm gaw
hpaji beng-ya hte sharin achyin ai ga hpe gang kau ma ai. 9:10 Yehowa hpe
hkrit hkungga ai myit gaw, hpaji beng-ya a npawt rai nga ai; chyoi pra ai wa
hpe chye chyap ai myit gaw zai beng-ya rai nga ai.15:33 Yehowa hpe hkrit
hkungga ai myit gaw hpaji sharin ai lam rai nga ai; arawng sadang a shawng
e myit shagrit ai rai nga ai.
(3) Hpaji byeng-ya hpe gara hku lu la mai a ta?:- 1:7 Yehowa hpe
hkrit hkungga ai hku nna lu la mai ai. 2:1-6 Hpaji byeng-ya ga hpe madat,
myit kata bang da, dai hpe gumhpraw zawn tam, makoi da ai sut rai hpe
zawn sawk yu ai hku nna lu la mai ai. 11:2 myit shagrit ai ni hpaji byeng ya
lu la ai. 19:20 Hpaji rawng ai wa tai na matu hpaji daw ai ga madat la u,
sharin shaga ai ga hta la u. 29:15 shingna hte shadum shahprang ai gaw,
hpaji hpe shapraw nga ai.
(4) Hpaji beng-ya a laklai ai maka kumla:- 10:5 Nmut ta e shu la ai
wa gaw hpaji rawng ai kasha rai nga ai; mam dan ten e yup ai wa chyawm
gaw kaya hkrum ai kasha rai nga ai.10:8 Hpaji rawng ai wa gaw, hkang da
ai ga hkam la nga ai; baw law ai angawk wa chyawm gaw, kadawng mat na
ra ai. 10:14 hpaji rawng ai wa gaw, chye machye hpe mahkawng da nga

2
ai;myit n su ai wa a n-gup chyawm gaw, hten byak ai hte ni nga ai.10:19 ga
law law tsun ai hta,yubak n lawm ai n nga lu ai; tinang a n-gup shim da ai
wa chyawm gaw myit su ai wa rai nga ai.10:23 angawk ai wa gaw, yubak
galaw na, pyaw lam nawn nga ai; nyan rawng ai wa mahtang hpaji hpe dai
zawn nawn nga ai.
14:8 tinang sa wa ai lam chye lu ai wa gaw myit su ai wa a hpaji rai
nga ai; angawk ai ni maw ai lam chyawm gaw, hkalem ai hkrai rai nga ai.
15:7 Hpaji rawng ai ni a n-gup gaw, chye chyang ai gat hkai nga ai; angawk
ai ni a myit chyawm gaw dai zawn n rai. 15:31 Asak hkrung ai lam hte seng
ai shadum shahprang ga madat ai wa gaw, hpaji beng-ya rawng ai ni hte rau
mazum nga na ra ai.16:23 Nyan rawng ai wa a myit gaw shi a n-gup hpe
sharin nna, shi tsun ai ga hta chye chyang ai lawm lu ai.19: 8 Hpaji lu ai wa
gaw, tinang myit masin hpe tsaw ra na ra ai; nyan hpe manoi ai wa gaw mai
kaja ai hpe hkam la na ra ai. 19:11 Sadi sahka re ai wa gaw myit galu kaba
nga ai rai nna, masha wa shut ai hpe hkam mana ai gaw shi a arawng rai nga
ai.20:1 Tsabyi jahku hkalem chye nga ai; chyaru gaw kabring kabrawng
shabyin nga ai. Dai hte nang pa hkawm ai wa gaw hpaji rawng nga ai n
rai.21:11 N kaw n law re ai wa ari hkrum yang, nyan tang ai wa gaw dum
hprang nga ai. Hpaji rawng ai wa hpe sharin yang shi chye chyang ai lam jat
wa nga ai. 21:30 Hpaji gade, chye chyang ai myit gade, hpaji daw ai lam
gade rai ti mung, Yehowa hpe dang lu na lam n nga ai.
(5) Hpaji a manu : - 3:13 Hpaji byeng-ya mu hkrup ai hte, chye
chyang ai myit lu la ai wa gaw a nga ai 3:14 hpaji hpaga ga ai gaw
gumhpraw hpaga hte de a amyat gaw ja jet hte grau akyu nga ai:15 dai gaw
patamya lung seng hte grau hpu nga ai rai nna, nang ra ai hpa rai ti mung
dai hte shadawn lu ai n rai.:18 Shi gaw shi hta manoi manat ai ni a matu
asak hpun rai nga ai; dai hpe n tat kau ai wa gaw a nga ai. 8:35-36 Ngai hpe
mu tam ai wa gaw, asak hpe mu la nna, Yehowa a chyeju mung hkam la lu
nu ai. :36 Ngai hpe shut hpyit ai wa chyawm gaw tinang a asak wenyi hpe
shut kau nu ai; ngai hpe n dawng ai ni yawng si ai hpe tsaw ra nga ma ai.
10:1 Hpaji rawng ai kasha gaw kawa hpe kabu shangun nga ai; angawk ai
kasha chyawm gaw kanu hpe yawn shangun nga ai. 12:18 Nhtu hte galun ai
zawn laji magra nna tsun ai wa mung nga ai; hpaji rawng ai wa a shinglet
chyawm gaw, ana pyi shamai ya lu ai. 29:3 Hpaji byeng-ya tsaw ra ai wa
gaw, kawa hpe kabu shangun nga ai; Shawa num ni hte mazum ai wa
chyawm gaw, sut gan ginlut kau nga ai.
(6) Hpaji hpe tam u: -4:5 Hpaji byeng-ya hpe tam la u, zai byeng-ya
hpe tam la u;Nye n-gup ga hpe hkum malap, hkum gang kau et.:6 hpaji
byeng-ya hpe hkum kau da et; shi nang hpe bau sin na ra ai; shi hpe tsaw ra
u, nang hpe makawp maga na ra ai:7 hpaji byeng-ya madung rai nga ai; dai
rai nna, hpaji byeng-ya tam la u; nang lu malu mahkra hta zai byeng-ya hpe
grau tam la u.:8 Shi hpe shagrau u, shi nang hpe shagrau shatsaw na ra ai;
shi hpe manoi manat yang, nang hpe arawng sadang jaw na ra ai. :9 Shi gaw
na a baw hta tsawm htap ai shanghkawng, shagup ya nna; daru magam re ai
janmau nang hpe ap ya na ra ai.

Ding hku hte seng ai matsun ga ai: (1) Dinghku kawa gaw sadi dung kang ka ra ai. Masha jan shaw
ai wa chyawm gaw nyan n rawng nga ai; shi a asak jasum kau mayu ai
majaw, dai lam galaw nga ai (6:32). kundinghku hpe lit la bau maka ra ai.
Chyinghka gaw hkinbawng hta, kayin wa ai hte maren; lagawn ai wa gaw,
tinang a yup ra hta kayin nga ai; Lagawn ai wa gaw, tinang a lata di hta
manaw bang da ti mung, n-gup de hta bang na pyi n kam nga ai. (26:14-15).
6:6-8 Dai zawn re ai wa hpe Kakyin hpang de sa yu nna sharin la shangun
nga ai. Lagawn ai wa e Kakyin hpang de sa su; shi a arawn alai hpe sumru
yu nna, hpaji rawng u. Shi gaw hpaawn wa agyi wa up ai wa n lu ti mung,
nlum ta e shi a sha hpa, nmut ta e shi a sha jarit hpe mahkawng da nga ai.
Lagawn ai wa e, nang gaw gaten du hkra yup nga na n ta? Yup ai kaw na
galoi hprang na n ta? :10 hkring mi yup, hkring mi sha naw yup pyaw nna,
lata hkintum let, naw kaleng taw nga yang, :11 matsan mayan ai gaw damya
wa zawn, sut gan ginlut kau ai gaw hpyen wa zawn, du na ra ai.
(2) Shakawn ging ai num a lam hpe 31:10-31 hta tsun da nga ai.
Shi gaw kaja dik ai lam ni hku dinghku hpe gaw gap nga ai;Shi dinghku
gaw shi a sari dasang rai nna, madu wa mung shi hta hpa nga ai; bungli
galaw shakut ai hte dinghku a shang gumhpraw tam ai; matsan mayan ni
hpe garum shingtau ai; N-gun lagaw hte sari sadang hpe hpun dagraw nga
ai; hpaji ga, hte n gaw n wai ga tsun ai; lagawn ai shat n sha ai; kashu/sha ni
hte madu wa a lu n dai ngu shagrau ai; Yehowa hpe hkrit hkungga ai num
re.
(3) Kashu/sha ni a matu kun dinghku gaw asak hkrung lam a rip kawp tara
ni hpe sharin la ai jawng re. 22:6 ma kaji hpe shi hkan mai ai lam hta
sharin u; shing rai yang, dingla wa yang pyi, lam n yit na ra ai. Kashu/sha
ni gaw kanu/wa hpe hkungga ra ai hte ga madat ra ai. 1:8-9 Ngai sha e wa
a sharin achyin ai ga madat mara u; n nu a tara hpe mung hkum gang kau et.
:9 dai lam hte gaw na a baw hta tsawm htap ai shanghkawng, na a du hta
gali ai hkachyi tai na ra ai. 3:1-4 Ngai sha e, nye tara hpe hkum malap kau
et, na a myit masin gaw, ngai htet da ai ga hpe matsing u ga.:2 kaning rai n
me law, dai gaw asak galu ai shaning shata hte ngwi pyaw ai lam, nang hpe
shalaw jahtam ya na ra ai.:3 chyeju myit hte kangka re ai myit hkum kau da
et; dai hpe na a du hta gali nga u. Na a kraw lawang lungpa hta tawk ka da
u.:4 shing rai yang, K.K a man e mung, masha a man e mung, nang myi
man pa nna. Kajai gumhkawng ai hkrum na ndai. 10:1 Hpaji rawng ai kasha
gaw kawa hpe kabu shangun nga ai; angawk ai kasha chyawm gaw kanu
hpe shayawn shangun nga ai. 15:20 hpaji rawng ai kasha gaw kawa hpe
kabu shangun nga ai; angawk ai wa chyawm gaw kanu hpe n kaw n law di
wu ai. 20:20 kanu/wa hpe dagam ai wa gaw, shi a pyendin, htat ai nsin hta
si mat na lu ai.13:1 Hpaji rawng ai kasha gaw, kawa sharin shaga ai madat
nga ai, n kaw n law re ai wa chyawm gaw daru ai ga n madat nga ai. 19:26
kawa a sut gan hpe ginlut kau nna, kanu hpe shaden kau ai kasha gaw,:27
ngai sha e shadum shahprang ai ga gang kau yang, chye chyang ai lam yit
kau ai hte maren rai nga ai. 30:17 tinang a kawa hpe asawng nna, kanu a ga
n kaw madat ai wa a myi hpe hkaraw na u hka ni malawk kau ya nna,
langda hkalung ni sha kau na mara ai. 28:24 mara n nga ai nga nna tinang a

4
kanu/wa hpe hpya sha ai wa gaw, hten byak ai wa a kanawn manang rai nga
ai.

Hpaga dingga hte seng ai lam:

Hpaji byeng-ya gaw hpaga dingga hte sut rai n tsa gara hku jai lang
na ngu ai hpe sharin ya nga ai. 22:16 tinang sut gan shalaw na matu, matsan
mayan ni hpe zingri ai wa hte, sut su ai ni hpe jaw ai wa gaw, matsan mayan
hkrum na ra ai.11:1 Yehowa gaw n man ai joi jang hpe matsat nna, teng man
ai joi si hpe, ra sharawng nga ai..22:28-29 Moi, nji nwa ni jung da ai, lamu
ga jarit shadaw hpe hkum sit kau et. :29 tinang amu hta marai shapraw ai
wa hpe, nang mu hkrup n ni? dai wa gaw, yu maya ni a man e n rai,
hkawhkam wa a man e she tsap nga na ra ai. 16:8 Ding hpring ai hte loi mi
sha lu ai gaw, n tara ai hte law law lu la ai hta, grau mai nga ai.

Mung up ai ni hte seng ai matsun ga:

28:15-16 Matsan mayan ni ntsa e up ai, tara n lang ai du wa gaw,
shabam ai hkanghkyi hte nwan hkawm ai tsap rai nga ai. :16 Nyan n rawng
ai du gaw gum shem du rai nga ai; law hpa myit n rawng ai du chyawm
gaw, asak galu na ra ai.16:10 Hkawhkam wa n-gup hta shingran ga rawng
nga ai.:12 hkawhkam tingnyang gaw dinghpring ai hte sha grin nga lu ai
majaw; hkawhkam ni tara n lang ai amu galaw yang, matsat shabat rai nga
ai. 20:26 Hpaji rawng ai hkawhkam gaw, n hkru ai ni hpe tsan kau nna,
shanhte a ntsa e hpwi rin shangun nga ai. :28 chyeju hte teng man ai gaw,
hkawhkam wa hpe shagrin da nna, shi a tingnyang gaw, chyeju hta gaw da
nga ai.31:3-5,8-9 Na a n-gun marai numsha ni hpe hkum jaw kau et. Hkaw
hkam ni hpe jahten shabyak ai lam hkum hkan et.:4 hkawhkam ni gaw
tsabyi lu na hte, du ni gaw chyaru kanang nga a ta? nga nna tsun ai gaw n
htuk nga ai.:5 shanhte chyaru lu ai hte tara hpe malap kau nna, matsan
mayan ni hpe n tara ai hku jeyang na tsang ra ai. :8 kam hpa kata ai ni a
amu hpe makawp maga nga let, maa ai ni a matu, na a n-gup hpaw u;:9 na a
n-gup hpaw let, teng man ai hku tara dara u; matsan mayan hte nni nkri
hkrum ai ni hpe, teng man ai hku daw dan u.

Myit masa ningja hte seng ai matsun ga ni:

10:12 Ndawng n yawt ai myit gaw, ga law ga la shapraw nga ai;
tsaw ra ni myit chyawm gaw, yubak yawng hpe magap kau nga ai.

Dinghpring ai hku asak hkrung ai a akyu ara

3:1-4 Ngai sha e, nye tara hpe hkum malap kau et, na a myit masin
gaw, ngai htet da ai ga hpe matsing u ga. :2 kaning rai n me law, dai gaw
asak galu ai shaning shata hte, ngwi pyaw ai lam nang hpe shalaw jahtam ya
na ra ai.:3 chyeju myit hte kangka re ai myit hkum kau da et; dai hpe na a
du hta gali nga u, na a kraw lawang lungpa hta tawk ka da u. :4 shingrai
yang, K.K a man e mung, masha a man e mung; nang myi man pa nna, kajai
gumhkawng ai hkrum na n dai.
10 :2 N tara ai sut gan gaw, hpa akyu n nga ai: dinghpring ai lam
chyawm gaw, si ai kaw na mawai la nga ai. :3 Yehowa gaw ding hpring ai

5
wa a myit masin hpe kawsi jahkrum ai n rai; tara n lang ai ni a myit ra ai
lam hpe chyawm gaw shi gang kau nga ai.:6 ding hpring ai wa a baw ntsa e
chyeju a nga nga ai; tara n lang ai ni a n-gup chyawm gaw, kashun kashe a
up nga ai.:7 ding hpring ai wa a masat dingsat gaw a nga ai; tara n lang ai
wa a amying chyawm gaw tsam mat na ra ai. :11 dinghpring ai wa a n-gup
gaw asak hka htung rai nga ai; tara n lang ai ni a n-gup chyawm gaw,
kashun kashe a up nga ai.:16 dinghpring ai ni a amu gaw, asak lam rai nga
ai; tara n lang ai ni a amyat gaw, yubak rai nga ai. :20 ding hpring ai wa a
shinglet gaw, gumhpraw jet hte bung nga ai; tara n lang ai ni a myit masin
gaw, hpa n hkaw nga ai.:21 ding hpring ai ni a n-gup gaw, masha law law
hpe bau nga ai; myit n su ai ni chyawm gaw, nyan kata ai majaw si ma
ai.:24 tara n lang ai wa hkrit ai lam, shi a ntsa e du na ra ai; ding hpring ai ni
a marit ai lam dik wa na ra ai. :25 tara n lang ai wa gaw, bung sha zawn
hkoi mat na ra ai; ding hpring ai wa chyawm gaw htani htana a grin nga na
ra ai. :28 Ding hpring ai ni a myit mada ai lam gaw, kabu gara lam rai nga
ai; tara n lang ai ni a myit mada ai lam chyawm gaw hten mat na ra ai. : 31
Ding hpring ai wa a n-gup gaw hpaji byeng-ya shapraw wu ai; masu magaw
chye ai shinglet chyawm gaw, atawk kau ai hkrum na ra ai. :32 Ding hpring
ai wa a n-gup gaw, tsaw ra mai ai lam chye nga ai; tara n lang ai ni a n-gup
chyawm gaw, manai ai ga hkrai tsun nga ai.
11:8-10 Ding hpring ai wa gaw, nni nkri kaw na lawt wa nna, tara n lang ai
wa, shi a malai hkrum sha na ra ai. :9 n shawp ai wa a n-gup gaw, htingbu
wa hpe shayuk kau nga ai; ding hpring ai wa chyawm gaw, chye chyang ai
hte lawt lu na ra ai. :10 Ding hpring ai ni nga mu nga mai yang mare ting
kabu nga ai; tara n lang ai wa, hten byak hkrum yang chyawm gaw, garu
jahtau nga ma ai. :19 ding hpring ai gaw asak lam rai nga ai; yubak hpe
hkan tam ai wa gaw, shi si na hpe hkan tam nga ai. :23 Ding hpring ai ni
marit ai hku, mai kaja ai hkrai rai nga ai; tara n lang ai ni a myit mada lam
chyawm gaw, pawt sindawng ai hkrai rai nga ai. :28 tinang a sut gan hta hpa
ai wa gaw, kadawng mat na ra ai; ding hpring ai ni chyawm gaw, tsit lali ai
hpun lap zawn prut wa na mara ai. :30 ding hpring ai wa a asi gaw asak
hpun a asi rai nga ai. :31 yu u, ding hpring ai wa pyi ga n tsa e ari hkrum
nga ai rai yang, tara n lang ai wa hte yubak kap ai wa grau nna hkrum na n
rai ni? 12:21 ding hpring ai wa gaw shoi hpa shoi rang n hkrum nga ai; tara
n lang ai ni chyawm gaw n hkru ai hte hpring na mara ai. 13: 21-22 Yubak
gaw mara kap ai ni hpe hkan shachyut nga ai; ding hpring ai ni chyawm
gaw, mai kaja ai akyu hkam la na mara ai. :22 mai kaja ai wa gaw kashu
kasha ni matu Sali wunli ngam da nga ai; yubak kap ai wa a sut gan
chyawm gaw, ding hpring ai wa a matu mahkawng da nga ai.

Gumrawng ai hte shagrit shanem ai: 11:2 Gumrawng gumtawng yang kaya kahpa pru; myit shagrit ai ni
hpaji byeng-ya lu. 13:10 Gumrawng ai majaw ga law ga la hkrai byin nga
ai; hpaji daw ai ni a ga hkan ai wa, hpaji rawng nga ai. 16:18 Gumrawng
gumtawng ai gaw, hten byak ai a shawng e, myit kaba ai gaw, kadawng mat
ai a shawng e, rai nga ai. 29:23 Gumrawng ai wa gaw, shagrit kau ai hkrum
na ra ai; myit nem ai wa chyawm gaw, arawng sadang lu la na ra ai.

Myit kadun ai hte myit galu ai: -

14:17 Myit kahtet ai wa gaw, n shawp ai amu shapraw nga ai; n

kaja ai hpaji daw ai wa hpe masha ni n dawng na maru ai. :29 myit galu ai
wa gaw, hpaji kaba rawng nga ai; myit kadun ai wa chyawm gaw, grai
angawk nga ai. 15:18 pawt sindawng ai wa gaw, ga law ga la shapraw nga
ai; myit galu ai wa chyawm gaw mye kau nga ai. 19:19 myit grai kahtet ai
wa gaw ari hkrum na ra ai; shi hpe lang mi mawai la yang, bai mawai la ra
na ra ai. 22:24-25 Myit kadun ai wa hte jinghku hkum hku et; sindawng
katawt ai wa kaw hkum hkan et; :25 hkan yang nang shi a lam sharin la nna,
dai gaw na a myit masin a mahkam tai na ra ai. 29:22 pawt sindawng ai wa
gaw ga law ga la shabyin wu ai; myit kahtet ai wa gaw, tara grai tawt lai nga
ai.

N dawng n yawt ai myit hte tsaw ra myit:10: 12 Ndawng nyawt ai myit gaw ga law ga la shapraw nga ai;
tsaw ra ai myit chyawm gaw, yubak yawng hpe magap kau nga ai.:18
Ndawng ai myit up da ai wa gaw masu chye ai n-gup tu nga ai; masu ai shi
tsun shabra ai wa gaw, angawk ai wa rai nga ai. 15:17 kawn tawn ai usu hpe
n ju n yawt let sha ai hta, tsaw ra myit hte sha ai shat mai lap ma mi gaw
grau mai nga ai. 17:9 Masha wa mara hpe magap da ai wa gaw, tsaw ra
galaw nu ai; tsun shabrawng dat ai wa chyawm gaw jinghku ni hpe shabra
kau nu ai.

Lagawn ai hte shakut sharang ai: 6:6-8 Lagawn ai wa e kakyin hpang de sa su; shi a arawn alai hpe
sumru yu nna, hpaji rawng u. 10:4 lagawn ai lata gaw matsan mayan hkrum
nga ai; shakut sharang ai lata chyawm gaw, sut su nga ai. 12:24 N gun
marai rawng ai wa gaw up nga na ra ai; lagawn ai wa chyawm gaw n
chyang tai na ra ai.:27 lagawn ai wa jau gawng gawng ti mung, shi lu ai
shan pyi; n kam kakang ai; shakut sharang ai wa chyawm gaw, manu ging ai
sut gan lu la na ra ai. 19:15 lagawn ai myit gaw yup pyaw shangun nna,
amu makan n tsang ai wa gaw, kawsi hpang gara hkrum na ra ai. 21:25
lagawn ai wa gaw, amu n galaw mayu ai majaw, tinang marit ai myit hte si
wa nga ai.

Magam bungli hte seng ai matsun ga:22:29 Tinang amu hta marai shapraw ai wa hpe nang mu hkrup n ni?
dai wa gaw, yu maya ni a man e n rai, hkawhkam wa a man e she tsap nga
na ra ai.24: 30-34 Ngai gaw lagawn ai wa a yi hkauna hte nyan n rawng ai
wa a tsabyi sun makau hku garet hkawm yu yang, yu u, ju hpun hkrai tu
nna, ga ting tsamat kaup nga ai hte de a nlung bunghku run mat nga ai hpe,
ngai mu nngai. Shaloi ngai mada yu let sumru yu nna, sharin achyin ai lam
hkam la nngai, hkringmi yup, hkring mi sha naw yup pyaw nna, lata
hkintum let, naw kaleng taw nga yang, matsan mayan ni gaw damya wa
zawn sut gan ginlut kau ai gaw, hpyen wa zawn du na ra ai.

Yehowa hpe hkrit hkungga ra ai lam:

3:7 Ngai hpaji rawng nngai, hkum myit et; Yehowa hpe hkrit
hkungga nna, yubak hpe koi kau u. 14:26-27 Yehowa hpe hkrit hkungga ai
gaw, shamyet shanat shara kaba rai nga ai. Kasha ni mung shingbyi
shingwung shara lu na mara ai. :27 Yehowa hpe hkrit hkungga ai gaw, asak
hka hpawk rai nga ai; de a majaw si ai mahkam hta na, lawt lu na rai nga ai.
15:16 Yehowa hpe hkrit kamyin let, lu ai kaji sha gaw, nji nmu hte lu ai sut
gan law law hta grau mai nga ai. 16:6 Yehowa hpe hkrit hkungga ai myit hte
yubak hpe koi kau lu nga ai. 19:23 Yehowa hpe hkrit kamyin ai myit gaw,
asak lam rai nga ai; dai myit rawng ai wa gaw apyaw sha nga lu na ra ai; shi
gaw aru ara hkrum na ra ai, n rai.
22:4 Myit nem ai hte Yehowa hpe hkrit hkungga ai akyu gaw, sut
gan, arawng sadang hte asak ai nga ai. 23:17 Yubak galaw ai ni hpe hkum
manawn et; Yehowa hpe shani ting hkrit kamyin nga u. 24:21 Ngai sha e,
Yehowa hte hkawhkam wa hpe, hkrit kamyin nga u; myit gale galau re ai ni
hte hkum kanawn et.
Ga Hpungdim
Ga shagawp laika hta shinggyim asak hkrunglam a matu Karai Kasang yaw
shada da ai hpunda hpe matsun madun da ai re.Gara gaw Karai Kasang a
man e manu dan ai, mai kaja ai, gara gaw manu n dan ai, n kaja ai ngu ai
lam ni hpe ginhka dan let shadum sharin da nga ai. Tengman ai lam hpe
chye na hkawn hkrang ai hte Hpaji beng-ya rawng ai shinggyim masha,
dinghku, amyu ni tai let Karai Kasang a hpung shingkang hpe shadan
jahkung nga ga!

Ginlen shalai ai,

Rev. Dr. Lahpai Awng Li
MIT, Insein.
Yangon.