1

Chyum Laika Gaw Makam Hte Sak HKurng Lam a Matu Daru Magam Hpung Shingkang Rawng
Ai Karai Kasang A Mungga Madung Re
(Sole Authority of Scripture for faith and practice).
Ga Hpaw: Dai ni mungkan ntsa hta Hkristan wuhpung wuhpawng law law nga nga ai hte wuhpung
wuhpawng langai hkrai gaw tinang a wuhpung wuhpawng, a lak lai ai kum la hte tsap dahpran hkam la ai
lam ni n bung ma ai re. N kau mi gaw,kasa ni a kamsham ai lam (Apostles' Creed), nkau mi gaw Nicence
kamsham lam (Nicence Creed) ni hpe madung dat mat ai re. Rai tim Hka Lup Hpung ni gaw, Hka Lup
Hpung ni a "lak lai ai hkam la kam sham lam (The distinctiveness of the Baptist)" ngu ai hku she tinang a
lak lai ai masat kumla hte tsap dahpran shara shatai ai re. Dai Hka Lup Hpung ni a "lak lai ai hkam la
kam sham lam" hta, chyoi pra ai Chyum Laika hpe hkik hkam dik Karai hpaw shadan lam hku hkap la
kam sham ai re.
A Matut Mahkai Ai Munnga Re (Communication)
Hka Lup Hpung ni hkam la ai hta Karai Kasang gaw chyum laika hte shinggyim masha langai
hkrai hpe mung, shinggyim wuhpung wuhpawng hpe mung matut mahkai ai re. Karai Kasang shinggyim
masha ni hpe hpaw shadan dan ai lam amyu myu nga ai hta na, chyoi pra ai Chyum Laika gaw Karai
Kasang a lam, Karai Kasang a shingni maka kum la, arawng sadang hpung shingkang, myit masa ningja,
yu lahku bau maka ai hte galaw gun hpai nga ai ai magam bungli , sharawng awng ai lam etc., ni hpe chye
na la shangun ai sha n-ga, Karai Kasng hte htinglu htinglai sak hkrung lu na matu matut mahkai ya nga ai
re. Dinghta mungkan shinggyim masha ni lang ai ga laika hte ka da ai rai tim, Karai hpe tam ai myit, kam
sham ai myit hte kyu hpyi nna hti hkaja ai shaloi, kaga shinggyim masha ni ka da ai laika buk ni hte n
bung ai sha, Karai a matsun maroi mungga ni hpe chye na la lu shangun ai re.
B Karai Kasang a Wenyi shung ya ai hte ka da ai lam
Chyoi pra ai Chyum laika gaw Karai Kasang shinggyim masha ni hpe hpaw shadan dan lam hpe
shinggyim masha ni kaw na, Karai hpaw shadan ya hkrum ai ni Wenyi shungya ai chyeju hte ka da ai re.
Rai tim Wenyi gaka hku shung ai ngu ai hte seng nna ga san nga nga ai ai. Wenyi shung ai shaloi gasi ga
ngau langai hkrai hpe hkan ka na matu ading tawk matsun ai (Dictation-verbal inspiration) lam hku n rai.
Hpaw shadan hkrum ai wa wanglu wanglang myit sawn daw dan lu ai kaw lam madunjahkawn jahkrang
ai hku nna she shung ya ai lam re (Dynamin inspiration). Karai maga de nna shung ya ai lam hta hkum
tsup kup ai hku lam madun jahkawn jahkrang tim mung shinggyim masha daw hku nna, dai aten na ga si
ga gau ni hte ka mazing ai re majaw, ga si ga ngau lang ai hta gawng kya ai lam ni, n hkum tsup ai lam ni
nga mai nga ai ai. Rai tim chyum laika hpe hti ai ni gaw, Karai hpe tam ai myit masin (sh) nawku kam
sham ai myit masin hte hti ai re majaw, chyoi pra ai wenyi a chye na hkawn hkrang la shangun ai chyeju
hte Karai Kasang a mungga hpe makam masham a matu hte asak hkrung lam a matu chyena hkawn
hkrang la shangun nga ai re. Chyum laika gaw Karai Kasang a Wenyi shung ya ai hte ka da ai re ngu tim
chyum laika buk hpe Karai Kasang hku nawku na matu n re. Chyum laika na ga si ga ngau ni hpe nawku
na matu mung n re. Htung shadik ai hku nna shani shani hti ra ai ngu ga si ga ngau ni hpe hti shadik ai
hku jai lang na matu mung n re. Chyoi pra ai chyum laika gaw Karai Kasang a wenyi shung ya ai hte ka
da ai re majaw, shinggyim masha a bawnu myit chye myit chyang san san hte sha gaw Karai Kasang a
mungga hpe makam masham a matu hte asak hkrung lam a matu chye na la lu ai lam n nga ai. Lachyum
chya na lam na matu hte tengman jaw ang ai hku lachyum chyehtai la na matu, Wenyi a chyeju ra ahkyak
ai ngu Hka Lup Hpung ni kam sham ai re.

2
C Chyum Laika a ahkang aya
Chyum laika gaw Karai Kasang a daru magam hpung shingkang rawng ai Karai Kasang a
mungga re. Chyum laika hta ka da ai lam ni gaw shinggyim masha ni a nyan hpaji, myit chye myit
chyang hte ka da ai lam n rai; Chyoi Pra ai Wenyi shung ya ai hte Karai Kasang lata san da ai masha ni
hku nna lai wa sai shaning hkying lahkawng ning jang daram hta ka da ai laika rai nga ai. Ga Shaka Ding
Sa hta laika buk 39 rawng nna, Ga Shaka Ningnan hta laika buk 27 rawng nga ai. Nga ai shara n bung ai,
nga sat nga sa madang n bung ai, amyu n bung ai masha marai 36-40 daram hpe We Nyi shung ya ai hte
ka da ai re. Rai tim, Chyum laika ting gaw Karai Kasang a lam hte Karai Kasang a matsun maroi ga ni
hpe ka da ai lam ni hkrai re. Dai majaw, chyum laika gaw Karai Kasang shi nan ka da ai matsun mungga
re ngu tsun lu nga ai.
Hkalup hpung ai hkam la hkan sa ai hta Chyoi pra ai chum laika gaw makam masham a matu
tsaw htum ai dai pawt dai hpang rai nhte tsaw dik ai ahkang aya hku lam woi lu ai Karai mungga re ngu
hkam la ai re. Ga Shaka Dingsa a Karai Karai mungga lam ni hpe Yesu Hkristu hku nna ja hkum shatsup
ai re majaw, Ga Shaka Dingsa hte Ningnan lahkawng hpe shingdaw ai shaloi mung, Ga Shaka Ningnan
hpe madaw she ahkang aya tsaw dik hku hkam la ai. Bai nna Hka Lup Hpung ni a makam hta, chyum
laika hta ka da ai lam madung ni yawng gaw Karai Kasang Yesu Hkristu hku nna hpaw shadan dan ai lam
hku chye na hkam la ai re.1
Ahkyak ai ahkang aya 3 nga ai. (1) Makam masham a matu Karai Kasang a tengman lam hpe hproi ra
hkra hpaw shadan dan da ai. (2) Kaga hpungtang hpaji, myit hkawn ningchyoi hpaji, shinggyim nga pra
masa hpaji, myit hpajai, etc., laika ni hte nbung ai aten shagu a matu tengman ai mungga re. (3) Kaga gara
laika buk ni hte mung n bung ai, Karai Kasang a daru magam ahkang aya hte tsun da ai mungga re.
D Chyum Laika a Daru Magam Hpung Shingkang (The Power of the Bible)
Lawu de na lam ni hku chyum laika a daru magam hpung shingkang hpe mu mada kam sham ai
re.
I. Chyum Laika gaw asak hte hpung shingkang rawng ai mungga re
Karai Kasang hpe chye chyang ai gaw htani htana asak lu la na matu re (Yawhan 17:3). Rai tim,
Karai Kasang gaw hpan da ai wa, shinggyim masha gaw hpan da hkrum ai wa re. Hpan da ai wa sha shi
hkum shi shinggyim masha ni chye chyang wa hkra shadan dan, tsun dan, shaleng dan ai lam nnga yang
shinggyim masha ni Karai Kasang hte shi a lam n chye chyang lu ga ai. Karai Kasang gaw shi hkum shi
Madu Yesu Hkrsitu hku hkum tsup kup hkra shadan dan ai re. Dai Yesu Hkristu a lam the, anhte hte rau
nga ai, yu lahku bau maka nga ai Karai ngu ai hpe, Chyoi Pra ai Chyum Laika hku nna chye la lu shangun
nga ai. Chyoi Pra ai Chyum laika gaw Yesu Hkrsitu a lam hpaw shaleng dan, tsun dan ai sha nga, dai
Yesu Hkristu hta htani htanna asak rawng nga ai hte, shi hpe kam sham ai ni yawng htani htana asak lu la
na lam hpaw tsun dan nga ai. Teng man ai Karai Kasang ngu ai kadai? Hpa majaw shinggyim masha ni
teng man ai Karai Kasang hpe kam sham ra ai? N hkru n hkra ai hte sawt ai lam ni hpe gara hku koi gam
na hte dinghpring ai lam hpe gara hku hkan tam asak hkrung na? Karai Kasang sharawng awng ai asak
1 Everett C. Goodwin, Down By The Riverside: A Brief History of Baptist Faith (Valley
Forge: Judson Press, 2002), 73.

3
hkrung lam hte Karai Kasang a man e gara hku daw jau let asak hkrung na? ngu ai lam ni hpe chye la lu
na matu chyum laika gaw daru magam hpung shingkang rawng ai hte, asak rawng ai tengman dik ai
mungga rai nga ai.
Mungkan hta laika buk law law wa Karai Kasang a lam, Chyum Laika a lam ni hpe ka da, tsun
sang lang dan da ma ai. Dai laika buk ni wenyi lam hta galu kaba kung hpan wa na lam a matu garum
shingtau ya nga ai. Rai tim, dai laika buk ni gaw chyum laika a shara hta n mai galai la kau nga ai. Hpa
majaw nga yang, dai laika buk ni gaw Karai Kasang a mungga madung, laika hkum hte ka da ai asak
hkrung ai mungga madung n re. Karai Kasang nan hpaw shaleng dan ai mungga n re. Chyum laika na lam
ni hpe kahtap lachyum shaleng dan ai laika ni she re.Dai majaw chyum laika hte ginrun nna hti hka ja ai
lam sha n rai yang, akyu n rawng lu ai..
Chyoi Pra ai Chyum Laika hta shinggyim masha hkum ding dek a matu, nawku hpung a
matu, shinggyim masha yawng a matu, Karai Kasang a sharawng awng ai lam ni hpe ka da nga ai. Anhte
Chyoi Pra ai Wenyi a lam woi ai hte shani shagu hti hka ja yang, Karai Kasang a sharawng awng ai lam ni
hpe chye na wa lu ga ai. Karai Kasang anhte hpe kaning re ai wa/jan byin tai shangun mayu ai, hpa baw
bungli ni galaw shangun mayu ai? Nawku hpung a ntsa Karai Kasang hpa baw yaw shada da ai (sh) hpa
baw sasana bungli ni dai ni galaw shangun mayu nga ai? Shinggyim wuhpawng ni a n tsa Karai Kasang
hpa baw yaw shada nga ai? Mungkan nga yawng dan hta hpe hpan da ai a yaw shada ai lam hpa rai ta?
ngu ai lam ni hpe matsun da nga ai. Dai majaw, Karai Kasang a mungga gaw tengman ai Karai Kasang a
lam, shinggyim masha a lam, mungkan a lam ni hpe teng man ai hku chye na shangun ai sha nga, n hkru
n hkra ai nat Satan hpe dang kau shangun lu nga ai hte (I Yawhan 2:14), Yesu HKristu hte rau mungkan
hpe awng dang ai asak hkrung lam hpe jaw ya nga ai (Yawhan 16:33) ahkrung nga ai mungga rai nga ai.
II. Hten mat n chye ai nli hta bai shangai wa shangun nga ai (1 Pet 1:23)
Chyum laika gaw shinggyim masha ni hpe ahkrung nga ai hte htani htana anga nga ai Karai
Kasang a mungga a marang e n si n mat chye ai nli hta bai shangai wa lu shangun nga ai. Chyum mungga
gaw shinggyim masha ni hpe jamna zawn, tinang hkum a gawng shingyan shingna hpe madun ya nga ai
(Yaku 1:23-25). Bai nna, Chyum mungga gaw ahkrung nga ai hte a- let nga ai rai nna, myit masin hte
wenyi hpe mung, nra hkrihkraw hte laswi hpe mung dinghkren ginhka chye nna, kraw lawang na myit
mamyit hte maw mawn ai hku hpe jeyang hparan lu nga ai (Heb 4:12). Dai majaw chyum mungga gaw
shinggyim masha ni hpe yubak lu ai wa, yubak a shabrai si ai hpe hkam la ra na wa ngu ai hpe shadum ai
sha nga, Karai Kasang gaw Yesu Hkristu a marang e mara hpe dat kau ya ai (Yerimia 31:34) hte yuabak
kaw na shalawt la nga ai (2 Tim 3:16) ngu ai kabu gara shiga hpe jaw ya nga ai.
Light in the Jungle ngu ai laika buk hta Chyurum W.P Myu Sha ni laika n lu, lu wa hkra mung
n shakut ai sha nga lai wa sai. Shan hpyi laika ju sha da ai amyu re majaw kraw dung myit chye myit
chyang hpaji lu ai ni re ngu, myit dik ai hte shakawng nna nga lai wa sai. Rai tim, kung hpan sai amyu ni,
Karai jaw ya ai hpaji byeng-ya lu ai ni yu yang, shaning 50 ning rai jang mat mat na re ngu tsun ai hpe
hkrum katut lai wa sai re. Hten mat chye ai nli hte nga pra ai amyu tai lai wa shaga ai. Sasana Sara Kaba
Dr. Ola Hanson Chyurum W.P Myu Sha ni kaw sasana sara hku sa du nna, Jinghpaw laika galaw ya ai hte
dai Jinghpaw laika hte Chyoi Pra ai Chyum Laika gale da ya sai re. Yaw shada ai lam gaw, Chyurum W.P
My Sha ni Karai Kasang hpe chye chyap ai hte hkye hkrang la hkrum ai amyu ni tai let, mungkan hta galu
kaba rawt jat kung hpan ai amyu tai wa na matu re. N hten n mat chye ai Karai Kasang a mungga nli hta
bai shangai wa lu na matu yaw shada ai lam rai nga ai. Dr. Ola Hanson htet da ai mung ndai chyum

4
munga hpe hti mu, Karai Kasang hpe kam sham mu, hkan nang hkan sa mu; hti nna yubak hpe koi mu,
Karai Kasang sharawng awng ai lam hpe chye la lu ai hte shi hpe teng man ai hku nawku mu, shaloi
shaman chyeju hkam la lu ai amyu ni tai wa na re, ngu htet da ai re. Sasana Sara ni mungga hte sa du
sharin ya ai majaw anhte myu ni n hten n mat ai galu kaba chye chyang wa ga ai re. Moi Ji Wa ni
shanhpyi laika hpe manu n chye shadan ai, akyu kaja nga na re mung n chye ai. Shanhpyi hku sha chye
na ai majaw, kaw si ai shaloi ju adup sha kau sai (sh) jahten shamat kau sai. Dai ni, Karai Kasang matsan
dum lama ai hte mai sau laika pa kaw ka ai chyum laika bai jaw da sai re. Rai tim yu maya laika buk ni
hte n bung ai hpe chye na let manu shadan ra ga ai. N hten n mat chye ai Karai Kasang a hkrung ai
mungga nli, asak hka hpawk hte bai shangai la nga ai re.
Nkau mi, chyum laika grai mari sharawng ai, tingda sharawng ai, rai tim shani shagu n
hti ai, mungga lam ni hpe shani shana myit mang ai lam n nga ai, majaw chyum Laika a lak lai ai chye ju
hpa mung n hkam sha lu ma ai.Hkristu hta masha ningnan n tai wa lu nga ai (II Kor 5:17).
N kau mi n gawn n sawn di ai majaw yubak tsin yam hkam sha ra ma ai. Ga shadawn- salik hku
gayawp lu ai majaw ga n mai shaga mat ai ni law law nga ga sai. India na Sadhu Sundar Singh ngu ai wa,
chyum laika hpe wan nat ai majaw 3 ya myit masin hta nji nmu nni nkri jam jau hkam sha ai gaw wan
leng lam ntsa baw sa mara nna si mat mayu hkra yubak hkam sha ra wu ai. Hpang jahtum asak hkrung ai
Karai hpe hkye la na matu dagam shaga ai shaloi Yesu shi hpe shadan dan ai hte sasana sara kaba tai wa ai
re (Sadhu Sundar Singh shi nan ka ai With and Without Christ ngu ai laika buk kaw sak se hkam da ai
lam re).
Nkau mi Chyum Laika hpe lit shaprai hku sha hti ai majaw laklai ai chyeju hpa mung n hkam sha
lu ma ai. Nkau mi gaw ti nang ra ai hku lachyum htai la ma ai. Chyum mungga gaw asak rawng ai, hpung
rawng ai, rai tim, kam sham ai myit hte kyu hpyi let hti ra ai. Shing n rai jang, tsa dan wa hkan shanut
jahten ai kaw, Chyum Laika hpe n jaw ai hku htai la mat wa nna, hten za ai de du wa mai ai. Ga shadawnChyum Laika hpe shut shai ai hku htai la ai majaw moi de Nhkai Bum kaw Yesu yu wa na hpe ala ai
hpung ni nga lai wa yu sai.
Karai Kasang a mungga hpe shani shagu hti hka ja ai lam n galaw yang Yesu Hkristu a teng man
ai sape n tai lu nga ai. Yesu tsun ai gaw nanhte gaw ngai hkaw tsun sharin shaga ai ga hpe madat mara
hkan sa myit yang gaw, nye a sape ni teng teng nanhte rai nga myit dai. Teng man ai lam mung nanhte
chye lu na marin dai rai nna, dai teng man ai gaw, nanhte hpe shalawt dat na ra ai (Yawhan 8:31-32) ngu
ai rai nga ai. Sape ni gaw Karai Kasang a mungga hpe shani shagu hti hka ja nna, dai mungga hte maren
shani shagu asak hkrung ra ai. Karai Kasang a mungga hpe atsawm chye na jang, shani shagu na asak
hkrung lam hta Karai Kasang a sharawng awng ai lam hpe chye na lu na re. Karai Kasang a sharawng
awng ai lam hpe chye na jang Karai Kasang a man e jaw ang ai hku kyu hpyi sit shang lu ai hte, Karai
Kasang kaw na mahtai kaja lu la mai nga ai.
II Tim 3:14-17 hta Chyum Laika hta maju jung nna asak hkrung ai a akyu chye ju ni gaw (1)
hpaji byeng-ya jaw ya ai hte ,Yesu Hkristu hpe kam sham let, hkye hkrang la ai lam lu la shangun nga ai.
Chyum laika gaw Yesu Hkristu a lam hpe chye la shangun ai hte hkye hkrang la hkrum ai asak hkrung
lam ning nan hpe lu la shangun nga ai. (2) chyum laika gaw Karai Kasang sharawng awng ai shinggyim
masha langai tai wa na matu jahkum shatsup ya nga ai. Chyum laika gaw Karai Kasang shatsam ai hte ka
da ai re majaw, teng man ai lam hpe sharin achyin ya na, shut ai lam hpe mara madun nna daru sharin na,
shut shai ai lam ni hpe mye shading na hte jaw ai asak hkrung lam a matu matsun madun ya nga ai.

5
Yesu Yuda ning baw ningla ni rai nga ai Saduke ni hpe tsun ai hta nanhte gaw, Chyum Laik hpe
mung, Karai Kasang a n-gun atsam hpe mung n chye ai majaw lam dam mat manit dai (Mt 22:29) ngu
nna, shut shai ai hku kam sham mat wa ai lam ni yawng gaw chyum laika hte Krai Kasang a n-gum atsam
hpe n chye ai majaw re ngu tsun da nga ai. Mungkan a hpaji laika ni, myit sawn ningchyoi (philosophy)
laika ni, hpungtang hpaji (science) laika ni, Hpara shaje ni a matsun maroi hte seng ai laika ni gaw
tengman ai Karai Kasang hpe kam sham manoi manat ai asak hkrung lam hpe n jaw ya lu nga ai.
Hkristan ni gaw chyoi pra ai chyum laika hta maju jung, hti hka ja let asak hkrung yang she shut shai ai
kaw na lawt lu let jaw ai asak hkrung lam hte asak hkrung lu na re.
Kam sham ai myit hte kyu hpyi ai hte Chyum Laika hpe hti yang, Chyum mungga gaw yubak lu
ai wa, n san seng n chyoi pra ai wa ngu ai hpe mu chye la shangun nga ai( Yaku 1:23-25) sha nga, myit
su wa shangun ai, n kaja ai lam yawng hpe koi kau lu shangun ai, pyengding zawn lam woi ai hte asak
hkrun lam a matu nhtoi hpe lu la shangun nga ai (Shakawn Kungdawn 119:100-105). Dai majaw, asak
Hkrung lam hpe galai shai ya lu ai hte Karai Kasang a kasha tai wa shangun lu ai Karai a mungga nli hte
tinang a asak hkrung lam hpe gaw gap sa wa ga law.
III. Karai Kasang a chyoi pra ai masha /amyu masha ni tai wa shangun nga ai. ( I Pet 2:9-10)
Masha gaw tinang a hpaji byen-ya hte, daru magam ahkang aya hte Karai Kasang hpe n chye lu
ai. Dai ni hpaji byeng-ya hta ning tawn ai hpungtang hpaji ninghkring ni yawng Hkristan ni n rai ma ai.
Daru magam ahkang aya lu ai ni yawng Karai Kasang hpe nawku kam sham ai ni n rai ma ai. Mahtai gaw,
hpaji byeng-ya hte daru magam ahkang aya gaw teng man ai Karai Kasang hpe mu tam shangun ai n re,
Karai Kasang a man e ding hpring ai wa n tai wa shangun lu ai, ngu ai rai nga ai. Yuda ni jep ai tara
shadik ai hte lamik kumla ni hpe yu nna Karai Kasang a man hta dinghpring ai lam lu la na matu tam ma
ai. Heleni ni hpaji byeng-ya hpe tam nna, n kaja ai hpe yeng seng kau lu let mai kaja ai lam hku asak
hkrung lu na matu shakut ma ai. Dai hku nna hkye hkrang la ai lam lu la na matu tam ma ai. Rai tim dai
lam ni hku masha gaw Karai Kasang a kashu kasha tai wa lu ai n rai. Chyum mungga hta tsun da ai
matsun maroi mungga hte maren, Yesu Hkrsitu hpe kam sham ai hte sha hkye hkrang la ai chyeju hkam la
lu ai hte, Karai Kasang a kashu kasha tai wa lu ga ai. Karai Kasang a mungga ngu ai chyoi pra ai chyum
laika hta rawng ai mungga hpe kam sham ai ni hpe hkye hkrang la hkrum lu na matu Karai Kasang lajang
da ya ai re (I Kor 1:21-22). Karai Kasang gaw kam sham ai ni hpe Yesu Hkristu hte langai sha byin tai
shangun ai hte, Hkristu gaw anhte a hpaji byeng-ya tai wa shangun sai. Dai Karai Kasang a hpaji byengya rai nga ai, Hkristu gaw, Shi hpe kam sham ai ni hpe mung, nsin kata de nna Shi a mau hpa nhtoi de
shaga bang nna, lata la ai amyu, hkawhkam hkinjawng ni, chyoi pra ai amyu baw hte Karai Kasang lahku
la ai masha ni, Karai Kasang a amyu, Karai Kasang a chyeju hkam la lu ai masha ni tai wa shangun nga ai
(I Pet 2:9-10). Anhte myu W.P sha ni hpe mung Ji Nat Jaw ai n sin htawng kaw na, hkye mawai la ai hte
lak san amyu hku mungga nhtoi hta lakawn la nga ai re. Dai gaw, Karai Kasang a mungga nli hta tu kaba
wa ai chyoi pra ai masha /amyu masha hku mungkan hta Karai a hpung shingkang matu asak hkrung na
matu chyeju jaw ai lam, rai nga ai.
Israela ni a labau hta, wan nat hkungga, mayu hkungga ni hte Karai Kasang a man e dinghpring
shakut ma ai.Tinang a hpaji, ngun atsam hta machyu nna, nga mu nga mai lam hpe tam ma ai. Myu a
shim lam hpe tam ma ai. Rai tim, Karai Kasang tsun ai gaw Nye a ga madat mu, shingrai yang Ngai
gaw nahte a Karai Kasang, nanhte gaw Nye a amyu tai na myit dai; nanhte nga mu nga mai lu hkra, ngai
nanhte hpe htet da mada hkan nang nga mu (Yeremia 7:23) ngu nna, Israela myu ni yawng Karai Kasang
a mungga hta madat mara asak hkrung na hpe tsun shadum nga ai. Karai Kasang hpe tsaw ra ai hte Shi a

6
hkang da ai ga hkan nang ai ni hpe prat hkying mun du hkra ga shaka shagrin nga nna, matsan dum ai
myit madun na re (Tara Jahprang 7:9). Karai Kasang a ga hpe azin ayang madat yang masha amyu nlang
hte hta shagrau la ai hkurm na, mare hta chyeju shaman lu la na, kashu kasha matu mara hta mung, na
lamu ga nsi naisi hta mung, yam nga nlang hte hta mung chyeju hkam la na. Nhku shang wa yang shaman
lu la na, shinggan pru wa yang chyeju shaman lu la na re (Tara Jahprang 28:1-6).
Dai majaw, Karai Kasang a ga rai nga ai, Chyum Laika hpe hti nna shani shana myit mang let
anhte Chyurum W.P Myu Sha ni asak hkrung yang, Karai Kasang hte Shi a sharawng awng ai lam ni hpe
grau chye na wa na re. Shaloi Karai Kasang hpe grau tsaw ra kam sham wa na. Dai zawn Karai Kasang
hpe grau grau tsaw ra kam sham let Shi a matsun maroi ga ni hpe azin ayang hkan nang ai rai yang
shaman chyeju grau lu la wa na re. Karai Kasang manu shadan ai, Karai Kasang lit la ai amyu hku
mungkan hta grau dan dawng wa ai hte, Karai Kasang a hpung shingkang hpe grau grau shadan shadawng
lu ai amyu ni anhte tai wa na ga ai law.

Ga Hpungdim: Hkalup hpung ni gaw makam makam masham hte seng ai lam hta mung, ta tut
asak hkrung lam hte seng ai lam ni hta mung, nawku daw jau ai lam hta mung, woi awn daw dan ai lam ni
hta mung Chyum laika Karai mungga hpe ahkyak dik hku hkungga manu shadan ai re. Masha langai
ngai, hpung up hpung sara, hpung kongsi ni a tsun shaga daw dan woi awn ai lam ni yawng hpe mung,
chyum laika hpe shadawn jit na shatai nna jaw ai n jaw ai (sh) Karai jai lang ai lam re kun? Tsadan re
kun? ginhka daw dan ai re. Chyum laika hpe madung dat nna she Chyoi pra ai Wenyi a lam woi ai hpe
hkam la let asak hkrung ai ni re.
Anhte Chyurum W.P Myu Sha ni yawng Chyum Laika a daru magam hpung shingkang hta manoi
manat let Karai Kasang a sali wunli hkam la lu ai amyu ni tai wa saga law! To God Be The Glogry!

Ginlen shalai ai,

Rev. Dr. Lahpai Awng LI
MIT, Insein
Nhtoi 24 July, 2016.