HAJI MUHAMMAD ABDULWAHHAB

SAHB - BAYAN 01
Si Muhammad Shafi Quraishi (19031971)
na skaniyani paganaya Ameer o Tablighi
Jamaat sa Raiwind Markaz, Pakistan;
kyatondogan skaniyani Haji Muhammad
Bashir (19191992). Ikatlo a
myakatondoga Ameer na si Haji
Muhammad Abdul Wahhab (inimbawata
ko January 1, 1923) taman imanto.
Skaniyani Ameer o Shura sa Raiwind
Markaz, go membro skaniyan ko Alami
Shura (World Council) sa Nizamuddin,
Delhi, India.
Bayan Maghrib 25 July 1995:
So Allah na pyakalebi nyan so Ummat o
Nabi Mohammad (SAW), sa minisanggolay
kiran so atastanggongana
kapakadayamanga ko minitalingoma o
Nabi sa intero a dunya, maana so Islam.
Sa taw a makasima sa karibatan odina di
kaphakatarotopo o lagid iyan na
maadenon so ghagaw tarosa mipangni

nyan sa duwaa ko Allah a mipagawa iyan

angkota karibatan iyan.
So mga Muslim na tanto dena myalalim
iran so mga ginawa iran sabap sa
myataman so panagontaman iran ko
bhabaya ko dunya. Opama bo ko bigan
iran sa lagidiyana awidaakal so agama o
Allah (SWT) na pembaloy sirana mala sa
pangilaylayano Allah.
So mga Muslim na aya pthimotimoan iran
ko mga Masjid na awidaakal ko katoroo
pagtaw. Ago maaden kiran so gagta
rarebo Nabi tano ago mipagintaw tano so
mga okitokit iyan. Saden sa pananayanan
iyan so kaoyagoyago Nabi na khaparoli
nyan so limoo Allah.
Kailangan dena ditano min duwaa ko
Allah a maaden ko mga puso tano so
awidaakalo Nabi tano, tarosa ditano min
duwaa a makalidas so kadandano pagtaw
ko naraka jahannam.
Saden sa makadolog ko mga luks iyan ko
wata irana myadhadag na tanto

skaniyana khabhabayaano mga luks

angkota wata a myadadag, tarosa
mbganiran sa mga alaa pamemegayan.
Lagidoto mambo, a saden sa
makanggonanao sa kaadeno Allah
oriyano kyadhadag iyan a makalidas ko
kasiksaan sa alongana mawri na
makapananangoran ko Allah na tanto
skaniyana khabhabayaan ago ikhalimoo
Allah.
Gyotoi sabapa andamanayai so di
nggalbek ko panagontamano Nabi na
mitogalin so dingan-dingan iran ko dunya
sa aya kiran matago na so sifat a
Tawakkul (Pananarig ko Allah).
Saden sa aya nyan masinganin na so mga
dayaan sangkaiya dunya na khaadenon
so kadatu ago kakawasaan, na so tithowa
oripeno Allah na kaadenon so tithowa
hakikato sambayang ago kazabar.

HAJI MUHAMMAD ABDULWAHHAB

SAHB - BAYAN 02
So mga taw a minitaralo a diran
kambaradosa na phapasen kirano Allah
so kanggalbek sa mga pipiyaa amal.
Amay ka sii tano ibilanga ginawa tano ko
mga taw a pinili o Allah a phapanampay
ko agama Nyan na thagoan tano Nyan sa
sabot.
Andamanayai kaphakakwa o taw sa ilham
a phoon ko Allah amay ka dinian baloyina
ginawa nyana ped ko pinili o Allah?
Gyotowi sabapa kailangan den ko Mumin
a mibilang iyana ginawa nyan a ped ko
pinili o Allah ko katoroo pagtaw.
So Mumin na kailangan dena
mapakabager iyan so ndolonan iran
agoso Allah, ago mapadalem ko puso iyan
so bhabaya ko Allah.
Kailangan ko Muslim a katagoan sa
awidaakal a mapadalemon so gageta
rareb ko katoroo pagtaw, andamanayai so

kadandano pagtaw na maadenon ago

misabot iyan so Kalimah.
So dinggalbek ko agama na sirani
marayag a sabapa kakhatoroo pagtaw.
Kagiya kamawto, na tangkeden tano ko
mga ginawa tanowa so Allah na katawan
Iyan so langona galebek tano ago ipagiza
Iyan rektano sa hadapan Iyan.

HAJI MUHAMMAD ABDULWAHHAB

SAHB - BAYAN 03
Aya taralbi ko taw na so kapanamari nyan
ko mga galbek / amal a kapenggonaan
iyan ko oriyano kapatay nyan.
Daa manosiya a baniyan mapaka
perengan so dowa a galbek. Ibarat iyan
na, dingka mapaka perengan so
kapagontod ka agoso katitindeg ka. Na
amay ka so taw na panamaran iyan na so
simba nyan ko Allah (SWT), na so Allah

(SWT) na phangataowan Iyan so pda

galbek a dikawn khaparo.
So mga taw a di mromasay sa lalan ko
Allah (SWT) na khaaden kiran so hidayat,
na so puso iran na khitaliyadok ko mga
pipiyaa galbek (amal).
Saden sa makambhagian sa nur a hidayat
na pembaloya asbab hidayat
(pkhasabapan sa toroan) o mga
manosiya, na pthagompiya siran sa
alongana mawri.
So mga taw a initompok iran so
kapagintaw iran ko panagontaman ko
Dawah na khatagoan siran sa yaqeen,
maana kathomangked a so kathagompiya
na knaba matatago ko kakowaa ko
kadatu, tamok antaa ka maporoa betad
ko galbek. Aya tithowa kathagompiya na
maparoli so kasosoato Allah (SWT).
Gyotowi sabapa andamanayai
kasongkada tano ko kyapagintaw o Nabi
Mohammad (SAW).

So mga pipiyaa sifat o Nabi tano na aya

kakhatago iyan rektano na maaden so
panagontaman ko kaaden iyan rektano,
agoso lalayon tano ron di kapamagosaya.
So Allah (SWT) na mbaloyin Iyan so puso
o mga taw a khabhabayaan iran so mga
taw a di managontaman ko agama Nyan.
Gyotowi lalayon tano kaphagaloya ko
Kalimah sabap sa adena
papadalemenono Allah (SWT) a mapya a
kapraradan iyan so manosiya.
HAJI MUHAMMAD ABDULWAHHAB
SAHB - BAYAN 04
Andadeni masa a makakikinanglan tano,
na sii matago so panarig tano ko Allah
(SWT), sabap sa Skaniyamboi phaka
angkos ko langona hajjat tano.
So Allah na pagangkosan Iyan so mga
hajjat tano amay ka inggolalan tano so
ndaowano Nabi Mohammad (SAW),
gyotowi sabapa andamanayai

kapanamaran tanowa kasongkada tano ko

okitokito Nabi tano.
Saden sa kabaya iyan so
kapakapamaroliyan iyan ko mga
pathamotamokano Allah na baloya nyan
so Kalimah a aya nyan phanamaran ko
interowa kaoyagoyag iyan. Sabap sa so
kakawasaan sangkaiya dunya na di
phakangghaya gona ko manosiya ko
kaphatay nyan go sii ko oriyano kapatay
nyan. Inonta na sobo so limoo Allah na
aya on phakabgaya kapipiyaa ginawa.
Gyotowi sabapa taralbi den so lalayon
tano katatadmi ko Allah sangkaiya dunya.
So manosiya na pananggilai nyan oba
pphakadarpa sii ko mga kalilimoda daon
so bandingan ko agama. Inonta na maalin
iyan a sii mabangkiring so kalilimod ko
bandingan ko Kalimah. Amay ka matago
so taw sa lagidoto a kalilimod na taralbi
ron so kapphamangni nyan ko Allah sa
makalidas skaniyan ko tiyoba a
phakatalingoma sangkota mga taw.

So mga taw a dinggalbek ko agama na

andamanayai maknal iran so kabnaro
Kalimah, mipangdao iran ko salakaw
kiran, na katagoan sa hakikat so mga
sambayang iran.
So mga taw a dinggalbek ko agama na
mabaloy so oras iran a katagoan sa gona,
go pananggilaan iran so daa mga gona
nyana bitiyara. Amay ka daa maptharo
oka a mapya, na panamaran so tadem ko
Allah (Dhikr), so Istighfar, so Salawat ko
Nabi, Tilawat Quran, Sunnah/Nafl Salah
agoso kabgay sa Dawat.
So manosiya na taralbi ron so lalayon
iyan kanduwaa ko Allah a maadenon so
Nur go Hidayat, ago minggolalan iyan so
mga amal a kakhaadenono Nur o Allah
(SWT). Aya pat a paitaw o Nur o Allah
(SWT) na so Kalimah, Salah, Dhikr ago
Talim.
So Ramadan na olanolana Nur, so galbeka
ka Tabligh na Nur agoso langona galbek
mipantag ko kan Dawah go Tabligh na

Nur. Gyotowi sabapa andamanayai

masinganin tano so Nur agoso mapya,
tarosa maaden mambo ko mga taw. Na
makapniat tano ago kathomangkedano
mga ginawa tanowa knaba tano mga
empleyado, taribasok ago mga padagang
ka aya tithowa galbek tano na so
kababaloy tanowa Daee Ilallah a
pphanampay ko agama o Allah (SWT).

HAJI MUHAMMAD ABDULWAHHAB

SAHB - BAYAN 05
So Allah na ini promise Iyan so tarotopa
kathagompiya ko kinggolalanen ko
tarotopa agama, na kakhaadeno tarotopa
agama na nggolalan sa tithowa
kapromasay.

So antapo kyapaka simbowanga rektanoo

Allah sangkaiya dunya na makaoombaw
adiso atastanggongan tano ko
kakhaoyagan, kaphamilya agoso nganina
antap ko kadudunyai. So mga padhagang
na so panamar iran ko kaoyagan na
magonga sa tamok ago kapakalaba a
kapenggonaan iran sangkaiya dunya.
Lagidoto mambo, a so panagontaman ko
galbeko Nabi Mohammad (SAW) na
khaparoli so kathagompiya nggolalan sa
hidayat.
Rilaan tanoo Allah sabap sa aya tano
kyabegan sa malaa panagontaman na so
dunya tano, inonta na khaoyag so
manosiya apyapen maitoa sokatan iyan
ko dunya lagido pangnengken ago
nditaren. Ogaid, na so taw na diniyan
khaparoli angkota tithowa kathagompiya
amay ka diniyan mipagintaw so okitokito
Nabi Mohammad (SAW).
So Muslim a puasa ko bolana Ramadan sa
soasoat ko Allah, na mbalasano Allah sa
daa itongan iyana balas. Pitharoo Allah,

So puasa na rek Akn, na Sakni mbalas ko

di puasa.
Ino mangaday, khasabotano taw ay
balasa itithilaghado Allah ko taw a mya
kurban iyanon so bhabaya iyan ko dunya
pantag bo ko kapaka dayamango agama
o Allah (SWT)?
Aya kailangana maaden ko kaphaka
moayano tithowa Iman na mataplis tano
so salakawa okitokit inonta na so okitokito
Nabi Mohammad (SAW). Gyaa salakawa
mga okitokit na sopak ko sogoano Iman
ago di khapakay ko Muslim obaon
makaayon.
So taw a lalayon pesengghay sa pat olan
sa lalan ko Allah na di khabaloya antapo
kaoyagoyag iyan so antapo kaoyagoyago
Nabi na adena maaadenon a di
kaphakatarotop.
Knaba tano antap na so kakwaa ko
kadatu agoso tamok, inonta na katagoan
sa hidayat so mga taw. Gyaa hidayat na
aya niyawa o mga ginawa tano na sii

anan phakapoon ko Allah. Imbgay Nyan

ko kabaya Iyan ago phapasen Iyan ko
kabaya Iyan.
Gyaa hidayat na sii bo mapapadalem ko
kapromasay ago panagontaman ko
kaaden rektanoo kaoyagoyago Nabi
Mohammad (SAW). Na aya khapaka
moayan angkaiya panagontaman na
kapamagogopa.
Aya kyadarodoso mga Muslim na so
panamar iran ko Allah agoso mga sogoan
Iyan, na sii myatago ko panamar iran ko
kadatu ago tamok.
Aya panagontamano Nabi Mohammad
(SAW) na so bhabaya ago padaadat ko
Allah (SWT) na mapamola ko puso o mga
taw, na omani isaa Daie na
minisanggolay rona atastanggongan,
agoso so atastanggongana misugo iyan
ko mga taw a maaden kiran mambo so
panagontamano Nabi tano.
So kapakakowa sa mga poporoo a
position ko goberno na knaba aya antapo

Daie. Inonta na mapaka inengka iyan so

mga taw a adena mga position iyan a
mipagintaw iran so okitokito Nabi
Mohammad (SAW).
Aya tithowa ikhasigi na so mga taw a
inosaro Allah (SWT) ko galbeka kanDawah go ka-Tabligh sabap sa
papadalemenon o Allah so tabang Iyan.

HAJI MUHAMMAD ABDULWAHHAB

SAHB - BAYAN 06
Pitharoo Allah:

Daa iphaliyogat o Allah ko baraniyawa, a
rowar ko khagaga niyan (Baqarah
2:286). Inonta na so mga sogoano Allah
na makaaayon ko betad ago khaghaga o
manosiya, a aya shabapan sa
kakhakowaa nyan ko bhabaya iyan.
So mga taw a maaped sangkaiya galbeka
Tabligh na baloya irana antap a mabaloya
matlub (singanin) o mga manosiya a sii

mitogalin ko Allah, ago pangoyatan sirana

kabhabayaan iran so Allah. Isa pen na aya
iran manggalbek na so khakowaan sa
ikasosoato Allah.
Aya kyapakasimbowang tano sangkaiya
dunya na mabaloy so mga datu ago
ndatuan, so mga kawasa ago pobre,
bhabay ago mama na inggolalan iran so
mga suguano Allah, maparoli so
ikasosoato Allah ago masongkad iran so
Sunnah o Nabi Mohammad (SAW).
So pamikirano mumin na mapamola on
so lalayon iyan kin-dawah an ko Allah sa
lagid den angkota kagogoraoka o wata ko
ina iyan. Imanto na so mga taw na aya
iran pananarigan na so mga galbek iran
ago tamok iran na myada so kapananarigi
ran ko Allah. Iphananaloo Allah sa
alongana mawri, Saden sa adena
pyanarigan iyana salakawa shai
(makaliyoliyo ko Allah) na ron pagapas ko
kapakakikinanglan iyan imanto.

So Allah na bebegan Iyan pen sa oras so

mga daa paratyaya nyan, na Skaniyani
pembegay sa bantogan ko
myamaratyaya. So mga galbeka
pkhalipatanon o manosiya so tadem ko
Allah na marayaga akalo Shaytan.
Gyotowi aya taralbi ko mumin na philiin
iyana iphagepeda iyan na so
mapenggonanao nyan ko bhabaya ko
Allah.
So mga tawa lalayon dinduwaa ko Allah
na di phakasaghad sa kabinasaan, na so
peman so mga madarainonn ko mga
tadem ko Allah na phakasaghad sa
pitibarangana tiyoba.
Minisanggolay rektano so
atastanggongana kin-dawaten ko agama
o Allah ko pitibarangana goberno, nation
ago inged. Na so Allah na Skaniyani
pphanoro ko lalana matitho ko kabaya
Iyan.
So Nabi Dawud (AS) na iniiza iyan ko
Allah; Ya Allah, antonaai galbek a

ikhabhabaya Aka raken? Inisembago

Allah na, Baloyangka so mga taw a
selaselaan Ako iran, tago angka so
bhabaya raken ko mga puso iran, began
ka kiran so mga pipiyaa-tothol,
pamakaiktiyar angka siran ko mga siksa
Aken, na khabhabayaan Aken ska.
Gyayai gorisa kekedegeno galbeka
Tabligh, ago makanggogonanao sa so
Tabligh na knaba matag pyangsara
galbek.
So Allah na ikhasoat Iyan so ikhlas dena
kaphakiilay nyan ko kadaa kaphakaghaga
nyan, na aya nyan di pagosayen so kalaa
o Allah.
So pphangarasi a mga ndadatu, so
kapakambebetado masa, so kargeno
kaoyagan, na ba makaalang ko mumin.
Lalayon den so katatadmi ko mga
suguano Allah (SWT) ko omani masa, ago
panamaran iyana kinggolalanen iyanon
mokit ko sunnah o Nabi Mohammad
(SAW). So antapo manosiya na

myakarayag sa quran,

Myaaden kano a mapiya a pagtaw, a

piyakaliyo ko manga manosiya (AliImran 3:110)
So manosiya na diniyan dapat oba niyan
kaleken so kapenggalbeka nyan ko kaTabligh. Inonta na nggalbeken iyan so
Dawah sa lagido Nabi ko kyabegi nyan sa
dawah ko daa meleng iyana mga Arab.
So mga taw a di mromasay ko ikasosoato
Allah, na masabar iyan so mga reregen na
phakaparoli sa hidayat ago aya dena
darajat o taw sa pangilaylayano Allah na
saden sa kalaa panagontaman iyan.
So Allah na bigan Iyan sa malaa limo
angkaiya Ummat ko kinibgan Iyan rektano
ko Nabi tano a Mohammad (SAW) ago
inibegay Nyan rektano so tarotopa
Shariah ago pinili tano Nyan. Gyotowi
sabapa, minisanggolay rektano so
atastanggongana kipphanampayen tano
ko agama tanowa Islam ko mga taw a daa
sabot iyan.

Antonai Jihad? Aya Jihad na so

panagontaman ko pananarigo taw ko
inaden (makhluq) na mitogalin ko
pananarig ko Miyangaden (Khaliq).
So ama na igiraa adena inisarig iyan ko
wata a atastanggongan lagido kaoyagano
pamilya, oriyan iyan na masakit so ama
iyan na atastanggongan iyana
kapanishakita nyan ko ama iyan apya
minsan pen myasendod so dagangana
inisarigoni ama iyan. Diniyan maptharo I,
Pyanginsana rakni ama so kaoyagano
pamilya, na pokas ako ko kaphanishakita
ko ron.
Sakamawto mambo, so Shariah na
inisugo iyan rektano so kashosokat sa
halal, agoso kashasagokora tano ko mga
luks tano, pamilya tano agoso peda lolot
tano. Ogaid na amay ka so kapagagama
na ndarodos, na atastangongano
pishakatawan so kabaton iyan sa
kabhabawan antaa ka kapakatiyolin
angkota kyadarodos ko puso o mga
mumin.

Sabap sa imantowa masa na so Iman

(paratyaya), so Ibadah (simba), so
Muamalat (kaphapasada), so Muasharat
(kandodolona) agoso Akhlaq (parangay) o
mga mumin na di makatitiyolin.

HAJI MUHAMMAD ABDULWAHHAB

SAHB - BAYAN 07
So kapanarigi ko nganina kaadeno Allah
na sakito paratyaya o manosiya.
Pitharoo Maulana Ahmad Ali Lahori , Di
tharoono sabaada di ako maka-aayon ko
galbekaTabligh, ogaid na paparatyayaan
akena so barakah a mapapadalem
sangkaiya galbek na maphakada iyan so
rarangito Allah.
Pitharoo Maulana Ilyas , Ya Allah, na
sabo sa kabaya Aka na aya
mapenggolaola.
Gyotowi sabapa, di tano aya
panagontamanan so nganina kabaya o

mga ginawa tano, mga karoma tano

agoso mga wata tano, sa aya tano
panagontamanan na so kabaya o Allah
(SWT).
So katantowano kababaloyo Allah a Gaos
Iyan so langowan taman na mapamola ko
mga puso tano, sa ron tano bo di
makapamangni sabap sa Skaniyamboi
phaka gaos ko langona makikinanglan
tano. Ago so lalayon tano ron di kin
duwaan sa minggolalan tano so mga
suguan Iyan, ago mada ko mga puso tano
so kadarainon ko agama Nyan.

HAJI MUHAMMAD ABDULWAHHAB

SAHB - BAYAN 08
Aya kapenggalbeka ko Tabligh na daa
ngana atay ago kandowa-dowa, na
langona maregen angkaiya Ummat na
khada misabap ko Dawah, amay ka
miokit ko Sunnah o Nabi Mohammad
(SAW).

Lalayon den so ditano kanduwaa ko Allah

a began Iyan sa hidayat ago
makambhalingan ko galbeka Tabligh so
mga old workers a myaawat sangkaiya
galbek antano siran mipagogopa
pharoman.
Aya tithowa Daie na iphanampay nyan so
agama sa daa baniyan mapipikira balas
ko mga taw, sa aya boa mapipikir iyana
mbalason na sobo so Allah.
So kandingan dingana ko padaadat antaa
ka bantogan ko Mashwara na waswasa
Nafso.
Lalayon den so ditano kanduwaa ko mga
tenatenawa kaghagawii a makambhagian
tano ko mga pipiyaa sifat o Nabi tano
antano makarani ko Allah. Ayaboa
miphakarani tanoko Allah na
makapromasay tano sa lagido
kyapromasayo Nabi tano.
So bhabaya ko Allah na diden matago ko
mga puso tano amay ka aya mipepeno ko
mga puso tano na so bhabaya ko dunya.

Gyotowi sabap lalayon tano mambo di

minduwaa a rilaan tanoo Allah sabap ko
kalobay tano ago aya matago ko puso
tano na so hidayat.
Amay ka maaden rektano so mga sifat a
kiyanggalbeko mga Ambiya ko ka Tabligh
na so panagontaman tano na khatarima,
na khada so ribat.
Amay ka gyaa Ummat na panamaran
irana minggolalan iran so mga kailangan
ko galbeka Dawat na phakadaano Allah
so kapapantagana Kaisar ago Kisra
sangkaiya masa. Gyotowi sabapa
paganay ron na andamanayai makatiyolin
so ndolonan tano agoso Allah.
Gyotowi sabapa so Daie na dinian aya
ipagawida akal so masosowa sa gyaa
dunya, sa aya nyan psifaten na
maadenon so kapangalimbhabaan ago
gageta rareb ko kambiyangono mga
Sunnah o Nabi Mohammad (SAW).
So mga Ambiya na dairan panarigi so
mga pipiyaa katharo ko kagawi o mga

taw. Inonta na kyatagoan siran sa

kathomangked ko ptharoon iran sa diden
kailangan so tantowa matasa ptharoon.
Aya tithowaa Daie na dinian phanarigan
so apya antonaa shai sangkaiya dunya,
sabap sa da tagoa o Allah so
kathagompiya sangkaiya di tatapa dunya
odina sii ko kadakel.
Ditano mabhabaya amay ka madakela
phamakineg ko mga bayan tano sabap ko
panagontaman tano. Inonta na so
panagontaman tano na aya pkha tashkil
tano na so mga taw a khakawit iyan so
limoo Allah. Amay ka so taw na
maaadenon so sifata kapangalimbhabaan
na neseseta den so kanggonanaowa
tanoron.
Aya tithowa Daie na dinian mapen
dingandingan so podi antaa ka bantogan
ko panagontaman iyan.
Aya kakhataama ko kamiso galbeka
Tabligh na amay ka minggolalan ko
tithowa tariqa (okit) niyan. So

panagontaman ko Dawat na malebod,

ogaid na aya maregen inggolalan na so
kaokito ko tithowa usool (taritib) iyan.
So kaped sa Shura na kena oba
kapakalebi antaa ka bantogan. Aya
tithowa khabantogan na so mga taw a
miphagepeda iyan so Nabi Mohammad
(SAW).
Aden otowa igira na so Allah na
phakaborantawn Iyan so agama Nyan
misabap ko mga baradosa. So galbeko
taw na di maphagema ko Allah, ka
Skaniyan na Langkap.
So toroano Allah na kyasambian sa
kadarainon ago kalokha, na so mga
dadarainonen na myapapason so limoo
Allah. Gyotowi lalayon den so katatademi
tano ko Allah (Dhikrullah).
Amay ka so Yaqin (sarig/kathomangked) o
manosiya na phagozor na karina sa
kaptharimaa ono Allah.

So Daie na di ikhasoata ginawa nyan so

panagontaman iyan, inonta na lalayon so
diniyan kanduwaa ko Allah sa
kaphakaozor iyan agoso mga pdiyan ko
pangkatana kasosoato Allah.
Amay ka so taw na ibtadiyan sa khakowa
nyan so singanin iyan misabap ko
kapasang iyan na sabnara myasoat iyana
ginawa nyan na myatago skaniyan ko
btada delikado.
Aya taralbi na matharo iyan so, Ya Allah!
Pakaapas Angka so galbek aken, odina,
pelebolebod Anka raken so kinggolalanen
aken ko galbeka ikhasoat Ka.
So taw a sisii sa lalan ko Allah na
tatarimaan so dua nyan. Gyotowi sabap,
a so Maulana Ilyas na lalayon iyan
kipsugoon ko kanduwaa sa lalan ko Allah.

HAJI MUHAMMAD ABDULWAHHAB

SAHB - BAYAN 09

So mga taw a dinggalbek ko Tabligh na

kailangan dena mapphakala iran so dhikr
iran sa lagido deno kyaaloya oni Maulana
Inamul Hasan mipantag ko tlo a tasbihat
a di zanai o mga old workers. Gyotowi
sabapa kaisegan tano sa mabaloya nem
antaa ka siyaw a tasbihat an makala so
ndolonan tano agoso Allah, an migaang
so ingarano Allah ko mga puso tano.
So kapamimikiran sa madalem
(muraqaba /meditation) na kailangan den
an matago so mga ginawa tano ko betada
sobo so Allah I mala sa ginawa tano ago
pkhabhabayaan tano,
makapanagontaman tano ko mga
ikasosoat Iyan, ago aya tano mabaloya
phagapasan ko langona maregen tano.
Igiraa ditano mag istighfar ko Allah na
pikiren tanowa mikokolob rektano so mga
kadostaan, na pamangnin tanoron a sotin
tano Nyan.
Pakalilipatan tano pasin so dunya igiraa
ditano dhikr, ago somengghay tano ron sa

oras oman gawii. Pitharoo Maulana Yusuf,

So kasotiya ko lawas na phakaogop ko
kasotiya ko niyawa.
So kanggedagedaa ko ginawa omani
matharo a tasbihat na kailangan den ko
kapakaozor ko agama.
Pitharo peno Maulana Yusuf, Amayka so
taw na ndhikr, na so kaphaka taasaro
langowan tamana shai inontabo so Allah
na khalalas ko puso iyan.
Na amay ka dipen khatago so bhabaya ko
Allah sii ko puso o taw na lalayon iyan
dinduwaa ko Allah ago pakalaa nyan so
dhikr iyan oman makazambayang sa
Sobuh.

HAJI MUHAMMAD ABDULWAHHAB

SAHB - BAYAN 10
So gotem, dokaw, karasayan ago
maregen a pkhasagadan sa lalan ko Allah

na aya psabapan sa kakhaparoliya ko

toroan agoso kamiso paratyaya.
Aya awidaakal angkaiya Ummat na
andamanayai mabaloy so omani
kangodaan a saliyantio Nabi tano, ka odi
skaniyan mabaloya saliyantio Nabi na
pembaloy skaniyana awidaakal angkaiya
Ummat.
So mga tawa aya panagontaman iran na
so kasosokat agoso pitibarangana orarig
sangkaiya dunya na lalayon siran
matatago sangkota kalimpang. Gyotowi
lalayon siran pphangni ko Allah sa
kapakalidas.
Pitharoo Maulana Yusuf, Amay ka so taw
na makasaghad sa maregen na sii
mabangkiring so pamikiran iyan ko
pangnengken antaa ka shai, na diden
mada so kamiskin angkota taw apya
minsan pen mbaloy skaniyana kawasa.
Na amay pman ka so taw na makagedam
sa maregen lagido kagotem, na aya
ptharoon iyan na, Ya Allah na misabap

sangkaiya gotem akn na toro angka so

kadandano Ummat o Nabi Mohammad
(SAW).
Gyayai pphangnin tano ko Allah agoso
interowa Ummat a ditano malalong
angkaiya dunya.

HAJI MUHAMMAD ABDULWAHHAB SAHB BAYAN 11

Aya tanda sa tyarimao Allah (SWT) so taw
sangkaiya galbeka Dawah na omani
galbek iyan na langona iphakarani ko
Allah.
So Maulana Ilyas na pesojod sa mathay
ko kapphamangni nyan ko Allah.
Gyotowi igiraa myaka aden so taw sa
ndolonan iran ko Allah (SWT) na diniyan
mapen dingan dingan oba nyan poroon
ngghagaan so ulo nyan ko kasosojod iyan.
Myapanotholo Hudaifa (RA) sa hadith a
myapanotholo Muslim ago Nasai, a igiraa

somiyojod so Nabi na tanto ko mathay sa

lagid deno kathayo katitindeg iyan sa
sambayang a kapembatyaa nyan ko mga
atas a Surah.
Sopman so Aisha na kyapanothola nyano
ko hadith o Baihaqi agoso Imam Ahmad,
na katao nyanon na ba myatay so Nabi ko
kathay a kasosojod iyan.
Na gyoto dni myasowa o mga Sahabah ko
Nabi tano.
So Madan Bin Talha na minithoona iyan
so Thauban, so pyakamaradika o Nabi a
oripen. Na iniiza iyanon antonaai galbeka
iphakasoldian ko sorga o Allah. Kayko
miiza iyanon sa myakatlo na inisembag
iyan na, Miniiza aken mambo anan ko
Nabi, na pitharo iyan na, Lalayon ka
psojod ko Allah, sabap sa daa misojod kaa
satimambo inonta na miporo so
pangkatan ka, ago maponas so dosangka
misabapon. Na iniiza iyan pen ko Abu
Darda na sakamawto mamboa myaaloy
nyan so pitharoo Thauban.

So Rabiah Bin Kab na pitharo iyan,

inwitan aken so Nabi sa ig a iphagabdas
iyan, na pitharo iyana mamangni ako.
Pitharo akna, bako skaniyan mipagpda sa
sorga. Pitharo iyan, antonai pangni kaa
makaliyoliyo ron? Pitharo akana gyoto bo.
Na tigo Nabi, Na ogopi akongka a
makowangka misabap sa lalayon ka
kapsojod.
Mataan a so kasojod na pithamanana
kapangalimbhabaan ko Allah. Na
makaphangni tano ko ron ko Allah sa
hidayat ago maap, ago khigoraok tanoron
so mga karibatan tano, ago mipen duwaa
tano so kapakalidas sa naraka. Gyotowi
masa ago betad a mipembitiyarai tanoron
so Allah. A khaparoli tanoron so kasosoat
ago rila o Allah SWT a gyanana dowa i
masisinganino pizakatawana Muslim ko
daniyampen kapatay.
HAJI MUHAMMAD ABDULWAHHAB
SAHB - BAYAN 12

So kasowaa ko galbeka Tabligh agoso

kasotiya ko ginawa na mga galbeka
dimaka pagogopa. So taw a kabaya iyana
adena maadenona mapyaa sifat na
panamari nyana mipangoyat iyan ko
salakaw rkaniyan sabap sa phakaogopon
a maaden on angkota sifat, sabap sa so
taw a pphanampay ago pphangoyat ko
salakaw rkaniyan, na pkhatarotop iyana
ginawa nyan.
So Kalimah Tayyibah na Kalimah a
marifah (kaknal). Taralbi den so ditano
ron kapamimikirana ko kasisibay ago
iphangoyat tano so kalbihan iyan ko mga
taw ago so kageneki tano magaloyaloy ko
kaphakaghaga o langona kaadeno Allah,
ago daon so kathagompiya. Matag siran
lagid tanowa inaden na daa baniyan
rektano kingghaya gona, inonta na
nggolalan sa idino Allah (SWT).
So Allah na bigan Nyan so omani kaaden
Iyan sa kipantag. Ogaid na ipapaaro Allah
so kaphakaghaga o inaden Iyan. So
langowana inadeno Allah na daa baniyan

kiogop ko taw amay ka kabayao Allah so

kabinasa o taw antaa ka shai.
Gyoto panamaran tanowa pkhapasad
tano so mga infiradi (individual) a mga
amal tano.
So LAA ILAAHA na matatagoon angkota
kasangka, na so ILLALLAH na matatagoon
angkota sogoan. Gyotowi sabapa
andamanayai mipagintaw o taw so
kapakaaayon iyan sangkaiya dowaa
Kalimah. Saden sa minggolalan iyan so
mga sogoano Allah ko okito Nabi na
khaparoli nyan so balaso galebek iyan.
So Maulana Ilyas na piyananggilaan iyan
oba nyan pkhaaloy so balas sa dunya
angkaiya galbeka Tabligh, na aya
pyanamaran iyana aya masinganino taw
na so mga balas sa akhirat. So khibgaya
mapya angkaiya galbeka Tabligh ko
kadandano pagtaw na maregena saboten.
So mga bayan tano na sii makadakel ko
mga kala ago kaknala ko Allah ago
minggolalan tano angkaiya galbeka

Tabligh ko minibetada mga taritib (usool)

iyan. So Daie na kailangan dena maaden
on so kapangalimbhabaan, dion maaden
so lagido kapaka phapantago guro agoso
morit iyan. Ago makapamagogopa so
mga worker andamanayai omani isa na
phakabegay sa dawat oman gawii.
Sii ko mga bayan tano na dion den mada
angkota taqwa (kalek) ko Allah lalayon,
agoso kapipikira ona katawano Allah so
matatago ko mga niyat tano. Gyotowi
lalayon tano di pamimikiranen so kala o
Allah, goso kababaloy tanoa oripen Iyan.
So Daie a lalayon di makiplomameka ko
mga taw na neseseta on den so lalayon
iyan di kap muraqaba (kapamimikirana)
ko Allah. So Maulana Ilyas na somingghay
sa nem olan ko isaa Sheikh sa
Saharampur, na inipangoyat ini o mga
ulama.
So di kapsosorota o mga workers na
misabap ko kaitoa connection ko Allah

agoso kakhokorango yaqeen

(kathomangked) sii Rkaniyana Allah.
So Allah na inibegay Nyan rektano so
Salah antano magenggen so mga ginawa
tano ko para ko mga kabayao Allah.
Gyotowi so mga taw a diniyan
khagenggena ginawa nyan ko soldo
sambayang, na andamanayai
kakhagenggena nyan ko ginawa nyan ko
liyoo sambayang.
So Maulana Ilyas na pyanagontamanan
iyana mipagintaw nyan so kaoyagoyago
mga Sahabah, na gyoto mamboa so
panagontaman iyan na myaka dayamang
sa interowa dunya. Lagidoto mamboa,
amay ka so awidaakal tano agoso
panagontaman tano na sii matago ko
agama na khaparoli tano so hidayat
agoso tabango Aallah.

HAJI MUHAMMAD ABDULWAHHAB

SAHB - BAYAN 13

So mga taw a myaganad sa secular

(kadudunyai) a phaganadan na myambiat
ko kanggonai nyan ko dunya ago mapaka
sunod iyan so mga taw, obadi so mga taw
na pembiaten ko kanggonai nyan ko mga
kakawasaano Allah.
Aya atastanggongano mga ulama na
mambiat iran so mga morit iran ko
kakowaa iran ko kailangan iran, golalan
ko limo ago kaphakaghaga o Allah (SWT).
Gyotowi ditano mandingan dingan so
tamok, bantogan antaa ka so di tatap a
gona ko dunya. Aya dapat na aya tano
mandingan dingan so kasosoato Allah, na
di tano masinganin so kibgaya gona o
goberno, odina batano siran kaleken,
sabap sa daa bairan kibgaya gona inonta
sa kabaya o Allah (SWT).
Aya antapo kaoyagoyag tano na
masalimbtad so mga taw a mipagintaw
iran so Quran.

HAJI MUHAMMAD ABDULWAHHAB

SAHB - BAYAN 14
Aya tithowa Daie na ngkota taw a
myapokas iyan sa ginawa so bayaa
ginawa nyan.
Gwani den ko gyaa Markaz Nizamuddin
na matimo so bayadan iyan na adena
mini mosawer iyana mangolekta a taw sa
donation / funding. Kyatokawan otoo
Maulana Yusuf na somiangka skaniyan
oba pangolektaa donation. Pitharo iyan,
Ba kabaya o mga taw na mapapas
rektano so limoo Allah? Pakalanaten tano,
na sii tano phanonen so maregen tano ko
Allah, ron tano mamangni sa tabang a
mada so maregen tano.
Na myakagoraok skaniyan, ago
myakagoraok pen so phamamakineg.
Tantowa kapaka rondan ko manosiya
amay ka so maregen iyan na aya nyan
mapikir ago panarigan na so lagidiyana
manosiya. Aya patot ko manosiya na sii

makan dirondan ko Allah, na

pagangkosano Allah so maregeno taw.
So Dawah, Talim agoso Dhikr na
psabapan sa kakhailaya ko maaden ko
taw a kapasang ago kaphakaghaga.
Oba niyo ilanga so kyarasay nyo. Saden
sa diniyan okitan so mga taritib (usool)
angkaiya galbek na khaparoli nyan so di
kasosoato Allah, na phokaseno Allah
sangkaiya galbek. Na so pman so magokit
ko mga taritib iyan na, Inshaallah, na
mipthoona iyan so Nabi tano.
So lalayon kapaka aawida akalo Daie na
shabapan sa toroano mga manosiya. Na
amay ka tarimaano Allah so Dawah,
Talim agoso Dhikr iyan na pagosaren iyan
ko hidayat o pagtaw.
Sabap ko kababaloy tanowa manosiya, na
so panagontaman tano na limitado ago
adna tamana iyan. Gyotowi sabapa
lalayon tano di min duwaa a toroono Allah
so kadandano pagtaw, ago mada so

kadhadag sabap ko awidaakal ago

panagontaman tano.
Inisugo rektanoo Allah so
kapanagontaman tano sa lagido mga
Ambiya. So Musa na siyugoo Allah a
dawatan iyan so datu a tangarasi. Ogaid
na imanto na tanto tanowa ikaalek so
mga superpower imantowa masa.
Sii ko kapakapasad tano lomalakaw sa
lalan ko Allah na sii ko wafsi hidayat, na
goraokan tano a sabap ko kalobay tano
na aya psabapan sa maitowa di tano
maprarad ago di mapyaa kaptharima
odina kapzalapidaw o phoonan tanowa
darpa.
Igiraa mamboa da ma approve so visa o
mlalakaw sa lalan ko Allah na inopen oto
ka da tarimaa o Allah. Na phakalaan tano
so connection tano ko Allah.
So kibhagaken ko Sambayang na toos sa
di kapapanagotiyapa ko Sambayang. Na
so peman so sambayanga maadaon so

kapakaiiman agoso katatagoa on sa

ginawa na di tharimaano Allah.
So mga taw a ding galbek ko Dawat na
thabangan sirano Allah, na so di
managontaman sa lalan sii Rkaniyan na
sisiyapen Iyan. Gyotowi sabapa di tano
man dingan dingan so dunya, na ayatano
panarigan na sobo so Allah.
So kipangandagen ko kaped ko apya
antonaa sapako agama na di tharimaano
Allah. Na sa taw a kabaya iyana
tarimaano Allah ko panagontaman ko
agama Nyan na pakimataani nyana
myapatoton so katarimaa ono Allah.

HAJI MUHAMMAD ABDULWAHHAB

SAHB - BAYAN 15
So kapag Ikhlas na kakhaaden iyan ko
taw na misabap ko panagontaman ko

agama agoso kapromasay sa kalalakaw

sa lalan ko Allah.
Aya mandidingan dingano Maulana Yusuf
agoso Maulana Inamul Hasan na so
langona dinggalbek ko Tabligh na
mipagayon iran pyapya so mga elders.
Saden sa aya nyan masinganen na podi
ago bantogan na kapokas sangkaiya
galbek, na so peman so di manangin ka di
mangakal na di makaprarad ko mga taw.
So panagontamana ijtimai na maoyag an
masalimbtad so mga taw, sabap sa so
tarotopa agama di phaka moayan taman
sa di magagama so pagtaw. Aya ibarat
iyan na so panonombali sa ayam na amay
ka daon so kalek ko Allah na, na
pphasaan iyan so madakla taw sa haram
a sapo. Gyotowi sabapa atastanggongano
pizakatawan so kapaka panagontaman
iyan ko kapakaozoro agama.
Mlagid so matao agoso kalilida taw a
masowa iyan so panagontamano Nabi, na

di aya khakwaa kapamatiya sa da mapira

timana kitab.
So pphaganad ko agama na makasowa
mamangni ko Allah, na di langon den na
phaladen iyan ko luks iyan. Pphangdaon
iran so mga taw sa kakawita ko mga
limoo Allah, ogaid na diran ipenggolalan.
Andamanayai kakhakowaa o myakasowa
ko bantogana phoon ko Allah amay ka
aya iran mapipikir so bantogan ago
padaadat o mga taw? Saden sa ibtad
iyana ginawa nyan sa Ulama na tyagoan
iyana ginawa nyan sa awidan taman ko
kapatay nyan.
Gyaa galbeka Tabligh na knaba para bo
ko matao agoso mga ulama. Taman ko
daa sabot iyan go so daa sowa iyan na
makaphangpedon.
So kasosobra o gasto na knaba pagonga
sa kapaka dayamang angkaiya galbek.
Inonta na so kinggolalanen ko mga
suguano Allah na aya zabapan sa kapaka
dayamang angkaiya galbek.

So di mromasay sa lalan ko Allah na mga

banto o Allah ago banto o Nabi. Gyotowi
ontonga malaa gyotowi mapyaa masa a
ditano Ron kaphanona ko mga reregen
tano.
So Allah na pagalinen iyan so betad
misabap ko duwaa. Na aya khatarima
sangkaiya galbeko Nabi na so mga taw a
kabaya iyana masowa iyan ago
ipenggolalan iyan so galbeko Nabi, na
khaaden on so awidaakal ko pagtaw.
So interowa Ummat na maka iibarat ko
interowa lawas. Amay ka adena muslim a
mbaradosa ko isaa inged, na so marataa
rarad iyan na makaprarad ko langona
muslim.
So Islam na inisugo iyan so kasapngi o
muslim ko karibatano pagari nyana
muslim, ago inisaparo agama tano so
kipayagen ko mga karataano pagari
tanowa muslim. Ogaid na so Allah na
ipagiza iyan ko taw ay tamana

panagontaman iyan ko kitarego mga

rarata.
Gyotowi pakalaan tano so mga dhikr tano,
goso Istighfar, Salawat ko Nabi ago
duwaa.
Amay ka tarimaano Allah so taw
sangkaiya galbeka dawat na phaki
sabotanono Allah ngkaiya galbek agoso
mga taritib (usool) iyan, na mbgan Iyan
sa bhabaya ko di kinggolalanen ko mga
amal.
So pphaganad sa agama na paganada
nyan so Quran ago Ahadith, sa aya niat
iyanon na maaden on so bhabaya ko Allah
agoso Nabi Nyan.
So Allah na mbgan Iyan sa sindaw (nur)
ko mga puso iran so mabhabaya
mamakineg pyapya ko mga osayan ko
agama, na mbgan Iyan siran sa mga
pipiya lagido kinggolalanen ko mga
pipiyaa amal.

So taw na taralbiron so lalayon iyan

kaphanambhayang sa Salat Hajjat, ago
lalayon iyan pki nduwaa a maaden on so
bhabaya ko Nabi, sabap sa ayaboa
kakhaaden rektanoo mga Sunnah o Nabi
na maaden rektano so bhabaya sii
rkaniyan.
So galbeka Dawat na matag sagintas ko
tarotopa kapagagama, a kapapadalman
sa katago rektanoo kathomangked ko
tithowa paratyaa ko Allah, kapagintawa
Islam golalan ko Sunnah o Nabi, simba,
kapyaa kandodolona, kapakiphapasada
ago mapyaa parangay.

HAJI MUHAMMAD ABDULWAHHAB

SAHB - BAYAN 16
So bhabaya ko dunya na tanto den ko
makadadayamanga paniyakit sa apyapen
so sabaad ko katawi tanoron na mga alai
paratyaya agoso mga baraamal na
maapedon.

So panagontaman ko kaadeno tithowa

Iman (paratyaya) ago Yaqin (sarig) na
khalimpiyo nyan so puso, na so peman so
kandarainon na dion khatago so tithowa
Iman ago Yaqin.
So puso na kailangan dena madaon so
bhabaya ko dunya sabap sa daa baniyan
khibgaya mapya ko manosiya. Apyaso so
mga Malaikat na daa bairan
kaphakaghaga oba iran kabgi sa mapya
antaa ka marata so manosiya inonta na
sa kabayao Allah. Skaniyamboi
Makaphapaar, na gyotowi sabapa aya
tano panarigan na sobo so Allah.
So mga Ambiya na aya kyasugoa kiran na
an makatiyolin so sarigo taw ko Allah
phoon ko sarig ko makhluq (kaaden),
sabap sa amay ka di makatiyolin na
matatago so taw ko peligro ago
kabinasaan.
Mataan a so mga taw a aya iran
pananarigan na so Allah a diran mapen

dingan dingan so tabango makhluq na

tanto mo maitoi bilangan.
So mga taw a mananagontaman ko
agama na thabangano Allah a makatiyolin
so Yaqin iran, na sadn sa phagoman sa
panagontaman na phagoman omanano
Allah so Yaqin iyan.
So mga Muslim na makathatalogdam
sabap sa inibhaba irana ginawa iran ko
pangilay layan kirano Allah. Gyotoi
sabapa di tano kapamagogopa golalan ko
mga duwaa tanoa makambhalingan so
kala irani pangkatan sa pangilaylayano
Allah.
Aya paganayrona panagontaman na
makatiyolin so Yaqin o mga taw ko mga
puso iran. Kailangan den ko pizakatawan
na makatiyolin so Yaqin iyan na tarosa
iawida akal iyan so pamilya nyana
matago kiran mambo so tithowa Yaqin.
So mga Sahabah na siyoti ran so mga
puso iran, sa kyasabapan sa mimbaloy

sirana inikhakalko mga alaa empire sa

dunya.
Ogaid na sektano na so Yaqin na sii bo
matataman ko mga dila tano, matao tano
mamagosay ko kalao Allah ogaid na so
puso tano na di mangingimbnar.
Gyoto sabapa pakandakelen tano so
kapphamagosaya ko kala o Allah an
mabaloy so mga puso tano, so pamikiran
tano agoso niyawa tano na maka
pangimbnar ago maka paratyaya. Saden
sa minggolalan iyan angkaiya
kazalimbtad na khaparoli nyan so
manaros a tabango Allah (SWT).

HAJI MUHAMMAD ABDULWAHHAB

SAHB - BAYAN 17
So kanggalbka ko Tabligh na dowaa kalai
iyani kipantag. Paganayron na, an
maoyag so agama. Ikadowa na, an

makamomoayan so agama sa diniyan

kadarodos.
Aya kakhatarima o Allah ko taw sangkaiya
galbeka Tabligh na depende ko
panagontaman iyan ko agama. Amay ka
so panagontaman iyan na ndedepekto, na
so kakhatarima iyan na kokhorang.
Aya kabaya rektanoo Allah na masongkad
tano so kya panagontamano Nabi tano an
maoyag so agama. Andadni kandarainon
tano na magonga sa kakhadarodos o
agama. Na antonai khasowa amay ka
ditano songkaden so Nabi tano? Gyotowi
kaphananayani tano ko Nabi tano.
So mapayaga kaoyagoyago taw a ding
galbek ko agama na diniyan masopak so
kaoyagoyago Nabi tano.
Imanto na, so pitibarangana sosonan ko
kapagintaw na aya phangingiringanano
mga taw na so mga olowan iran. Ibarat,
na so mga businessman, na aya iran
sosonoden na so mga alaa businessman.
Aya mamboa myasowa sa lagidayaa

pamikiran na myabinasa nyan so kaiisa

isa o ummat.
So myakatondog ko mga Sahabah a
siyongkad iran so mga Sahabah na lagido
bairan minipagintaw so kapyaa
kaoyagoyag ko masa o Nabi. Na amay
mambo ka managontaman tano sa
kaoyag iyan, na miphagintaw tano
mambo so mapyaa kaoyagoyag ko masa
o Nabi tano.
Malbod so kipzagdaan tano ko mga taw a
maada ko toroano agama, ogaid na aya
maregen na so kanggonanaowa ko mga
taw ko toroan ko agama. Gyotowi lalayon
so ditano kan duwaa a tabangan tanoo
Allah.
So tithowa bantogan na phoon ko Allah na
imbgay nyan ko mga taw a kabaya Iyan.
Saden sa aya nyan masinganin na so di
tatap a bantogan sangkaiya dunya na
mapembagian iyan ogaid na dibo khatay,
na khatago skaniyan ko kapaka dapanas.

Gyotowi lalayon tano kaphag checka ko

mga ginawa tano. Ago saden sa aya nyan
on kapipikira na mala skaniyani bantogan
na diniyan khaparoli angkota tabango
Allah.
Aden otowa mga taw a pinggasto nyanon
so oras iyan goso so tamok iyan ko
agama, ogaid na diniyan khaparoli
angkota tithowa bantogan a phoon ko
Allah, sabap sa salakawa niyat iyan.
Gyotowi ditano masinganin so dunya ko
ditano kang galbeka ko Tabligh, ago
ditano masinganin so bantogan sangkaiya
dunya ago ditano maakalo mga bayaa
ginawa tano. Adena mga taw a maaped
sangkaiya galbek ogaid na aya iran
pakauunan so mga kabayaa ginawa iran
adiso kailangano agama agoso kapya
angkaiya galbek.
So mga taw a aya nyan pakauunaan so
kapya o Ummat na sirani saliyanti o Nabi
tano, na sirani shabapan ko kaiisaisa
agoso kakhada o marata. Siran so pinili o

Allah na totoroon Iyan siran ko diran king

golalanen ko mga atastanggongan iran.
So mga taw a lalayon iyan din duwaa a
manggalbeko mga taw angkaiya galbeka
Tabligh na makapembagian ko balaso
mga taw a minggalbekon.
So peman so bantogan sangkaiya dunya
a masisinganin iyan na daa bagian iyan
sa alongana mawri. So mga Sahabah na
kyambiatan kiran na phananggilaan iran
so kasangan sa galbek, na aya bebetadan
iran sa ginawa iran na disiranon
kapapatotan.
So mga taw a myalimpiyo nyana nafso
nyan ko bayaa ginawa na aya
kapapatotan ko atastanggongan. So mga
taw a kapipikira nyan sa ginawa nyan na
malai kipantag ago malai darajat na
andamanayai mipagawa iyan, nago
pananggilaan tano oba pkharinayag
angkota taw. So bayaa ginawa na phaka
binasa ko taw, na aya lawan roo na so
taw a amay ka phatay na katokawan

iyana daniyan kapakaapas. Gyotowi

ditano pangontaremen so bhabaya ko
tamok, kadatu ago bantogan.
Gyotowi lalayon tano pphangnin ko Allah
a matago rektano so gagta rarebo Nabi
(SAW) ko katoroo pagtaw. Nago ioman
tanoron pna pphangnin tano so hidayat o
pagtaw, agoso mga taw a myapatoton so
siksa o Allah na mambagian iran pen so
toroan.
So paitaw o hidayat na khalkaan ko taw a
tithowa myangalimbhabaan ko Allah
(SWT).