LAWISWIS KAWAYAN

Ako magtatanom lawiswis kawayan

Akon la kan pikoy palataylatayan
Salbahis nga pikoy ka-waray batasan
Sinulod ha kwarto, kan inday higdaan.
An panyo, an panyo nga may sigarilyo,
Ginpiksi ni Inday kay may sentimiento
An nasisinahan, an nabi- an nabibidu-an
Tungod la han gugma nga waray katuman
 BALUD

Mga balud
Nagpapasibo ha kadagatan
Kakuri gud mahidakpan
Inin balud
Ha baras napulilid
Kon diri hira nag-iisog
Hay Intoy,
Kamakuri mo pagdad-on
Baga-baga ka gud la
Hinin balud
Kon nasisina nalakat ka
Mag-uusahan ako, tabi.

Kay ano nga ginbaya-an mo ako?

Waray na balud inin lawod ko
Hain na an mga haplas mo?
Nailiw na an baras ngan bato

Bisan la
Danay di nagkaka-asya
Sugad han langit ug tuna
Kon an gugma
Nga marig-on o masarig
Di mapapara hin balud.

Kay ano nga ginbaya-an mo ako?

Waray na balud inin lawod ko
Hain na an mga haplas mo?
Nailiw na an baras ngan bato

Balik na kamahidlaw na ha imo

Waray na balud hinin lawod ko
Hain na an mga haplas mo?
Nailiw na an baras ngan bato

Hain na an mga haplas mo?

Nailiw na an kasingkasing ko
 LUBI LUBI
Lubi-lubi lubi, lubi lingkuranay
Ayaw gad pagsak-i, kay hibubo-ay.
Ayaw gad pagsak-i,
Lubi-lubi
Kon maruruyag ka kumaon hin silot
Didto la nga didto la
Kan Nanay nga didto la.
Kan Tatay nga didto la, pakigsabot.
Agidaw-gidaw an bukaw
Naglupad-lupad ha igbaw
Agidaw-gidaw an gitgit
Naglupad-lupad ha langit
Agidaw-gidaw an bukaw
Naglupad-lupad ha igbaw
Agidaw-gidaw an gitgit
Linmupad ha langit
Enero, Pebrero, Marso, Abril, Mayo,
Hunyo, Hulyo, Agosto,
Setyembre, Oktubre,
Nobyembre, Desyembre,
Lubi-lubi.