KONTRA-GAPI

PANGKAT PARA SA KONTEMPORARYONG ETNIKONG MUSIKA AT SAYAW NG PILIPINAS

Ang Kontemporaryong Gamelan Pilipino (Kontra-Gapi) ay itinatag noong 1989 ni

Propesor Pedro Edru Abraham Jr., isang dalubguro ng Art Studies sa Kolehiyo ng Arte at
Literatura (KAL), Unibersidad ng Pilipinas Diliman, upang mangalap ng inspirasyon mula sa
malawak at mayabong na kultura ng mga pangkat-etniko sa Pilipinas at ibat-ibang bansa sa
Timog-Silangang Asya. Ang layunin ng grupo ay itanghal ang kulturang sariling atin sa buong
bansa at sa buong mundo, sa pamamagitan ng pagtatanghal ng mga piyesang orihinal, sayaw
na hinango sa mula sa ibat-ibang pangkat etniko sa Pilipinas, at mga awiting pawang
pagsulong sa pagmamahal sa ating sintang bayan at sa kalikasan ang nais isabuhay.

Nagsilibing tahanan ng Kontra-Gapi ang Kolehiyo ng Arte at Literatura at saksi ito sa

pagniningas nito mula sa kawalan hanggang sa pagbubuo nito ng legasiya sa buong
unibersidad, at sa bansa. Ginawaran ng dating dekano ng kolehiyo ang grupo bilang
residenteng magtatanghal sa pangkat-etnikong musika at sayaw noong 1993. Bilang pagkilala
sa mithiin at kapuri-puring ambag sa kultura, ang Kontra-Gapi ay ginawaran noong taong 1996
ng UPD Chancellors Plaque of Outstanding Achievement in Arts sa kategorya ng sining
pagtatanghal. At nakilala ang grupo bilang International Ambassador for Culture, Arts and
Goodwill. Noong Pebrero 2016, kinilala ng Komisyon ng Karapatang-Pangtao (CHR) bilang
artist-in-residence ang Kontra-Gapi upang maging katuwang ng kagawaran sa pagsulong ng
karapatang-pantao at paglilingkod sa sambayanan. At nito lamang Hunyo sa parehong taon,
ginawaran ang Kontra-Gapi ng UPD Honorific Award for Student Performing Arts Group
(HASPAG) upang magsilbing pagkilala ng unibersidad sa mga natatanging grupo ng aktibong
mga mag-aaral na ginagamit ang talento upang mapayabong ang ating kultura at sining.

Sa nagdaang 26 taon, naikot na ng Kontra-Gapi ang Pilipinas at ilang banyagang lupain

upang itanghal ang namumukod-tanging sining. Tunay ngang hindi matatawaran ang dangal at
husay ng Kontra-GaPi. Sa katunayan, nitong nakaraang Hulyo 22-24 ay tumungo ang piling
mga miyembro na kumatawan sa Pilipinas sa ginanap na 21st Yogyakarta Gamelan Festival
2016 sa Yogyakarta, Indonesia.

Ang musika ay sayaw na naririnig at ang sayaw ay musikang nakikita, iyan ang mga
katagang madalas mong maririnig kapag kami'y nagtatanghal. Siyang tunay, masagana at
mayabong ang ating sining at kultura. Sa panahong kontemporaryo kung saan lahat ng bagay
ay sumasabay sa alon ng teknolohiya at pagbabago, hindi natin maiaalis ang naka-ukit sa ating
kulturang parang apoy na naghihintay lamang sumiklabo upang lumiwanag na muli.