PAHIRAM

Ni Suprema Lex

Mahal, Kumusta ka?

Kakamustahin kita kahit alam kong ito'y isang malaking katangahan dahil alam kong masaya ka na
Alam kong masaya ka na sa piling ng iba
Habang ako'y patuloy sa pananariwa sa mga ala-ala
Paulit-ulit pinaniniwala ang sarili na akin ka
Paulit-ulit na pinagsisiksikang may pag-asa pa
Dahil hindi ko kayang bitawan ang mga bagay na sa akin ay nagpapasaya
Mali pala
Dahil ako'y walang kakayahan
Walang kakayahang bitawan ang isang bagay na ni minsa'y di ko nahawakan
Heto nanaman ako, nagsisisi, nanghihinayang
Sa mga panahong minahal mo ako ngunit ika'y binalewala
Sa mga pagkakataong pwede kitang mahalin ngunit di ko ginawa
Bakit kaya?
Bakit mas pinili kong pairalin ang katangahan?
Bakit ko hinayaang magpatuloy sa pagtakbo ang mga kamay ng orasan?
Mahal, pasensya na kung noo'y paulit ulit kitang itinaboy at sinaktan
Kung paulit ulit kitang pinagtulak-tulakan
Pasensya na kung makailang ulit kang natisod sa kakahabol
Pasensya na kung hinayaan kong malanta ang pag-ibig mong namukadkad at sumibol
Pasensya na kung lahat ng bagay ay ngayon ko lang napagtanto
Sadyang bilog ang mundo
Mga biro ng tadhana'y di nakakatawa
Dahil ngayo'y mahal na kita
Ngunit ayaw mo na
Tuluyan ka nang sumuko, bumitaw, lumisan nang di man lang nagpaalam
Kaya kahit isang oras, minuto, o kahit ilang segundo lang ay nais ko sanang humiram
Pakiusap, mahal, kahit isang saglit lang
Isang saglit lang at di na ako muli pang magpaparamdam
Dahil ngayon ko lang nabigyan ng pagkakataong dinggin ang mga tinig
Ang mga sigaw ng puso kong noo'y ayaw kong marinig
Isang saglit lang at di na ako muli pang magpaparamdam
Dahil ngayon ko lang nagawang palayain ang pakiramdam na noo'y ayaw kong maramdaman
Ngayon ko lang naintindihan
Ngayon ko lang lubusang nauunawaan kung gaano ka kahalaga
Ngayon lang kung kailan pag-aari ka na ng iba
Kailan kaya?
Kailan muling mabibigyan ng pagkakataon ang "Ikaw" at "Ako"?
Kailang nga ba magtatagpo ang tamang panahon at tamang tao?
Kailan pa?
Kailan pa ba kung sa ngayo'y masaya ka na sa kanya?
Kaya pahiram muna
Sa kanya'y hihiramin muna kita.
Masyadong magulo
Di ko maintindihan , masyadong nakatutuliro
Kaya kahit masyadong makasarili
Wala akong pake
Kung nagbago na ba ang iyong pakiramdam
Kaya pahiram
Pahiram ng mga oras na noo'y hindi ko naibigay
Pahiram ng isang saglit upang mabigyan ng pagkakataong mahawakan ang iyong kamay
Maaari pang ipinta natin muli ang papel natin sa mundo
Maaari pa tayong bumuo ng sarili nating kwento
Bigyan natin ng pagkakataon ang mga pusong nagpupumiglas
Upang pareho tayong lumaya at makaalpas
Ako lang pala
Ako lang pala ang nasa likod ng mga rehas
Ako lang pala ang bilanggo ng nakaraan at nais makatakas
Dahil ikaw, may iba ka nang mahal
Sa ating dalawa, ako lang pala ang nag-iisang hangal
Hindi ka pala papayag kung sasabihing kong pahiram
Dahil hindi mo sya kayang iwan at saktan
Kagaya ng ginawa ko sayo
Na ngayo'y pinagsisisihan ko
Ngunit kung ipahihintulot ng panaho'y nais kitang mahalin
Paulit-ulit kong hihilingin sa mga bituin
At kapag tama na ang panahon, hanapin mo ako
Dahil alam kong ikaw ang tamang tao
Mahabang landas lang ang lalakbayin
Ngunit umaasang sa bandang huli tayo'y pagtatagpuin
Hindi na kailangan pang magpaalam
Hihintayin ko ang panahong iyon na hindi ko na kailangan pang manghiram.