1

San Seng Ai sak Hkrung Lam

(Mahte 5:8; I Petre 1:15)
Ga Hpaw
San seng ai ngu ai gaw, lama ma hte gayau mat ai (sh) aka mat ai lam n nga ai (sh) awu
asin re ai lam n nga ai (sh) jet jet re ai hpe tsun ai re.Chyum Laika hta san seng ai ngu ai hpe
chyoi pra ai (sh) Karai sharawng awng ai hku asak hkrung ai ngu ai lam hte shingdaw nna tsun
shaga ai hpe mu lu ga ai. Dai hpe tsun shaga ai, myit mang ai, galaw gun hpai ai, lu sha ai, nse
nsa lam n hkan ai, kyang shingni kaja ai, mara n kap ai, chyoi pra hkra shakut asak hkrung ai ngu
ai (II Kor 7:1) shadawn gyitna ni hte madi madun nna tsun shaga ai re. Karai masa lachyum
madung gaw, masha (sh) arung arai gaw yu maya lam ni kaw na lak san ginhka nna Karai
Kasang a man hta ap nawng da ai (sh) Karai a hpung shingkang dan hkung lam a matu jai lang ai
hpe tsun ai lam rai nga ai.

(A) K.K a matu ginhka da ai masa lam: K.K gaw yubak mara nlu ai, arawn alai hta ra rawng ai
lam n nga hkra hkum tsup ai majaw, chyoi pra san seng ai wa re. Chyum laika hta, makam
masham hte seng ai tara hku jasan jaseng shangun ai lam gaw, Karai Kasang a man hta san seng
hkra nga ra ai hpe madun ai re (Jaw jau 11; 19:11-13). Karai Kasang laban nhtoi hte kaga makam
masham hte seng ai nhtoi ni hpe shachyoi shapra shangun ai gaw, kaga nhtoi ni hte n bung ai hku
ginhka nna masat chye let manu shadan shangun ai lam re/sadi sahka let jahkik jahkam shangun
ai la re (Pru. 31:15; Jaw. Jau 23:4,21,24). Israela hpe chyoi pra san seng ai ngu tsun ai shaloi
mung, K.K hte seng ai, kaga makam masham kam sham ai makau grup yin masha ni a arawn alai
shingni n hkan ai sha, kaga hpara shaje n naw ai, K.K sharawng awng ai hku kam sham myit hte
madat mara asak hkrung ai lam hpe tsun ai lam re (Pru 19:6;Tara.j 7:6).
Ga shaka dingsa hta Hkinjawng ni gaw yu maya mungkan masha ni hte nbung ai hku, lak san
K.K a man hta ap nawng da nna K.K a matu daw jau ai ni re majaw, san seng chyoi pra ai ngu
tsun ai rai nga ai (J.J 21:6-8). Shanhte gaw, nawku htung shadik ai hku galaw ai san seng chyoi
pra lam (Pru 29:1f), arawn alai san seng chyoi pra dinghpring lam (Pru 19:2; Sh.K 15:1ff; Esaia
57:15), n kaja ai lam baw sumhpa hpe koi gam ai ( I Hte 5:23) lam ni hpe shadik ra ma ai.

B) Myit masin san seng ra ai: Myit san seng ai ni gaw a lu ma ai: kaning rai nme law shanhte
gaw K.K hpe mu lu na mara ai (Mt 5:8). Myit sawn/mang/hkam sha hkam la ai myit masin san
seng ra ai. Shinggan shingni hku nawku htung tara sha shadik nna myit masin n san seng ai
Hparishe ni, hkingjawng ni, laika ka sara ni hpe Yesu daru ai re (Mahte 23). Masha a myit kata
de nna, n kaja ai myit mang ai, num shut hpyit na, lagu na, n hkru n hkra ai, hkalem ai, ngang ai,
manawn masham ai, shatan nhkan ai, gumrawng ai hte angawk angak re ai myit, pru wa ai. Dai n
hkru ai lam nlang hte gaw kata de nnna pru wa ai rai nna, masha hpe awu asin di kau wu ai (
Marku 7:21-23). Myit san seng na matu (1) Myit mang/sawn ai lam ahkyak ai hpe ayan dum ra
ai. (2) Tinang hkum galoi mung san jep yu nga ra ai (3) tinang hkawm sa asak hkrung ai makau
grup yin hpe sadi maja ra ai. (4) san seng ai myit masin lu la mayu ai myit rawng ra ai (5) Chyoi
pra ai Wenyi a bau sin makawp maga lam lu la na matu ayan akyu hpyi ra ai.

©Arawn alai san seng ai masa lam: Arawn alai san seng ai ngu ai gaw, yu maya re ai lam hta
grau hkrak ai, grau hkum tsup ai ngu ai hpe tsun ai re. Ga shaka dingsa prat na Myihtoi ni gaw,
nawku htung shadik ai hku nna san seng chyoi pra shakut ai hta shani shagu Karai a man hta
arawn alai kaja hte asak hkrung ai lam hpe she san seng chyoi pra lam re ngu madung dat tsun
sharin ma ai (Esaia 58:13-14; Amos 2:7). Hkungga jaw ai wa tinang a asak hkrung lam san seng
 2

ra ai. Dai hpe "Tinang hkum hpe kashin kau mu; tinang dai jasan jaseng mu; nanhte a n hkru ai
amu hpe, nye a man kaw na yeng seng kau mu; n shawp ai arawn alai kau da mu. Kaja ai amu
galaw na sharin la mu; ding hpring ai hpe hkan shachyut mu; nni nkri hkrum ai ni hpe karum mu;
chyahkrai ma ni a matu teng man ai hku jeyang mu; gai da gaina ni hpe tau mu ( Esia 1:11-17)"
ngu sharin da nga ai.. Ga shaka ningnan hta mung sanseng chyoi pra ai K.K a shingni maka ni
hpe kam sham ai ni a asak hkrung lam hta myit masa arawn alai hku shadan shadawng nga ra ai
lam tsun sharin da nga ai ( Mk 6:20; Eph. 1:4; 5:27; I Thes 4:7; Titu 1:8; Heb 12:10,14). Chyoi
pra ai Wenyi a chyeju hte, myit masin kata kaw nna nan galai shai nna, tinang a tigyeng ni hpe
ndang kau let K.K sharawng awng ai hku asak hkrung ai lam hpe tsun ai rai nga ai (I kor 7:14;
Rom 15:16; II Htesa 2:13; I Pet 1:2; Korlo 1:10).

(D) Yesu a marang e chyu sha lu la mai ai: Shinggyim masha gaw, K.K a man hta san seng
chyoi pra lam hpe tinang hkrai shakut nna n lu la mai ai.Yawng yubak galaw ma ai hte, K.K a
arawng sadang hpe dumhprut kau nna, jahpu n ya ai sha, shi a chyeju hte, Yesu Hkristu a
htingrai htingrat ya ai a gawp e, ding hpring ai gaw du lu na ma ai ( Rom 3:23-24). Nanhte gaw
anhte a Madu Yesu Hkristu a mying ningsang hte, anhte a K.K a Wenyi e kashin kamun kau ai
mung, shachyoi shapra ai mung, ding hpring ngu ai mung, hkam la manit dai (I Kor 6:11).
Yubak a mayam n tai sai, K.K a ali ama ni tai sai majaw, chyoi pra hkam na akyu lu la ai ni re
(Rom 6:8-11; 19-22). Yesu hta rai nga yang asak hkrung lam ting gaw san seng wa ai re.

(E) Karai Masa Ningmu: Chyoi pra san seng ai ngu ai gaw, K.K a matu ngu nna san da ai (sh)
K.K a amying ningsang hpung shingkang shadan jahkung nga ai masa hpe tsun ai re (I Yawhan
1:5). Dai gaw Yesu Hkristu hpe kam sham ai marang e lu la ai asak hkrung lam nnan hte magam
lit nnan ngu ai tsaw ra myit hta npawt de ai sak hkung masa hpe tsun ai re. Hkristu hta ru jung
nna gaw da ai a marang e lu la wa ai sak hkrung lam re. Tsawra ai myit hte teng man ai ga tsun
nga yang Hkristu ngu ai baw hte lam shagu hta kaba rawt wa ai asak hkrung lam re (Ehp 4:15).
Dai majaw san seng ai ngu ai gaw, san san ginhka da ai lam hpe sha tsun ai n re. Tinggyeng matu
sha asak hkrung ai kaw nna, tsawra myit hte masha ni a matu asak hkrung ai/daw jau ma hku
K.K a mungdan a matu sak hkrung ai lam re. Yesu dai hku hkrung lai wa ai re. Dai she chyoi pra
san seng ai ngu ai re. Lamu tang hta K.K myit dik ai zawn ga ntsa e dik lit ga law ngu nna daw
jau ai lam re. Kaji htum ai ni hpe daw jau ai lam gaw Yesu hpe daw jau ai re (Mt 25:40).
Mungkan kaw na hprawng mat wa, makoi mat wa, yen mat wa ai lam n re. Mungkan hpe tsaw ra
myit hte daw jau ai de shanang sa wa ai asak hkrung lam hpe tsun ai re.

Ga Hpungdim
Dai rai nna, san seng ai asak hkrung lam ngu ai gaw, shingra maka ningnan hta asak
hkrung ai lam re. Yesu hpe tinang a hkye la madu hku hkap la kam sham ai lam rai n nga shi ai
aten na sak hkrung maka hte shai ai, Yesu gaw gap ya nga ai sak hkrung maka hta madat mara
gaw gap nga ai sak hkrung maka re.Lawu de na lam ni hpe shangang shakang gaw gap sa mat wa
ra ai.

Ginlen shalai ai – Rev. Dr. Lahpai Awng Li (MIT, Insein).